Se Boleloang ke ho Rata Baahelani ba Rōna
“U rate moahelani oa hao joalokaha u ithata.”—MATHEU 22:39.
1. Re bontša joang hore re rata Molimo?
JEHOVA o hloka eng ho ba mo rapelang? Jesu o ile a akaretsa karabo ka mantsoe a seng makae a bonolo le a matla. O ile a bolela hore taelo e khōlō ke hore re rate Jehova ka pelo eohle, moea ’ohle, kelello eohle le matla ’ohle. (Matheu 22:37; Mareka 12:30) Joalokaha re bone sehloohong se fetileng, ho rata Molimo ho akarelletsa ho mo mamela le ho boloka litaelo tsa hae tumellanong le lerato leo a re bontšitseng lona. Ba ratang Molimo ha ba imeloe ke ho etsa thato ea hae, hoa ba thabisa.—Pesaleme ea 40:8; 1 Johanne 5:2, 3.
2, 3. Ke hobane’ng ha re lokela ho ela hloko taelo ea hore re rate baahelani ba rōna, hona ho hlaha lipotso life?
2 Jesu o ile a bolela hore taelo ea bobeli e khōlō e amana le ea pele: “U rate moahelani oa hao joalokaha u ithata.” (Matheu 22:39) Joale, ka lebaka le utloahalang, re tla buisana ka taelo ena. Mehla eo re phelang ho eona e tsebahala ka lerato la boithati le la boikaketsi. Tlhalosong ea hae ea ‘matsatsi a ho qetela,’ e ngotsoeng ka pululelo, moapostola Pauluse o ile a ngola hore batho ba ne ba sa tl’o ratana, empa ba ne ba tla ithata, ba rate chelete le menyaka. Ba bangata ba ne ba sa tl’o ba le “lerato la tlhaho,” kapa joalokaha phetolelo e ’ngoe ea Bibele e bolela, ba ne ba tla “haelloa ke lerato la tlhaho malapeng a bona.” (2 Timothea 3:1-4) Jesu Kreste o ile a bolela esale pele a re: “Ba bangata . . . ba tla ekana ’me ba tla hloeana. . . . Lerato la ba bangata le tla fola.”—Matheu 24:10, 12.
3 Leha ho le joalo, hlokomela hore Jesu ha aa ka a re lerato la e mong le e mong le tla fola. Kamehla ho ’nile ha e-ba le ba bonahatsang lerato leo Jehova a le hlokang le le mo loketseng, ebile ba tla ba teng kamehla. Batho ba ratang Jehova e le kannete ba tla loanela ho nka ba bang ka tsela eo a ba nkang ka eona. Leha ho le joalo, baahelani ba rōna bao re lokelang ho ba rata ke bo-mang? Re ka bontša joang hore re rata baahelani ba rōna? Mangolo a ka re thusa ho araba lipotso tsena tsa bohlokoa.
Moahelani oa ka ke Mang?
4. Ho ea ka Levitike khaolo ea 19, Bajuda ba ne ba lokela ho rata bo-mang?
4 Ha Jesu a ne a bolella Mofarisi e mong hore taelo ea bobeli e khōlō ke hore motho a rate moahelani oa hae joalokaha a ithata, o ne a bua ka molao o itseng o neng o filoe Baiseraele. O tlalehiloe ho Levitike 19:18. Khaolong eona eo, Bajuda ba ile ba bolelloa hore ba nke Balichaba e le baahelani ba bona. Temana ea 34 e re: “Mojaki ea lulang e le mojaki hammoho le lōna o lokela ho ba ho lōna joaloka letsoalloa la habo lōna; le mo rate joalokaha le ithata, etsoe le bile bajaki naheng ea Egepeta.” Kahoo, esita le Balichaba, haholo-holo ba sokolohetseng Sejudeng, ba ne ba lokela ho tšoaroa ka lerato.
5. Bajuda ba ne ba e-na le kutloisiso efe ka lerato la moahelani?
5 Leha ho le joalo, baeta-pele ba Bajuda ba mehleng ea Jesu, ba ne ba bona litaba kahosele. Ba bang ba ne ba ruta hore mantsoe “motsoalle” le “moahelani” a sebetsa ho Bajuda feela. Balichaba ba ne ba lokela ho hlouoa. Mesuoe eo e ne e beha lebaka la hore ba rapelang Molimo ba lokela ho khesa ba sa rapeleng Molimo. Buka e ’ngoe e re: “Boemong bo joalo, lehloeo le ne le tla ata. Le ne le tla ba le lintho tse le hlohlelletsang.”
6. Jesu o ile a bontša lintlha life tse peli ha a ne a bua ka ho rata moahelani?
6 Jesu o ile a bua ka taba ena Thutong ea hae ea Thabeng, a hlakisa hore na ke bo-mang ba lokelang ho tšoaroa ka lerato. O ile a re: “Le utloile hore ho itsoe, ‘U rate moahelani oa hao ’me u hloee sera sa hao.’ Leha ho le joalo, ke re ho lōna: Tsoelang pele ho rata lira tsa lōna le ho rapella ba le hlorisang; e le hore le ka ba bara ba Ntat’a lōna ea leng maholimong, kaha o chabisetsa batho ba khopo le ba molemo letsatsi la hae ’me o nesetsa batho ba lokileng le ba sa lokang pula.” (Matheu 5:43-45) Jesu o ile a bontša lintlha tse peli mona. Ea pele, Jehova o seatla se bulehileng ebile o mosa ho ba lokileng le ba babe. Ea bobeli, re lokela ho etsisa mohlala oa hae.
7. Re ithuta’ng papisong ea Mosamaria ea nang le moea oa boahelani?
7 Ketsahalong e ’ngoe, serutehi se seng sa molao sa Mojuda se ile sa botsa Jesu: “Ha e le hantle moahelani oa ka ke mang?” Jesu o ile a se araba ka ho etsa papiso e ileng ea hlalosa ka Mosamaria ea ileng a fumana monna e mong oa Mojuda ea neng a hlasetsoe ke masholu, a ba a mo amoha thepa ea hae. Le hoja Bajuda ba bangata ba ne ba khesa Basamaria, Mosamaria enoa o ile a tlamisa maqeba a monna eo a ba a mo isa moo ho sireletsehileng ntlong ea baeti, moo a neng a ka folla teng. Re ithuta eng? Lerato la rōna la moahelani le lokela ho fetela ho batho ba merabe e meng, lichaba tse ling le malumeli a mang.—Luka 10:25, 29, 30, 33-37.
Se Boleloang ke ho Rata Baahelani ba Rōna
8. Levitike khaolo ea 19 e bolela hore lerato le ne le lokela ho bontšoa joang?
8 Ho rata moahelani, joaloka ho rata Molimo, hase boikutlo feela; ho akarelletsa ketso. Ho boetse ho molemo ho hlahloba taba e potolohileng taelo e tlalehiloeng ho Levitike khaolo ea 19 e khothalletsang batho ba Molimo hore ba rate baahelani joalokaha ba ithata. Khaolong ena re ithuta hore Baiseraele ba ne ba lokela ho lumella ba mahlomoleng le bajaki hore ba be le seabo kotulong. Ho ne ho sa lumelloe bosholu, ho thetsa kapa ho qhekella. Baiseraele ba ne ba sa lokela ho ahlola ka leeme. Le hoja ba ne ba lokela ho khalemela moo ho hlokahalang, ba ile ba bolelloa ka ho toba: “U se ke ua hloea mor’eno ka pelong ea hao.” Litaelo tsena le tse ling tse ngata li ile tsa akaretsoa ka mantsoe ana: “U rate oa heno joalokaha u ithata.”—Levitike 19:9-11, 15, 17, 18.
9. Ke hobane’ng ha Jehova a ile a laela Baiseraele hore ba ikarole lichabeng tse ling?
9 Le hoja Baiseraele ba ne ba lokela ho rata batho ba bang, ba ne ba boetse ba lokela ho ikarola ho ba rapelang melimo ea bohata. Jehova o ile a ba lemosa ka likotsi le liphello tsa litloaelano tse mpe. Ka mohlala, mabapi le lichaba tseo Baiseraele ba neng ba lokela ho nka linaha tsa tsona, Jehova o ile a ba fa taelo ena: “U se ke ua etsa selekane sa lenyalo le tsona. U se ke ua fana ka morali oa hao ho mora oa hae, ’me u se ke ua nkela mora oa hao morali oa hae. Etsoe o tla khelosa mora oa hao hore a se ke a ntatela, ’me ka sebele ba tla sebeletsa melimo e meng; ruri bohale ba Jehova bo tla le tukela.”—Deuteronoma 7:3, 4.
10. Re lokela ho ikalosa ho eng?
10 Ka ho tšoanang, Bakreste ba ikalosa hore ba se ke ba qalisa likamano le batho ba ka ’nang ba fokolisa tumelo ea bona. (1 Bakorinthe 15:33) Rea eletsoa: “Le se ke la kena jokong e sa lekaneng hammoho le ba sa lumelang,” e leng bao e seng karolo ea phutheho ea Bokreste. (2 Bakorinthe 6:14) Ho feta moo, Bakreste ba eletsoa hore ba nyale “feela Moreneng.” (1 Bakorinthe 7:39) Leha ho le joalo, le ka mohla ha rea lokela ho nyelisa ba sa lumeleng ho Jehova. Kreste o ile a shoela baetsalibe, ’me ba bangata ba neng ba etsa lintho tse mpe ba ile ba fetola mekhoa ea bona ’me ba boelana le Molimo.—Baroma 5:8; 1 Bakorinthe 6:9-11.
11. Tsela e molemo haholo ea ho rata ba sa sebeletseng Jehova ke efe, hona hobane’ng?
11 Tsela e molemo haholo ea ho rata ba sa sebeletseng Molimo, ke hore re etsise Jehova ka boeena. Le hoja a hloile bokhopo, o bontša mosa o lerato ho bohle ka ho ba bulela monyetla oa hore ba sokolohe litseleng tsa bona tse mpe ’me ba fumane bophelo bo sa feleng. (Ezekiele 18:23) Jehova “o lakatsa hore bohle ba fihle pakong.” (2 Petrose 3:9) Thato ea hae ke hore “batho ba mefuta eohle ba pholohe ’me ba fihle tsebong e nepahetseng ea ’nete.” (1 Timothea 2:4) Ke ka lebaka leo Jesu a ileng a laela balateli ba hae hore ba bolele, ba rute ba be ba “etse batho ba lichaba tsohle barutuoa.” (Matheu 28:19, 20) Ha re kopanela mosebetsing ona, re bontša hore re rata Molimo le baahelani, ’me ntle ho pelaelo le tsona lira tsa rōna!
Ho Rata Barab’abo Rōna ba Bakreste
12. Moapostola Johanne o ile a ngola’ng mabapi le ho rata mor’abo rōna?
12 Moapostola Pauluse o ile a ngola a re: “A re sebetseng se molemo ho bohle, empa haholo-holo ho ba amanang le rōna tumelong.” (Bagalata 6:10) Kaha re Bakreste, re tlamehile ho rata ba amanang le rōna tumelong—e leng bara le baralib’abo rōna moeeng. Lerato lee ke la bohlokoa hakae? Moapostola Johanne o ile a ntša ntlha ena ea bohlokoa ha a ne a ngola a re: “E mong le e mong ea hloileng mor’abo ke ’molai . . . Haeba leha e le mang a re: ‘Ke rata Molimo,’ leha ho le joalo a hloile mor’abo, o leshano. Etsoe ea sa rateng mor’abo, eo a mo boneng, a ke ke a rata Molimo, eo a e-s’o mo bone.” (1 Johanne 3:15; 4:20) Mantsoe ana a matla. Jesu Kreste o ile a re Satane Diabolose ke “’molai” le ‘ea leshano.’ (Johanne 8:44) Ho hang re ke ke ra rata hore mantsoe ana a sebelisoe ho rōna!
13. Re ka rata balumeli-’moho le rōna ka litsela life?
13 Bakreste ba ’nete ba ‘rutoa ke Molimo ho ratana.’ (1 Bathesalonika 4:9) Ha rea lokela ho “rata ka lentsoe kapa ka leleme, empa re [lokela ho rata] ka ketso le ’nete.” (1 Johanne 3:18) Lerato la rōna le lokela hore “e be le se nang boikaketsi.” (Baroma 12:9) Lerato le re susumelletsa hore re be mosa, re qenehele, re tšoarele, re tiisetse, ’me re se ke ra ba mōna, ra ithorisa, ra ikhohomosa, kapa ra ba baithati. (1 Bakorinthe 13:4, 5; Baefese 4:32) Le re tlama hore re “sebeletsane joaloka makhoba.” (Bagalata 5:13) Jesu o ile a bolella barutuoa ba hae hore ba ratane feela joalokaha a ba ratile. (Johanne 13:34) Ka lebaka leo, Mokreste o lokela ho ikemisetsa ho shoela balumeli-’moho le eena ha ho hlokahala.
14. Re ka bontša lerato joang ka lapeng?
14 Lerato le lokela ho bontšoa haholo ka lelapeng la Bakreste, haholo-holo pakeng tsa monna le mosali. Maqhama a lenyalo a tiile hoo Pauluse a ileng a re: “Banna ba tšoanela ho rata basali ba bona joaloka ’mele ea bona.” O ile a eketsa ka ho re: “Ea ratang mosali oa hae oa ithata.” (Baefese 5:28) Pauluse o boetse o pheta keletso ena ka mor’a litemana tse hlano. Monna ea ratang mosali oa hae a ke ke a etsisa Baiseraele ba mehleng ea Malakia ba neng ba sebetsa balekane ba bona ka bolotsana. (Malakia 2:14) O tla mo rata. O tla mo rata joalokaha Kreste a ne a rata phutheho. Ka tsela e tšoanang, lerato le tla susumetsa mosali hore a hlomphe monna oa hae.—Baefese 5:25, 29-33.
15. Ho bona lerato la bara ba motho ho ile ha susumeletsa batho ba bang hore ba re’ng le hore ba etse’ng?
15 Ho hlakile hore lerato la mofuta ona ke letšoao le khethollang Bakreste ba ’nete. Jesu o ile a re: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:35) Ho ratana ha rōna ho hulela batho ho Molimo eo re mo ratang le eo re mo emelang. Ka mohlala, Mozambique ho hlaha tlaleho ena e buang ka lelapa le leng la Lipaki. “Ntho e tjena re ne re qala ho e bona. Thapama ho ile ha foka moea o bohale o ileng oa lateloa ke pula ea litloebelele le sefako. Moea oo o matla o ile oa senya ntlo ea rōna ea lehlaka, ’me masenke a ruletseng a ile a fefoha. Ha barab’abo rōna ba liphutheho tse haufi ba tla ’me ba re thusa ho tsosa ntlo ea rōna, baahelani ba rōna ba maketseng ba ile ba re: ‘Bolumeli ba lōna bo molemo haholo. Ha re e-s’o fumane thuso e tjena likerekeng tsa rōna.’ Re ile ra phetla Bibele eaba re ba bontša Johanne 13:34, 35. Baahelani ba rōna ba bangata ba ithuta Bibele hona joale.”
Ho Rata Motho ka Mong
16. Phapang ke efe pakeng tsa ho rata sehlopha le ho rata motho ka mong?
16 Ha ho thata ho rata baahelani ba rōna e le sehlopha. Leha ho le joalo, ho rata motho ka mong, ho ka ba thata. Tsela feela eo batho ba bang ba ratang baahelani ba bona ka eona ke ka ho ntša monehelo ba o fa mokhatlo o itseng oa liphallelo. Ka sebele, ho bonolo haholo ho bolela hore re rata baahelani ba rōna empa ha ho bonolo ho bolela hore re rata basebetsi-’moho le rōna bao ho bonahalang eka ha ba re tsotelle, le ho rata batho ba babe ba ahisaneng le rōna kapa ho rata metsoalle e re soetsang.
17, 18. Jesu o ile a bontša joang hore o rata motho ka mong, ’me o ne a etsa seo ka sepheo sefe?
17 Tabeng ena ea ho rata motho ka mong, re ithuta ho Jesu ea sa kang a fanya ha a bonahatsa litšoaneleho tsa Molimo. Le hoja a ile a tla lefatšeng ho tla tlosa sebe sa lefatše, o ile a bontša hore o rata motho ka mong—mosali oa sekulane, molepera le ngoana. (Matheu 9:20-22; Mareka 1:40-42; 7:26, 29, 30; Johanne 1:29) Ka ho tšoanang, re bontša hore re rata baahelani ba rōna ka tsela eo re sebelisanang le motho ka mong eo re teanang le eena letsatsi le letsatsi.
18 Leha ho le joalo, ha rea lokela ho lebala hore re rata moahelani hobane re rata Molimo. Le hoja Jesu a ile a thusa mafutsana, a folisa ba kulang, a fepa ba lapileng hammoho le ho ruta matšoele, sepheo sa hae ha a ne a etsa lintho tsena tsohle, e ne e le ho thusa batho hore ba boelane le Jehova. (2 Bakorinthe 5:19) Jesu o ne a etsa lintho tsohle ho tlotlisa Molimo, a sa lebale hore o ne a emetse Molimo eo a mo ratang ebile a bonahatsa seo A leng sona. (1 Bakorinthe 10:31) Ha re etsisa mohlala oa Jesu, le rōna re ka bonahatsa lerato la ’makhonthe la moahelani ’me ra ’na ra lula re se karolo ea lefatše la batho ba khopo.
Re ka Rata Baahelani ba Rōna Joalokaha re Ithata Joang?
19, 20. Ho bolela’ng ho rata baahelani joalokaha re ithata?
19 Jesu o ile a re: “U rate moahelani oa hao joalokaha u ithata.” Ke ntho ea tlhaho hore re itlhokomele le hore re itlhomphe ka tsela e itseng. Ha ho ne ho se joalo, taelo ena e ne e sa tl’o bolela letho. Lerato lena la ho ithata ha lea lokela ho tšoantšoa le lerato la boikhabi le boletsoeng ke moapostola Pauluse ho 2 Timothea 3:2. Ho e-na le hoo, ke boikutlo bo leka-lekaneng ba ho inka u le oa bohlokoa. Setsebi se seng sa Bibele se hlalositse hore ke “ho ithata hantle eseng ho iphahamisa ka ho re ‘kea halalela’ kapa ho itellisa batho ba bang ka ho re ‘ke lefeela.’”
20 Ho rata ba bang joalokaha re ithata ho bolela hore re nka ba bang kamoo re ratang hore ba re nke kateng le hore re tšoara ba bang ka tsela eo re ratang hore ba re tšoare ka eona. Jesu o ile a re: “Lintho tsohle tseo le batlang hore batho ba le etse tsona, le lōna ka ho tšoanang le ba etse tsona.” (Matheu 7:12) Hlokomela hore Jesu ha aa ka a re re lohothe ka seo batho ba bang ba re entseng sona nakong e fetileng ebe rea iphetetsa. Ho e-na le hoo, re lokela ho nahana ka hore na re ka rata ho tšoaroa joang ebe re etsa seo re batlang ha batho ba bang ba re etsa sona. Hape, hlokomela hore Jesu ha aa ka a lebisa mantsoe a hae ho metsoalle le mokhatlo oa bara ba motho feela. O sebelisitse lentsoe “batho,” mohlomong e le ha a bontša hore re lokela ho etsa sena ho batho bohle, e mong le e mong eo re teanang le eena.
21. Re bontša eng ka ho rata batho ba bang?
21 Ho rata baahelani ba rōna ho tla re sireletsa hore re se ke ra etsa se sebe. Moapostola Pauluse o ile a ngola a re: “Molao o reng, ‘U se ke ua feba, U se ke ua bolaea, U se ke ua utsoa, U se ke ua chacheha ka mohono,’ le taelo efe kapa efe e teng, e akarelitsoe polelong ena, e reng, ‘U rate moahelani oa hao joalokaha u ithata.’ Lerato ha le hlahisetse moahelani oa motho bobe.” (Baroma 13:9, 10) Lerato le tla re susumelletsa ho batla litsela tseo ka tsona re ka etsetsang ba bang se molemo. Ha re rata batho ba bang, re bontša hore re rata le Jehova Molimo, e leng eena ea bōpileng motho ka setšoantšo sa Hae.—Genese 1:26.
U ka Araba Joang?
• Re lokela ho rata bo-mang, hona hobane’ng?
• Re ka bontša joang hore re rata batho ba sa sebeletseng Jehova?
• Bibele e hlalosa lerato leo re lokelang ho rata barab’abo rōna ka lona joang?
• Ho rata baahelani ba rōna joalokaha re ithata ho bolela’ng?
[Setšoantšo se leqepheng la 26]
“Ha e le hantle moahelani oa ka ke mang?”
[Setšoantšo se leqepheng la 29]
Lerato la Jesu le akarelletsa motho ka mong