Leta U sa Fele Pelo

MOLISA eo khafetsa a neng a hooa a re “Phiri!” empa ho se na phiri o ile a fumana hore hamorao ha a hooa bakeng sa thuso batho ba ile ba mo hlokomoloha. Ka ho tšoanang kajeno, ba bangata ba hlokomoloha bohaufi ba letsatsi la Jehova hobane ba utloile litemoso tse se nang palo tse ipakileng e le mekhosi ea bohata. Sera se seholo sa Molimo, Satane, ‘lengeloi leo la leseli’ la bohata, se nka monyetla ka ’nete ea hore ba bangata ba hlōleha ho lemoha hore na ke temoso efe eo e leng ea sebele le eo ba lokelang ho e ela hloko.—2 Bakorinthe 11:14.

Moea oa ho se tsotelle o ne o tla ba kotsi esita le ho ba sebelelitseng Jehova ka nako e itseng. Hobane’ng? Nahana ka temoso ea moapostola Petrose lekholong la pele la lilemo.

Nahana Hantle

Lengolo la bobeli la Petrose le bululetsoeng e ne e le khopotso ho Bakreste ba pele, ’me ke khopotso le ho rōna. Oa ngola: “Baratuoa, joale lena ke lengolo la bobeli leo ke le ngollang lona, leo ho lona, joaloka ho la ka la pele, ka khopotso ke tsosang matla a lōna a hlakileng a ho nahana.” (2 Petrose 3:1) Petrose o na le mabaka afe a ho ameha ka tsela ee? Petrose o totobatsa boteng ba basomi bao ho soma ha bona ho fokolisang boikutlo bo hlokahalang ba ho potlaka mabapi le nako eo bahlanka ba Molimo ba phelang ho eona. Hona joale ke nako ea ho hlokomela hore basomi ba se ke ba re qhekella. Kahoo, Petrose o phehella babali ba hae ho “hopola lipolelo tse ileng tsa buuoa pele ke baprofeta ba halalelang.” (2 Petrose 3:2; Liketso 3:22, 23) Baprofeta ba ne ba ile ba re’ng?

Bahlanka ba Molimo ba tšepahalang hangata ba ne ba lebisa tlhokomelo tseleng eo ka eona likahlolo tsa bomolimo li ileng tsa felisa bokhopo. Petrose o hopotsa babali ba hae ka Moroallo oa mehleng ea Noe oo Molimo a ileng a o sebelisa e le mokhoa oa ho kenella, ha lefatše le ne le tletse bobe. Moroallo oo o phallang ka potlako o ile oa felisa lefatše la nakong eo ka katleho. Empa Molimo o ile a boloka Noe le lelapa la hae arekeng le lintho tse phelang tse emelang ‘mofuta ka mong oa nama.’ Litšōmo tse fumanehang hohle li tiisa bonnete ba litlaleho tsa Bibele.a—Genese 6:19, NW; 2 Petrose 3:5, 6.

Petrose o bitsa ho kenella hoo ha bomolimo ‘’nete e phonyohang tlhokomelo’ ea batho ba bang. Joale basomi ba mehleng eo ba ile ba koeetsa ba bang hore ba se ke ba tsotella. Leha ho le joalo, rōna ha rea lokela hore le ka mohla re hlokomolohe seo Jehova a seng a se entse. Petrose oa re bolella: “Ka lentsoe le tšoanang maholimo le lefatše tse teng hona joale li boloketsoe mollo ’me li ntse li bolokiloe ho fihlela letsatsing la kahlolo le la timetso ea batho ba se nang bomolimo.” (2 Petrose 3:7) E, Molimo o lokela ho kenella hape.

Molimo ha a Liehe

Ho se ho fetile lilemo tse likete. Ke hobane’ng ha Molimo a letile nako e telele hakaale pele a rarolla mathata a moloko oa batho? Petrose o boetse o lebisa tlhokomelo ’neteng e ’ngoe. O re: “’Nete ena e le ’ngoe a e se ke ea phonyoha tlhokomelo ea lōna, baratuoa, hore letsatsi le le leng ho Jehova le joaloka lilemo tse sekete le lilemo tse sekete li joaloka letsatsi le le leng.” (2 Petrose 3:8) Pono ea Jehova ea nako e fapane le ea rōna. Ho Molimo ea phelang ka ho sa feleng, nako ea ho tloha pōpong ea Adama ho fihlela joale hase le beke. Empa ho sa tsotellehe pono eo re nang le eona ka nako, lilemo tse ling le tse ling tse sekete le letsatsi le leng le le leng le fetang le re atametsa ho phethahaleng ha morero oa Jehova.

Ho na le polelo e reng: “Moleta ngoeli ke moleta lefifi” e bolelang hore ho letela ketsahalo e itseng ho bonahala ho liehisa ho etsahala ha eona. Leha ho le joalo, Petrose o buella ‘ho leta le ho lula re hopolela haufi ho ba teng ha letsatsi la Jehova.’ (2 Petrose 3:12) Re ka sebeletsa joang hore re be le boikutlo ba kelello bo re bolokang re falimehetse bohaufi ba ho kenella ha Molimo?

Liketso li Bua ho Feta Lipolelo

Petrose o lebisa tlhokomelo liketsong. O bua ka ‘liketso tse halalelang tsa boitšoaro’ hammoho le ‘liketso tsa boinehelo ba bomolimo.’ (2 Petrose 3:11) Tsee li akarelletsa eng?

Mohlanka oa Molimo oa sebele o etsa lintho ka tsela e Mo thabisang. Tumelo ea morapeli ea joalo oa ’nete e bonahala boitšoarong ba hae. Sena se mo khetholla ho ba mpang feela ba bua ka tumelo ho Molimo le litšepiso tsa hae. Mohlomong u hlokometse hore tšebeletso ea phatlalatsa ea Lipaki tsa Jehova e li khetholla e le tse fapaneng. Li etela lapeng ha hao ho lebisa tlhokomelo litšepisong tsa Molimo tse lokolisitsoeng ka Bibeleng. Empa li boetse li fana ka bopaki mabapi le tšepo ea tsona le tumelo hohle moo li kopanang le batho teng.

Paki e lulang e tšoarehile ka ho bolella ba bang ka tumelo ea eona e tiisa le ho matlafatsa lintho tseo e li lumelang. Ho bolela ho etsa hore ntho e tebe haholoanyane maikutlong ’me ka nako e tšoanang ho tlisa thabo ea ka hare le khotsofalo. Ha re phatlalatsa litaba tse molemo tsa ’Muso oa Molimo, re boetse re thabisa Jehova. ’Me rea tseba hore ‘hase ea sa lokang hoo a ka lebalang mosebetsi oa rōna le lerato leo re le bontšang bakeng sa lebitso la hae,’ joalokaha Pauluse, moapostola-’moho le Petrose a bolela.—Baheberu 6:10; Baroma 10:9, 10.

Ho ameha ka tsela ena ka ho phatlalatsa litaba tse molemo tsa ’Muso matsatsing a ho qetela a tsamaiso ea hona joale e khopo ho fella ka eng? Batho ba likete tse makholo ba lipelo li tšepahalang ba ithuta kamoo ba ka bang le kamano e haufi le Jehova, ba ka fumanang molemo moseng oa hae o sa tšoanelang le ho ba le thabo ea ’nete tebellong ea bophelo bo sa feleng lefatšeng la paradeise.

Tsebo e Fanoeng Esale Pele

Le hoja, ho latela Bibele, re tseba hore Jehova Molimo o tla kenella ka nako ea hae, ho hlokahala hore re ele hloko temoso e tsoelang pele eo Petrose a fanang ka eona. “Le e-na le tsebo ena e fanoeng esale pele, le itebele e le hore le se ke la hulanngoa hammoho le bona ke phoso ea batho ba nyelisang molao ’me la oa ho tieeng ha lōna.”—2 Petrose 3:17.

Ka sebele Jehova o tsebile esale pele hore ba bang ba se nang tumelo e matla ba ne ba ka nyahamisoa ke ha ho bonahala eka Molimo o lieha ho kenella. O ne a boetse a tseba hore tšusumetso ea batho ba sa tšabeng Molimo e ne e ka senya bahlanka ba hae ba ’nete, kapa bonyane e ka fokolisa tumelo ea bona tabeng ea hore ho halaletsoa ha lebitso la Molimo ho haufi. E ne e tla ba ho kotsi hakaakang ho lesa ho falimeha matsatsing aa a ho qetela!

Hona joale hase nako ea ho koetla lipelaelo kapa ho se kholisehe ka seo Jehova a tla se etsa. (Baheberu 12:1) Ho e-na le hoo, hona joale ke nako ea ho eketsa kananelo bakeng sa seo ho se fele pelo ha Jehova ho se tlisitseng—tebello ea ho pholoha ha ba limilione ba fetohang karolo ea bongata bo boholo ba machaba ba lebeletseng ho pholoha matšoenyeho a maholo a tlang. (Tšenolo 7:9, 14) Petrose oa khothatsa: “Le tsoele pele ho hōla moseng o sa tšoanelang le tsebong tsa Morena le Mopholosi oa rōna Jesu Kreste. Ho eena e be khanya hona joale hammoho le ho isa letsatsing la bosafeleng.”—2 Petrose 3:18.

“Le Ipoloke Leratong la Molimo”

Ho lula re tšoarehile ho boleleng ka ’Muso le ho ba teng kamehla libokeng tsa Bokreste bakeng sa borapeli le ho ithuta Lentsoe la Molimo hoa re sireletsa. Kahoo, re ke ke ra ba le nako ea ho ameha ka ho tlōlisang ka maemo a ntseng a mpefala tsamaisong ea kajeno e khopo. Ha ho hlokahale hore tšabo le matšoenyeho li rene bophelong ba Bakreste ba ’nete. (1 Bakorinthe 15:58) Ha re tšoarehile haholoanyane ka ho sebeletsa Jehova, nako e tla feta kapele haholoanyane.

Jude, ea phetseng mehleng ea Petrose ebile e le mor’abo Jesu ka ’m’a bona, oa re khothatsa: “Lōna, baratuoa, ka ho ikaha tumelong ea lōna e halalelang ka ho fetisisa, le ho rapela ka moea o halalelang, le ipoloke leratong la Molimo, ha le ntse le letetse mohau oa Morena oa rōna Jesu Kreste ka tebello ea bophelo bo sa feleng.” (Jude 20, 21) Hlokomela bohlokoa ba maikutlo a nepahetseng a susumetsoang ke ho tiisetsa. (1 Bathesalonika 5:17) Joale Jude oa eketsa: “Le tsoele pele ho bontša mohau ho ba bang ba nang le lipelaelo; ba pholoseng ka ho ba hloibila mollong. Empa ba bang le tsoele pele ho ba bontša mohau, le etsa joalo ka tšabo, ha le ntse le hloea le seaparo sa ka hare se silafalitsoeng ke nama.” (Jude 22, 23) Ke habohlokoa hakaakang ho matlafatsana linakong tsena tse thata! ’Me ke habohlokoa hakaakang ho se oele molekong, re sebelisa ‘letsatsi lena la poloko’ le lelefalitsoeng e le phephi bakeng sa “boitšoaro bo hlephileng,” boo hona joale bo atileng hakana lefatšeng la kajeno la boitšoaro bo litšila.—Jude 4; 2 Bakorinthe 6:1, 2.

Ka ho ela hloko keletso e lerato ea Petrose, Pauluse le Jude le ka ho tšoareha le ho ba mafolofolo tšebeletsong ea Molimo, u ka letela hore Jehova a kenelle u sa fele pelo. Empa na u tla ho etsa?

U se ke ua qea-qea ho kopana le Lipaki tsa moo u lulang teng hore li u thuse ho matlafatsa tumelo ea hao tšepisong ea ’Mōpi ea bophelo bo sa feleng. Ithute se hlokahalang bakeng sa hore u tšoanelehele ho kopanela mosebetsing ona oa bopaki ba lefatše lohle oo ho seng mohla o tla phetoa, o tla phethoa matšoenyehong a maholo a atamelang. (Mareka 13:10) Joale u tla ba le tebello ea ho phela lefatšeng le lecha la ho loka leo Jehova a le tšepisang. (2 Petrose 3:13) Ela hloko likhopotso tsa hae! Leta u sa fele pelo! E-ba ea tšoarehileng!

[Mongolo o botlaaseng ba leqephe]

[Setšoantšo se leqepheng la 5]

Ithute ka tšepiso ea Molimo ea Paradeise hona joale

[Tlhaloso ea Moo Setšoantšo se Nkiloeng Teng e leqepheng la 7]

Wolf: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.