Ho Khutla Hoa Kreste
Tlhaloso: Pele a tloha lefatšeng, Jesu Kreste o ile a tšepisa hore o tla khutla. Liketsahalo tse thabisang tse amanang le ’Muso oa Molimo li amana le tšepiso eo. Ho ke ho hlokomeloe hore ho na le phapang pakeng tsa ho tla le ho ba teng. Ka hona, ha ho tla hoa motho (ho amanang le ho fihla hoa hae kapa ho khutla hoa hae) ho etsahala ka nako e boletsoeng, a ka ’na a ba teng ka lilemo tse itseng kamorao ho moo. Ka Bibeleng lentsoe la Segerike erʹkho·mai (le bolelang “ho tla”) le sebelisoa hape mabapi le ho lebisa hoa Jesu tlhokomelo ea hae mosebetsing oa bohlokoa nakong eitseng ha a le teng, e leng, mosebetsing oa hae e le moahloli oa Jehova ntoeng ea letsatsi le leholo la Molimo o Matla ’Ohle.
Na liketsahalo tse amanang le ho ba teng hoa Kreste li etsahala ka nako e khutšoaane haholo kapa ka lilemo tse itseng?
Matt. 24:37-39: “Joale ka ha ho bile mehleng ea Noe, le ho tleng [‘ho beng teng,’ NW, Yg, Ro, ED; pa·rou·siʹa, ka Segerike] ha Mor’a motho ho tla ba joalo. Hobane joale ka mehleng e bileng teng pele ho moroallo oa metsi, ha batho ba ne ba e-ja, ba e-noa, ba nyala, ba nyalisa, ha ba ha fihla tsatsi leo Noe a keneng arekeng ka lona; ha ba ka ba lemoha, ha ba ha fihla moroallo, ’me ba nkoa bohle ke oona: ho tla ba joalo le ho tleng ha Mor’a motho.” (Liketsahalo tsa “mehleng ea Noe” tse hlalositsoeng mona li etsahetse ka lilemo tse telele. Jesu o tšoantšitse ho ba teng hoa hae le se etsahetseng nakong eo.)
Ho Mattheu 24:37 ho sebelisitsoe lentsoe la Segerike parou·siʹa. Ka ho toba le bolela “ho ba pel’a.” Greek-English Lexicon ea Liddell le Scott (Oxford, 1968) e ngola “ho ba teng hoa batho,” e le tlhaloso ea eona ea pele ea pa·rou·siʹa. Kutloisiso ea lentsoe e bontšoa ka ho hlakileng ho Ba-Filippi 2:12, moo Pauluse a bapisang ho ba teng (pa·rou·siʹa) hoa hae le ho ba sieo (a·pou·siʹa) hoa hae. Ka lehlakoreng le leng, ho Mattheu 24:30, e bolelang ka “Mor’a motho a e-tla ka maru a leholimo, ka matla a maholo le ka khanya e kholo” e le moahloli oa Jehova ntoeng ea Harmagedone, ho sebelisitsoe lentsoe la Segerike er·khoʹme·non. Bafetoleli ba bang ba sebelisa ‘ho tla’ bakeng sa mantsoe ao a mabeli a Segerike, empa ba hlokolosi haholoanyane ba bontša phapang ea mantsoe ana a mabeli.
Na Kreste o tla khutla ka mokhoa o bonahalang mahlong a batho?
Joh. 14:19: “Ho se ho se hokae, ’me lefatše ha le sa tla mpona; empa lōna [baapostola ba khabane ba Jesu] le tla mpona; ereka ha ’na ke phela, le lōna le tla phela.” (Jesu o ne a tšepisitse baapostola ba hae hore o tla khutla hape ’me a ba nke ho ea ba le eena leholimong. Ba ne ba ka mo bona hobane e ne etlaba libopuoa tsa moea joaloka eena. Empa lefatše le ne le ke ke la hlola le mo bona. Bapisa 1 Timothea 6:16.)
Lik. 13:34: “O [Molimo] mo [Jesu] tsositse bafung, hore a se hlole a khutlela ho boleng.” (’Mele ea batho e-ea bola ka tlhaho. Ke ka lebaka leo 1 Ba-Korinthe 15:42, 44 e sebelisang lentsoe ‘ho bola’ tekanyong e le ’ngoe le “’mele oa nama.” Jesu a ke ke a hlola a e-ba le ’mele o joalo.)
Joh. 6:51: “Ke ’na bohobe bo phelang, bo theohileng leholimong; ekare ha motho a e-ja bohobe bona, o tla phela ka mehla; ’me bohobe boo ke tla mo nea bona, ke nama ea ka, ee ke tla e nea lefatše, le tle le phele.” (Ha a fane ka oona, Jesu ha a o nke hape. Ka hona ha a amohe batho melemo ea sehlabelo sa hae sa bophelo bo phethahetseng.)
Bona le maqephe 158, 159 tlas’a “Ho Nkoa ka ’Mele oa Nama.”
Ke eng e boleloang ke ho tla hoa Jesu “ka mokhoa oo” a nyolohetseng leholimong ka oona?
Lik. 1:9-11: “A nyolosoa ba [baapostola ba Jesu] ntse ba mo talimile, ’me leru la mo tlosa mahlong a bona. Ba re ba sa lelaletse leholimong, ha a ntse a nyoloha, bonang, ha hlaha ho bona banna ba babeli, ba apereng liaparo tse tšoeu, ba re: Banna ba Galilea, le ntse le emetse’ng, le lelaletse leholimong? Jesu eo ea nketsoeng leholimong a le har’a lōna, o tla be a tle ka mokhoa oo le ’moneng a e-ea leholimong ka oona.” (Hlokomela hore e re “ka mokhoa oo,” e seng ka ’mele oo. “Mokhoa” oo a nyolohileng ka oona ke ofe? Joalokaha temana ea 9 e bontša, o ile a nyamela ponong, ho tloha hoa hae ho bonoa feela ke barutuoa ba hae. Lefatše ka kakaretso ha lea ka la lemoha ho etsahetseng. Ho tla ba joalo le ka ho khutla hoa Kreste.)
Ho ne ho boleloa eng ka ‘ho tla ha hae ka maru’ ’me ‘mahlo ’ohle a mo bona’?
Tšen. 1:7: “Bonang, o tla ka maru, ’me mahlo ’ohle a tla ’mona, le bona ba mo hlabileng; ’me ba mefuta eohle ea lefatše ba tla soaba ka baka la hae.” (Le Mattheu 24:30; Mareka 13:26; Luka 21:27)
“Maru” a supa eng? Ho se bonahale. Ha sefofane se le har’a maru a teteaneng kapa kaholim’a maru, hangata batho ba fatše ha ba se bone, le hoja ba ka ’na ba utloa ho rora hoa lienjine. Jehova o itse ho Moshe: “Ke tla tla ho uena, lerung le letenya.” Moshe ha a ka a bona Molimo, empa leru leo le ne le bontša boteng bo sa bonahaleng ba Jehova. (Ex. 19:10; bona le Levitike 16:2; Numere 11:25.) Haeba Kreste a ne a ka hlaha a bonahala maholimong, ho totobetse hore hase “mahlo ’ohle” a neng a tla mo bona. Ka mohlala, haeba a ne a ka bonahala holim’a Australia, o ne a ke ke a bonahala Europe, Afrika le Amerika, na ha ho joalo?
“Mahlo ’ohle a tla mo bona” ka kutloisiso efe? A tla lemoha ka liketsahalo tse bonahalang lefatšeng hore o teng a sa bonahale. Johanne 9:41 le eona ha e bua ka pono eo e seng ea mahlo, e-ea tlaleha: “Jesu a re ho bona [Bafarisi]: Hojane le lifofu, le ka be le se na sebe; empa joale le re: Rea bona; sebe sa lōna se sala ke hona.” (Bapisa Ba-Roma 1:20.) Kamorao ho ho khutla hoa Kreste, batho ba bang ba bontša tumelo; ba hlokomela pontšo ea ho ba teng hoa hae. Ba bang ba hana bopaki, empa ha Kreste a nka bohato e le moahloli oa Molimo oa ba khopo, le bona ba tla lemoha pontšong ea matla a hae hore timetso e tsoa leholimong e seng ho batho. Ba tla tseba se etsahalang hobane ba ile ba lemosoa esale pele. Ka lebaka la se tla beng se ba oela holimo, ba tla ‘ikotla ke ho soaba.’
Ba “mo hlabileng” ke bafe? Hona ho entsoe ke masole a Baroma ha ho bolaoa Jesu. Empa ke khale a shoele. Ka hona ho tlameha ho bolela batho bao ka ho tšoanang ba tlatlapang, kapa ba ‘hlabang’ balateli ba ’nete ba Kreste “mehleng ea qetello.”—Matt. 25:40, 45.
Na ho ka hla hoa thoe motho o ‘tlile’ kapa ‘o teng’ haeba a sa bonahale?
Moapostola Pauluse o buile ka hore o ‘sieo ka ’mele, empa o teng ka moea’ phuthehong ea Korinthe.—1 Ba-Kor. 5:3.
Jehova o buile ka ho “theohela” hoa hae ho ea ferekanya puo ea bahahi ba tora ea Babele. (Gen. 11:7) O boetse a bolela hore o tla ‘theohela’ ho lopolla Iseraele botlamuoeng Egepeta. ’Me Molimo oa tiisetsa Moshe, “sefahleho sa ka se tla ea” ho ea etella Iseraele pele ho ea Lefatšeng la Pallo. (Ex. 3:8; 33:14) Empa ha ho lea mong ea kileng a bona Molimo.—Ex. 33:20; Joh. 1:18.
Liketsahalo tse ling tseo Bibele e li amahanyang le ho ba teng hoa Kreste ke life?
Dan. 7:13, 14: “E mong ea kang mor’a motho [Jesu Kreste] a hlaha ka maru a leholimo, a fihla ho Moholo oa matsatsi [Jehova Molimo], a atametsoa ho eena; a neoa ’muso, le hlompho, le borena, hore ba mefuta eohle, le ba lichaba tsohle, le ba lipuo tsohle, ba tle ba mo sebeletse.”
1 Ba-Thess. 4:15, 16: “Re fela re le bolella ka polelo ea Morena, hore, ha e le rōna ba tlang ho phela le ho salla ho tla ha Morena, re ke ke ra raka ba robetseng. Hobane Morena ka sebele o tla theoha leholimong ka mohoo, ka lentsoe la arekangeloi, le ka terompeta ea Molimo, ’me ba shoetseng ho Kreste ba tla tsoha pele.” (Ka hona, ba tla busa le Kreste ba ne ba tla tsosetsoa ho ba le eena leholimong—ho qaloa ka ba shoeleng lilemong tse fetileng, ho latela ba neng ba tla shoa kamor’a hore Morena a khutle.)
Matt. 25:31-33: “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. O tla bea linku ka letsohong la hae le letona, a bee lipōli ho le letšehali.”
2 Ba-Thess. 1:7-9: “’Me lōna ba tšoenngoang, le etsetsoe phomolo le rōna, mohla Morena Jesu a bonahalang a e-tsoa leholimong, le mangeloi a matla a hae, ka mollo o tukang, ho iphetetsa ho ba sa tsebeng Molimo, le ho ba sa utloeng Evangeli ea Jesu Kreste, Morena oa rōna. Bao ba tla otloa ka tšenyeho e sa feleng, ba tlosoe pel’a Morena le pel’a khanya ea matla a hae.”
Luka 23:42, 43: “Eaba se [sesinyi se qenehelang se khokhothetsoeng pel’a Jesu] re ho Jesu: Morena, u nkhopole ha u kena ’musong oa hao! Jesu a re ho sona: Ka ’nete ke re ho uena: U tla ba le ’na kajeno Paradeiseng.” (Tlas’a puso ea Jesu, lefatše lohle le tla fetoha paradeise; bafu ba khopolong ea Molimo ba tla tsosoa ba e-na le monyetla oa ho thabela bophelo bo phethahetseng lefatšeng ka ho sa feleng.)
Bona le maqephe 294-298, tlas’a sehlooho “Mehla ea Qetello.”