“Litaba Tse Nyakallisang” Tsa Apocalypse

“Ka bona lengeloi le leng le fofa sebakeng, ’me le ne le e-na le litaba tse molemo tse sa feleng ho li bolela e le litaba tse nyakallisang ho ba lulang lefatšeng.”—TŠENOLO 14:6.

 1. Le hoja Lipaki tsa Jehova li lumela hore buka ea Apocalypse e bululetsoe, ke hobane’ng ha e se “sehlotšoana sa bokhelohi se phatlalatsang apocalypse”?

HO FAPANA le liqoso tse khahlanong le tsona, Lipaki tsa Jehova hase “sehlotšoana sa bokhelohi se phatlalatsang ntoa ea makhaola-khang [apocalypse]” kapa “lequloana la borapeli le phatlalatsang letsatsi la kahlolo.” Leha ho le joalo, li amohela Apocalypse, kapa buka ea Tšenolo, e le karolo ea Lentsoe la Molimo le bululetsoeng. Ke ’nete hore Tšenolo e fupere melaetsa ea kahlolo e khahlanong le ba khopo. Empa ha ba paka phatlalatsa, bahlanka ba Molimo ba lebisa tlhokomelo e khōlō tšepong e hlollang e boletsoeng ka Bibeleng, ho akarelletsa le e ho Apocalypse, kapa Tšenolo. Kahoo, ha ba eketse kapa hona ho tlosa eng kapa eng mantsoeng a boprofeta a fumanoang moo.—Tšenolo 22:18, 19.

Ba Phatlalatsang Litaba Tse Nyakallisang

 2. Ke mangolo afe a mang ao Lipaki tsa Jehova li atisang ho a sebelisa mosebetsing oa tsona oa boboleli?

² Motheo oa Mangolo oa tšebeletso ea phatlalatsa ea Lipaki tsa Jehova o atisang ho qotsoa, ke polelo ea Jesu e reng: “Litaba tsena tse molemo tsa ’muso li tla phatlalatsoa lefatšeng lohle leo ho ahiloeng ho lona hore e be bopaki ho lichaba tsohle; ’me joale e ntan’o ba hona bofelo bo tla tla.” (Matheu 24:14, NW, mongolo o botlaaseng ba leqephe) ’Me “litaba tsena tse molemo tsa ’muso” ke life? Lipaki tse ngata li ne li tla araba ka ho qotsa litemana tsa Tšenolo khaolo ea 20 le 21 tse buang ka Puso ea Kreste ea Lilemo tse Sekete le puso ea hae ea ’Muso le mokhatlo oa batho, moo lefu, ho siama le bohloko li sa tlo “hlola li e-ba teng.”—Tšenolo 20:6; 21:1, 4.

 3. Tšebeletso ea phatlalatsa ea Lipaki tsa Jehova e lumellana le mosebetsi ofe?

³ E le ba phatlalatsang litaba tsena tse nyakallisang, Lipaki tsa Jehova ka sebele ke babuelli ba lenģosa la leholimong leo le lona thōmo ea lona e hlalositsoeng ho Tšenolo. “Ka bona lengeloi le leng le fofa sebakeng, ’me le ne le e-na le litaba tse molemo tse sa feleng ho li bolela e le litaba tse nyakallisang ho ba lulang lefatšeng, le ho sechaba se seng le se seng le moloko o mong le o mong le leleme le leng le le leng le sehlopha se seng le se seng sa batho.” (Tšenolo 14:6) “Litaba tse molemo tse sa feleng” li akarelletsa phatlalatso e reng “’muso [kapa puso] oa lefatše” o ‘fetohile ’muso oa Morena oa rōna le oa Kreste oa hae’ le e reng “nako e behiloeng” ea Jehova e tlile ea “ho senya ba senyang lefatše.” (Tšenolo 11:15, 17, 18) Na ka sebele tseo hase litaba tse molemo?

Seo Tšenolo e re Tšoaretseng Sona

 4. (a) Ke linnete life tsa motheo tse bontšitsoeng khaolong ea 1 ea Tšenolo? (b) Ho hlokahala eng ho ba ratang ho rua molemo litabeng tse nyakallisang?

⁴ Khaolo e qalang ea buka ea Tšenolo e bontša Jehova e le “Alfa le Omega, . . . Ea teng le ea neng a le teng le ea tlang, ea Matla ’Ohle.” ’Me e bontša hore Mora oa hae, Jesu Kreste ke “Paki e Tšepahalang,” “letsibolo ho tsoa bafung,” le “’Musi oa marena a lefatše.” E boetse e bua ka Jesu e le “ea re ratang le ea ileng a re lokolla libeng tsa rōna ka mali a hae.” (Tšenolo 1:5, 8) Kahoo, ho tloha qalong, Tšenolo e qaqisa linnete tsa motheo tse pholosang bophelo. “Ba lulang lefatšeng” ba ke ke ba rua molemo litabeng tse nyakallisang tseo ba li tlisetsoang ntle le hore ba amohele bobusi ba Jehova, ba be le tumelo maling a Jesu a tšolotsoeng, ’me ba lumele hore Jehova o mo tsositse le hore hona joale Kreste ke ’Musi ea khethiloeng ke Molimo.—Pesaleme ea 2:6-8.

 5. Kreste o bontšoa e le ea phethang karolo efe ho Tšenolo khaolo ea 2 le ea 3?

⁵ Likhaolo tse peli tse latelang li bontša hore Kreste Jesu ke Molebeli oa leholimo ea lerato oa liphutheho tsa barutuoa ba hae ba lefatšeng. Moqolo o neng o ngoletsoe liphutheho tsa Bakreste tse supileng tse khethiloeng tse neng li le Asia Minor lekholong la pele la lilemo C.E. o ne o fupere khothatso le keletso e tiileng e ntseng e sebetsa le kajeno. Melaetsa e romeloang liphuthehong tsena hangata e qala ka mantsoe a kang “Ke tseba liketso tsa hao” kapa ‘Ke tseba matšoenyeho a hao.’ (Tšenolo 2:2, 9) E, Kreste o ne a tseba hantle se etsahalang liphuthehong tsa barutuoa ba hae. O ile a babatsa tse ling bakeng sa lerato, tumelo, mosebetsi oa tsona tšebeletsong, mamello le ho tšepahala lebitsong la hae le lentsoeng la hae. Tse ling o ile a li nyatsa hobane li ne li lumelletse lerato la tsona bakeng sa Jehova le Mora oa hae hore le fole, kapa li ne li khutletse boitšoarong bo bobe ba botona le botšehali, borapeling ba litšoantšo kapa lihlotšoaneng tsa bokoenehi.

 6. Pono e tlalehiloeng khaolong ea 4 e thusa batho hore ba utloisise eng?

⁶ Khaolo ea 4 e fana ka pono e tšosang ea terone ea leholimo ea Jehova Molimo. E fana ka tlhase ea khanya ea sebaka seo Jehova a lulang ho sona le ea sebōpeho sa puso ea leholimo seo a tla se sebelisa. Babusi ba behiloeng boreneng, bao literone tsa bona li pota-potileng terone e bohareng ea bokahohleng, ba inamela Jehova ’me baa phatlalatsa: “Ua tšoaneleha, Jehova, uena Molimo oa rōna, ho amohela khanya le tlhompho le matla, hobane u bōpile lintho tsohle, ’me ka lebaka la thato ea hao li ile tsa ba teng ’me tsa bōptjoa.”—Tšenolo 4:11.

 7. (a) Lengeloi le laela baahi ba lefatše ho etsa’ng? (b) Karolo ea bohlokoa ea mosebetsi oa rōna oa ho ruta ke efe?

⁷ Na see se bolela ho hong ho batho kajeno? Ka sebele ho joalo. Haeba ba batla bophelo tlas’a ’Muso oa Kreste oa Lilemo tse Sekete, ba tlameha ho ela hloko seo ‘lengeloi le fofang sebakeng’ le se phatlalatsang: “Tšabang Molimo ’me le mo tlotlise, hobane hora ea ho ahlola ha hae e fihlile.” (Tšenolo 14:6, 7) O mong oa merero e ka sehloohong ea mosebetsi oa thuto ea Bibele oa Lipaki tsa Jehova ke ho thusa “ba lulang lefatšeng” hore ba tsebe Jehova le ho mo rapela, ba hlokomele hore ke ’Mōpi, ’me ba ikemisetse ho ikokobelletsa bobusi ba hae bo lokileng.

Konyana e Lokelang ho Hlomphuoa

 8. (a) Kreste o bontšoa e le ea etsang eng khaolong ea 5 le ea 6? (b) Bohle ba mamelang litaba tse nyakallisang ba ka ithuta eng ponong ee?

⁸ Likhaolo tse peli tse latelang, 5 le 6, li bontša hore Jesu Kreste ke Konyana eo ho bonoeng e lokela ho bula moqolo o nang le litiiso tse supileng, kahoo, ka puo ea tšoantšetso a senola liketsahalo tse etsahalang mehleng ea rōna. (Bapisa le Johanne 1:29.) Ho Konyana ena ea leholimo ea tšoantšetso, mantsoe a leholimo a re: “Ua tšoaneleha ho nka moqolo le ho bula litiiso tsa oona, hobane u ile ua hlajoa ’me ka mali a hao ua rekela Molimo batho ho tsoa molokong o mong le o mong le lelemeng le leng le le leng le sehlopheng se seng le se seng sa batho le sechabeng se seng le se seng, ’me u ile ua ba etsa hore e be ’muso le baprista ho Molimo oa rōna, ’me ba tla busa e le marena holim’a lefatše.” (Tšenolo 5:9, 10) Pono ena e ruta hore motheong oa mali a Kreste a tšolotsoeng, batho ba itseng ba merabe eohle ba biletsoa ho ba le eena leholimong ’me ba ‘buse e le marena holim’a lefatše.’ (Bapisa le Tšenolo 1:5, 6.) Palo ea bona e lekanyelitsoeng e senoloa hamorao ho Tšenolo.

 9. Khaolo ea 6 e bua joang ka Kreste?

⁹ Ponong e ’ngoe, ho buuoa ka Kreste e le mopalami oa pere e tšoeu ea behiloeng boreneng, ea tsoang “e le ea hlōlang le ho phetha tlhōlo ea hae.” Hoa thabisa hore ebe o tla hlōla liphello tse mpe tse tšoantšetsoang ke banna ba bang ba bararo ba lipere tsa Apocalypse, bao ho palama ha bona ho bontšang khalefo e khōlō ho tliselitseng moloko oa batho ntoa, tlala le lefu ho tloha ka selemo sa bohlokoahali sa 1914. (Tšenolo 6:1-8) Karolo e khethehileng ea Kreste, Konyana ea Molimo polokong ea moloko oa batho le ho phethahaleng ha merero ea Jehova e hlollang ke sehlooho sa bohlokoa sa mosebetsi oa Lipaki tsa Jehova oa ho ruta Bibele.

10. (a) Khaolo ea 7 e fana ka boitsebiso bofe ba bohlokoa? (b) Kreste o ile a bua joang ka ba amohelang ’Muso?

¹⁰ Khaolo ea 7 e fupere litaba tse nyakallisang ka sebele. Ke bukeng ea Tšenolo feela moo re fumanang palo ea bao Jesu a ileng a ba bitsa “mohlape o monyenyane” o entsoeng ka bona bao Ntate oa Konyana a ba fang ’Muso. (Luka 12:32; 22:28-30) Bana ba tiisitsoe ke Jehova Molimo ka moea oa hae. (2 Bakorinthe 1:21, 22) Moapostola Johanne, ea ileng a amohela Tšenolo, oa tiisa: ‘Ka utloa palo ea ba neng ba tiisitsoe, likete tse lekholo le mashome a mane a metso e mene.’ (Tšenolo 7:4) Palo ena e nepahetseng e tiisoa khaolong e tlang hamorao e le e feletseng ea ba ‘rekiloeng har’a moloko oa batho’ hore ba buse le Konyana Thabeng ea Sione ea leholimo. (Tšenolo 14:1-4) Le hoja likereke tsa Bokreste-’mōtoana li fana ka litlhaloso tse sa utloahaleng le tse sa kholiseng mabapi le palo ena, hoa thahasellisa hore ebe setsebi sa Bibele E. W. Bullinger se re ka eona: “Polelo ena ke ’nete e bonolo: ke palo e tobileng ho fapana le palo e sa tobang khaolong eona ena.”

11. (a) Ho ka fumanoa litaba life tse nyakallisang khaolong ea 7? (b) Litho tsa “bongata bo boholo” li lebeletse lintho life?

¹¹ Bullinger o ne a bua ka palo efe e sa tobang? Temaneng ea 9, moapostola Johanne o ngotse: “Ka mor’a lintho tsena ka talima, ’me, bonang! bongata bo boholo, boo ho seng motho ea neng a khona ho bo bala, bo tsoa lichabeng tsohle le melokong eohle le lihlopheng tsohle tsa batho le malemeng ’ohle.” (Tšenolo 7:9) Ke bo-mang bao e leng karolo ea bongata boo bo boholo, boemo ba bona ba hona joale ke bofe ka pel’a Molimo, ’me bokamoso ba bona ke bofe? Karabo ea Apocalypse ke litaba tse molemo bakeng sa baahi ba lefatše. Rea bala: “Bana ke ba tsoang matšoenyehong a maholo, ’me ba hlatsoitse liaparo tse telele tsa ka holimo tsa bona le ho li soeufatsa maling a Konyana.” Ka tumelo maling a Kreste a tšolotsoeng, ba tla sireletsoa “matšoenyehong a maholo.” Kreste o “tla ba tataisetsa lilibeng tsa metsi a bophelo. ’Me Molimo o tla hlakola meokho eohle mahlong a bona.” (Tšenolo 7:14-17) E, batho ba limilione ba phelang kajeno e ka ba karolo ea bongata bo boholo bo se nang palo bo tla pholoha bofelo ba tsamaiso ea hona joale ea lintho. E le bafo ba Morena Jesu Kreste Pusong ea hae ea Lilemo tse Sekete, o tla ba tataisetsa bophelong bo sa feleng lefatšeng. Na tseo hase litaba tse molemo?

“Likahlolo Tsa Hae ke Tsa ’Nete ’me li Lokile”

12, 13. (a) Khaolo ea 8 ho ea ho ea 19 li fupere eng? (b) Ke hobane’ng ha boprofeta bo joalo bo sa lokela ho tšoenya batho ba lipelo li tšepahalang?

¹² Khaolo ea 8 ho ea ho ea 19 li tlatselitse haholo botumong boo buka ea Apocalypse, kapa Tšenolo e nang le bona ba ho ba buka e bolelang esale pele likoluoa tse tšosang. Li fupere melaetsa ea kahlolo e matla (e tšoantšetsoang ke melumo ea literompeta, mafu a seoa le likotlolo tsa bohale ba Molimo) e tšolleloang likarolong tse sa tšoaneng tsa tsamaiso ea lintho ea Satane. Ha likahlolo tsena li lihuoa, ho tla qaloa ka bolumeli ba bohata (“Babylona e Moholo”), ebe ho latela litsamaiso tsa lipolotiki tsa batho ba sa tšabeng Molimo, tse tšoantšetsoang ke sebata.—Tšenolo 13:1, 2; 17:5-7, 15, 16.a

¹³ Likhaolo tsena li bontša ho hloekisoa ha maholimo, ’me Satane le bademona ba hae ba liheloa tikolohong ea lefatše. Sena se fana ka tlhaloso eo e leng eona feela e utloahalang bakeng sa mahlomola a lefatše ao ho seng a tšoanang le ’ona a qalileng ka 1914. (Tšenolo 12:7-12) Li boetse li hlalosa, ka puo ea tšoantšetso, timetso ea tsamaiso ea lintho e khopo ea Satane e lefatšeng. (Tšenolo 19:19-21) Na batho ba lipelo li tšepahalang ba lokela ho tšosoa ke liketsahalo tse joalo tse makatsang? Che, hobane nakong ea ho lihuoa ha likahlolo tsa Molimo, lebotho la leholimo lea hoeletsa: “Rorisang Jah! Poloko le khanya le matla ke tsa Molimo oa rōna, hobane likahlolo tsa hae ke tsa ’nete ’me li lokile.”—Tšenolo 19:1, 2.

14, 15. (a) Tsamaiso ea hona joale e khopo e tla felisoa joang ka ho loka? (b) Ke hobane’ng ha karolo ee ea Apocalypse e lokela ho thabisa batho ba lipelo li tšepahalang?

¹⁴ Jehova a ke ke a tlisa tsamaiso ea lintho ea ho loka a sa felise ba senyang lefatše. (Tšenolo 11:17, 18; 19:11-16; 20:1, 2) Leha ho le joalo, ha ho na motho kapa naha ea puso ea lipolotiki e nang le matla a ho finyella sena. Ke Jehova feela le Morena le Moahloli oa hae ea khethiloeng, Kreste Jesu, ba ka etsang sena ka ho loka.—2 Bathesalonika 1:6-9.

¹⁵ Joalokaha Apocalypse e bontša ka ho hlaka, Jehova o rera ho felisa tsamaiso ea hona joale e khopo. ’Nete ena e tlameha ho ba mohloli oa thabo ho banna le basali ba “feheloang, ba bobolang ka baka la manyala ’ohle a etsoang.” (Ezekiele 9:4) Sena se lokela ho hatisa ka ho bona tlhokahalo e potlakileng ea ho ela hloko mohoo o ileng oa etsoa ke lengeloi le nang le litaba tse nyakallisang, le ileng la re: “Tšabang Molimo . . . hobane hora ea ho ahlola ha hae e fihlile, ’me kahoo le rapele Ea entseng leholimo le lefatše.” (Tšenolo 14:7) E se eka batho ba joalo ba ka rapela le ho sebeletsa Jehova hammoho le Lipaki tsa hae, ‘tse bolokang litaelo tsa Molimo le tse nang le mosebetsi oa ho paka ka Jesu.’—Tšenolo 12:17.

Puso ea Kreste ea Lilemo Tse Sekete e Khanyang

16. (a) Ke hobane’ng ha likereke tsa Bokreste-’mōtoana li hanne tšepo ea Puso ea Kreste ea Lilemo tse Sekete? (b) Ke hobane’ng ha Lipaki tsa Jehova li lumela hore thapelo ea mohlala e tla arajoa?

16 Khaolo ea 20 ho ea ho ea 22 tsa buka ea Tšenolo li fupere motheo oa Mangolo oa tšepo ea Puso ea Kreste ea Lilemo tse Sekete. Ena ke eona feela karolo ea Bibele e hlileng e buang ka nako ea lilemo tse sekete e tlang ho ba selelekela sa thabo ea ka ho sa feleng leholimong le lefatšeng. Likereke tsa Bokreste-’mōtoana li hanne tšepo ea Puso ea Kreste ea Lilemo tse Sekete. Kaha thuto ea kereke e re ba lokileng ba ea leholimong ’me ba khopo ba ea liheleng, ha e rute ka lefatše la paradeise. Thapelo ea mohlala e kōpang hore “thato [ea Molimo] e etsoe lefatšeng joalokaha e etsoa leholimong,” ha e sa na moelelo ho hang ho boholo ba litho tsa likereke tsa Bokreste-’mōtoana. (Matheu 6:10, New International Version) Empa ha ho joalo ho Lipaki tsa Jehova. Li lumela ka tieo hore Jehova Molimo ha aa ka a etsetsa lefatše “lefeela” empa o le etselitse “hore le ahuoe.” (Esaia 45:12, 18) Kahoo, boprofeta ba boholo-holo, thapelo ea mohlala le tšepo ea Apocalypse ea Puso ea Kreste ea Lilemo tse Sekete kaofela lia lumellana. Nakong ea Puso ea hae ea Lilemo tse Sekete, Kreste o tla etsa kahohle hore thato ea Jehova e etsoe lefatšeng, feela joalokaha e etsoa leholimong.

17. Ke’ng se bontšang hore “lilemo tse sekete” li lokela ho utloisisoa ka tsela ea sebele?

¹⁷ Poleloana “lilemo tse sekete” e hlaha ka makhetlo a tšeletseng litemaneng tsa pele tse supileng tsa Tšenolo khaolo ea 20. Se totobalang ke ’nete ea hore litemaneng tsa pele tsa Segerike e sebelisitsoe ka makhetlo a mane e e-na le lereho-lekhethi “tseo,” le bontšang hore e bua ka lilemo tse sekete tsa sebele, eseng feela nako e telele e sa lekanyetsoang, e leng seo bahlalosi ba bangata ba Bokreste-’mōtoana ba neng ba ka rata hore re se lumele. Ho tla etsahala eng nakong ea Puso ea Kreste ea Lilemo tse Sekete? Taba ea pele, Satane o tla tšoaroa matsoho nakong eo eohle. (Tšenolo 20:1-3; bapisa le Baheberu 2:14.) Tseo ke litaba tse molemo hakaakang!

18. (a) Ke hobane’ng ha Puso ea Kreste ea Lilemo tse Sekete e ka bitsoa “letsatsi” la kahlolo? (b) Ho tla etsahala eng qetellong ea lilemo tse sekete?

¹⁸ Kaha “matla a ho ahlola” a fuoe ba ‘busang e le marena le eena [Kreste] ka lilemo tseo tse sekete,’ ha e le hantle, nako ena ke “letsatsi” la kahlolo la lilemo tse sekete. (Tšenolo 20:4, 6; bapisa le Liketso 17:31; 2 Petrose 3:8.) Bafu ba tla tsosoa ’me, hammoho le baphonyohi ba ‘matšoenyeho a maholo,’ ba tla ahloloa ka ho loka ho latela lintho tseo ba li entseng, kapa liketso tsa bona, tsa nakong eo. (Tšenolo 20:12, 13) Qetellong ea lilemo tseo tse sekete, Satane o tla lokolloa hakhutšoanyane e le hore a leke moloko oa batho lekhetlo la ho qetela, ka mor’a moo eena le bademona ba hae, le marabele afe kapa afe a leng lefatšeng a mo latelang ba tla timeletsoa ruri. (Tšenolo 20:7-10) Batho ba fetang teko ena ka katleho mabitso a bona a tla ngoloa a ke ke a hlola a hlakoloa “bukeng ea bophelo” ’me ba tla kenngoa bophelong ba thabo ea ka ho sa feleng, ba sebeletsa Jehova le ho mo rapela lefatšeng la paradeise.—Tšenolo 20:14, 15; Pesaleme ea 37:9, 29; Esaia 66:22, 23.

19. (a) Ke hobane’ng ha re ka tiisa hore litšepiso tse hlollang tse bontšitsoeng bukeng ea Tšenolo li tla hle li phethahale? (b) Ho tla hlahlojoa eng sehloohong se latelang?

¹⁹ Tseo ke litaba tse nyakallisang tse ngotsoeng ho Apocalypse. Hase litšepiso tsa lefeela tsa batho. Moapostola Johanne o ile a ngola: “Ea lutseng teroneng o re: ‘Bona! Ke etsa hore lintho tsohle li be ncha.’ Hape, o re: ‘Ngola, hobane mantsoe ana aa tšepahala ’me ke a ’nete.’” (Tšenolo 21:5) Re lokela ho etsa eng hore re kopanele phethahatsong ea litaba tsee tse nyakallisang? Buka ea Tšenolo e fupere likeletso tse ngata bakeng sa ba batlang ho thabisa Molimo. Ho sebelisa likeletso tse joalo ho tla re tlisetsa thabo e khōlō, hona joale le ka ho sa feleng, joalokaha sehlooho se latelang se tla bontša.

[Mongolo o botlaaseng ba leqephe]

Lintlha Tsa Tlhahlobo

◻ Ke linnete life tsa motheo tse fumanoang ho Tšenolo khaolo ea 4 ho ea ho ea 6 tseo e leng karolo ea bohlokoa ea litaba tse nyakallisang?

◻ Ho ka fumanoa litaba life tse nyakallisang ho Tšenolo khaolo ea 7?

◻ Ke hobane’ng ha batho ba lipelo li tšepahalang ba sa lokela ho tšoenngoa ke melaetsa ea kahlolo e fumanoang ho Tšenolo?

◻ Puso ea Kreste ea Lilemo tse Sekete e tla ba “letsatsi” la kahlolo ka litsela life?

[Setšoantšo se leqepheng la 10]

Morena Jesu Kreste o tla felisa ntoa, tlala le lefu ka ho feletseng lefatšeng