Lentsoe la Jehova Lea Phela
Lintlha-khōlō Tsa Lengolo la Jakobo le Mangolo a Petrose
HOO e ka bang lilemo tse 30 ka mor’a Pentekonta ea 33 C.E., morutuoa Jakobo—e leng mor’abo Jesu ka ’m’a bona—o ngolla “meloko e leshome le metso e ’meli” ea Iseraele ea moea lengolo. (Jak. 1:1) Sepheo sa hae ke ho e khothatsa hore e be matla tumelong le hore e mamelle ha e thulana le liteko. O boetse o fana ka keletso ea hore ho lokisoe maemo a tšoenyang a hlahileng ka liphuthehong.
Nakoana pele ho letšolo la Moemphera Nero oa Roma la mahloriso ka 64 C.E., moapostola Petrose o ngola lengolo la hae la pele le eang ho Bakreste, a ba khothalletsa hore ba eme ba tiile tumelong. Lengolong la hae la bobeli leo a le ngotseng kapele ka mor’a la pele, Petrose o khothalletsa balumeli-’moho le eena hore ba ele hloko lentsoe la Molimo ebile o ba lemosa ka ho tla ha letsatsi la Jehova. Ka sebele, re ka rua molemo ha re ela hloko melaetsa ea lengolo la Jakobo le mangolo a Petrose.—Baheb. 4:12.
MOLIMO O FANA KA BOHLALE HO BA ‘KŌPANG KA TUMELO’
Jakobo oa ngola o re: “Ho thaba motho ea ntseng a tsoela pele ho mamella teko, hobane ha e e-ba ea amohelehang o tla amohela moqhaka oa bophelo.” Ba ‘ntseng ba kōpa ka tumelo,’ Jehova o ba fa bohlale bo hlokahalang hore ba mamelle liteko.—Jak. 1:5-8, 12.
Bao ‘e bang mesuoe’ ka phuthehong ba boetse ba hloka tumelo le bohlale. Ka mor’a ho bolela hore leleme ke “setho se senyenyane” se ka ‘silafatsang ’mele oohle,’ Jakobo o lemosa ka mekhoa ea lefatše e ka senyang kamano ea motho le Molimo. O boetse o thathamisa mehato eo mang kapa mang ea kulang moeeng a lokelang ho e nka e le hore a fole.—Jak. 3:1, 5, 6; 5:14, 15.
Lipotso Tsa Mangolo Lia Arajoa:
2:13—“Mohau o thaba ka ho fetisisa ka tlhōlo ho feta kahlolo” ka tsela efe? Ha re lokela ho ikarabella ho Molimo, o hopola mohau oo re o bontšitseng ba bang ’me o re tšoarela a ipapisitse le sehlabelo sa Mora oa hae. (Bar. 14:12) Na lee ha se lebaka le leng la hore re be batho ba laoloang ke mohau bophelong ba rōna?
4:5—Jakobo o qotsa lengolo lefe moo? Jakobo ha a qotse temana e itseng ka ho khetheha. Leha ho le joalo, ho ka etsahala hore ebe mantsoe ana a bululetsoeng ke Molimo, a thehiloe mohopolong oa mangolo a kang Genese 6:5; 8:21; Liproverbia 21:10; le Bagalata 5:17.
5:20—“Ea khutlisang moetsalibe phosong ea tsela ea hae” o tla pholosa moea oa mang lefung? Mokreste ea khutlisang mofosi tseleng ea boetsalibe, o pholosa moea oa motho ea bakileng hore o se ke oa shoa lefu la moea ’me mohlomong a ka ba a mo pholosa le timetsong ea ka ho sa feleng. Motho ea thusang moetsalibe ka tsela ena, o tla boela a ‘koahele libe tse ngata haholo tsa motho eo.’
Seo re Ithutang Sona:
1:14, 15. Sebe se tsoaloa ke takatso e fosahetseng. Ka lebaka leo, ha rea lokela ho lula re nahana ka litakatso tse fosahetseng. Ho e-na le hoo, re lokela ho ‘tsoela pele ho nahana’ ka lintho tse hahang le ho tlatsa likelello tsa rōna le lipelo tsa rōna ka tsona.—Bafil. 4:8.
2:8, 9. “Ho bontša leeme” ha ho lumellane le “molao oa borena” oa lerato. Kahoo, Bakreste ba ’nete ha ba bontše leeme.
2:14-26. Re “pholositsoe ka tumelo,” eseng “ka lebaka la mesebetsi” ea Molao oa Moshe kapa eo re e etsang re le Bakreste. Tumelo ea rōna ha ea lokela ho ba ea molomo feela. (Baef. 2:8, 9; Joh. 3:16) E lokela ho re susumelletsa hore re etse lintho tumellanong le thato ea Molimo.
3:13-17. Ka sebele “bohlale bo tsoang holimo” bo phahame ho feta bohlale “ba lefatše, ba bophoofolo [le] ba bodemona”! Re lokela hore re ‘’ne re batle bohlale ba Molimo joaloka matlotlo a patiloeng.’—Liprov. 2:1-5.
3:18, Bibele—Phetolelo e Ncha. Peō ea litaba tse molemo tsa ’Muso e lokela ho “jaloa ka khotso ke ba etsang khotso.” Ke habohlokoa hore re be batho ba bōpang khotso re se ke ra ba baikakasi, ba ratang likhang kapa ba morusu.
‘EMANG LE TIILE TUMELONG’
Petrose o hopotsa balumeli-’moho le eena ka ‘tšepo e phelang’ ea bona ea lefa la leholimong. O re ho bona: “Le ‘morabe o khethiloeng, baprista ba marena, sechaba se halalelang.’” Ka mor’a ho fana ka keletso e tobileng mabapi le boikokobetso, o ba eletsa kaofela hore ba ‘be le kelello e joalo, ba bontše ho utloelana bohloko, ba e-na le boikutlo bo mofuthu ba bara ba motho, ba e-na le qenehelo e bonolo, ba ikokobelitse kelellong.’—1 Pet. 1:3, 4; 2:9; 3:8.
Kaha ‘bofelo ba [tsamaiso ea Sejuda ea] lintho bo atametse,’ Petrose o eletsa barab’abo hore ba ‘hlaphoheloe likelellong, ’me ba falimehe mabapi le lithapelo.’ O re ho bona: “Lulang le hlaphohetsoe likelellong, le lebele. . . . Emang khahlanong le [Satane], le tiile tumelong.”—1 Pet. 4:7; 5:8, 9.
Lipotso Tsa Mangolo Lia Arajoa:
3:20-22—Kolobetso e re pholosa joang? Kolobetso ke tlamo ho ba batlang ho pholosoa. Leha ho le joalo, kolobetso ka boeona ha e re pholose. Ha e le hantle re pholosoa “ka tsoho ea Jesu Kreste.” Motho ea kolobetsoang o lokela ho lumela hore a ka pholosoa feela hobane Jesu a ile a shoa lefu la sehlabelo, a tsosoa a ba a ba “ka letsohong le letona la Molimo,” a e-na le matla holim’a ba phelang le ba shoeleng. Kolobetso e thehiloeng tumelong e joalo, e tšoana le ha ‘meea e robeli e ne e pholosoa e sireletsehile metsing.’
4:6—“Bafu” ba neng ba ‘bolelloa litaba tse molemo’ ke bafe? Bana ke batho ba neng ba “shoele litšitong le libeng tsa [bona],” kapa ba neng ba shoele moeeng, pele ba utloa litaba tse molemo. (Baef. 2:1) Leha ho le joalo, ha ba se ba lumetse litaba tse molemo, ba ile ba qala ho ‘phela’ moeeng.
Seo re Ithutang Sona:
1:7. E le hore tumelo ea rōna e be ea bohlokoa bo boholo, e lokela hore e be eo boleng ba eona bo lekiloeng. Tumelo e matla joalo e hlile e ‘boloka moea o phela.’ (Baheb. 10:39) Ha rea lokela ho ikhula litekong tsa tumelo ea rōna.
1:10-12. Mangeloi a ile a lakatsa ho nyarela le ho utloisisa linnete tse tebileng tsa moea tseo baprofeta ba Molimo ba boholo-holo ba ileng ba li ngola mabapi le phutheho ea Bakreste ba tlotsitsoeng. Leha ho le joalo, ha Jehova a ne a qala ho sebetsa ka phutheho, ke hona feela moo lintho tsena li ileng tsa hlaka. (Baef. 3:10) Na ha rea lokela ho latela mohlala oa mangeloi ebe re loanela ho batla ka hare ho “lintho tse tebileng tsa Molimo”?—1 Bakor. 2:10.
2:21. Re lokela ho etsisa ’Mehi-mohlala oa rōna Jesu Kreste ka hore re ikemisetse ho utloa bohloko esita le ho isa lefung e le hore re emele bobusi ba Jehova.
5:6, 7. Ha re lahlela matšoenyeho a rōna ho Jehova, o re thusa hore re etelletse pele borapeli ba ’nete bophelong ba rōna ho e-na le ho tšoenyeha ho tlōla ka hore na ho ka ’na ha etsahala eng letsatsing le hlahlamang.—Mat. 6:33, 34.
“LETSATSI LA JEHOVA LE TLA TLA”
Petrose oa ngola o re: “Ha ho nako eo ka eona boprofeta bo ileng ba tlisoa ke thato ea motho, empa batho ba ile ba bua ho tsoa ho Molimo ha ba ntse ba khannoa ke moea o halalelang.” Ho ela hloko lentsoe la boprofeta ho ka re sireletsa ‘mesuoeng ea bohata’ le bathong ba bang ba silafatsang.—2 Pet. 1:21; 2:1-3.
Petrose o ile a lemosa a re: “Matsatsing a ho qetela ho tla tla basomi ka ho soma ha bona.” Empa “letsatsi la Jehova le tla tla joaloka lesholu.” Petrose o phetha lengolo la hae ka keletso e bohlale e eang ho ba ‘letileng ’me ba lutse ba hopola ho ba teng ha letsatsi leo.’—2 Pet. 3:3, 10-12.
Lipotso Tsa Mangolo Lia Arajoa:
1:19—“Naleli ea meso” ke mang, e hlaha neng, hona re tseba joang hore e se e hlahile? “Naleli ea meso” ke Jesu Kreste ka mor’a hore e be Morena oa ’Muso oa Molimo. (Tšen. 22:16) Ka 1914, Jesu o ile a hlaha ka pel’a pōpo eohle e le Morena eo e leng Mesia, ’me o ne a phatlalatsa meso ea letsatsi le lecha. Ho fetoha sebōpeho ha Jesu ho ile ha bontša khanya ea hae le matla a hae a Puso esale pele, e leng ho ileng ha tiisa hore lentsoe la Molimo la boprofeta le ka tšeptjoa. Ho ela hloko lentsoe leo ho etsa hore lipelo tsa rōna li khanye, ’me seo se etsa hore re hlokomele hore Naleli ea meso e se e hlahile.
2:4—“Tartarase” ke eng, hona mangeloi a marabele a akhetsoe ho eona neng? Tartarase ke boemo bo kang ba ho ba chankaneng boo ho behoang libōpuoa tsa moea feela ho bona, eseng batho. Ke boemo ba ho ba lefifing le letšo kelellong mabapi le merero e khanyang ea Molimo. Ba Tartarase ha ba na tšepo leha e le efe ka bokamoso. Mehleng ea Noe Molimo o ile a akhela mangeloi a sa mameleng Tartarase, ’me a tla lula boemong boo bo tlotlollang ho fihlela a timetsoa.
3:17—Petrose o ne a bolela’ng ka ‘tsebo e fanoeng esale pele’? Petrose o ne a bua ka tsebo e fanoeng esale pele, ea liketsahalo tsa ka moso, eo eena le bangoli ba bang ba Bibele ba ileng ba e fuoa ka pululelo. Kaha ena e ne e se tsebo e feletseng, ho ba le eona ha hoa ka ha etsa hore Bakreste ba pele ba tsebe lintlha tsohle mabapi le lintho tse neng li tla etsahala ka moso. Ba ile ba tseba lintlha tse akaretsang feela tsa se neng se ka lebelloa.
Seo re Ithutang Sona:
1:2, 5-7. Ho phaella tabeng ea ho re thusa hore re eketse “tsebo e nepahetseng ea Molimo le ea Jesu,” haeba re ikitlaelletsa hore re be le litšobotsi tse kang tumelo, mamello le boinehelo ba bomolimo seo se ka re “thibela ho ba ba sa sebetseng kapa ba sa beheng” mabapi le tsebo eo.—2 Pet. 1:8.
1:12-15. E le hore re lule re “tsepame ’neteng,” re hloka likhopotso tse sa khaotseng, tse kang tseo re li fumanang libokeng tsa phutheho, ha re ithuta le ha re bala Bibele.
2:2. Re lokela ho ba hlokolosi hore boitšoaro ba rōna bo se ke ba tlisetsa Jehova le mokhatlo oa hae o hlophisitsoeng thohako.—Bar. 2:24.
2:4-9. Ka lebaka la seo a ileng a se etsa nakong e fetileng, re ka kholiseha hore “Jehova o tseba ho lopolla batho ba boinehelo ba bomolimo tekong, empa ho bolokela batho ba sa lokang letsatsi la kahlolo hore ba khaoloe.”
2:10-13. Le hoja “ba khanyang,” ke hore, baholo ba Bakreste, ba e-na le liphoso ’me ba ka ’na ba fosa ka linako tse ling, ha rea lokela ho ba nyefola.—Baheb. 13:7, 17.
3:2-4, 12. Ho ela hloko “lipolelo tse ileng tsa buuoa pele ke baprofeta ba halalelang le taelo ea Morena le Mopholosi” ho tla re thusa hore re lule re ntse re hopola hore letsatsi la Jehova le haufi.
3:11-14. Joaloka ba ‘letileng le ba lutseng ba hopola ho ba teng ha letsatsi la Jehova’, re lokela ho (1) ‘halalela boitšoarong,’ re hloeke ’meleng, kelellong le moeeng; (2) re etse liketso tse ngata tse bontšang “boinehelo ba bomolimo,” tse kang tse amanang le mosebetsi oa ho bolela ka ’Muso le oa ho etsa barutuoa; (3) re boloke boitšoaro ba rōna le botho ba rōna bo “se na letheba,” bo sa silafatsoa ke lefatše; (4) re lule re “se na sekoli,” re etse lintho tsohle ka sepheo se setle; ’me (5) re ‘be khotsong’ le Molimo le barab’abo rōna ba Bakreste, hammoho le batho ba bang.