Phehellang Boinehelo ba Bomolimo le le Bakreste ba Kolobelitsoeng
“Leha ho le joalo, uena, monna oa Molimo, . . . phehella ho loka, boinehelo ba bomolimo.”—1 TIMOTHEA 6:11, “NW.”
1. U ne u tla arabela joang potso ee, Letsatsi la bohlokoa ka ho fetisisa bophelong ba hao ke lefe? Ke hobane’ng ha u arabela joalo?
LETSATSI la bohlokoa ka ho fetisisa bophelong ba hao ke lefe? Haeba u Paki ea Jehova e kolobelitsoeng, ha ho pelaelo hore u tla arabela, ‘Ke letsatsi leo ke kolobelitsoeng ka lona!’ Ka sebele kolobetso ke bohato ba bohlokoa ka ho fetisisa bophelong ba hao. Ke pontšo e pepenene ea hore u entse boinehelo bo felletseng u bile u sa itšiele letho ho Jehova ho etsa thato ea hae. Kolobetso ea hao e tšoaea letsatsi la ho khethoa ha hao ho ba mosebeletsi oa Molimo o Holimo-limo, Jehova.
2. (a) Ho ka ’na ha bontšoa joang hore kolobetso hase bohato ba ho qetela boo u bo nkang tseleng ea hao ea Bokreste? (b) Ke mehato efe ea bohlokoa e tlang pele eo u e nkang pele u kolobetsoa?
2 Empa, na kolobetso ke bohato ba ho qetela boo u bo nkang tseleng ea hao ea Bokreste? Le hanyenyane! Ho etsa mohlala: Linaheng tse ngata mokete oa lenyalo o tšoaea qetello ea nako ea ho rera le ho lokisa (’me hangata ea lefereho). Ka nako e tšoanang, o tšoaea qaleho ea ho phela ’moho joaloka banyalani. Ka ho tšoanang, kolobetso ea hao ke sehlohlolo sa nako ea tokisetso eo ka eona u ileng ua nka mehato e ’maloa ea bohlokoa e etellang oo pele. U ile ua fumana tsebo ka Molimo le Kreste. (Johanne 17:3) U ile ua qala ho lumela ho Jehova joaloka Molimo oa ’nete, le Kreste joaloka ’Moloki oa hao, le Bibele joaloka Lentsoe la Molimo. (Liketso 4:12; 1 Ba-Thessalonika 2:13; Ba-Heberu 11:6) U ile ua bontša tumelo eo ka ho bakela tsela ea hao ea boitšoaro ea pele le ho sokolohela tseleng e lokileng. (Liketso 3:19) Joale u ile ua etsa qeto ea ho inehela ho Jehova ho etsa thato ea hae. (Mattheu 16:24) Qetellong, u ile ua kolobetsoa.—Mattheu 28:19, 20.
3. (a) Re ka bontša joang hore kolobetso ea rōna e tšoaea qalo ea bophelo ba tšebeletso ea boinehelo ho Molimo? (b) Ho phahama lipotso life, hona ke hobane’ng ha re lokela ho thahasella likarabelo haholo?
3 Leha ho le joalo, kolobetso ea hao hase qetello empa ke qalo ea tšebeletso e halalelang ea boinehelo ho Molimo. Joalokaha seithuti se seng sa Bibele se boletse, bophelo ba Bokreste e tlameha hore e se be ‘lekhara-khara le bang teng qalong feela le lateloang ke phomolo ea nako e telele.’ Joale, u ka bontša joang hore boemong ba hao, kolobetso ha e emele feela ‘lekhara-khara le bang teng qalong’? Ka ho phehella tsela ea boinehelo ba bomolimo nakong eohle ea bophelo. Boinehelo bona ba bomolimo ke eng? Ke hobane’ng ha ho hlokahala hore bo phehelloe? U ka bo hlaolela haholoanyane joang bophelong ba hao? Re lokela ho thahasella likarabelo haholo, hobane re tlameha ho ba batho ba khetholloang ka “liketso tsa boinehelo ba bomolimo” haeba re tla pholoha letsatsi le atamelang la kahlolo ea Jehova.—2 Petrose 3:11, 12, NW.
Se Boleloang ke Boinehelo ba Bomolimo
4. Pauluse o ile a eletsa Timothea hore a etse eng, ’me ke eng eo e neng e le ’nete ka Timothea nakong ee?
4 Neng-neng pakeng tsa 61 le 64 C.E., moapostola Pauluse o ile a ngolla morutuoa oa Mokreste Timothea lengolo la hae la pele le bululetsoeng. Ka mor’a ho hlalosa likotsi tseo lerato la chelete le ka lebisang ho tsona, Pauluse o ile a ngola: “Leha ho le joalo, uena, monna oa Molimo, baleha linthong tsena. Empa u phehelle . . . boinehelo ba bomolimo.” (1 Timothea 6:9-11, NW) Ho thahasellisang, nakong ena mohlomong Timothea o ne a le ka holimonyana ho lilemo tse 30. O ne a se a tsamaile ka mokhoa o pharalletseng le moapostola Pauluse ’me a fuoe matla a ho khetha balebeli le bahlanka ba sebeletsang ka liphuthehong. (Liketso 16:3; 1 Timothea 5:22) Leha ho le joalo, Pauluse o ile a eletsa monna enoa oa Mokreste ea inehetseng le ea kolobelitsoeng, ea hōlileng moeeng hore a phehelle boinehelo ba bomolimo.
5. Polelo “boinehelo ba bomolimo” e bolela’ng?
5 Pauluse o ne a bolela eng ka polelo “boinehelo ba bomolimo”? Lentsoe la pele la Segerike (eu·seʹbei·a) le ka ’na la fetoleloa ka moelelo oa sebele e le “ho ba le tlhompho e ntle ea borapeli.” Mabapi le seo le se bolelang, rea bala: “Eusebeia e hlaha ka makhetlo a ’maloa ka kutloisiso e bolelang boinehelo ba botho ba bolumeli mengolong ea kajeno . . . empa moelelo oa lona o akaretsang haholoanyane Segerikeng se tloaelehileng sa mehleng ea Baroma e ne e le ‘botšepehi.’ . . . Ho Bakreste eusebeia ke mofuta o phahameng ka ho fetisisa oa boinehelo ho Molimo.” (Christian Words, ea Nigel Turner) Kahoo kamoo e sebelisitsoeng ka teng ka Mangolong, polelo “boinehelo ba bomolimo” e bolela tlhompho ea borapeli kapa boinehelo bo nang le botšepehi ho Jehova Molimo joaloka motho.
6. Mokreste a ka paka boinehelo ba hae ba bomolimo joang?
6 Empa boinehelo bona ba bomolimo hase feela boikutlo ba borapeli. Feela joalokaha “tumelo, ha e se na mesebetsi, e shoele,” ka ho tšoanang, boinehelo ba bomolimo bo tlameha ho senoloa bophelong ba motho. (Jakobo 2:26) Ho New Testament Words, William Barclay o ngotse: “Hase feela hore [eu·seʹbei·a le mantsoe a amanang le eona] e senola boikutlo ba tšabo le tlhompho ea borapeli, empa hape li fana ka moelelo oa borapeli bo tšoanelang tšabo eo, le bophelo ba ho utloa ka mafolo-folo bo tšoanelang tlhompho eo ea borapeli.” Eu·seʹbei·a e tsoela pele ho hlalosoa e le “hona ho ela Molimo hloko ho sebetsang tšobotsing e ’ngoe le e ’ngoe ea bophelo.” (The Second Epistle General of Peter and the General Epistle of Jude, ea Michael Green) Ka hona, Mokreste o tlameha ho paka kamano ea hae le Jehova ka tsela eo a phelang bophelo ba hae ka eona.—1 Timothea 2:2, NW; 2 Petrose 3:11, NW.
Ho Hlokahala Boiteko bo Matla
7. Pauluse o ne a bolela eng ha a khothalletsa Timothea hore a “phehelle” boinehelo ba bomolimo, le hoja a ne a se a kolobelitsoe?
7 Empa ho akarelletsoa eng tabeng ea ho hlaolela le ho bonahatsa boinehelo ba bomolimo? Na ke feela taba ea ho kolobetsoa? Hopola hore Timothea, le hoja a ne a kolobelitsoe, o ile a khothalletsoa ho “bo phehella [tlhaloso ea lentsoe ka lentsoe e re, ‘u ’ne u bo phehelle’].”a (1 Timothea 6:11, Kingdom Interlinear) Ka ho hlakileng, Pauluse o ne a sa bolele hore morutuoa Timothea o ne a haelloa ke boinehelo ba bomolimo. Ho e-na le hoo, o ne a hatisa ho eena tlhokahalo ea ho tsoela pele ho bo phehella ka tieo le ka cheseho. (Bapisa le Ba-Filippi 3:14.) Ka ho hlakileng, ena e ne e lokela ho ba phehello ea bophelo bohle. Joaloka Bakreste bohle ba kolobelitsoeng, Timothea o ne a ka tsoela pele ho bonahatsa boinehelo ba bomolimo.
8. Petrose o bontšitse joang hore ho hlokahala boiteko bo matla hore Mokreste ea inehetseng, ea kolobelitsoeng a phehelle boinehelo ba bomolimo?
8 Ho hlokahala boiteko bo matla hore Mokreste ea inehetseng, ea kolobelitsoeng a phehelle boinehelo ba bomolimo. Ha a ngolla Bakreste ba kolobelitsoeng ba neng ba e-na le tebello ea ‘ho fetoha ba kopanelang sebopehong sa bomolimo,’ moapostola Petrose o itse: “E, ka lona lebaka lena, ka ho tlatsetsa ha lōna ka boiteko bohle bo tiileng ha le arabela, eketsang bokhabane tumelong ea lōna, bokhabaneng ba lōna tsebo, tsebong ea lōna boitšoaro, boitšoarong ba lōna mamello, mamellong ea lōna boinehelo ba bomolimo.” (2 Petrose 1:4-6, NW) Ka ho hlakileng, ho hlokahala tekanyo e itseng ea tumelo e le hore re ka itlhahisa bakeng sa kolobetso. Leha ho le joalo, ka mor’a kolobetso re ke ke ra lula re iketlile, ra ikhotsofatsa ka setšoantšo feela sa Bokreste. Ho fapana le hoo, ha re ntse re etsa tsoelo-pele bophelong ba Bokreste, ho hlokahala hore re tsoele pele ho hlaolela litšoaneleho tse ling tse ntle, ho akarelletsa boinehelo ba bomolimo, tse ka eketsoang tumelong ea rōna. Petrose o re sena se hloka boiteko bo tiileng ka lehlakoreng la rōna.
9. (a) Lentsoe la Segerike le emelang ‘eketsa’ le bontša tekanyo ea boiteko bo hlokahalang bakeng sa ho hlaolela boinehelo ba bomolimo joang? (b) Petrose o re khothalletsa hore re etse’ng?
9 Lentsoe la Segerike leo Petrose a le sebelisang bakeng sa ‘eketsa’ (e·pi·kho·re·geʹo) le na le semelo se thahasellisang ’me le bontša tekanyo ea boiteko bo hlokahalang. Le tsoa ho lereho (kho·re·gosʹ) leo ha e le hantle le bolelang “moeta-pele oa sehlopha sa libini tšoantšisong.” Le ne le bolela motho ea neng a lefa litšenyehelo tsohle tsa ho koetlisa le ho boloka sehlopha sa libini ha li etsa tšoantšiso sethaleng. Banna ba joalo ba ne ba nka boikarabelo bona ka boithaopo ka baka la ho rata motse oa habo bona ’me ba ne ba lefa litšenyehelo ka chelete ea bona. Banna ba joalo ba ne ba le motlotlo ho ntša chelete e ngata ho hlokomela sohle se hlokahalang bakeng sa tšoantšiso e ntle. Lentsoe leo le ile la hōla ho bolela “ho eketsa, ho fana ka bongata.” (Bapisa le 2 Petrose 1:11.) Kahoo Petrose o re phehella hore re se ikekeletse tekanyo e itseng feela ea boinehelo ba bomolimo, empa ponahatso e felletseng ka hohle kamoo ho ka khonehang ea tšoaneleho ena ea bohlokoahali.
10, 11. (a) Ke hobane’ng ha ho hlokahala boiteko bakeng sa ho hlaolela le ho bonahatsa boinehelo ba bomolimo? (b) Re ka hlōla ntoa joang?
10 Empa ke hobane’ng ha boiteko bo joalo bo hlokahala bakeng sa ho hlaolela le ho bonahatsa boinehelo ba bomolimo? Lebaka le leng ke hore re loantša nama e lemalletseng sebe. Kaha “tšekamelo ea pelo ea motho e mpe ho tloha bocheng ba hae,” ha ho bonolo ho phehella bophelo ba ho utloa Molimo ka mafolo-folo. (Genese 8:21, NW; Ba-Roma 7:21-23) Moapostola Pauluse o re: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.” (2 Timothea 3:12, NW) E, Mokreste ea lekang ka matla ho phela ka tsela e khahlisang Molimo o tlameha ho fapana le lefatše. O na le litekanyetso le lipakane tse fapaneng. Joalokaha Jesu a lemositse, sena se tsosa lehloeo lefatšeng le khopo.—Johanne 15:19; 1 Petrose 4:4.
11 Leha ho le joalo, re ka hlōla ntoa, hobane “Jehova o tseba kamoo a ka lopollang batho ba boinehelo ba bomolimo tekong.” (2 Petrose 2:9, NW) Empa, re tlameha ho etsa karolo ea rōna ka ho tsoela pele ho phehella boinehelo ba bomolimo.
Ho Hlaolela Boinehelo ba Bomolimo
12. Petrose o bontša se hlokahalang bakeng sa ho hlaolela boinehelo ba bomolimo ka tekanyo e felletseng haholoanyane joang?
12 Ka hona, ke joang u ka hlaolelang boinehelo bona ba bomolimo ka tekanyo e felletseng haholoanyane? Moapostola Petrose o fana ka tataiso. Ho 2 Petrose 1:5, 6 (NW), ha a thathamisa litšoaneleho tse tlamehang ho eketsoa tumelong ea rōna, o thathamisa tsebo e le e tlang pele ho boinehelo ba bomolimo. Pejana khaolong eona eo, o ngotse: “Matla a hae a bomolimo a re file ka bolokolohi lintho tsohle tse amang bophelo le boinehelo ba bomolimo, ka tsebo e nepahetseng ea ea re bitsitseng.” (2 Petrose 1:3, NW) Ka hona Petrose o amahanya boinehelo ba bomolimo le tsebo e nepahetseng ea Jehova.
13. Ke hobane’ng ha tsebo e nepahetseng e hlokahala haholo bakeng sa ho hlaolela boinehelo ba bomolimo?
13 Ha e le hantle, ka ntle ho tsebo e nepahetseng ha ho kamoo boinehelo ba bomolimo bo ka hlaoleloang. Hobane’ng? Koana, hopola hore boinehelo ba bomolimo bo isoa ho Jehova joaloka motho ’me bo pakoa ke tsela eo re phelang bophelo ba rōna ka eona. Ka hona tsebo e nepahetseng ea Jehova ea hlokahala, kaha e akarelletsa ho mo tseba joaloka motho, haufi-ufi, ho tloaelana ka ho phethahetseng le litšobotsi le litsela tsa hae. Ho feta moo, e akarelletsa ho loanela ho mo etsisa. (Ba-Efese 5:1) Ha re etsa tsoelo-pele e eketsehileng ea ho ithuta ka Jehova le ho bonahatsa litsela le litšoaneleho tsa hae bophelong ba rōna, re mo tseba hamolemonyana. (2 Ba-Korinthe 3:18; bapisa le 1 Johanne 2:3-6.) Joale, sena se fella ka kananelo e tebileng haholoanyane ea litšoaneleho tsa bohlokoa tsa Jehova, tekanyo e felletseng haholoanyane ea boinehelo ba bomolimo.
14. Ho fumana tsebo e nepahetseng, lenaneo la rōna la thuto ea botho le lokela ho akarelletsa eng, hona hobane’ng?
14 U ka fumana tsebo e nepahetseng joalo joang? Ha ho na litselana tse khaoletsang. Ho fumana tsebo e nepahetseng, re tlameha ho ithuta Lentsoe la Molimo le likhatiso tse theiloeng Bibeleng ka matla. Thuto e joalo ea botho e lokela ho akarelletsa lenaneo la ho bala Bibele ka mehla, le kang le lokiselitsoeng mabapi le Sekolo sa Tšebeletso sa Puso ea Molimo. (Pesaleme ea 1:2, NW) Kaha Bibele ke mpho e tsoang ho Jehova, seo re se etsang tabeng ea ho ithuta Bibele ke pontšo ea hore na re ananela mpho eo hakae. Mekhoa ea hao ea thuto ea botho e senola eng ka botebo ba kananelo ea hao bakeng sa litokisetso tsa Jehova tsa moea?—Pesaleme ea 119:97.
15, 16. (a) Ke eng e ka re thusang ho hlaolela takatso e ntle ea lijo tsa moea bakeng sa thuto ea botho ea Bibele? (b) Hore thuto ea botho ea Bibele e tle e felle ka ho hlaolela ha rōna boinehelo ba bomolimo, motho o lokela ho etsa eng ha a bala karolo ka ’ngoe ea Lentsoe la Molimo?
15 Rea lumela hore ho ithuta le ho bala ha ho bonolo ho ba bang. Empa ka nako le boiteko, u ka hlaolela takatso e ntle ea lijo tsa moea bakeng sa thuto ea botho ea Bibele. (1 Petrose 2:2) Ha u nahanisisa ka kananelo ka sohle seo Jehova Molimo a se entseng, seo a ntseng a se etsa, le seo a sa ntsaneng a tla se etsa molemong oa hao, pelo ea hao e tla u susumelletsa ho ithuta sohle seo u ka ithutang sona ka eena.—Pesaleme ea 25:4.
16 Empa hore thuto e joalo ea botho ea Bibele e tle e felle ka ho hlaolela ha hao boinehelo ba bomolimo, sepheo sa hao e ke ke ea ba feela ho koahela maqephe a boitsebiso kapa ho tlatsa kelello ea hao boitsebiso. Ho fapana le hoo, ha u bala karolo e itseng ea Lentsoe la Molimo, u tlameha ho ipha nako ea ho nahanisisa ka boitsebiso boo, u ipotse lipotso tse kang: ‘Bo nthuta eng ka litšoaneleho le litsela tse mosa tsa Jehova? Nka tšoana haholoanyane le Jehova joang lintlheng tsee?’
17. (a) Re ithuta eng ka mohau oa Jehova bukeng ea Hosea? (b) Ho nahanisisa ka mohau oa Jehova ho lokela ho re ama joang?
17 Nahana ka mohlala o mong. Nakoana e seng kae e fetileng ’malo oa rōna oo re neng re o abetsoe Sekolong sa Tšebeletso sa Puso ea Molimo o ile oa re isa bukeng ea Hosea. Ka mor’a ho bala buka ena eohle ea Bibele, u ka ’na ua ipotsa: ‘Ke ithuta eng ka Jehova joaloka Motho—litšoaneleho le litsela tsa hae—bukeng ee?’ Tsela eo e sebelisitsoeng ka eona ke lingoli tsa morao tsa Bibele e bontša hore re ithuta ho hongata ka mohau o mosa oa Jehova bukeng ea Hosea. (Bapisa Mattheu 9:13 le Hosea 6:6; Ba-Roma 9:22-26 le Hosea 1:10 le 2:21-23.) Ho ithaopela ha Jehova ho bontša mohau ho Iseraele ho ile ha tšoantšetsoa ka litšebelisano tsa Hosea le mosali oa hae, Gomere. (Hosea 1:2; 3:1-5, NW) Le hoja tšollo ea mali, ho utsoa, bohlola, le borapeli ba melimo ea litšoantšo li ne li atile Iseraeleng, Jehova o ile ‘a bua le pelo ea Iseraele.’ (Hosea 2:13, 14; 4:2) Jehova o ne a sa tlameha ho bontša mohau empa o ne a tla etsa joalo ka “ho ithatela” ha hae, haeba Baiseraele ba ne ba ka bontša pako e tlohang botebong ba pelo ’me ba furalla tsela ea bona ea boetsalibe. (Hosea 14:4; bapisa le Hosea 3:3, NW.) Ha u ntse u nahanisisa ka tsela ena ka mohau o sa tloaelehang oa Jehova, o tla susumetsa pelo ea hao, o matlafatse kamano ea hao ea botho le eena.
18. Ka mor’a ho nahanisisa ka mohau oa Jehova joalokaha o hatisitsoe ho Hosea, u ka ’na ua ipotsa eng?
18 Empa ho hlokahala ho eketsehileng. Jesu o itse: “Ho lehlohonolo ba mohau; hobane ba tla hauheloa.” (Mattheu 5:7) Ka hona, ka mor’a ho nahanisisa ka mohau oa Jehova joalokaha o hatisitsoe bukeng ea Hosea, ipotse: ‘Ke joang nka etsisang mohau oa Jehova hamolemonyana litšebelisanong tsa ka le ba bang? Haeba moena kapa khaitseli ea ntšitetsoeng kapa ea nkhopisitseng a nkōpa tšoarelo, na ke tšoarela “ka thabo”?’ (Ba-Roma 12:8; Ba-Efese 4:32) Haeba u sebeletsa ka phuthehong u le moholo ea khethiloeng, u ka ’na ua ipotsa: ‘Ha ke sebetsana le litaba tsa boahloli, ke joang nka etsisang Jehova hamolemonyana, ea lutseng “a loketse ho tšoarela,” haholo-holo haeba mofosi a fana ka bopaki ba ’nete ba pako e tlohang botebong ba pelo?’ (Pesaleme ea 86:5, NW; Liproverbia 28:13) ‘Ke lokela ho talima eng e le motheo oa ho bontša mohau?’—Bapisa Hosea 5:4 le 7:14.
19, 20. (a) Phello e ba efe ha thuto ea Bibele e etsoa ka mokhoa o phethahetseng? (b) Thuso e eketsehileng ea ho hlaolela boinehelo ba bomolimo ke efe?
19 Thuto ea hao ea botho ea Bibele e fetoha e putsang hakaakang ha e etsoa ka mokhoa o phethahetseng joalo! Pelo ea hao e tla kokomoha ke kananelo bakeng sa litšoaneleho tsa bohlokoahali tsa Jehova. ’Me ka ho tsoela pele ho loanela ho etsisa litšoaneleho tsena bophelong ba hao, u tla matlafatsa kamano ea hao ea botho le eena. Ka hona u tla be u phehella boinehelo ba bomolimo u le mohlanka ea inehetseng, ea kolobelitsoeng oa Jehova.—1 Timothea 6:11, NW.
20 Thuso e eketsehileng ea ho hlaolela tšoaneleho ena ea bohlokoahali e ka fumanoa ho Jesu Kreste—mohlala o phethahetseng oa boinehelo ba bomolimo. Ho latela mohlala oa Jesu ho tla u thusa joang ho hlaolela boinehelo ba bomolimo le ho bo bonahatsa? Sehlooho se leqepheng la 18 se tla tšohla potso ena le tse amanang le eona.
[Mongolo o botlaaseng ba leqephe]
a Mabapi le lentsoe la Segerike di·oʹko (“phehella”), The New International Dictionary of New Testament Theology e hlalosa hore mengolong ea Baroma le Bagerike lentsoe leo “[tlhaloso ea lentsoe ka lentsoe] le bolela ho lelekisa, ho phehella, ho matha ka mor’a, . . . le [ka tšoantšetso] ho phehella ntho e ’ngoe ka cheseho, ho leka ho finyella ntho e ’ngoe, ho leka ho fumana.”
U ne u Tla Arabela Joang?
◻ Ke hobane’ng ha kolobetso e se bohato ba ho qetela boo u bo nkang tseleng ea hao ea Bokreste?
◻ “Boinehelo ba bomolimo” bo bolela eng, ’me u ka bo paka joang?
◻ Ke hobane’ng ha ho hlokahala boiteko bo matla bakeng sa ho hlaolela boinehelo ba bomolimo?
◻ U ka hlaolela boinehelo ba bomolimo ka tekanyo e felletseng haholoanyane joang?