Lipotso Tse Tsoang ho Babali
Na ho latela Tšenolo 20:8 re lokela ho etsa qeto ea hore Satane o tla khelosa matšoele-tšoele tekong ea ho qetela?
Tšenolo 20:8 e hlalosa tlhaselo ea ho qetela ea Satane bathong ba tla beng ba phela lefatšeng qetellong ea puso ea lilemo tse sekete ea ’Muso oa Mesia. Ha temana ena e bua ka Satane, e re: “O tla tsoa ho ea khelosa lichaba tseo likhutlong tse ’nè tsa lefatše, Gogo le Magogo, ho li bokella bakeng sa ntoa. Palo ea tsona e kaalo ka lehlabathe la leoatle.”
Ho sa tsotellehe mekhoa e tsoetseng pele ea saense, ho ntse ho sa tsejoe palo ea “lehlabathe la leoatle.” Kahoo, ho ka boleloa hore poleloana ena e bolela palo e sa tsejoeng. Empa na e bolela palo e khōlō esita le ea tonanahali, kapa e mpa feela e le palo e sa tsejoeng leha ho le joalo e le khōlō haholo?
Ka Bibeleng, poleloana e reng ‘joaloka lehlabathe la leoatle’ e sebelisoa ka litsela tse ngata. Ka mohlala, ho Genese 41:49, rea bala: “Eaba Josefa o tsoela pele ho bokella lijo-thollo tse ngata haholo, joaloka lehlabathe la leoatle, ho fihlela qetellong ba tlohela ho li bala, hobane li se na palo.” Mona taba e khōlō ke hore li ne li se na palo. Ka ho tšoanang, Jehova o ile a re: “Feela joalokaha makhotla a maholimo a ke ke a baloa, kapa lehlabathe la leoatle la lekanngoa, ke tla atisa joalo peō ea mohlanka oa ka Davida.” Joalokaha linaleli tsa leholimo le lehlabathe la leoatle li se na palo, le tšepiso ea Jehova ho Davida e tla phethahala.—Jeremia 33:22.
Hangata poleloana e reng “lehlabathe la leoatle” e bolela ntho e ngata kapa e khōlōhali. Ha Baiseraele ba le Gilgale, ba ne ba tšositsoe haholo ke lebotho la Bafilista le neng le khobokane Mikmashe, le neng le le “joaloka lehlabathe le lebōpong la leoatle ka bongata.” (1 Samuele 13:5, 6; Baahloli 7:12) “Molimo a tsoela pele ho fa Solomone bohlale le kutloisiso ka tekanyo e khōlō haholo le pelo e pharaletseng, joaloka lehlabathe le lebōpong la leoatle.” (1 Marena 4:29) Le hoja seo ho neng ho buuoa ka sona boemong ka bong se ne se le seholo haholo, se ne se ka lekanngoa.
Poleloana e reng “lehlabathe la leoatle” e ka boela ea hlalosa palo e sa tsejoeng, empa e se khōlōhali. Jehova o ile a re ho Abrahama: “Ruri ke tla atisa peō ea hao joaloka linaleli tsa maholimo le joaloka lehlabathe le lebōpong la leoatle.” (Genese 22:17) Ha Jehova a pheta tšepiso ena ho Jakobo setloholo sa Abrahama, o ile a sebelisa poleloana e reng “lerōle la lefatše,” eo Jakobo eena a ileng a re ke “lehlabathe la leoatle.” (Genese 28:14; 32:12) ’Me palo ena ea “peō” ea Abrahama eo Jesu a itseng ke “mohlatsoana,” ke 144 000 ho sa baloe Jesu Kreste.—Luka 12:32; Bagalata 3:16, 29; Tšenolo 7:4; 14:1, 3.
Mehlala ee e re ruta’ng? E re ruta hore poleloana e reng, ‘joaloka lehlabathe la leoatle’ hase kamehla e bolelang palo e ke keng ea lekanngoa, ea tonanahali; ebile hase kamehla e hlalosang ntho e khōlōhali. Hangata e bolela palo e sa tsejoeng empa e le khōlō. Ka hona, hoa utloahala ho lumela hore letšoele la marabele a tla tšehetsa Satane ha a hlasela batho ba Molimo ka lekhetlo la ho qetela, e ke ke ea e-ba le leholohali, empa le tla ’ne le be leholo hoo le tla tšosa. Leha ho le joalo, palo ea lona ha e tsejoe hona joale.