Re Thabela ho Letela Jehova
NA U kile ua ja tholoana e sa butsoang? Ha ho pelaelo hore e ile ea u sulafalla. Ho nka nako hore tholoana e butsoe, ’me ho molemo ho letela hore e butsoe. Ho na le maemo a mang ao ho ’ona ho leng molemo hore re lete. Bibele e re: “Ho molemo hore motho a lete, a bile a khutsitse, bakeng sa poloko ea Jehova.” (Lillo Tsa Jeremia 3:26; Tite 2:13) Bakreste ba lokela ho letela Jehova ka litsela life? Re ka rua molemo joang ka ho mo letela?
Ho Letela Molimo ho Akarelletsa Eng?
Re le Bakreste, re ‘letile ’me re lutse re hopola ho ba teng ha letsatsi la Jehova.’ Re lebeletse ho lopolloa mohla a ‘timetsang batho ba se nang bomolimo.’ (2 Petrose 3:7, 12) Jehova o labalabela ho felisa bobe bohle, empa oa ithiba e le hore a pholose Bakreste ka tsela e tla tlotlisa lebitso la hae. Bibele e re: “Molimo, le hoja a e-na le takatso ea ho bontša khalefo ea hae le ho tsebahatsa matla a hae, [o] mameletse ka tiisetso e khōlō lijana tsa khalefo tse entsoeng hore li lokele timetso, e le hore a ka tsebahatsa maruo a khanya ea hae lijaneng tsa mohau.” (Baroma 9:22, 23) Joaloka mehleng ea Noe, Jehova o tseba nako e nepahetseng ea ho pholosa batho ba hae kajeno. (1 Petrose 3:20) Kahoo, ho letela Molimo ho akarelletsa ho letela nako ea hae ea ho nka bohato.
Ha re ntse re letetse letsatsi la Jehova, ka linako tse ling re ka utloa bohloko ha re bona litekanyetso tsa boitšoaro tsa lefatše lena li ntse li senyeha ho ea pele. Ha re le boemong boo, ho molemo ho nahana ka mantsoe a Mikea, moprofeta oa Molimo ea ileng a ngola a re: “Ea tšepahalang o timetse lefatšeng, ’me har’a moloko oa batho ha ho na ea lokileng.” Eaba o phaella ka ho re: “Ha e le ’na, ke tla ’ne ke lebelle Jehova. Ke tla letela Molimo oa poloko ea ka.” (Mikea 7:2, 7) ‘Ho leta’ hoo re lokelang ho ho hlaolela ke eng? Kaha hangata motho o fela pelo ha a lokela ho letela ntho e itseng, re ka etsa joang hore re thabe ha re ntse re letetse Molimo?
Ho Thaba ha re Ntse re Letile
Re ka ithuta boikutlo bo loketseng ho Jehova. Ha ho mohla a kileng a khaotsa ho ba “Molimo ea thabileng.” (1 Timothea 1:11) O thabile ha a ntse a letile hobane o tsoela pele ho lokisetsa hore a phethahatse morero oa hae oa ho etsa hore batho ba mo ratang ba phethahale, e leng seo a neng a se reretse batho ha a ne a ba bōpa. (Baroma 5:12; 6:23) O bona liphello tse ntle tsa mosebetsi oa hae—e leng batho ba limilione ba khahliloeng ke borapeli ba ’nete. Jesu o itse: “Ntate o ’nile a tsoela pele ho sebetsa ho fihlela joale, le ’na ke tsoela pele ho sebetsa.” (Johanne 5:17) Ho etsetsa ba bang lintho ke mohloli oa thabo. (Liketso 20:35) Ka ho tšoanang, Bakreste ba ’nete ha baa phutha matsoho ha ba ntse ba letile. Ho e-na le hoo, ba tsoela pele ho thusa ba bang ho ithuta merero ea Molimo bakeng sa moloko oa batho.
Batho ba tšepahalang ba ’nile ba khotsofalla ho rorisa Molimo ha ba ntse ba letetse nako ea hae ea ho nka bohato. Nahana ka mohlala oa mopesaleme Davida. Davida o ile a hlorisoa ke morena oa hae, a ekoa ke motsoalle oa hlooho ea khomo ’me a fetoheloa ke mora oa hae. Maemong ana kaofela, na Davida o ne a ka thaba ha a ntse a letetse ho lopolloa ka nako ea Jehova e loketseng? Pesaleme ea 71, eo ho bonahalang e ngotsoe ke Davida, e re: “Ha e le ’na, ke tla leta kamehla, ke tla ekeletsa thorisong eohle ea hao. Molomo oa ka o tla pheta ho loka ha hao ka ho qaqileng, o phete poloko ea hao letsatsi lohle.” (Pesaleme ea 71:14, 15) Ho e-na le hore Davida a lete a sa thaba, o ile a bontša hore o thabile hobane o ne a tšoarehile ho roriseng Jehova le ho matlafatseng ba bang borapeling ba ’nete.—Pesaleme ea 71:23.
Ho letela Jehova ha ho felise pelo joaloka ho letela bese e liehang ho fihla. Ho batla ho tšoana le ha batsoali ba letetse ka thabo hore ngoana oa bona e be motho e moholo eo ba ka bang motlotlo ka eena. Ba sebetsa ka thata ha lilemo li ntse li feta—ba mo koetlisa, ba mo ruta le ho mo laea—ka morero oa ho finyella pakane ea bona. Ka ho tšoanang, rōna ba letetseng Jehova re thabela ho thusa ba bang ho atamela haufi le Molimo. Le rōna re batla ho amoheloa ke Molimo ’me re qetelle re bolokehile.
Ho se Felloe ke Tšepo
Ho letela Jehova ho bolela ho tsoela pele re mo rata le ho mo sebeletsa re sa felloe ke tšepo. Sena e ka ba se phephetsang. Kajeno bahlanka ba bangata ba Molimo ba lula libakeng tseo batho ba somang mang kapa mang ea phelang ho latela tumelo e thehiloeng litšepisong tsa Molimo. Leha ho le joalo, nahana ka mohlala oa Baiseraele ba tšepahalang ba ileng ba lula ba e-na le tšepo ha ba le botlamuoeng Babylona ka lilemo tse 70. Ba ile ba thusoa ke’ng hore ba lule ba e-na le tšepo? Ha ho pelaelo hore ho bala lipesaleme ho ile ha ba matlafatsa. Pesaleme e ’ngoe e khothatsang eo ho ka etsahalang hore e ne e se e ngotsoe ka nako eo e re: “Ke letetse lentsoe la hae. Moea oa ka o letetse Jehova ho feta balebeli ba letetseng hore e be hoseng, ba lebeletseng hoseng. Baiseraele ba ’ne ba letele Jehova.”—Pesaleme ea 130:5-7.
Bajuda ba ileng ba matlafatsa tšepo ea bona ka ho bala le ho bua ka eona ba ile ba putsoa ha qetellong Babylona e haptjoa ke bahlaseli ba eona. Bajuda ba likete ba tšepahalang ba ile ba potlakela ho ea Jerusalema. Ho ngotsoe sena mabapi le nako eo: “Ha Jehova a khutlisa baholehuoa ba Sione, . . . melomo ea rōna ea tlala litšeho.” (Pesaleme ea 126:1, 2) Bajuda bao ha baa ka ba tela, empa ba ile ba tsoela pele ho matlafatsa tumelo ea bona. ’Me ha ho mohla ba ileng ba khaotsa ho rorisa Jehova.
Ka ho tšoanang, Bakreste ba ’nete ba letelang Molimo nakong ea “qetello ea tsamaiso ea lintho” ba leka ba sa phetse ho matlafatsa tumelo ea bona. Ba ithuta Lentsoe la Molimo, baa khothatsana ’me ba lula ba rorisa Jehova ka ho bolela litaba tse molemo tsa ’Muso oa hae.—Matheu 24:3, 14.
Ho Leta e le Hore re ka Rua Molemo oa Taeo
Jeremia, moprofeta oa Molimo, o ile a ngola tjena: “Ho molemo hore motho a lete, a bile a khutsitse, bakeng sa poloko ea Jehova.” (Lillo Tsa Jeremia 3:26) Jeremia o ne a bolela hore ho ne ho tla ba molemo hore batho ba Molimo ba se ke ba belaella tsela eo Jehova a neng a ile a ba laea ka eona ha a ne a lumella hore Jerusalema e timetsoe. Ho e-na le hoo, ba ne ba lokela ho rua molemo phihlelong eo ka hore ba nahanisise ka liphello tsa ho se mamele ha bona le hore ho hlokahala hore ba fetole boikutlo ba bona.—Lillo Tsa Jeremia 3:40, 42.
Tsela eo taeo e tsoang ho Jehova e re ruisang molemo ka eona e ka ’na ea tšoantšoa le tsela eo ka eona tholoana e butsoang ka eona. Bibele e bua tjena ka taeo e tsoang ho Molimo: “Ho ba koetlisitsoeng ke eona e beha litholoana tsa khotso, e leng, ho loka.” (Baheberu 12:11) Joalokaha tholoana e nka nako hore e butsoe, ka tsela e tšoanang ho hlokahala nako hore re fetole boikutlo ba rōna ho latela koetliso eo Molimo a re fang eona. Ka mohlala, haeba boitšoaro ba rōna bo bobe bo ka etsa hore re lahleheloe ke tokelo e itseng ka phuthehong, ho ikemisetsa ha rōna ho letela Molimo ho tla re thusa hore re se ke ra nyahama le ho beha meja fatše. Maemong a joalo, mantsoe a bululetsoeng a Davida aa khothatsa ha a re: “Ho ba tlas’a bohale ba [Molimo] ke ha motsotsoana, ho ba tlas’a kamohelo ea hae ke ha bophelo bohle. Ka shoalane ho lla ho ka ’na ha e-ba teng, empa hoseng ho ba le mohoo oa thabo.” (Pesaleme ea 30:5) Haeba re ithuta ho leta ’me re sebelisa keletso eo re e fumanang Lentsoeng la Molimo le mokhatlong oa hae o hlophisitsoeng, ho tla fihla nako eo ka eona re tla ‘hooa ka thabo.’
Ho Hōla Moeeng ho Nka Nako
Haeba u sa le mocha lilemong kapa o sa tsoa kolobetsoa, e ka ’na eaba u labalabela ho ba le boikarabelo bo itseng ka phuthehong ea Bokreste. Empa ho nka nako hore u hōle ka ho lekaneng moeeng hoo u ka jarang boikarabelo bo joalo. Ka lebaka leo, sebelisa hamolemo lilemo tsa bocha ba hao hore u hōle moeeng. Ka mohlala, bocha ke nako e loketseng ea ho bala Bibele eohle, ho hlaolela litšoaneleho tsa Bokreste le ho fumana tsebo ea ho etsa barutuoa. (Moeklesia 12:1) Haeba ka boikokobetso u bontša hore u ka khona ho leta, nako ea Jehova ea hore u be le boikarabelo bo eketsehileng e tla fihla.
Mosebetsi oa ho etsa barutuoa le oona o hloka hore re se fele pelo. Hantle feela joalokaha molemi a lokela ho tsoela pele a nosetsa ho fihlela Molimo a hōlisa peō, ho joalo le ka mosebetsi oa ho etsa barutuoa. (1 Bakorinthe 3:7; Jakobo 5:7) Ho thusa ba bang hore ba be le tumelo ho Jehova le ho mo ananela ho tloha pelong, ho nka likhoeli esita le lilemo re ithuta Bibele le bona re sa fele pelo. Ho letela Jehova ho akarelletsa ho tiisetsa, esita leha qalong liithuti li sa arabele ho seo li ithutang sona. Haeba bonyane li bontša kananelo e itseng, eo e ka ’na ea e-ba pontšo ea hore li arabela tataisong ea moea oa Jehova. Ha u sa fele pelo, u ka ’na ua thabela ho bona ha Jehova a etsa hore seithuti sa hao e be morutuoa oa Kreste.—Matheu 28:20.
Ho Bontša Lerato ka ho Leta
E le mohlala oa kamoo ho leta e ka bang pontšo ea lerato le kholiseho, nahana ka boemo ba nkhono e mong ea lulang sebakeng se lehoatata sa Andes, Amerika Boroa. Ke eena le morali e mong oabo rōna feela bao e leng Lipaki Tsa Jehova motseng oa habo bona. U ka inahanela hore na ha Bakreste-’moho le bona ba ba etela ba leta ka tabatabelo e kaakang! Ka nako e ’ngoe, molebeli oa potoloho o ne a il’o ba etela ka lekhetlo la pele ha a tla lahleha. O ile a tlameha ho menahana le mehlala eaba o lieha ho fihla ka lihora tse ’maloa. E ne e se e le ka mor’a khitla ha a qetella a bone motse oo a le hōjana. Kaha ho ne ho se na motlakase sebakeng seo, o ile a makala ha a bona khanya e phatsimang. O ile a thaba hakaakang ha qetellong a kena motseng oo ’me a bona hore khanya eo e ne e le ea lebone la oli le neng le phahamisitsoe ke nkhono eo! Nkhono eo o ne a kholisehile hore oa tla, ka hona o ne a letile.
Ka ho tšoanang, re thabela ho letela Jehova re sa fele pelo. Re kholisehile hore o tla phethahatsa litšepiso tsa hae. ’Me joaloka molebeli eo oa potoloho, re ananela ba re letelang ka lerato. Ka lebaka leo, ha ho makatse hore ebe Molimo o ananela ba mo letelang. Bibele e re: “Jehova o khahlisoa ke . . . ba letelang mosa oa hae o lerato.”—Pesaleme ea 147:11.
[Setšoantšo se leqepheng la 18]
Batho ba tšoarehileng ka ho rorisa Molimo ba thabela ho letela Jehova