Lipotso Tse Tsoang ho Babali
Ho tiisa ho boletsoeng ho Tšenolo 7:3 ho bolela eng?
Tšenolo 7:1-3 e re: “Ka bona mangeloi a mane a eme likhutlong tse ’nè tsa lefatše, a tšoere ka tieo meea e mene ea lefatše, e le hore ho se ke ha e-ba le moea o ka fokang lefatšeng kapa leoatleng kapa sefateng leha e le sefe. Ka bona lengeloi le leng le nyoloha bochaba-tsatsi, le e-na le tiiso ea Molimo ea phelang; la hoeletsa ka lentsoe le phahameng mangeloi a mane a neng a nehiloe hore a senye lefatše le leoatle, la re: ‘Le se ke la senya lefatše kapa leoatle kapa lifate, ho fihlela ka mor’a hore re tiise makhoba a Molimo oa rōna liphatleng tsa ’ona.’”
Ha “meea e mene” e lokolloa, seo se tla tlisa ‘matšoenyeho a maholo,’ timetso ea bolumeli ba bohata le timetso ea lefatše lena le khopo kaofela. (Tšenolo 7:14) “Makhoba a Molimo oa rōna” ke barab’abo Kreste ba tlotsitsoeng ba leng lefatšeng. (1 Petrose 2:9, 16) Kahoo, boprofeta bona bo bontša hore ho tiisoa ha barab’abo Kreste ho tla be ho phethiloe ha matšoenyeho a maholo a qhoma. Leha ho le joalo, litemana tse ling tsa Bibele li bontša hore ho na le batlotsuoa ba bang ba tiisoang pele. Ka hona, ka linako tse ling, re bua ka ho tiisoa ha pele le ka ho tiisoa ha ho qetela. Ho na le phapang efe pakeng tsa ho tiisoa hoo ha pele le ha ho qetela?
A re tšohleng moelelo oa lentsoe ‘tiisa.’ Mehleng ea boholo-holo, tiiso e ne e le ntho e neng e sebelisetsoa ho tempa tokomane. Lentsoe lena le boetse le bua ka khatiso e entsoeng ke setempe. Mehleng eo, ho ne ho tloaelehile ho beha tiiso tokomaneng kapa linthong tse ling ho bontša hore ke tsa sebele kapa ho bontša hore na ke tsa mang.—1 Marena 21:8; Jobo 14:17.
Pauluse o ile a bapisa moea o halalelang le letšoao la tiiso ha a ne a re: “Ea tiisang hore lōna le rōna re ba Kreste le ea re tlotsitseng ke Molimo. O boetse o behile tiiso ea hae holim’a rōna ’me o re file pontšo ea se tlang ho tla, ke hore, moea, ka lipelong tsa rōna.” (2 Bakorinthe 1:21, 22) Kahoo, Jehova o tlotsa Bakreste bana ka moea oa hae o halalelang ho bontša hore ke ba hae.
Leha ho le joalo, ho tiisoa ha batlotsuoa ho etsoa ka mekhahlelo e ’meli. Ho tiisoa ha pele ho fapana le ho tiisoa ha ho qetela (1) ka morero le (2) ka nako. Ho tiisoa ha pele ho etsoa ka morero oa ho khetha setho se secha se eketsoang palong ea Bakreste ba tlotsitsoeng. Ho tiisoa ha ho qetela ho etsoa ka morero oa ho bontša kannete hore motho enoa ea khethiloeng le ea tiisitsoeng o bontšitse ka botlalo hore oa tšepahala. Ke ka nako eo feela, nakong ea ho tiisoa ha ho qetela, moo tiiso e tla behoa ‘phatleng’ ea motlotsuoa, e le ho mo khetholla hore ke ‘lekhoba la Molimo oa rōna’ le lekiloeng le le tšepahalang. Ho tiisoa ho boletsoeng ho Tšenolo khaolo ea 7 ke hona ho tiisoa ha ho qetela.—Tšenolo 7:3.
Mabapi le nako ea ho tiisoa ha pele, moapostola Pauluse o ile a ngolla Bakreste ba tlotsitsoeng a re: “Le lōna le ile la ba le tšepo ho eena ka mor’a hore le utloe lentsoe la ’nete, litaba tse molemo tse mabapi le poloko ea lōna. Ka eena hape, ka mor’a hore le lumele, le ile la tiisoa ka moea o halalelang o tšepisitsoeng.” (Baefese 1:13, 14) Hangata, tlaleho ea Bibele e bontša hore Bakreste ba lekholo la pele la lilemo ba ile ba tiisoa e le kannete nakoana ka mor’a hore ba utloe litaba tse molemo le ho lumela ho Kreste. (Liketso 8:15-17; 10:44) Ho tiisoa ho joalo ho ne ho bontša hore Molimo oa ba amohela. Leha ho le joalo, ho ne ho sa bontše hore Molimo o ba amohetse ka ho feletseng. Hobane’ng?
Pauluse o ile a bolela hore Bakreste ba tlotsitsoeng ba ‘tiisitsoe bakeng sa letsatsi la ho lokolloa.’ (Baefese 4:30) Sena se bontša hore ka mor’a ho tiisoa ha pele ho ne ho tla feta nako e itseng, eo ka tloaelo e neng e tla ba lilemo tse ngata. Batlotsuoa ba lokela ho lula ba tšepahala ho tloha letsatsing leo ba tiisoang ka lona ka moea o halalelang ho fihlela ‘letsatsing leo ba lokolloang’ ’meleng ea bona ea nama ka lona—ke hore, ho fihlela lefung. (Baroma 8:23; Bafilipi 1:23; 2 Petrose 1:10) Ka hona, Pauluse o ne a ka bua mantsoe a latelang feela qetellong ea bophelo ba hae: “Ke mathile tseleng ea peiso ho fihlela qetellong, ke bolokile tumelo. Ho tloha nakong ena ho ea pele ke boloketsoe moqhaka oa ho loka.” (2 Timothea 4:6-8) Ho feta moo, Jesu o ile a re ho phutheho ea Bakreste ba tlotsitsoeng: “U tšepahale esita le ho isa lefung, ’me ke tla u fa moqhaka oa bophelo.”—Tšenolo 2:10; 17:14.
Lentsoe “moqhaka” le fana ka bopaki bo eketsehileng ba hore ho ne ho tla feta nako e itseng pakeng tsa ho tiisoa ha pele le ho tiisoa ha ho qetela. Hobane’ng? Mehleng ea boholo-holo, ho ne ho tloaelehile ho fa semathi se hapileng lebelo moqhaka. E le hore se fumane moqhaka oo, se ne se sa lokela ho kenela peiso eo feela. Se ne se lokela ho matha ho fihlela qetellong. Ka tsela e tšoanang, Bakreste ba tlotsitsoeng ba tla fuoa moqhaka oa bophelo ba ho se shoe leholimong haeba feela ba tiisetsa ho fihlela qetellong ea bophelo ba bona—e leng ho tloha nakong ea ha ba ne ba tiisoa ka lekhetlo la pele, ho fihlela ha ba tiisoa la ho qetela.—Matheu 10:22; Jakobo 1:12.
Masala a Bakreste ba tlotsitsoeng a tiisitsoeng ka lekhetlo la pele a tla tiisoa neng la ho qetela? Leha e le afe a ntseng a phela lefatšeng a tla tiisoa “liphatleng” pele matšoenyeho a maholo a qhoma. Ha meea e mene ea matšoenyeho e lokolloa, Baiseraele bohle ba moea ba tla be ba tiisitsoe la ho qetela, esita leha ba ’maloa ba bona ba tla be ba ntse ba phela nameng ’me ba sa ntse ba lokela ho phetha tsela ea bona ea lefatšeng.