Na U Sa Hopola?

Na u thabetse ho bala litokollo tsa morao tjee tsa Molula-Qhooa? Haeba ho joalo, u tla fumana e le ho thahasellisang ho hopola tse latelang:

◻Ke hobane’ng ha re ka tšepa batho ba khethiloeng ke Jehova hore ba tataise batho ba hae?

Boikarabelo bo itseng, Jehova o bo khethela batho ba nang le litšoaneleho tse hlokahalang hore ba tataise batho ba hae tseleng eo a batlang hore ba tsamaee ka eona ka nako eo.—8/15, leqepheng la 14.

◻Re ka ithuta eng phihlelong ea Jonase?

Jonase o ne a inahana ho tlōla ’me a sa nahane hakaalo ka batho ba bang. Re ka ithuta ho Jonase ka hore re se iketelletse pele rōna ka borōna haesita le maikutlo a rōna.—8/15, leqepheng la 19.

◻Ke ka tsela efe ho ka thoeng “lebitso la Jehova ke qhobosheane e thata”? (Liproverbia 18:10)

Ho batla ha rōna setšabelo lebitsong la Molimo ho bolela ho tšepa Jehova ka boeena. (Pesaleme ea 20:1; 122:4) Ho bolela ho tšehetsa bobusi ba hae, ho boloka melao le melao-motheo ea hae, ho ba le tumelo linthong tseo a li tšepisitseng le ho mo fa boinehelo bo ikhethang. (Esaia 50:10; Baheberu 11:6)—9/1, leqepheng la 10.

◻Mokhoa oa Pauluse oa ho paka ka pel’a ba boholong o re fa mohlala joang?

Ha a bua le Morena Agrippa, Pauluse o ile a sebelisa masene, a hatisa lintlha tseo eena le Agrippa ba neng ba lumellana ka tsona. Ka ho tšoanang, le rōna re lokela ho hatisa lintlha tse ntle tsa litaba tse molemo, re hatisa tšepo eo re nang le eona e tšoanang le ea ba bang. (1 Bakorinthe 9:22)—9/1, leqepheng la 31.

◻Ke mang ea ruang molemo mamellong ea Jehova?

Ka lebaka la mamello ea Jehova, kajeno ba eketsehileng ba limilione ba ntse ba fuoa monyetla oa ho pholosoa ‘letsatsing la Jehova’ le tlang. (2 Petrose 3:9-15) Mamello ea hae e boetse e lumella e mong le e mong oa rōna hore a ‘’ne a sebeletse poloko ea hae ka tšabo le ka thothomelo.’ (Bafilippi 2:12)—9/15, leqepheng la 20.

◻Phetolelo ea Bibele ea Septuagint e ne e le ea bohlokoa hakae?

Phetolelo ena e bile e ka sehloohong ho haseng tsebo ka Jehova Molimo le ’Muso oa hae, ’me Jesu Kreste e le Morena. Ka Septuagint, ho ile ha raloa motheo oa bohlokoa bakeng sa Bajuda ba buang Segerike le Balichaba lekholong la pele la lilemo hore ba amohele litaba tse molemo tsa ’Muso.—9/15, leqepheng la 30.

◻Papiso ea mora ea lehlasoa e re ruta’ng ka Molimo?

Taba ea pele, hore Jehova ‘o mohau ’me o lereko‚ o lieha ho halefa ’me o tletse mosa o lerato le ’nete.’ (Exoda 34:6) Ea bobeli, hore o “itokiselitse ho tšoarela,” ha phetoho ea pelo e fana ka motheo bakeng sa ho bontša mohau. (Pesaleme ea 86:5)—10/1, leqepheng la 12 le la 13.

◻Maemo a khotso a tšepisitsoeng ho Esaia 65:21-25 a tla phethahala neng?

Joaloka barapeli ba kopaneng ba Jehova ba paradeiseng ea moea kajeno, batlotsuoa le ba “linku tse ling” hona joale ba latsoa khotso eo ba e filoeng ke Molimo. (Johanne 10:16) ’Me khotso eo e tla atolohela Paradeiseng ea sebele, ha ‘thato ea Molimo e tla be e etsahala lefatšeng lohle, joalokaha e etsahala leholimong.’ Nakong eo mantsoe a moprofeta Esaia a tla phethahala ka botlalo. (Matheu 6:10)—10/15, leqepheng la 24.

◻Ke hobane’ng ha Bakreste ba keteka lihopotso tsa machato empa eseng matsatsi a tsoalo?

Bibele ha e behe lenyalo ka mosing. Ke taba ea botho ka ho feletseng hore na Bakreste ba khetha ho hlokomela sehopotso sa lechato kapa che, ba nahana ka monyaka oa ketsahalo eo le boikemisetso ba bona ba ho sebeletsa katleho e le banyalani. Leha ho le joalo, mekete feela ea matsatsi a tsoalo e tlalehiloeng ka Bibeleng ke ea bahetene, ’me e ne e amahanngoa le liketsahalo tse sehlōhō.—10/15, leqepheng la 30 le la 31.

◻Papisong ea Pauluse e tlalehiloeng ho 1 Bakorinthe 3:12, 13, “mollo” o emela eng, hona Bakreste bohle ba lokela ho hlokomela eng?

Ho na le mollo oo bohle re tobanang le oona bophelong—liteko tsa tumelo ea rōna. (Johanne 15:20; Jakobo 1:2, 3) E mong le e mong eo re mo rutang ’nete o tla lekoa. Haeba re ruta hampe, ho ka ’na ha e-ba le liphello tse mpe, joalokaha Pauluse a lemositse. (1 Bakorinthe 3:15)—11/1, leqepheng la 11.

◻Noe o ile a ‘tsamaea le Molimo oa ’nete’ joang? (Genese 6:9)

Noe o ile a tsamaea le Molimo ka hore o ile a etsa seo Molimo a neng a mo boleletse hore a se etse. Ka lebaka la ho nehela bophelo ba hae ho etseng thato ea Molimo, Noe o ile a thabela kamano e mofuthu le e haufi-ufi le Molimo.—11/15, leqepheng la 10.

◻Re bulehetsoe ke menyetla efe ka ho se tsebe ha rōna nako e tobileng eo Molimo a tlang ho liha phetetso ea hae ka eona holim’a ba khopo?

Hona ho re fa monyetla oa ho paka hore re rata Jehova e le kannete le hore re batla ho tsamaea litseleng tsa hae ka ho sa feleng. Ho boetse ho bontša hore rea tšepahala ho Molimo le hore re tšepa tsela ea hae ea ho sebetsa litaba. Ho feta moo, hona ho re thusa ho lula re le mahlahahlaha hape re falimehile moeeng. (Matheu 24:42-44)—11/15, leqepheng la 18.

◻Ho bolela’ng ho beha tumelo “lebitsong la Mora oa Molimo”? (1 Johanne 5:13)

Hona ho bolela ho mamela litaelo tsohle tsa Kreste, ho akarelletsa le taelo ea hae ea ho ‘ratana.’ (Johanne 15:14,17) Lerato le batla ho etsa se molemo ho ba bang. Le tlosa leeme lohle la morabe, bolumeli le la boahisani.—12/1, leqepheng la 7.

◻Ke hobane’ng ha Lipaki tsa Jehova li ‘hloiloe’? (Matheu10:22)

Lipaki tsa Jehova li ’nile tsa hlouoa ka ho hloka toka ka mabaka a tšoanang le ao Bakreste ba pele ba neng ba hlorisoa ka ’ona. Taba ea pele, Lipaki tsa Jehova li nka bohato ka litumelo tsa tsona tsa bolumeli ka litsela tse ba etsang ba sa ratoeng ke ba bang. Ea bobeli, li ’nile tsa e-ba liphofu tsa liqoso tsa bohata—mashano a totobetseng le linehelano tse sothiloeng tsa litumelo tsa tsona.—12/1, leqephe 14.