Khaolo 44

Tšenolo le Uena

 1. (a) Lengeloi le re’ng ha le kholisa Johanne mabapi le litšepiso tsohle tse hlollang tse fumanoang ho Tšenolo? (b) Ke mang ea reng, “Ke tla kapele,” ’me o ‘tla’ neng?

HA U bala tlhaloso e thabisang ea Jerusalema e Mocha, u ka ’na ua susumelletseha ho botsa: ‘Na ka sebele ntho e ntle hakaalo e ka ba teng?’ Johanne o araba potso eo ka ho tlaleha mantsoe a latelang a lengeloi: “[La] re ho ’na: ‘Mantsoe ana aa tšepahala ’me ke a ’nete; e, Jehova Molimo oa lipolelo tse bululetsoeng tsa baprofeta o ile a romela lengeloi la hae ho bontša makhoba a hae lintho tse tla etsahala haufinyane. Bona! Ke tla kapele. Ho thaba mang kapa mang ea bolokang mantsoe a boprofeta ba moqolo ona.’” (Tšenolo 22:6, 7) Ka sebele litšepiso tsohle tse hlollang tsa Tšenolo li tla phethahala! Ha le bua lebitsong la Jesu, lengeloi le re Jesu o tla ka potlako, “kapele.” E tlameha ebe ena ke nako eo ka eona Jesu a tlang “joaloka lesholu” ho tla timetsa lira tsa Jehova le ho tlisa tlhōrō e hlollang ka botle le e thabisang ea Tšenolo. (Tšenolo 16:15, 16) Kahoo, re lokela ho etsa hore bophelo ba rōna bo lumellane le mantsoe a “moqolo ona” oa Tšenolo, e le hore ka nako eo ho tle ho phatlalatsoe hore re thabile.

 2. (a) Johanne o etsa’ng ha a utloa tlhaloso e tletseng boitsebiso bo tebileng ea tšenolo, ’me lengeloi le re’ng ho eena? (b) Re ithuta eng mantsoeng a lengeloi a reng, “Hlokomela!” le a reng, “Rapela Molimo”?

² Ka mor’a boitsebiso bo tebileng ba tšenolo, ke ho utloahalang hore ebe Johanne o ne a ka ikutloa a hloletsoe. O re: “Joale, ’na Johanne ke ne ke utloa ’me ke bona lintho tsena. Ha ke utloile ’me ke bone, ka itihela fatše ho rapela ka pel’a maoto a lengeloi le neng le mpontša lintho tsena. Empa lea mpolella: ‘Hlokomela! U se ke ua etsa joalo! Ke mpa feela ke le lekhoba-’moho le uena le barab’eno ba baprofeta le ba bolokang mantsoe a moqolo ona. Rapela Molimo.’” (Tšenolo 22:8, 9; bapisa le Tšenolo 19:10.) Temoso ena e phetiloeng habeli ea ho se rapele mangeloi e ne e tlile ka nako e loketseng mehleng ea Johanne, ha ho ne ho bonahala hore ba bang ba ne ba ntšetsa pele borapeli bo joalo kapa ba bolela hore ba fumane litšenolo tse khethehileng ho mangeloi. (1 Bakorinthe 13:1; Bagalata 1:8; Bakolose 2:18) Kajeno, hoo ho totobatsa ’nete ea hore re tlameha ho rapela Molimo feela. (Matheu 4:10) Ha rea lokela ho silafatsa borapeli bo hloekileng ka ho rapela mang kapa mang kapa ntho leha e le efe.—Esaia 42:5, 8.

 3, 4. Lengeloi le tsoela pele ho bolella Johanne eng, ’me masala a tlotsitsoeng a mametse mantsoe a lona joang?

³ Johanne o tsoela pele ho re: “Le boetse lea mpolella: ‘U se ke ua tiisa mantsoe a boprofeta ba moqolo ona, etsoe nako e behiloeng e haufi. Ea etsang ho sa lokang, a ’ne a etse ho sa lokang; ea litšila a ’ne a silafatsoe; empa ea lokileng a ’ne a etse ho lokileng, ’me ea halalelang a ’ne a halaletsoe.’”—Tšenolo 22:10, 11.

⁴ Kajeno masala a tlotsitsoeng a mametse mantsoe a lengeloi leo. Ha aa tiisa mantsoe ao a boprofeta. Khatiso ea pele ea Zion’s Watch Tower and Herald of Christ’s Presence (July 1879) e ile ea hlalosa litemana tse ngata tsa Tšenolo. Joalokaha re hlokometse khaolong ea rōna e qalang, ka lilemo Lipaki Tsa Jehova li ’nile tsa hatisa libuka tse ling tse re behang leseling ka Tšenolo. Hona joale re boetse re hlokomelisa bohle ba ratang ’nete boprofeta bo matla ba Tšenolo le ho phethahala ha bona.

 5. (a) Ho thoe’ng haeba batho ba batla ho hlokomoloha litemoso le keletso tse hlahang ho Tšenolo? (b) Ba bonolo le ba lokileng ba lokela ho etsa’ng?

⁵ Haeba batho ba batla ho hlokomoloha litemoso le keletso tse ho Tšenolo, a ba etse joalo! “Ea etsang ho sa lokang, a ’ne a etse ho sa lokang.” Haeba ke sona seo ba ikhethelang ho se etsa, ba qhafutsang litšileng tsa mehla ena ea ho lumella ntho e ’ngoe le e ’ngoe ba tla shoela litšileng tseo. Haufinyane, likahlolo tsa Jehova li tla phethahatsoa ka ho feletseng, ho qala ka ho timetsoa ha Babylona e Moholo. E se eka ka mafolofolo batho ba bonolo ba ka ela hloko mantsoe ana a moprofeta: “Le batle Jehova . . . Batlang ho loka, le batle bonolo. Mohlomong le ka patoa letsatsing la bohale ba Jehova.” (Sofonia 2:3) Ha e le ba seng ba ntse ba inehetse ho Jehova, “ea lokileng a ’ne a etse ho lokileng, ’me ea halalelang a ’ne a halaletsoe.” Batho ba bohlale baa tseba hore ha ho na molemo oa nakoana o tlisoang ke sebe o ka bapisoang le litlhohonolofatso tse sa feleng tse tla fumanoa ke ba phehellang ho loka le khalalelo. Bibele e re: “Le ’ne le inonye hore na le tumelong, le ’ne le leke seo le leng sona.” (2 Bakorinthe 13:5) Motheong oa tsela eo u e khethileng eo u bileng u tsoelang pele ka eona, u tla amohela moputso oa hao.—Pesaleme ea 19:9-11; 58:10, 11.

 6. Jehova o re’ng ha a bua le babali ba Tšenolo lekhetlo la ho qetela boprofeteng boo?

⁶ Joale Jehova, Morena oa bosafeleng, o bua le babali ba Tšenolo lekhetlo la ho qetela boprofeteng bona, o re: “Bona! Ke tla kapele, ’me moputso oo ke nehelanang ka oona o ho ’na, ho fa e mong le e mong kamoo mosebetsi oa hae o leng kateng. Ke ’na Alfa le Omega, oa pele le oa ho qetela, qalo le qetello. Ho thaba ba hlatsoang liaparo tsa bona tse telele tsa ka holimo, e le hore ba ka ba le matla a ho ea lifateng tsa bophelo e le hore ba ka kena motseng ka liheke tsa oona. Ka ntle ke lintja le ba sebelisanang le meea le lihlola le babolai le barapeli ba litšoantšo le e mong le e mong ea ratang leshano le ea tsoelang pele ka lona.”—Tšenolo 22:12-15.

 7. (a) Jehova o “tla kapele” o tlil’o etsa’ng? (b) Ke hobane’ng ha baruti ba Bokreste-’mōtoana ba ke ke ba e-ba le sebaka Jerusalema e Mocha?

⁷ Hape-hape, Jehova Molimo o hatisa bobusi ba hae bo sa feleng le ’nete ea hore seo a se rerileng pele o tla qetella a se phethile. ‘O tla kapele’ ho tla phethahatsa kahlolo ’me o tla putsa ba mo batlang ka tieo. (Baheberu 11:6) Melao ea hae ke eona e rerang hore na ke bo-mang ba tla putsoa le ba tlang ho qheloa. Baruti ba Bokreste-’mōtoana ba itšoere joaloka “lintja tse sa khoneng ho bua,” ba iphapanyetsa bokhopo boo Jehova a bo hlalosang mona. (Esaia 56:10-12; bona le Deuteronoma 23:18, NW, botlaaseng ba leqephe.) Ka sebele, ‘ba ratile’ lithuto tsa leshano tsa bolumeli ba ba ba ‘tsoela pele ka’ tsona ’me ba hlokomolohile keletso ea Jesu e eang ho liphutheho tse supileng ka ho feletseng. Ka lebaka leo, ha ba na sebaka Jerusalema e Mocha.

 8. (a) Ke bo-mang feela ‘ba eang lifateng tsa bophelo,’ ’me seo se bolela’ng? (b) Bongata bo boholo bo “hlatsoitse liaparo tsa bona tse telele tsa ka holimo” joang, ’me bo boloka boemo ba bona bo hloekileng joang?

⁸ Ke feela Bakreste bao ba tlotsitsoeng bao kannete ba “hlatsoang liaparo tsa bona tse telele tsa ka holimo” e le hore e ka ba ba hloekileng mahlong a Jehova, ba filoeng tlotla ea ho ea “lifateng tsa bophelo.” Ka mantsoe a mang, ba amohela tokelo le tlotla ea bophelo ba ho se shoe boemong ba bona leholimong. (Bapisa le Genese 3:22-24; Tšenolo 2:7; 3:4, 5.) Ka mor’a hore ba shoe e le batho, ba kena Jerusalema e Mocha ka tsoho. Mangeloi a 12 a ba lumella ho kena, ha a ntse a thibela mang le mang ea itloaelitseng leshano kapa litšila le hoja a ipolela hore o na le tšepo ea ho phela leholimong. Bongata bo boholo bo lefatšeng le bona bo “hlatsoitse liaparo tsa bona tse telele tsa ka holimo ’me [bo] li soeufalitse maling a Konyana” ’me ho hlokahala hore bo boloke boemo ba bona bo hloekileng. Bo ka etsa sena ka ho qoba bokhopo boo Jehova a lemosang ka bona mona, hammoho le ho tebisetsa pelong keletso ea Jesu e melaetseng ea hae e supileng e eang ho liphutheho.—Tšenolo 7:14; khaolo ea 2 le ea 3.

 9. Jesu o bua mantsoe afe, ’me molaetsa oa hae le Tšenolo eohle li tobisitsoe ho bo-mang haholo-holo?

⁹ Ka mor’a Jehova, Jesu oa bua. O tobisa mantsoe a khothatso ho ba lipelo li lokileng ba balang Tšenolo, o re: “’Na, Jesu, ke ile ka romela lengeloi la ka hore le le pakele lintho tsena bakeng sa liphutheho. Ke ’na motso le ngoana oa Davida, le naleli e khanyang ea hoseng.” (Tšenolo 22:16) E, mantsoe ana a lebisitsoe haholo-holo ho “liphutheho.” Ona ke molaetsa oo, pele ho tsohle, o lebisoang phuthehong ea Bakreste ba tlotsitsoeng lefatšeng. Ntho e ’ngoe le e ’ngoe e hlahang ho Tšenolo e tobisitsoe haholo-holo ho Bakreste ba tlotsitsoeng, ba tla aha Jerusalema e Mocha. Ka phutheho eo, bongata bo boholo le bona bo nehoa tlotla ea ho utloisisa linnete tsena tsa bohlokoa tsa boprofeta.—Johanne 17:18-21.

10. Ke hobane’ng ha Jesu a ile a ipitsa (a) “motso le ngoana oa Davida”? (b) “naleli e khanyang ea hoseng”?

¹⁰ Jesu Kreste o ne a tšepetsoe hore a fetisetse Tšenolo ho Johanne ’me ka eena e fetisetsoe ho phutheho. Jesu ke “motso le ngoana oa Davida.” Ke setloholo sa Davida ka nama, kahoo oa tšoaneleha ho ba Morena oa ’Muso oa Jehova. Hape e tla ba “Ntate oa ka ho sa Feleng” oa Davida, ka tsela eo e be “motso” oa Davida. (Esaia 9:6; 11:1, 10) Ke Morena oa ka ho sa feleng, ea sa shoeng lelokong la Davida, ho phethahatsa selekane sa Jehova le Davida, hape ke “naleli e khanyang ea hoseng” e profetiloeng mehleng ea Moshe. (Numere 24:17; Pesaleme ea 89:34-37) Ke eena “naleli ea meso” e hlahang, e bontšang ho chaba ha letsatsi. (2 Petrose 1:19) Maqiti ’ohle a sera se seholo, e leng Babylona e Moholo, a ile a hlōleha ho thibela ho hlaha hona ho khanyang.

E-Re: “Tloo!”

11. Ke memo efe e eang ho mang kapa mang eo joale Johanne a fanang ka eona, ’me ke bo-mang ba ka e amohelang?

¹¹ Joale ke nako ea hore Johanne a bue. Ka pelo e tletseng kananelo bakeng sa sohle seo a se boneng le seo a se utloileng, o re: “Moea le monyaluoa ba ntse ba re: ‘Tloo!’ Mang kapa mang ea utloang a ke a re: ‘Tloo!’ Mang kapa mang ea nyoriloeng a ke a tle; mang kapa mang ea lakatsang a ke a nke metsi a bophelo ntle ho tefo.” (Tšenolo 22:17) Melemo ea sehlabelo sa thekollo sa Jesu e ke ke ea fella feela ho ba 144 000, hobane ena ke memo e eang ho mang kapa mang. Moea o susumetsang oa Jehova o sebetsa ka sehlopha sa monyaluoa, e le hore molaetsa ona o ka tsoela pele ho phatlalatsoa ka ho hlaka hohle: ‘Nkang metsi a bophelo ntle ho tefo.’ (Bona le Esaia 55:1; 59:21.) Mang kapa mang ea nyoretsoeng ho loka o memeloa hore a ‘tle’ ’me a amohele matletsetletse a tsoang ho Jehova. (Matheu 5:3, 6) Bohle ba lebeletseng ho ba sehlopha sa lefatšeng, ba amohelang memo ee ea sehlopha se tlotsitsoeng sa Johanne, ba nehiloe tlotla e kaakang!

12. Bongata bo boholo bo etsa’ng ha ho bo utloa memo e hlahang ho Tšenolo 22:17?

¹² Ho tloha qalong ea bo-1930, ba bongata bo boholo ba ntseng ba eketseha ka palo ba ’nile ba ‘utloa’—ba ela hloko memo ena. Joaloka makhoba-’moho le bona a tlotsitsoeng, ba fumane boemo bo hloekileng ka pel’a Jehova. Ba hlolohetsoe nako eo ka eona Jerusalema e Mocha e tla theoha leholimong e tl’o fetisetsa litlhohonolofatso ho batho. Hoba bongata bo boholo bo utloe molaetsa o susumetsang oa Tšenolo, ha bo re feela “Tloo!” empa ka mafolofolo bo bokella ba bang hore ba tle mokhatlong o hlophisitsoeng oa Jehova, bo ba koetlisetsa hore le bona ba re: “Mang kapa mang ea nyoriloeng a ke a tle.” Kahoo palo ea bongata bo boholo e tsoela pele ho hōla, joalokaha ba fetang 6 000 000 linaheng tse fetang 235 lefatšeng lohle ba kopanela le ba ka tlaase ho 9 000 ba sehlopha sa monyaluoa se tlotsitsoeng ha ba fana ka memo ea hore batho ba ‘nke metsi a bophelo ntle ho tefo.’

13. Jesu o fana ka temoso efe?

¹³ Ka mor’a moo, ke Jesu ea boetseng a buang, o re: “Ke pakela e mong le e mong ea utloang mantsoe a boprofeta ba moqolo ona: Haeba mang kapa mang a eketsa linthong tsena, Molimo o tla mo ekeletsa likotlo tse ngotsoeng moqolong ona; haeba mang kapa mang a tlosa ntho leha e le efe mantsoeng a moqolo oa boprofeta bona, Molimo o tla tlosa kabelo ea hae lifateng tsa bophelo le motseng o halalelang, lintho tseo ho ngotsoeng ka tsona moqolong ona.”—Tšenolo 22:18, 19.

14. Sehlopha sa Johanne se talima “boprofeta” ba Tšenolo joang?

¹⁴ Ba sehlopha sa Johanne ba tlameha ho hlokomelisa batho “boprofeta” ba Tšenolo. Ha baa lokela ho bo pata kapa ho bo eketsa. Molaetsa oa bona o tlameha ho boleloa phatlalatsa, “holim’a matlo.” (Matheu 10:27) Tšenolo e bululetsoe ke Molimo. Ke mang ea ka lekang ho fetola lentsoe la seo Molimo a se buileng a ba a se fetisa ka eo hona joale e leng Morena ea busang, Jesu Kreste? Ka sebele, motho ea joalo o ne a tla lokela hore a lahleheloe ke bophelo le hore a otloe ka likotlo tse tlamehang ho oela Babylona e Moholo le lefatše lohle.

15. Ha Jesu a re ke eena “ea pakang lintho tsena” le ha a re “ke tla kapele” o bolela’ng?

¹⁵ Joale Jesu o phaella ka polelo ea ho qetela ea khothatso: “Ea pakang lintho tsena o re, ‘E; ke tla kapele.’” (Tšenolo 22:20a) Jesu ke “paki e tšepahalang le ea ’nete.” (Tšenolo 3:14) Haeba a beha bopaki ka lipono tsa Tšenolo, e tlameha ebe ke ’nete. Eena le Jehova Molimo ka boeena khafetsa ba hatisa taba ea hore ba tla “kapele,” kapa haufinyane, ’me mona Jesu o bolela seo ka lekhetlo la bohlano. (Tšenolo 2:16; 3:11; 22:7, 12, 20) Morero oa ‘ho tla’ hona ke ho tla phethahatsa kahlolo holim’a seotsoa se seholo, “marena” a lipolotiki le ba bang bohle ba hanyetsang “’muso oa Morena [Jehova] oa rōna le oa Kreste oa hae.”—Tšenolo 11:15; 16:14, 16; 17:1, 12-14.

16. Kaha ua tseba hore Jehova Molimo le Jesu ba tla kapele, ke bohato bofe bo tiileng boo u lokelang ho bo nka?

¹⁶ Ho tseba ha hao hore Jehova Molimo le Jesu ba tla kapele ho lokela ho u khothalletsa hore u lule ‘u hopola ho ba teng ha letsatsi la Jehova.’ (2 Petrose 3:12) Ho tsitsa hofe kapa hofe ho bonahalang ho le teng ha lefatše la tsamaiso ea lintho ea Satane ke ho thetsang. Katleho leha e le efe eo ho bonahalang eka leholimo la babusi ba lefatše le tlas’a Satane le ka e finyella ke ea nakoana. Lintho tsena lia feta. (Tšenolo 21:1) Lintho tse sa feleng li ka fumanoa feela ho Jehova, ’Musong oa hae o tlas’a Jesu Kreste, le lefatšeng le lecha leo a le tšepisitseng. Le ka mohla u se ke ua lebala sena!—1 Johanne 2:15-17.

17. Kananelo ea hao bakeng sa ho halalela ha Jehova e lokela ho u ama joang?

¹⁷ Joale, e se eka u ka lumella seo u ithutileng sona ho Tšenolo hore se susumetse bophelo ba hao ka ho teba. Na ho nyarela ha hao moo Jehova a leng teng leholimong ha hoa ka ha hatisa ho uena khanya e phatsimang le ho halalela ha ’Mōpi oa rōna? (Tšenolo 4:1–5:14) Ke tlotla e kaakang ho sebeletsa Molimo ea joalo! E se eka kananelo ea hao bakeng sa ho halalela ha hae e ka u susumelletsa hore u nke ka botebo keletso ea Jesu e eang ho liphutheho tse supileng le hore u qobe lintho tse kang ho rata lintho tse bonahalang, borapeli ba litšoantšo, boitšoaro bo bobe, ho ba foofo, lihlopha tsa bokhelohi tsa bokoenehi, kapa ntho efe kapa efe e ka etsang hore tšebeletso ea hao e se ke ea amoheleha ho Jehova. (Tšenolo 2:1–3:22) Mantsoe a moapostola Petrose a eang ho sehlopha sa Johanne a boetse a sebetsa e le molao-motheo ho bongata bo boholo: “Tumellanong le Mohalaleli ea le bitsitseng, le lōna le fele le halalele boitšoarong bohle ba lōna.”—1 Petrose 1:15, 16.

18. Ke eng eo u lokelang ho kopanela ho eona ka botlalo kamoo u ka khonang, hona ke hobane’ng ha mosebetsi oo o potlakile kajeno?

¹⁸ Ho phaella moo, e se eka u ka susumelletseha hore u be le cheseho e nchafalitsoeng ha u phatlalatsa “selemo sa Jehova sa kamohelo le letsatsi la phetetso la Molimo oa rōna.” (Esaia 35:4; 61:2) Ebang u oa mohlatsoana kapa oa bongata bo boholo, e se eka u ka kopanela ka botlalo kamoo ho ka khonehang ho phatlalatsa ho tšolloa ha likotlolo tse supileng tsa bohale ba Jehova, ho bolela likahlolo tsa Molimo holim’a lefatše la Satane. Ka nako e tšoanang, tlatsetsa ka lentsoe la hao phatlalatsong e thabisang ea litaba tse molemo tse sa feleng tsa ho hlongoa ha ’Muso oa Jehova le Kreste oa hae. (Tšenolo 11:15; 14:6, 7) Etsa mosebetsi ona ka potlako. ’Me e se eka ho hlokomela hore re letsatsing la Morena ho ka susumelletsa ba bangata ba e-song ho sebeletse Jehova hore ba kopanele mosebetsing oa ho phatlalatsa litaba tse molemo. E se eka bana le bona ba ka tsoela pele ’me ba nehele bophelo ba bona ho Molimo e le hore ba kolobetsoe. Hopola, “nako e behiloeng e haufi”!—Tšenolo 1:3.

19. Mantsoe a qetellang a moapostola Johanne ea tsofetseng ke afe, ’me u etsa joang ha u a utloa?

¹⁹ Kahoo, re kopane le Johanne, ka tieo rea rapela: “Amen! Tloo, Morena Jesu!” ’Me moapostola ea tsofetseng, Johanne, o eketsa ka ho re: “E se eka mosa o sa tšoanelang oa Morena Jesu Kreste o ka ba le bahalaleli.” (Tšenolo 22:20b, 21) E se eka o ka boela oa e-ba le lōna bohle ba balang buka ena. E se eka u ka ba le tumelo ea hore tlhōrō e hlollang ka botle ea Tšenolo e haufi, e le hore le uena u ka kopanela le rōna ha re bua ho tsoa botebong ba pelo re re “Amen!”

[Setšoantšo se leqepheng la 314]

“Ka ntle ke lintja . . . ”

[Setšoantšo se leqepheng la 315]

‘Ho thaba ba kenang motseng ka liheke tsa oona’