Le ’Ne le Hōle Tsebong
“Ekeletsang tumelong ea lōna . . . tsebo.”—2 PETROSE 1:5, NW.
1, 2. (a) U ka ithuta eng ka ho sheba maholimo? (Ba-Roma 1:20) (b) Ha e le hantle motho a ka khona ho eketsa tsebo ea hae ho isa bohōleng bofe?
KE ENG seo u ka ithutang sona ha u tsoela ka ntle bosiung bo hlakileng, ho le lefifi ’me u sheba khoeli le linaleli tse se nang palo? Ho na le seo u ka ithutang sona ka Ea entseng lintho tsena tsohle.—Pesaleme ea 19:1-6; 69:34.
2 Haeba u ne u batla ho eketsa tsebo eo, na u ne u tla hloella ka holim’a marulelo a ntlo ea hao ebe u sheba u le moo? Mohlomong u ne u ke ke ua etsa joalo. Albert Einstein o kile a sebelisa papiso e joalo ha a hlakisa hore bo-rasaense ha ba hlile ha baa eketsa tsebo hakaalo ka bokahohle ’me ka sebele ba tseba hanyenyane haholo ka Ea bo entseng.a Dr. Lewis Thomas o ile a ngola: “Ntho e ’ngoe e khōlō ka ho fetisisa e finyelletsoeng ke saense makholong ana a lilemo a atlehang haholo saenseng ke ho sibolla hore re lefifing la ho hloka tsebo ka ho tebileng; re tseba hanyenyane haholo ka tlhaho ’me re utloisisa ho fokolang ka ho fetisisa ka eona.”
3. Ho eketsa tsebo ho eketsa bohloko ka kutloisiso efe?
3 Esita leha u ka qeta lilemo tsohle tse setseng tse tloaelehileng tsa bophelo u ntse u batla tsebo e joalo, u ka hlokomela haholo feela kamoo bophelo bo leng bokhutšoaane ka teng ’me u bone ka ho hlaka hore tšebeliso ea motho ea tsebo e lekanyelitsoe ke ho se phethahale le ‘ho khopama’ ha lefatše lena. Salomone o ile a bua ka ntlha ena, ha a ngola: “Moo ho nang le hlalefo e ngata, ho hlomoha ho hongata ho teng le hona, ’me ea itotisetsang [“eketsang,” NW] tsebo, o itotisetsa le bona bohloko.” (Moeklesia 1:15, 18) E, ho rua tsebo le bohlale ho sa tsejoe merero ea Molimo hangata ho kopanyeletsa bohloko le matšoenyeho.—Moeklesia 1:13, 14; 12:12; 1 Timothea 6:20.
4. Re lokela ho batla tsebo ea mofuta ofe?
4 Na Bibele e khothaletsa hore re se ke ra thahasella ho eketsa tsebo ea rōna? Moapostola Petrose o ile a ngola: “Che, empa le ’ne le hōle moseng o sa tšoanelang le tsebong ea Morena oa rōna le Mopholosi Jesu Kreste. Ho eena e be khanya hona joale le ka ho sa feleng.” (2 Petrose 3:18, NW) Re ka amohela ’me ra nka khothatso ena e matla e sebetsa ho rōna, e re susumeletsa hore re hōle tsebong. Empa tsebong ea mofuta ofe? Re ka hōla joang ho eona? Hona na re hlile re etsa joalo?
5, 6. Petrose o ile a hatisa joang hore ho hlokahala re fumane tsebo?
5 Ho hōla tsebong e nepahetseng ea ’Mōpi oa bokahohle le Jesu e ne e le moko-taba oa lengolo la bobeli la Petrose. Qalong ea lona o ngotse: “E se eka mosa o sa tšoanelang le khotso li ka ekeletsoa ho lōna ka tsebo e nepahetseng ea Molimo le Jesu Morena oa rōna, hobane matla a Molimo a re file ka bolokolohi lintho tsohle tse amang bophelo le boinehelo ba bomolimo, ka tsebo e nepahetseng ea ea re bitsitseng ka khanya le bokhabane.” (2 Petrose 1:2, 3, NW) Ka hona, o hokahanya ho fumana mosa o sa tšoanelang le khotso le ho rua ha rōna tsebo ka Molimo le Mora oa hae. Sena sea utloahala, hobane ’Mōpi, Jehova, ke mohloli oa tsebo ea sebele. Motho ea tšabang Molimo o khona ho ba le pono e nepahetseng ea lintho le ho etsa liqeto tse utloahalang.—Liproverbia 1:7.
6 Joale Petrose oa khothatsa: “Ekeletsang tumelong ea lōna bokhabane, bokhabaneng ba lōna tsebo, tsebong ea lōna boitšoaro, boitšoarong ba lōna mamello, mamellong ea lōna boinehelo ba bomolimo, boinehelong ba lōna ba bomolimo kameho ea boena, kamehong ea lōna ea boena lerato. Hobane ntho tseo ha li le ho lōna ’me li khaphatseha, li tla le thibela ho ba botsoa kapa ho sitoa ho beha litholoana mabapi le tsebo e nepahetseng ea Morena Jesu Kreste.” (2 Petrose 1:5-8, NW)b Khaolong e latelang, re bala hore ho fumana tsebo ho thusa batho hore ba balehele litšila tsa lefatše. (2 Petrose 2:20) Ka hona Petrose o ile a hlakisa hore ba fetohang Bakreste ba hloka tsebo, joalokaha e hlokoa le ke ba seng ba ntse ba sebeletsa Jehova. Na u ho se seng sa lihlopha tseo?
Ithute, Pheta, Kenya Tšebetsong
7. Ba bangata ba fumane tsebo e nepahetseng ea linnete tsa motheo tsa Bibele ka tsela efe?
7 E ka ’na eaba u ithuta Bibele le Lipaki tsa Jehova hobane u hlokomela hore molaetsa oa tsona ke ’nete. Hanngoe ka beke, ka nako e ka etsang hora, le buisana ka sehlooho sa Bibele u sebelisa thuso e kang U ka Phela ka ho sa Feleng Paradeiseng Lefatšeng. Hoa babatseha! Ba bangata ba bileng le thuto e joalo le Lipaki tsa Jehova ba fumane tsebo e nepahetseng. Leha ho le joalo, ke eng seo u ka se etsang ho eketsa seo uena ka mong u ithutang sona? Litlhahiso tse ling ke tsena.c
8. Ha seithuti se lokiseletsa ho ba le thuto, se ka etsa’ng hore se ithute ho eketsehileng?
8 Pele ho nako, ha u lokisetsa thuto, habahanya boitsebiso bo tla koaheloa. Sena se bolela ho sheba sehlooho se seholo, lihloohoana, le litšoantšo leha e le life tse sebelisitsoeng ho hlakisa boitsebiso bo itseng. Joale, ha u bala serapa kapa karolo e itseng ea sengoliloeng, batla likhopolo tsa sehlooho le mangolo a li tšehetsang, u li thalle kapa u etse hore li totobale. E le ho bona haeba u ithutile linnete tse boletsoeng, leka ho araba lipotso tse leng lirapeng tse sa tšoaneng. Ha u etsa sena, leka ho beha likarabo ka mantsoe a hao. Qetellong, ikhopotse thuto eo, u leke ho hopola lintlha tse khōlō le mabaka a li tšehetsang.
9. Ho sebelisa litlhahiso tsa ho ithuta ho tla thusa motho joang hore a ithute?
9 U ka lebella hore tsebo ea hao e eketsehe haeba u sebelisa litlhahiso tsena. Hobane’ng? Lebaka le leng ke hore u tla be u bala boitsebiso ka takatso e matla ea ho ithuta, ekare u lokisa mobu. Ka ho ba le pono e akaretsang ’me ebe u sheba lintlha tse khōlō le mabaka, u tla bona kamoo lintlha li amanang ka teng le sehlooho kapa qetello. Tlhahlobo ea ho qetela e tla u thusa hore u hopole seo u ithutileng sona. Ho thoe’ng hamorao, nakong ea thuto ea Bibele?
10. (a) Ke hobane’ng ha ho pheta lintlha feela kapa boitsebiso bo bocha ho na le molemo o lekanyelitsoeng? (b) “Ho ikhopotsa lintho pakeng tsa likhefu tse telele” ho akareletsa eng? (c) Ho ka etsahala hore bara ba Baiseraele ba ile ba rua molemo joang mokhoeng oa ho pheta-pheta?
10 Litsebi mafapheng a thuto li tseba bohlokoa ba ho pheta-pheta ntho ka nako e loketseng ’me e le ka morero o itseng. Sena hase feela ho pheta mantsoe a buuoang ke motho e mong, e leng seo mohlomong u ileng ua se etsa sekolong ha u ne u ithuta lebitso le itseng, ntlha e itseng, kapa khopolo e itseng ka ho e pheta ka hlooho. Leha ho le joalo, na u ile ua bona kamoo ka potlako u lebalang seo u neng u ntse u se pheta, le hore ka potlako se tsoile kelellong? Hobane’ng? Ho pheta mantsoe a macha a buuoang ke motho e mong kapa ntlha e itseng ho ka tena, ’me liphello tsa hona ke tsa nakoana. Ke eng se ka fetolang see? Ho batla ha hao ka tieo ho ithuta ho tla thusa. Senotlolo se seng ke ho pheta-pheta ntho ka morero. Metsotso e itseng ka mor’a hore u ithute ntlha e itseng, pele u e lebala, leka ho ikhopotsa seo u ithutileng sona. Sena se bitsoa “ho khona ho ikhopotsa lintho tse ncha pakeng tsa likhefu tse telele.” Ka ho nchafatsa monahano oa hao pele u lebala, u lelefatsa nako ea ’ona ea ho boloka boitsebiso. Iseraeleng, bo-ntate ba ne ba tlameha ho ruta bara ba bona ka litaelo tsa Molimo. (Deuteronoma 6:6, 7) “Ho ruta” hona ho bolela ho ruta ka ho pheta-pheta. Ho ka etsahala hore bo-ntate ba bangata ba ne ba qala ka ho bolella bara ba bona melao ena; hamorao ba phete boitsebiso boo; ebe ba botsa bara ba bona lipotso ka seo ba ithutileng sona.
11. Ho ka etsoa eng nakong ea thuto ea Bibele ho eketsa mokhoa oa ho ithuta?
11 Haeba Paki e u khannela thuto ea Bibele, e ka ’na ea u thusa hore u ithute ka ho akaretsa taba joalo-joalo ka linako tse itseng ha thuto e ntse e tsoela pele. Sena hase bongoana. Ke mokhoa o ntlafatsang ho ithuta, kahoo, kopanela ka thabo nakong ea kakaretso e etsoang joalo-joalo. Ebe, qetellong ea thuto, u kopanela tlhahlobong ea ho qetela eo u tla e araba ka hlooho. Mohlomong ka mantsoe ao e leng a hao, u ka hlalosa lintlha tseo u tla li ruta motho e mong. (1 Petrose 3:15) Sena se tla u thusa hore seo u ithutileng sona se be mohopolong oa hao ka nako e telele.—Bapisa le Pesaleme ea 119:1, 2, 125; 2 Petrose 3:1.
12. Seithuti ka bosona se ka etsa eng ho ntlafatsa matla a sona a ho hopola boitsebiso?
12 Mohato o mong oa bohlokoa e tla ba hore uena ka mor’a letsatsi kapa a mabeli u bolelle motho e mong, mohlomong eo u kenang sekolo le eena, mosebetsi-’moho kapa moahisani seo u ithutileng sona. U ka ’na ua bolela sehlooho eaba u bolela hore u mpa u batla feela ho bona hore na u sa hopola lintlha tsa sehlooho tsa taba eo kapa litemana tse e tšehetsang tse tsoang Bibeleng. Sena se ka ’na sa tsosa thahasello ea motho e mong. Esita le haeba ho sa be joalo, hona hore ebe u pheta boitsebiso bo bocha ka mor’a letsatsi kapa a mabeli ho tla bo hatisa mohopolong oa hao. Joale etlaba u hlile u ithutile bona, u entse se khothaletsoang ke 2 Petrose 3:18.
Ho Ithuta ka Matla
13, 14. Ke hobane’ng ha re batla ho etsa ho fetang feela ho fumana boitsebiso le ho bo hopola?
13 Ho ithuta ho feta feela ho amohela linnete kapa ho khona ho hopola boitsebiso. Batho ba bolumeli mehleng ea Jesu ba ne ba etsa seo ka lithapelo tsa bona tse pheta-phetang. (Mattheu 6:5-7) Empa ba ile ba angoa joang ke boitsebiso boo? Na ba ile ba beha litholoana tsa ho loka? Ho hang. (Mattheu 7:15-17; Luka 3:7, 8) Bothata bo bong ke hore tsebo ha ea ka ea teba ka lipelong tsa bona, le ho ba ama hamolemo.
14 Ho ea ka Petrose, boemo e lokela ho ba bo fapaneng ho Bakreste, ba nakong eo le ba hona joale. O re khothalletsa hore tumelong ea rōna re eketse tsebo e tla re thusa hore re qobe ho ba botsoa kapa ho sitoa ho beha litholoana. (2 Petrose 1:5, 8, NW) Hore sena se re etsahalle, re tlameha ho batla ho hōla tsebong ena ’me re batle hore e re ame ka ho teba, e re ame ka hare-hare. Sena se ka ’na sa se etsahale ka mehla.
15. Ke bothata bofe bo ileng ba hlaha ho Bakreste ba bang ba Baheberu?
15 Mehleng ea Pauluse Bakreste ba Baheberu ba ne ba na le bothata tabeng ena. Kaha e ne e le Bajode, ba ne ba tseba Mangolo ho isa bohōleng bo itseng. Ba ne ba tseba ka Jehova le lintho tse ling tseo a li hlokang. Hamorao ba ile ba eketsa tsebo ka Messia, ba bontša tumelo, ’me ba fetoha Bakreste ba kolobelitsoeng. (Liketso 2:22, 37-41; 8:26-36) Ka likhoeli le lilemo tse ngata, e tlameha ebe ba ne ba ba teng libokeng tsa Bokreste, moo ba neng ba ka kopanela ho baleng mangolo le ho faneng ka litlhaloso. Ho ntse ho le joalo, ba bang ha baa ka ba hōla tsebong. Pauluse o ile a ngola: “Hobane ekabeba ke khale le le baruti, athe le sa ntse le tšoaneloa ke ho rutoa litaba tsa bonyenyane, tseo taba tsa Molimo li qaloang ka tsona; ’me le fetohile batho ba tšoaneloang ho fepjoa ka lebese, e seng ka lijo tse tiileng.” (Ba-Heberu 5:12) See se ne se ka etsahala joang? Na se ka etsahala le ho rōna?
16. Permafrost ke eng, hona e ama limela joang?
16 Ha re etsa papiso, nahana ka permafrost, e leng mobu o lulang e le leqhoa Arctic le libakeng tse ling moo ho batang haholo. Mobu, majoe, le metsi a ka tlas’a lefatše li fetohile leqhoa, mohlomong limithara tse 900. Hlabula, karolo e ka holimo ea mobu e ka ’na ea qhibiliha (e bitsoang karolo e sebetsang). Leha ho le joalo, moalo o monyenyane o ka holimo oa mobu o qhibilihileng hangata o ba seretse ka lebaka la hore mongobo o sitoa ho monyela karolong ena e leqhoa ea permafrost e tlaase. Hangata limela tse hlahang moalong o mosesaane o ka holimo li nyenyane kapa ha li hōle hantle; metso ea tsona e sitoa ho kenella karolong e leqhoa ea permafrost. U ka ’na ua ipotsa hore, ‘Permafrost e amana joang le taba ea ho hōla ha ka tsebong ea ’nete ea Bibele?’
17, 18. Permafrost le moalo o sebetsang li ka sebelisoa joang ho etsa papiso ka se ileng sa etsahala ho Bakreste ba bang ba Baheberu?
17 Permafrost e bontša hantle boemo ba batho bao matla a bona a kelello a sa ameheng ka mokhoa o sebetsang ho fumana tsebo e nepahetseng, ho e hopola, le ho e sebelisa. (Bapisa le Mattheu 13:5, 20, 21.) Ho ka etsahala hore motho enoa o na le matla a kelello a ho ithuta lintho tse fapa-fapaneng, ho kopanyelletsa le ’nete ea Bibele. O ile a ithuta “litaba tsa bonyenyane, tseo taba tsa Molimo li qaloang ka tsona” ’me mohlomong a tšoaneleha bakeng sa kolobetso joaloka Bakreste bao ba Baheberu. Leha ho le joalo, e ka ’na eaba ha a ‘hahamalle khōlong,’ e leng linthong tse fetang “litaba tsa thuto ea Kreste tseo ho qaloang ka tsona.”—Ba-Heberu 5:12; 6:1.
18 Ak’u iketsetse setšoantšo sa kelello sa Bakreste bao ha ba le libokeng nakong eo. Ba ne ba ba teng ’me ba falimehile, empa na mehopolo ea bona e ne e amehile ka ho ithuta? Na ka mafolo-folo le ka boikemisetso ba ne ba hōla tsebong? Mohlomong ba ne ba sa etse joalo. Ho ba neng ba sa hōla tsebong, kamoo ho ka boleloang ka teng, ho nka karolo libokeng ho ne ho etsahala moalong o mosesaane o ka holimo o sebetsang, ha tlaase ho ne ho le leqhoa. Metso ea linnete tse tiileng le tse tebileng haholoanyane e ne e sitoa ho tebela sebakeng sena sa permafrost ea kelello.—Bapisa le Esaia 40:24.
19. Kajeno Mokreste ea nang le phihlelo a ka tšoana le Bakreste ba Baheberu joang?
19 Sena se ka etsahalla Mokreste kajeno. Le hoja a le teng libokeng a ka ’na a se sebelise linako tse joalo ho hōla tsebong. Ho thoe’ng ka ho nka karolo ho tsona ka mafolo-folo? Hore motho e mocha ’neteng kapa lilemong a ithaopele ho bala lengolo kapa ho fana ka tlhaloso serapeng ka mantsoe a hae ho ka hloka boiteko bo boholo, ho bonahatsa hore o sebelisa matla a hae hantle le ka mokhoa o babatsehang. Empa Pauluse o bontšitse hore ba bang, ka lebaka la nako eo ba e qetileng e le Bakreste, ba lokela ho feta mohatong oa pele oa ho nka karolo haeba ba batla ho lula ba hōla tsebong.—Ba-Heberu 5:14.
20. Ke boitlhahlobo bofe boo e mong le e mong oa rōna a lokelang ho bo etsa?
20 Haeba Mokreste ea nang le phihlelo ho se mohla a tsoelang pele ho feta feela ho bala temana ea Bibele kapa ho fana ka karabo e tobileng ho tsoa serapeng, mohlomong ho nka karolo ha hae ho tsoa “moalong o ka holimo o sebetsang” oa kelello ea hae. Liboka li ka feta ka ho latellana empa botebo ba matla a hae a kelello bo le leqhoa, ha re ntšetsa pele papiso ea rōna ea permafrost. Re lokela ho ipotsa: ‘Na ke joalo? Na ke lumelletse hore ho be teng mokhoa o itseng oa permafrost ea kelello? Kelellong ke falimehile ’me ke thahasella ho ithuta hakae?’ Esita le haeba re ikutloa re sa khotsofatsoe ke likarabo tsa rōna tse entsoeng ka botšepehi, re ka qala hona joale ho nka mehato ea ho hōla tsebong.
21. Ke mehato efe eo ho buuoeng ka eona pejana eo u ka e sebelisang ha u lokisetsa le ha u le libokeng?
21 Ka bomong re ka sebelisa litlhahiso tse leng serapeng sa 8. Ho sa tsotellehe hore na re na le nako e telele hakae re kopanela le phutheho, re ka ikemisetsa ho hahamalla khōlong le tsebong e khōloanyane. Ho ba bang sena se ka bolela hore ba lokisetse liboka ka khothalo haholoanyane, mohlomong ba tsosolose mekhoa e neng e sebelisoa lilemong tse ngata tse fetileng empa ea tloheloa butle-butle. Ha u lokisetsa, leka ho hlokomela hore na lintlha tsa sehlooho ke life le ho utloisisa mangolo ao u sa a tloaelang a sebelisitsoeng ho hōlisa taba. Batla ntlha e ncha kapa tšobotsi e ncha tabeng e ithutoang. Ka ho tšoanang, ha liboka li ntse li tsoela pele, leka ho sebelisa litlhahiso tse boletsoeng lirapeng tsa 10 le 11. Leka ka matla ho falimeha kelellong, joaloka hoja u boloka mocheso oa kelello ea hao o le holimo. Sena se tla loantša tšekamelo leha e le efe ea hore “permafrost” e be teng; boiteko bona ba kelello bo tla boela bo qhibilihisa boemo leha e le bofe ba “leqhoa” ba boo mohlomong bo bileng teng.—Liproverbia 8:12, 32-34.
Tsebo, Thuso Bakeng sa ho Beha Litholoana
22. Re tla rua molemo joang haeba re sebeletsa ho eketsa tsebo ea rōna?
22 Re tla rua molemo joang ka bomong haeba re ameha ka taba ea ho hōla moseng o sa tšoanelang le tsebong ea Morena le Mopholosi oa rōna Jesu Kreste? Ka ho etsa boiteko ba ho boloka matla a rōna a kelello a falimehile, a loketse ho amohela tsebo, joale peō ea linnete tse ncha le tse tebileng haholoanyane tsa Bibele e tla etsa metso e tebelang tlaase, ’me kutloisiso ea rōna e tla eketseha ’me e be teng ka linako tsohle. Ho tla tšoana le seo Jesu a se boletseng papisong e ’ngoe ka lipelo. (Luka 8:5-12) Peō e oelang mobung o motle e ka etsa metso e matla ho tšehetsa lifate tse behang le ho hlahisa litholoana.—Mattheu 13:8, 23.
23. Ho ka ba le liphello life ha re tebisetsa mantsoe a 2 Petrose 3:18 pelong? (Ba-Kolosse 1:9-12)
23 Papiso ea Jesu e ne e batla e fapane, leha ho le joalo liphello tse ntle li ne li tšoana le se tšepisitsoeng ke Petrose: “Ka lona lebaka lena, ka ho tlatsetsa ha lōna ka ho arabela ka boiteko bohle bo tiileng, ekeletsang tumelong ea lōna bokhabane, bokhabaneng ba lōna tsebo . . . Hobane ntho tseo ha li le ho lōna ’me li khaphatseha, li tla le thibela ho ba botsoa kapa ho sitoa ho beha mabapi le tsebo e nepahetseng ea Morena Jesu Kreste.” (2 Petrose 1:5-8, NW) E, ho hōla ha rōna tsebong ho tla re thusa hore re behe litholoana. Re tla fumana hore ho amohela tsebo e eketsehileng e ba ho thabisang haholoanyane. (Liproverbia 2:2-5) Ho tla ba bobebe hore u hopole seo u ithutang sona ’me se tla u thusa ha u ruta ba bang hore e be barutuoa. Kahoo ka tsela ena, u tla beha haholoanyane le ho tlisa khanya ho Molimo le ho Mora oa hae. Petrose o phetha lengolo la hae: “Le ’ne le hōle moseng o sa tšoanelang le tsebong ea Morena le ’Moloki oa rōna Jesu Kreste. Ho eena e be khanya hona joale le ka ho sa feleng.”—2 Petrose 3:18, NW.
[Mongolo o botlaaseng ba leqephe]
a “[E] tšoana le ea motho, ea thahasellang ho ithuta ho eketsehileng ka khoeli, a hloellang ka holim’a marulelo a ntlo ea hae ho e shebela haufi.”
b Tumelo le bokhabane, litšoaneleho tsa pele tse peli tse boletsoeng litemaneng tsena, li tšohliloe tokollong ea July 15, 1993.
c Litlhahiso tsena li ka boetse tsa thusa batho bao e bileng Bakreste ka nako e telele hore ba fumane ho eketsehileng ho tsoa thutong ea bona ea botho le ha ba lokisetsa liboka.
Na U ka Hopola?
◻ Ke hobane’ng ha u lokela ho thahasella ho eketsa tsebo ea hao?
◻ Seithuti se secha sa Bibele se ka rua molemo o eketsehileng joang thutong ea sona?
◻ U batla ho qoba kotsi efe, joalokaha ho bontšitsoe ke papiso ea permafrost?
◻ Ke hobane’ng ha u lokela ho ikemisetsa ho ntlafatsa matla a hao a ho eketsa tsebo?
[Setšoantšo se leqepheng la 15]
Na ke na le bothata ba “permafrost” ea kelello?