Khaolo ea 6
Molimo o ’Nile oa Etsa’ng?
1. Batho ba bangata kajeno ba lumela eng ka Molimo, empa na ke ’nete?
BATHO ba bangata kajeno ba lumela hore Molimo ha o thahaselle lefatše ka mokhoa o mafolo-folo kapa hore ha ho seo o se etsang ka mathata a tšoenyang batho. Empa ’nete ke hore Molimo o tsotella haholo. Ke ’nete, e ka ’na eaba ha o-oa etsa seo batho ba neng ba lebelletse hore o se etse. Empa hona ha ho bolele hore ha o-oa etsa letho. Ha e le hantle, haesale o etsetsa batho lintho ho tloha tšimolohong ea histori ea batho ho theosa ho tla fihlela kajeno.
2. Nako e khutšoaane ea bophelo ba bona e ka ’na ea ama monahano oa batho joang tabeng ee?
2 Lebaka le leng la hore batho ba bang ba fihlele qeto ea hore Molimo ha o etse letho ke nako e khutšoaane eo ba e phelang. Hona ho ba etsa hore ba tatele ho etsa lintho ka nakoana e khutšoaane eo bophelo ba bona bo ba lumellang ka eona. Ka hona monahano oa bona o busoa ke takatso ea ho bona liphetoho bophelong ba bona. Tšekamelo ea bona, he, ke ho ahlola Molimo motheong oa phihlelo e joalo ea botho, ka likhaello tsohle tsa eona.
3. Bolelele ba bophelo ba Jehova bo ama matla a hae a ho sebetsa maemo ka nako e molemohali joang?
3 Ka lehlakoreng le leng, Jehova o phela ka ho sa feleng. (Pesaleme ea 90:2, 4; Esaia 44:6) Ponong ea hae, a ka bona hantle hore na ke hokae ha nako e ntse e feta moo liketso tsa hae li tla finyella molemo o fetisisang bakeng sa e mong le e mong ea amehang le ho hōlisa morero oa hae hamolemo ka ho fetisisa. (Esaia 40:22; 2 Petrose 3:8, 9) Ke sona hantle seo Molimo o ’nileng oa se etsa.
Kamoo Molimo o Itšenotseng
4. Jehova o boletse hore morero oa hae ke eng, ’me kahoo tsebo eo a faneng ka eona bakeng sa batho ke efe?
4 Morero oa Jehova ke ho fana ka tsamaiso e lokileng bakeng sa pōpo eohle, e tlang ho momahanya batho hammoho khotsong le bonngoeng, ba thabele tšireletseho e feletseng. (Ba-Efese 1:9, 10; Liproverbia 1:33) Leha ho le joalo, Molimo ha o qobelle mang kapa mang hore a kene tlas’a tsamaiso ea oona. Ho amoheleha feela ba o sebeletsang le ba ratang tsela eo o busang ka eona. Ka pono ea ho thea lefatše le tla phela ka litekanyetso tse lokileng tsa tsamaiso ea oona, Molimo o entse hore batho ba fumane tsebo ea litekanyetso tseo le hore na tsamaiso ea oona e sebetsa joang. Ka nako e tšoanang, Molimo o ’nile oa nolofaletsa batho hore ba fumane tsebo ea bohlokoa mabapi le oona le litšoaneleho tsa botho ba oona.—Johanne 17:3.
5. Re ka ithuta eng ka Molimo mesebetsing ea pōpo?
5 Ha e le hantle, kaha Jehova ke moea, ha a bonahale ho motho. Kahoo, o ne a ka etsa joang hore batho ba nama le mali ba utloisise lintho tsee? Har’a tse ling, ho ka ithutoa ho hongata ka litšoaneleho tsa ’Mōpi ka mosebetsi oa hae o tsoileng matsoho. (Ba-Roma 1:20) Kamano e tsotehang har’a lintho tse phelang le melao ea bokahohle e laolang lintho tsohle e fana ka bopaki ba bohlale ba hae. Matla a maholohali a bonahalang maoatleng, boemong ba leholimo, le matleng a linaleli a fana ka bopaki ba matla ’ohle a hae. (Jobo 38:8-11, 22-33; 40:2) ’Me lijo tsa mefuta-futa tse thabisang tatso, botle ba lipalesa, linonyana, ho likela le ho chaba hoa letsatsi, menyakoe ea liphoofolo—kaofela li bolela ka lerato la ’Mōpi ho batho le takatso ea hae ea hore re fumane bophelo bo thabisa. Empa ho itšenola hoa Molimo ha ho felle ka lintho tsena.
6. (a) Ke ka mekhoa efe e meng Molimo o faneng ka tšenolo e tobileng ea thato ea oona? (b) Ke ka mekhoa efe hape Molimo o senoletseng batho metheo ea oona le litšoaneleho tsa oona?
6 Hape o buile ka makhetlo a sa tšoaneng a le maholimong. Mabakeng a mang a bua ka boeena. Mabakeng a mang o buile ka mangeloi, joaloka Thabeng ea Sinai Hloahloeng ea Arabia, moo a faneng ka molao oa hae ho Baiseraele ba limillione. (Exoda 20:22; Ba-Heberu 2:2) Joale, o ile a buisana le batho ka baprofeta ba hae ka makholo a mangata a lilemo ’me a etsa hore ba ngole litšenolo tsa thato ea hae. (2 Petrose 1:21) Kahoo, butle-butle Jehova o entse hore motho a tloaelane le litekanyetso tse lokileng tsa Hae le thato ea Hae. Ntlha ea bohlokoa ea sena ke tsela eo a senotseng melao-metheo ea hae le litšoaneleho tsa hae ka litšebelisano tsa hae le batho. Hona ho phaelletse boipiletsong bo mofuthu ba phihlelo ea motho Lentsoeng la oona le ngotsoeng. Ke ho laeang haholoanyane hakaakang le ho kholisang hakaakang hore re se ke ra bala le ho utloa lipolelo tsa morero oa Molimo feela empa hape hore ka tlalehong ea Bibele re be le mehlala e phelang e re thusang ho utloisisa thato ea oona hamolemonyana! (1 Ba-Korinthe 10:11) ’Me tlaleho eo e senola eng?
7. (a) Molimo o bontšitse joang hore ha o mamelle bobe ka ho sa feleng? (b) Ka ho ithuta hore na Molimo o talima boitšoaro bo joalo joang, re lokela ho etsa joang?
7 E fana ka bopaki ba hore Molimo ha o mamelle bobe ka ho sa feleng. Ke ’nete, o ile oa lumella bana ba Adama le Eva hore ba ikele ka tsela ea bona, ba hahe tlaleho e ke keng ea qojoa ea ho hlōleha hoa motho hore a ipuse ka katleho. Empa Molimo ha o-oa ka oa sia batho ba se na bopaki ba kahlolo ea Oona khahlanong le litsela tsa bona tse sa lokang. Kahoo o ile oa tlisa moroallo mehleng ea Noe hobane “lefatše le ne le tletse ho bolaeana.” (Genese 6:11-13) O ile oa timetsa metse e boitšoaro bo hlephileng ea Sodoma le Gomorrha. (Genese 19:24, 25; Juda 7) Oa lumella sechaba sa Iseraele, se neng se ipolela hore sea o sebeletsa, se ee botlamuoeng hobane ba ne ba sebelisa bolumeli ba bohata. (Jeremia 13:19, 25) Ha re ithuta hore na Molimo o talima boitšoaro bo joalo joang, re na le monyetla oa hore re etse liphetoho bophelong ba rōna ho bontša lerato la rōna bakeng sa se lokileng. Na re tla ho etsa?
8. Ha Molimo o tlisa timetso, na ho na le ba tla phonyoha? Bontša.
8 Tlaleho ea Bibele e boetse e senola hore Molimo o khetholla pakeng tsa ba lokileng le ba khopo. Moroallong oa lefatše lohle, Molimo ha o-oa ka oa timetsa Noe, eo e neng e le “ ’moleli oa ho loka,” empa oa mo boloka le ba bang ba supileng. (2 Petrose 2:5) ’Me, pele mollo le sebabole li nela Sodoma, Lota ea lokileng le ba ntlo ea hae ba ile ba nolofaletsoa hore ba balehe.—Genese 19:15-17; 2 Petrose 2:7.
9. Re ithuta eng ka tsela eo Jehova a sebelisaneng le Iseraele ea boholo-holo ka eona?
9 Ha batho ba Iseraele, ba neng ba hlapantse hore ba tla sebeletsa Molimo, ba ipaka ba sa tšepahale, ha a ka a potlakela ho ba lahla. Joalokaha a itse ho bona: “Nkile ka ’na ka le romela bahlanka ba ka kaofela ba baprofeta, ke ntse ke tsoha e sa le hosasa-sasa ka tsatsi le leng le le leng, ’me ke ba roma.” Empa ha baa ka ba mamela. (Jeremia 7:25, 26) Leha nako e se e le haufi hore Jerusalema e timetsoe, Jehova a re: “Hleka nka thabela lefu la e mobe? . . . Nka mo thabela, ha a ka kheloha litsela tsa hae, a tle a phele . . . Ha ho le joalo, sokolohang, le tle le phele.”—Ezekiele 18:23, 32.
10. Ntle ho hore o-oa mamella, litlaleho tsee tsa Bibele li re ruta eng hape ka Molimo?
10 Joale re bona eng? Hore ka tsela e amang ka botebo lipelo tsa batho ba sekametseng ho lokeng, Jehova o hlakisitse mamello ea hae e telele le batho. Leha ho le joalo, litšebelisano tsa hae le tsona li hatisa ka matla ho rōna lerato la hae la ho loka le bohlokoa ba hore re phele tumellanong le seo a se hlokang.
11. (a) Ke polelo efe ea morero eo Jehova a e entseng Edeneng? (b) Molimo o ’nile oa etsa’ng ho tloha ka nako eo?
11 Ho totobala ho hong hape hoa bohlokoa haholo. Hoa hlaka hore ho tloha tšimolohong Molimo o bile le morero o tiileng ho sohle seo o se entseng. ’Me ha ho mohla o kileng oa hlōleha ho nka bohato ha phethahatso ea morero oa oona e ho hloka. Morero ona oa bohlokoa o ile oa boleloa hona Edeneng. Ha a ahlola Satane, Jehova a profeta hore Satane o ne a tla ba le monyetla oa ho hlahisa “peō,” ba neng ba tla bontša hore ba tšoana le eena ba bile baa mo tšehetsa. Hape a profeta hore ho tla hlahisoa “peō” e ’ngoe, molopolli ea lokileng. Enoa o ne a tla ntša “noha ea khale, e bitsoang Diabolose le Satane” leqeba le bolaeang, ka hona a lopolla batho pusong ea hae e senyang. (Genese 3:15; Tšenolo 12:9) Hoba a bolele morero ona, Jehova a tsoela pele ho etsa litokisetso tse tiileng tsa hore qetellong a buse litaba tsa lefatše tlas’a “peō” e tšepisitsoeng. Mosebetsi ona oa selelekela o ne o tla nka nako, joalokaha re tla bona.
Lebaka la ho Sebelisana ka ho Khethehileng le Iseraele ea Boholo-holo
12, 13. (a) Ke hobane’ng ha Molimo o khethile Iseraele ’me o fane ka melao ea oona ho sechaba seo se le seng feela? (b) Kahoo, re ka ithuta eng historing ea Iseraele le ea lichaba tse ling?
12 Khale pele lichaba tsa kajeno li e-ba teng, Molimo o ile oa khetha sechaba se le seng seo o ileng oa se sebelisa joaloka sechaba sa oona ka makholo a lilemo. Hobane’ng? E le hore o ka fana ka pontšo e phelang ea tšebetso ea melao-metheo ea oona e lokileng. Sechaba seo, Iseraele ea boholo-holo, se ne se entsoe ka litloholo tsa Abrahama, monna ea neng a ile a bontša tumelo e khōlō ho ’Mōpi. Jehova a re ho bona: “Hase ka hobane le fetisa lichaba tse ling ka bongata Jehova a le ratileng, a le khethileng; hobane le sechaba se senyenyane ho lichaba tsohle. Empa kahobane Jehova a le ratile, ’me a bolokile kano eo a e anetseng bo-ntat’a lōna.”—Deuteronoma 7:7, 8; 2 Marena 13:23.
13 Hoba a ba lopolle bokhobeng Egepeta, Jehova a ithaopela ho ba kenya kamanong e khethehileng le eena, ’me ba arabela: “Tsohle tseo Jehova a li buileng re tla li etsa.” (Exoda 19:8) Joale Jehova a ba nea litaelo tsa hae, kahoo a ba khetha ho lichaba tse ling tsohle ’me a fana ka boitsebiso bo qaqileng mabapi le litekanyetso tsa hae tse lokileng. (Deuteronoma 4:5-8) Kahoo, histori ea Iseraele oa boholo-holo e fana ka tlaleho ea se etsahalang ha melao e lokileng ea Molimo e hlomphuoa kapa e hlompholloa. Ho sa le joalo, histori ea lichaba tse ling e senola phello ho ba phelang ntle ho molao oa Molimo.
14. (a) Na Molimo o ile oa siteloa lichaba tseo e seng Baiseraele ka ho se kena-kenane le litaba tsa tsona? (b) Empa, li ile tsa rua molemo joang moseng o sa tšoanelang oa Molimo?
14 Ho thoe’ng ka lichaba tseo tse ling? Li ile tsa ikela ka tsela ea tsona, li ikhethela mefuta ea tsona ea puso. Batho ba tsona ba ne ba ntse ba e-na le molemo o itseng bophelong ba bona. Ba ne ba ntse ba e-na le matla a letsoalo, ’me ka nako e ’ngoe a ne a ba susumelletsa liketsong tsa botho mabapi le batho ba bang. (Ba-Roma 2:14; Liketso 28:1, 2) Empa sebe seo ba se futsitseng le ho hana tataiso ea bomolimo li ne li ba etsa hore ba phehelle tsela ea boitaolo e neng e isa lintoeng tse sehlōhō le mekhoeng e hlephileng. (Ba-Efese 4:17-19) Ka sebele Molimo o ne o ke ke oa nkoa o ikarabella ka bomalimabe bo neng bo tlisoa ke tsela ea bophelo eo ba neng ba ikhethetse eona. Linako feela tseo Molimo o neng o kenella e ne e le ha liketso tsa batho li loantšana le ho phethahala hoa merero ea oona. Ho sa le joalo, Molimo ka mosa oa ba lumella hore ba be le kabelo ho thabeleng ho phela, bokhabaneng ba pōpo le litholoaneng tse beoang ke lefatše.—Liketso 14:16, 17.
15. Ke litokisetso life bakeng sa tlhohonolofatso e neng e tla qetella e tletse batho ba lichaba tsee tseo Molimo o neng o ntse o li sebetsa?
15 Leha e le hore Jehova o kile a khetholla batho ba lichaba tsena hore qetellong ba se ke ba fumana melemo e tšepisitsoeng ka “peō” ea Abrahama. Jehova o itse ka “peō” ena e neng e tla tla ka lesika la lelapa la Abrahama: “Lichaba tsohle tsa lefatše li tla itlhohonolofatsa lelokong [“ka peō,” NW] la hao, ka baka la hobane u mametse lentsoe la ka.” (Genese 22:18) Kahoo le hoja Jehova a ne a sebelisana ka ho khethehileng le Iseraele, hape o ne a sebetsa morero oa hae ntle ho khethollo ho hlohonolofatsa lichaba tse ling hamorao, le hoja li ne li sa ho hlokomele.—Liketso 10:34, 35.
16. (a) Ka nako ena eohle, Molimo o ne o ntse o etsa’ng mabapi le tšepiso ea Peō? (b) Peō eo ea tšepiso e ipakile hore ke mang?
16 Ka nako eo Jehova a neng a sebelisana le Iseraele oa boholo-holo, o ile a fana ka boprofeta bo bongata bo koetseng sekheo sa bohlokoa bakeng sa batho ba tumelo—hore na Peō e tšepisitsoeng ea Abrahama e ne e tla tsejoa joang mohla e fihlang. Le lesika la lelapa la eona, ka leloko la Juda le ntlo ea Davida, li ile tsa boleloa ka ho hlakileng. (Genese 49:10; Pesaleme ea 89:35, 36) Bethlehema moo a neng a tla tsoalloa teng, ho ile hoa boleloa ka lebitso. (Mikea 5:2) Makholo a lilemo e sa le pele ho ile hoa boleloa selemo seo a neng a tla tlotsoa ka sona e le Messia. (Daniele 9:24-27) Ho ile hoa tšoantšetsoa litšebeletso tsa hae tsa boprista molemong oa batho. ’Me ho bile joalo le ka sehlabelo sa hae sa botho se ileng sa bulela batho ba lichaba tsohle monyetla oa bophelo bo sa feleng. (Ba-Heberu 9:23-28) Kahoo, ha nako e beiloeng e fihla, ntho e ’ngoe le e ’ngoe e ile ea tsebahatsa Jesu Kreste ntle ho phoso e le Peō e tšepisitsoeng eo ka eona mahlohonolo a neng a tla qetella a tletse batho.—Ba-Galata 3:16, 24; 2 Ba-Korinthe 1:19, 20.
Ho Lokisoa Hoa Babusi ba Batho
17. Ka Jesu, Molimo o ne o tla tlisa’ng, ’me hona ho ile hoa hatisoa joang nakong ea tsoalo ea hae?
17 Pele Jesu a tsoaloa lengeloi le ne le boleletse ’m’ae Maria hore mora oa hae o ne a tla neoa ’muso o sa feleng. Haufi le Bethlehema, balisa ba ile ba tsebisoa ka ho tsoaloa hoa hae, ’me ba utloa letšoele la makhotla a leholimo le rorisa Molimo ’me le re: “Khanya e be ho Molimo maholimong a holimo, khotso e be lefatšeng ho batho bao o khahloang ke bona.”—Luka 1:31-33; 2:10-14.
18. (a) Ke ka tsela efe liphihlelo tsa hae lefatšeng li mo lokiselitseng liofisi tsa borena le boprista? (b) Lefu la hae le bile le phello efe ho fumaneng khotso?
18 Nahana ka melemo ea hore e be Morena enoa oa kamoso oa leholimo o ile a phela lefatšeng. Joaloka motho o ile a tseba a ba a utloisisa mathata a batho. O phetse a ba a sebetsa le bona, a kopanela mahlomoleng a bona ’me ka boeena a feta har’a mathata. O pakile botšepehi ba hae le lerato la hae la ho loka ho Jehova tlas’a liteko tse matla ka ho fetisisa. Ka tsela ena Molimo o ne o lokisa Jesu hore e be Morena ea utloisisang hammoho le Moprista e Moholo ho sebelisa melemo e phelisang ho batho. (Ba-Heberu 1:9; 4:15; 5:8-10) Ho feta moo, ka hore a tele bophelo ba hae, Jesu Kreste o ile a bulela batho tsela ea hore ba boele ba fumane likamano tsa khotso le Molimo.—1 Petrose 3:18.
19. (a) Re tseba joang hore Jesu o tsositsoe a ba a nyolohela leholimong? (b) Tabeng ea bobusi ba hae, o ile a etsa’ng hoba a khutlele leholimong?
19 Hoba Jesu a shoe, Molimo oa mo tsosetsa bophelong hape, ’me o ile a bonoa ke lipaki tse fetang 500 tsa batho ba neng ba ka paka hore tsoho e hlile e etsahetse. (1 Ba-Korinthe 15:3-8) Matsatsi a mashome a mane hoba Jesu a tsosoe, a nyolohela nģa leholimong ’me a nyamela mahlong a barutuoa ba hae ba neng ba shebelletse. (Liketso 1:9) A tsoela pele ho sebelisa borena ba hae ho balateli ba hae ba tšepahalang ho tloha leholimong ’me melemo ea puso ea hae ea ba etsa hore ba eme ba totobetse ha ba bapisoa le batho ka kakaretso. Empa na joale e ne e le nako ea hore a qale ho busa lichaba? Che, hobane litaba tse ling lenaneong le leholo la Molimo li ne li hloka ho eloa hloko.—Ba-Heberu 10:12, 13.
20. Ke mosebetsi ofe o mocha oo Jesu a neng a o buletse barutuoa ba hae lefatšeng?
20 Ho ne ho sa salletse hore ho etsoe mosebetsi o moholo lefatšeng lohle. Pele ho lefu le tsoho tsa Jesu ha ho Baiseraele ba neng ba ile ba tsoa e le baboleli ho sokolla batho ba lichaba tse ling. Empa leha e le bafe ba neng ba lakatsa ho nka borapeli ba Jehova ba ne ba ka kopanela melemo le Baiseraele kamehla. (1 Marena 8:41-43) Leha ho le joalo, ho tla hoa Bokreste ho ile hoa bula mosebetsi o mong o moholo o mocha. Jesu Kreste ka boeena o beile mohlala ’me a o siela barutuoa ba hae e le lefa, a ba bolella pele a nyolohela leholimong: “Le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea lefatše.”—Liketso 1:8.
21. Ho e-na le ho sokolla lefatše, Molimo o ne o finyella eng ka bopaki boo?
21 Na sepheo e ne e le ho sokolla lefatše? Che. Ho e-na le hoo, Jesu o bontšitse hore nakong ea ho fihlela ‘bofelong ba tsamaiso ea lintho,’ ho ne ho tla be ho bokelloa haholo-holo “bana ba ’muso.” E, litho tse ling tsa puso e tlang ea ’Muso li ne li lokela ho khethoa. (Mattheu 13:24-30, 36-43) Mang kapa mang ea balang Mangolo a Bakreste a Segerike a ka bona hang hore ho tloha ka Pentekonta ea 33 C.E., ba bang ba ne ba memeloa ho kopanela le Jesu Kreste pusong ea ’Muso oa hae oa leholimo.—2 Timothea 2:12; Ba-Heberu 3:1; 1 Petrose 1:3, 4.
22. (a) Molimo o ne o hloka litšoaneleho life ho bao e neng e tla ba majalefa a ’Muso oa leholimo? (b) Kahoo, na ho khetha ho entsoe ka lepotla-potla?
22 Ho khetha bana ba neng ba tla busa hammoho kamoso holim’a batho, ho ne ho tla nka nako. Hobane’ng? Har’a tse ling, monyetla oo o ne o lokela ho atolosetsoa ho batho ba lichaba tsohle. ’Me, ha ba bangata ba ipolela hore ba itšoarelletse ho oona, ke ba seng bakae ba ipakileng kannete hore ke balateli ba tšepahalang ba Mor’a Molimo. (Mattheu 22:14) Litekanyetso tse phahameng li ne li tlameha ho khahlametsoa. Le hoja Bakreste ba sa phele e le sehlopha sa sechaba se khethehileng joaloka Iseraele ea boholo-holo, ba ’nile ba talingoa e le basele, ba buellang tsela e ’ngoe ea bophelo. (1 Petrose 2:11, 12) Ba tlameha ho lula ba hloekile mekhoeng ea boitšoaro bo bobe le e litšila ea lefatše le ba potolohileng. (1 Ba-Korinthe 6:9, 10) Hore e be “bana ba ’muso” ka sebele, ba tlameha ho ipaka e le “ba bōpang khotso,” ba sa kopanele lintoeng tsa lichaba ’me ba sa iphetetse ha ba hlorisetsoa tumelo ea bona. (Matheu 5:9, TLP; 26:52; Ba-Roma 12:18, 19) Ba tlameha ho bontša botšepehi pusong ea Molimo ka ho hana ho buella mebuso ea lipolotiki, e tšoantšoang le ‘libatana’ ka Bibeleng. (Tšenolo 20:4, 6) Ka lebaka la sena sohle, le ka lebaka la hore ba phahamisitse lebitso la Jesu Kreste karolong ea hae e le Morena ea tlotsitsoeng oa Molimo, ba ‘hloiloe ke lichaba tsohle.’ (Mattheu 24:9) Kahoo ba tla busa batho le Kreste ba le leholimong, ha baa khethoa ka lepotla-potla.
23. (a) Ke ba bakae ba tlang ho ba sehlopheng seo sa puso sa leholimo le Kreste? (b) Ba khethiloe har’a bafe, hona hobane’ng?
23 Hase ka lebaka la hobane palo e khethiloeng e ne e tla ba khōlō ha khetho e nkile nako e telele hakana. Ho latela Mangolo, Molimo o lekanyelitse sehlopha sena se khethehileng sa puso tlas’a Jesu Kreste ho batho ba 144 000 feela. (Tšenolo 14:1-3) Empa Molimo o ba khethile ka hloko. Ba nkiloe ‘mefuteng eohle, lipuong tsohle, merabeng eohle le lichabeng tsohle.’ (Tšenolo 5:9, 10) Har’a bona ke batho ba tsoang metsamaong eohle ea bophelo, banna le basali, batho ba ileng ba kopanela mathateng a mefuta-futa a batho. Tseleng ea ha ba ntse ba apara botho bo bocha ba Bokreste, ho hang ha ho bothata boo ba bang ho bona ba sa kang ba talimana le bona le ho bo hlōla. (Ba-Efese 4:22-24; 1 Ba-Korinthe 10:13) Hona re ka ho thabela hakaakang! Hobane’ng? Hobane ho re tiisetsa hore e tla ba marena le baprista ba utloelang bohloko le ba mohau, ba khonang ho thusa banna le basali ba mefuta eohle hore ba rue molemo tokisetsong ea Molimo bakeng sa bophelo bo sa feleng.
24. Ho thoe’ng ka batho ba bang ba limillione ba phetseng ba ba ba e-shoa nakong ee, ba bangata ho bona ba sa tsebe Bibele?
24 Ho thoe’ng ka batho ba kantle ho tokisetso ee? Ka nako ena eohle, Molimo ha o-oa ka oa kena-kenana le mebuso e fapa-fapaneng. O ile oa tlohella batho hore ba ikele ka tsela eo ba ikhethetseng eona. Ha e le hantle, batho ba limillione ba phetse ba ba ba e-shoa, ba bangata ho bona ho se mohla ba kileng ba utloa ka Bibele kapa ka ’Muso oa Molimo. Empa Molimo o ne o sa ba lebala. O ne o lokisetsa nako eo moapostola Pauluse a buileng ka eona: “Ke na le tšepo ho Molimo, . . . ea hore tsoho ea bafu e tla ba teng, ea ba lokileng le ea ba sa lokang.” (Liketso 24:15) Joale, tlas’a maemo a lokileng a Tsamaiso e Ncha ea Molimo, ba ne ba tla neoa monyetla o feletseng oa ho ithuta ka litsela tsa Jehova. Motheong oa sena, ba ne ba ka inkela boemo ba botho tsekong ea borena ba bokahohleng. Ba ratang ho loka ba ne ba tla fumana monyetla oa ho phela ka ho sa feleng.
Ha “Bofelo” bo Atamela
25, 26. (a) Ka nako ea teng, Kreste o ne a tla neoa matla afe a eketsehileng, ’me o ne a tla nka bohato khahlanong le bo-mang? (b) Hona ho ne ho tla ama maemo lefatšeng joang?
25 Pele Tsamaiso e Ncha eo e e-tla, ho tlameha ho etsahale liketsahalo tse thabisang. Bibele e profetile ka phetoho e khōlō litabeng tsa lefatše. Jesu Kreste o ne a tla be a beiloe teroneng e le Morena ea sa tl’o busa feela holim’a barutuoa ba hae empa ka matla a ho nka bohato mabapi le lefatše lohle. Polelo e ne e tla etsoa leholimong: “Mebuso ea lefatše e fetohile ’muso oa Morena oa rōna le oa Kreste oa hae, ’me o tla busa ka ho sa feleng.” (Tšenolo 11:15) Bohato ba pele ba Morena bo ne bo tla ba khahlanong le “morena oa lefatše” ka boeena, Satane Diabolose le bademona ba hae. (Johanne 14:30) Makhotla ana a khopo a ne a tla liheloa a e-tsoa maholimong ’me a seeloe moeli sebakeng sa lefatše. Ka phello efe?
26 Tlhaloso ea boprofeta e tlaleha lentsoe le tsoang leholimong e le le reng: “Thabang ke hona, maholimo, le lōna ba ahileng teng. Ho malimabe lōna ba ahileng lefatšeng le leoatleng; hobane Diabolose o theohetse ho lōna a halefile hampe, ka ho tseba hobane nako ea hae ha e sa le ekae.” (Tšenolo 12:12) Morusu oo ho seng o kileng oa tšoana le oona o ne o tla etsahala har’a lichaba, empa bofelo bo ne bo ke ke ba tla hang.
27. (a) Ha “bofelo” bo ntse bo atamela, ke mosebetsi ofe o moholo oa ho arola o neng o tla etsahala, hona joang? (b) Timetso e profetiloeng ea lefatše e ne e tla ba khōlō hakae?
27 Ena e ne e tla ba nako ea mosebetsi o moholo oa ho arola. Tlas’a tataiso ea Jesu Kreste ea beiloeng teroneng, balateli ba hae ba tšepahalang ba ne ba tla lebisa ho boleloa hoa “litaba tsena tse molemo tsa ’muso” lefatšeng lohle leo ho ahiloeng ho lona e le bopaki ho lichaba tsohle. Batho hohle ba ne ba tla neoa monyetla oa ho bontša boikutlo ba bona mabapi le bobusi ba bomolimo. (Mattheu 24:14, NW; 25:31-33) Ha ho finyelletsoe sena, joalokaha Jesu a hlalositse, “e tla ba hona bofelo bo hlahang.” E tla ba ‘mahlomola a maholo, ha e sa le le tšimolohong ea lefatše, ho fihlela joale, tsietsi e kaalo e e-song ho ka e e-ba teng, ’me ha e ka ke ea boela ea e-ba teng le ka mohla o le mong.’ (Mattheu 24:21) Ha ho mohla batho ba tla boela ba botsa, Molimo o ’nile oa etsa’ng? Ho tla phonyoha feela ba ileng ba tsotella ka ho lekaneng hore ba fumane seo o neng o ntse o se etsa le ho tlisa bophelo ba bona tumellanong le seo o se hlokang pele timetso ea lefatše e fihla.
28. (a) Ho beoa teroneng hoa Kreste le ho aroloa hoa batho ba lichaba tsohle ho ne ho tla etsahala neng? (b) Kahoo, ho potlakile hore uena u le motho ka mong u etse’ng?
28 Empa liketsahalo tsee tsohle li tla etsahala neng? Kreste o neoa neng matla a ho busa e le Morena le ho tsoela pele ho arola batho ba lichaba tsohle? Linnete li bontša hore Molimo o ’nile oa etsa lintho tsena lekholong lena la bo20 la lilemo. Kreste o se a le teroneng ea hae ea leholimo, ’me hona joale mosebetsi oa ho arola o haufi le ho phethoa. Nako ea ho itsebahatsa hore u ka lehlakoreng la Jehova la tseko ea borena ba bokahohle e khutšoaane haholo. ‘Mahlomola a maholo’ a haufi haholo! Tlhahlobo ea boprofeta ba Bibele leseling la histori ea hona joale e paka hore hona ke ’nete. Re u khothalletsa hore u bo hlahlobe ka hloko.
[Setšoantšo se leqepheng la 62]
Ka ho phela har’a batho, morena e mocha oa lefatše o ile a utloisisa batho hamolemonyana