Mohanyetsi oa Kreste ke Mang?
Ho na le baesekopo e tšosang ea morao tjena eo sehlooho sa eona e leng Antichrist (mohanyetsi oa Kreste).
Sehlopha sa libini se tsebahalang se ile sa reha CD e ’ngoe ea tsona Antichrist Superstar.
Friedrich Nietzsche, e leng rafilosofi oa lilemong tsa bo-1800, o ile a reha buka e ’ngoe ea hae The Antichrist.
Marena le baemphera ba Mehleng e Bohareng ba ne ba atisa ho re bahanyetsi ba bona ke bo-antichrist.
Martin Luther, eo e neng e le moeta-pele oa Phetohelo ea Jeremane, o ile a re bapapa ba Roma e K’hatholike ke bo-antichrist.
KAHA ka nako e telele lebitso “antichrist” le ’nile la sebelisoa linthong tse ngata ho akarelletsa le marena le libaesekopo, ha ho makatse hore re botse potso ena: Antichrist e bolela’ng? Na lebitso lee lea re ama kajeno? Ntle ho pelaelo ho ka ba molemo hore re batlisise lebitso lena ka Bibeleng, kaha le hlaha ka makhetlo a mahlano.
MOHANYETSI OA KRESTE OA PEPESOA
Moapostola Johanne ke eena feela mongoli oa Bibele ea sebelisitseng poleloana “mohanyetsi oa Kreste.” O ile a re mohanyetsi oa Kreste ke mang? Hlokomela hore na o mo hlalosa joang ha a re: “Bana ba banyenyane, ke hora ea ho qetela, ’me, feela joalokaha le utloile hore mohanyetsi oa Kreste oa tla, esita le hona joale ho se ho e-na le bahanyetsi ba Kreste ba bangata; e leng seo re tsebang ka sona hore ke hora ea ho qetela. Ba ile ba tsoa ho rōna, empa e ne e se ba mofuta oa rōna . . . Ke mang ea leshano haeba e se ea latolang hore Jesu ke Kreste? Enoa ke mohanyetsi oa Kreste, ea latolang Ntate le Mora.”—1 Johanne 2:18, 19, 22.
Moapostola Johanne o ne a utloisisa hore mohanyetsi oa Kreste ke batho bohle bao ka boomo ba jalang mashano a bolumeli ka Jesu Kreste le lithuto tsa hae
Re ithuta’ng mantsoeng aa? Johanne o ile a re “bahanyetsi ba Kreste ba bangata,” a bontša hore hase motho a le mong empa ke sehlopha sa batho. Batho le mekhatlo e hanyetsang Kreste ba jala mashano, ba hana hore Jesu ke Kreste kapa Mesia, ebile ba hlalosa kamano e pakeng tsa Molimo le Mora oa Hae hampe. Batho ba hanyetsang Kreste ba ipolela hore ke bo-Kreste kapa baemeli ba hae, empa kaha “ba ile ba tsoa ho rōna,” ba khelohile lithuto tsa Bibele. Ho feta moo, sehlopha sena se ne se le teng ha Johanne a ne a ngola lengolo la hae, ‘horeng ea ho qetela,’ mohlomong qetellong ea mehla ea baapostola.
Johanne o ile a re’ng hape ha a bua ka bahanyetsi ba Kreste? Ha a bua ka baprofeta ba bohata o ile a re: “Polelo e ’ngoe le e ’ngoe e bululetsoeng e bolelang hore Jesu Kreste o tlile ka nama e simoloha ho Molimo, empa polelo e ’ngoe le e ’ngoe e bululetsoeng e sa boleleng Jesu ha e simolohe ho Molimo. Ho feta moo, ena ke polelo e bululetsoeng ea mohanyetsi oa Kreste eo le utloileng hore ea tla, ’me joale e se e le lefatšeng.” (1 Johanne 4:2, 3) Ho phaella moo, Johanne o ile a boela a hatisa ntlha eo lengolong la hae la bobeli ’me a re: “Bathetsi ba bangata ba kene lefatšeng, batho ba sa boleleng Jesu Kreste e le ea tlang ka nama. Enoa ke mothetsi le mohanyetsi oa Kreste.” (2 Johanne 7) Ho hlakile hore Johanne o ne a utloisisa hore mohanyetsi oa Kreste ke batho bohle bao ka boomo ba jalang mashano a bolumeli ka Jesu Kreste le lithuto tsa hae.
“BAPROFETA BA BOHATA” LE “MOTHO EA SA EENG KA MOLAO”
Jesu o ile a lemosa hore baprofeta ba bohata ba ne ba tla tla joaloka ‘liphiri tse harolang tse apereng seaparo sa nku’
Khale koana pele Johanne a ngola mabapi le bathetsi ba bolumeli, Jesu Kreste o ile a eletsa balateli ba hae a re: “Itebeleng ho baprofeta ba bohata ba tlang ho lōna ba apere seaparo sa nku, empa ka hare e le liphiri tse harolang.” (Matheu 7:15) Ka ho tšoanang moapostola Pauluse o ile a lemosa Bakreste ba Thesalonika a re: “Ho se ke ha e-ba le ea mong ea le ekang ka mokhoa leha e le ofe, hobane le ke ke la tla ntle le hore bokoenehi bo tle pele ’me motho ea sa eeng ka molao a senolehe, mora oa timetso.”—2 Thesalonika 2:3.
Kahoo, lekholong la pele la lilemo baprofeta ba bohata le bakoenehi ba ne ba se ba ntse ba le teng ’me ba leka ka matla ho fokolisa phutheho ea Bokreste. Bohle ba amehang tabeng ea ho jala mashano a bolumeli ka Jesu Kreste le lithuto tsa hae ke karolo ea bao Johanne a ileng a re ke “mohanyetsi oa Kreste.” Boikutlo ba Jehova ka bona bo ile ba totobatsoa ke mantsoe a Pauluse ha a ba bitsa “mora oa timetso.”
HLOKOMELA MESEBETSI EA MOHANYETSI OA KRESTE MEHLENG ENA
Mohanyetsi oa Kreste o tsebahala ka’ng mehleng ee? Le kajeno ho ntse ho e-na le mekhatlo le batho ba hanyetsang Kreste le lithuto tsa hae. Ba thetsa batho ka boomo e le hore ba se ke ba tseba phapang pakeng tsa Jehova Molimo le Mora oa Hae, Jesu Kreste. Re lokela ho lemoha mashano a joalo a bolumeli. A re ke re hlahlobeng mehlala e ’meli ea mashano a joalo a tloaelehileng.
Likereke li ’nile tsa ruta thuto ea Boraro-bo-bong ka lilemo tse makholo, li bolela hore Ntate le Mora baa lekana. Ka lebaka leo, bahanyetsi ba Kreste ba ferekanya batho mabapi le boemo ba Jehova Molimo le ba Jesu Kreste. Leshano lena le sitisa batho ba ratang ’nete ho etsisa Jesu Kreste le ho ba le kamano le Molimo, e leng seo Bibele e ba khothalletsang hore ba se etse.—1 Bakorinthe 11:1; Jakobo 4:8.
Likereke li eketsa pherekano ka ho khothalletsa batho hore ba sebelise Libibele tse se nang lebitso la Molimo, e leng Jehova. Li khothalletsa sena le hoja li tseba hore lebitso Jehova le hlaha ka makhetlo a ka bang 7 000 ka Bibeleng ea pele. Ka lebaka leo, batho ba bangata ha ba tsebe lebitso la Molimo.
Ka lehlakoreng le leng, ho tseba lebitso Jehova, ho thusitse batho ba bangata ba tšepahalang hore e be metsoalle ea Molimo. Richard ke e mong oa bona, ’me o sa ntse a hopola puisano ea hae le banyalani ba bang ba Lipaki Tsa Jehova. O re: “Ba ile ba mpontša lebitso la Molimo ka Bibeleng. Ke ile ka hlolloa ha ke bona hore Molimo o na le lebitso, e leng seo ke neng ke qala ho se utloa.” Ho tloha ka nako eo, o ile a loanela ho phela ka melao ea Bibele le ho khahlisa Jehova. O re: “Ho tseba lebitso la Molimo ho nthusitse hore ke be le kamano e haufi le eena.”
Ka lilemo tse makholo, batho ba hanyetsang Kreste ba ’nile ba arohanya batho ba limilione le Molimo. Empa ha re ithuta Lentsoe la Molimo Bibele, re khona ho tseba hore na ba hanyetsang Kreste ke bo-mang ’me seo se re lokolla mashanong a bona a bolumeli.—Johanne 17:17.