Lipotso tse Tsoang ho Babali

Na batho ba tla tsosoa haeba ba sa amohele Bokreste ba ’nete hona joale ’me ba shoa pele mahlomola a maholo a qala?

Ho molemo hore bohle re hanele tšekamelo ea ho ba baahloli, re hlokomele hore qetellong, kahlolo ea Jehova ka Jesu Kreste ke eona ea bohlokoa. (Johanne 5:22; Liketso 10:42; 2 Timothea 4:1) Empa Mangolo a fana ka boitsebiso bo itseng bo thusang ho arabela potso ena e phahamisitsoeng.

Boboleli ba lefatše lohle ba litaba tse molemo tsa ’Muso oa Molimo ke karolo ea bohlokoa ea ‘pontšo ea ho ba teng ha Jesu.’ Pontšo ena e ’nile ea e-ba bopaki ho tloha qalong ea lekholo lena la lilemo. Mosebetsi oa ho bolela o fella ka ho aroloa ha batho ba lichaba tsohle phethahatsong ea papiso ea Jesu ea “linku” le “lipōli.” Ha ho se ho qetiloe mosebetsi ona oa ho bolela le oa ho arola, ‘mahlomola a maholo’ a tla felisa tsamaiso ena e khopo ea lintho.—Mattheu 24:3, 21, 22, NW; 25:31-46.

Jehova, a e-na le Mora oa hae, o tla ahlola hore na ba qhelang molaetsa oa ’Muso ’me ba shoa pele mahlomola a maholo a qala ba nkoa e le lipōli. Jesu o ile a re lipōli ‘li tla ea mollong oa ka ho sa feleng.’ Ka baka leo, re ka fihlela qeto ea hore ba nkoang e le lipōli ke Molimo ba ke ke ba fumana tsoho. Ba na le kahlolo e tšoanang le ea “ba tla otloa ka tšenyeho e sa feleng” nakong ea mahlomola a maholo.—2 Ba-Thessalonika 1:9.

Empa ho thoe’ng ka bao ho bonahalang eka molaetsa oa ’Muso ha oa ka oa hlahisoa ho bona ka ho lekaneng e le hore ba ka be ba khonne ho etsa khetho e bohlale bakeng sa ’nete kapa khahlanong le eona pele ba e-shoa “mehleng ea qetello”?—2 Timothea 3:1.

Ba bangata ba shoang nakong eo mosebetsi oa ho bolela o ntseng o tsoela pele pele ho mahlomola a maholo ka ho hlakileng ba tla fumana tsoho. Sena se suptjoa ke seo re se balang ho Tšenolo 6:7, 8 se amang ho palama ha banna ba lipere ba tšoantšetso. Batho ba bangata ba shoele e le mahlatsipa a lintoa, likhaello tsa lijo, le mafu a bolaeang. Kaha ke “Hades” e batlang mahlatsipa a “Lefu,” ba tla tsosoa nakong ea Puso ea Kreste ea Lilemo tse Sekete, ha Hades e tla ntša bafu bohle ba ho eona. (Tšenolo 20:13) E ka ’na eaba bongata ba ba tla tsosetsoa bophelo bo kile ba utloa molaetsa oa ’Muso pele bo e-shoa.

Re ka leboha hakaakang hore Jesu ha aa ka a ho beha matleng a batho ho ahlola hore na ke bo-mang ba kang linku ’me ke bo-mang ba kang lipōli! Batho ba sa phethahalang ba ke ke ba lekanya ka ho loketseng hore na ke monyetla o mokae oo motho ea itseng a neng a na le oona oa ho utloa le ho amohela litaba tse molemo. Na re ka tseba hore na boemo ba hae ba pelo e ne e le bofe kapa hore na o ne a tla rata ho loka e le kannete? Na re ka lekanya hore na ho arabela ha hae ho ne ho tla angoa joang ke lelapa la hae, semelo sa hae sa bolumeli, kapa litšusumetso tse ling? Che. Leha ho le joalo, re ka kholiseha hore Jehova Molimo le Jesu Kreste ba ka lekanya litaba tse kang tseo ’me ba fihlela likahlolo tse phethahetseng, tse nang le toka, tse lokileng.—Deuteronoma 32:4; Esaia 11:1-5.

Kahoo, ha ho na lebaka la hore re lekanye hore ke bo-mang har’a ba sa tsoa shoa ba tla tsosoa kapa ba ke keng ba tsosoa. Ha rea fuoa matla a ho etsa seo. (Bapisa le Luka 12:13, 14.) Ke bohlale bo boholo hore re emele liqeto tsa Baahloli ba lokileng, Jehova Molimo le Jesu Kreste. Sena se tla re fa khotso e eketsehileng ea kelello joaloka basebeletsi ba Jehova. Ho boetse ho tla re thusa ho tsepamisa mehopolo ea rōna haholoanyane ho seo re abetsoeng ho se etsa—‘ho ea re etse barutuoa har’a batho ba lichaba tsohle, re ba ruta ho boloka tsohle tseo Jesu a li laetseng.’—Mattheu 28:19, 20, NW.

[Tlhaloso ea Moo Setšoantšo se Nkiloeng Teng e leqepheng la 31]

Leicester sheep, Meyers