Khaolo ea Borobong

Matla a Tšepo ea Tsoho

 1. Kantle ho tšepo ea tsoho, bafu ba ne ba tla ba le tebello efe?

NA U kile ua lahleheloa ke baratuoa ka lefu? Kantle ho tsoho, ho ne ho ke ke ha e-ba le tšepo ea ho hlola re ba bona hape. Ba ne ba tla lula ba le boemong boo Bibele e bo hlalosang ha e re: “Ha e le ba shoeleng, ho hang ha ba tsebe letho, . . . etsoe ha ho mosebetsi kapa morero kapa tsebo kapa bohlale Sheole [lebitla], e leng sebaka seo u eang ho sona.”—Moeklesia 9:5, 10.

 2. Ke tebello efe e babatsehang eo ho leng bonolo ho e fumana ka tsoho?

² Ka mohau, Jehova o buletse matšoele a se nang palo a batho ba shoeleng monyetla oa bohlokoahali oa hore ba tsohe bafung ’me ba thabele bophelo bo sa feleng. Hona ho bolela hore ka letsatsi le leng u ka ba le tšepo e thabisang ea hore, lefatšeng le lecha la Molimo, u tla boela u kopanngoa le baratuoa ba robetseng lefung.—Mareka 5:35, 41, 42; Liketso 9:36-41.

 3. (a) Tsoho e ipakile e le ea bohlokoa ho phethahatseng morero oa Jehova ka litsela life? (b) Ke neng ka ho khetheha tšepo ea tsoho e bang mohloli oa matla ho rōna?

³ Ka lebaka la tsoho, ha ho hlokahale hore re tšabe lefu. Jehova a ka lumella Satane ho etsa sohle se matleng a hae ho leka ho paka qoso ea hae e lonya ea hore “motho o tla nehelana ka ntho e ’ngoe le e ’ngoe eo a nang le eona bakeng sa moea oa hae,” empa eseng hore a ntše bahlanka ba hae ba tšepahalang kotsi ea nako e telele. (Jobo 2:4) Jesu o ile a tšepahala ho Molimo esita le ho isa lefung, kahoo Molimo o ile a mo tsosetsa bophelong ba leholimo. Kahoo Jesu o ile a hlahisa bohlokoa ba sehlabelo sa hae sa botho se phethahetseng ka pel’a terone ea Ntat’ae oa leholimo, e leng ho re tliselitseng melemo e pholosang bophelo. Ka tsoho, bao e leng ba “mohlatsoana,” joaloka majalefa-’moho le Kreste, ba na le tšepo ea ho kopanngoa le eena ’Musong oa leholimo. (Luka 12:32) Bakeng sa ba bang, ho na le tšepo ea ho tsohela bophelong bo sa feleng lefatšeng la paradeise. (Pesaleme ea 37:11, 29) Bakreste bohle ba fumana tšepo ea tsoho e le mohloli oa matla “a fetang se tloaelehileng” ha ba le litekong tse etsang hore ba talimane le lefu.—2 Bakorinthe 4:7.

Lebaka Leo ka Lona e Leng Motheo oa Tumelo ea Bokreste

 4. (a) Ke ka kutloisiso efe tsoho e leng “thuto ea mathomo”? (b) Tsoho e bolela’ng lefatšeng ka kakaretso?

⁴ Tsoho, joalokaha ho boletsoe ho Baheberu 6:1, 2, ke “thuto ea mathomo.” Ke karolo ea motheo oa tumelo eo ntle ho eona le ka mohla re neng re ke ke ra ba Bakreste ba hōlileng tsebong. (1 Bakorinthe 15:16-19) Leha ho le joalo, seo Bibele e se rutang ka tsoho ha sea tloaeleha monahanong oa lefatše ka kakaretso. Batho ba eketsehileng ba haelloang ke bomoea ba bona bophelo bona e le bona feela ba sebele. Kahoo ba phelela menyaka. Joale ho na le ba khomaretseng bolumeling ba neano—ka hare le ka ntle ho Bokreste-’mōtoana—ba nahanang hore ba na le moea o sa shoeng. Empa tumelo eo ha e nyalane le thuto ea Bibele ea tsoho, kaha tsoho e ne e ke ke ea hlokahala haeba batho ba e-na le moea o sa shoeng. Ho leka ho nyalanya maikutlo ana a mabeli hoa ferekanya ho e-na le ho susumetsa tšepo. Re ka thusa ba lipelo li tšepahalang ba batlang ho tseba ’nete joang?

 5. (a) Pele motho a ka utloisisa tsoho, ho hlokahala hore a tsebe eng? (b) U ka sebelisa mangolo afe ho hlalosa hore na moea ke eng? boemo ba bafu ke bofe? (c) Ho ka etsoa eng haeba motho e mong a sebelisa phetolelo ea Bibele eo ho bonahalang e pata ’nete?

⁵ Pele batho ba joalo ba ka utloisisa hore na tsoho ke tokisetso e babatsehang hakaakang, ho hlokahala hore ba be le kutloisiso e nepahetseng mabapi le hore na moea ke eng le hore na boemo ba bafu ke bofe. Hangata, mangolo a seng makae feela a lekane ho hlakisa litaba tsena ho motho ea lapetseng ’nete ea Bibele. (Genese 2:7; Pesaleme ea 146:3, 4; Ezekiele 18:4) Leha ho le joalo, liphetolelo tse ling tsa kajeno le likhatiso tse akaretsang taba tsa Bibele li pata ’nete e buang ka moea. Kahoo e ka ’na ea e-ba habohlokoa ho hlahloba mantsoe a sebelisitsoeng lipuong tsa pele tsa Bibele.

 6. U ka thusa motho joang hore a utloisise hore na moea ke eng?

⁶ Phetolelo ea Lefatše le Lecha ke ea bohlokoa haholo ho etseng sena hobane ha e feto-fetohe ha e fetolela lentsoe la Seheberu neʹphesh le le lumellanang le lona la Segerike psy·kheʹ e le “moea.” Sehlomathisong sa phetolelo ena ho thathamisitsoe litemana tse ngata tseo ho fumanoang mantsoe ana ho tsona. Liphetolelo tse ling tse ngata tsa Bibele lia feto-fetoha ’me li ka ’na tsa se ke tsa fetolela mantsoe ana a qalong e le “moea” feela empa tsa a fetolela hape e le “sebōpuoa,” “boleng,” “motho” le “bophelo”; “neʹphesh ea ka” e ka ’na ea fetoleloa e le “’na,” le “neʹphesh ea hao” e le “uena.” Ho bapisa liphetolelo tse ling tsa Bibele le Phetolelo ea Lefatše le Lecha ho tla thusa seithuti se tiileng ho utloisisa hore mantsoe a puo ea pele a fetoletsoeng e le “moea” a bua ka batho le liphoofolo. Empa ha ho mohla mantsoe ana a fanang ka maikutlo a hore moea ke ntho e sa bonahaleng, e sa tšoareheng e ka phonyohang ’meleng lefung ’me ea ’na ea tsoela pele e phela kae-kae.

 7. U ka hlalosa joang ka Bibele boemo ba batho ba Sheole? ba Hadese? ba Gehena?

⁷ Hape Phetolelo ea Lefatše le Lecha ha e feto-fetohe ha e sebelisa lentsoe “Sheole” kamoo le hlahang kateng ka Seheberu sheʼohlʹ le ha e sebelisa “Hadese” bakeng sa lentsoe la Segerike haiʹdes le “Gehena” bakeng sa lentsoe la Segerike geʹen·na. “Sheole” ke ntho e le ’ngoe le “Hadese.” (Pesaleme ea 16:10; Liketso 2:27) Bibele e hlakisa hore Sheole le Hadese ke lebitla le tloaelehileng la batho ’me li amana le lefu, eseng bophelo. (Pesaleme ea 89:48; Tšenolo 20:13) Mangolo a boetse a bua ka tebello ea ho khutla lebitleng le tloaelehileng ka tsoho. (Jobo 14:13; Liketso 2:31) Ho fapana le moo, ha ho tšepo ea bophelo nakong e tlang e boloketsoeng ba eang Gehena, ’me ha ho mohla ho buuoang ka hore moea oa ikutloa moo.—Matheu 10:28.

 8. Ho utloisisa tsoho ka ho nepahetseng ho ka susumetsa boikutlo ba motho le liketso tsa hae joang?

⁸ Ha litaba tsena li hlakisitsoe hantle, joale motho a ka thusoa ho utloisisa hore na tsoho e hlile e bolela eng ho eena. A ka qala ho ananela lerato la Jehova ka ho etsa tokisetso e babatsehang joalo. Masoabi a aparetseng ba lahlehetsoeng ke baratuoa ba bona ka lefu a ka tlosoa ke thabo ea ho lebella ho kopana le bona hape lefatšeng le lecha la Molimo. Ho utloisisa litaba tsena hape ke habohlokoa bakeng sa ho utloisisa se boleloang ke lefu la Kreste. Bakreste ba lekholong la pele la lilemo ba ile ba hlokomela hore tsoho ea Jesu Kreste ke motheo oa tumelo ea Bokreste, e bulela ba bang tsela ea tsoho. Ba bolella ba bang ka cheseho ka tsoho ea Jesu le ka tšepo eo e fanang ka eona. Kahoo, le kajeno ba ananelang tsoho ba chesehela ho kopanela ’nete ena ea bohlokoa le ba bang.—Liketso 5:30-32; 10:42, 43.

Ho Sebelisa ‘Senotlolo sa Hadese’

 9. Jesu o sebelisa “linotlolo tsa lefu le tsa Hadese” pele joang?

⁹ Bohle ba lokelang ho kopanela le Kreste ’Musong oa hae oa leholimo qetellong ba tlameha ho shoa. Empa ba tsebisisa tiiso eo a faneng ka eona ha a ne a re: “Ke ile ka shoa, empa, bona! ke phela ka ho sa feleng le kamehla, ’me ke na le linotlolo tsa lefu le tsa Hadese.” (Tšenolo 1:18) O ne a bolela’ng? O ne a hlokomelisa ka seo a fetileng ho sona. Le eena, o ne a kile a shoa. Empa Molimo ha aa ka a mo tlohela Hadese. Ka letsatsi la boraro, Jehova ka boeena o ile a mo tsosetsa bophelong ba moea le ho mo apesa ho se shoe. (Liketso 2:32, 33; 10:40) Ho phaella moo, Molimo o ile a mo neha “linotlolo tsa lefu le tsa Hadese” e le hore a li sebelise ho lokolla ba bang lebitleng le tloaelehileng la batho le liphellong tsa sebe sa Adama. Ka lebaka la ho ba le linotlolo tseo, Jesu o na le matla a ho tsosa balateli ba hae ba tšepahalang bafung. Joalokaha Ntate oa hae a mo file mpho ea bohlokoa ea bophelo ba ho se shoe leholimong, le eena o tsosa litho tse tlotsitsoeng ka moea tsa phutheho ea hae pele.—Baroma 6:5; Bafilipi 3:20, 21.

10. Tsoho ea Bakreste ba tšepahalang ba tlotsitsoeng e etsahala neng?

¹⁰ Bakreste ba tšepahalang ba tlotsitsoeng ba ne ba tla fumana tsoho eo ea leholimo neng? Bibele e bontša hore e se e qalile. Moapostola Pauluse o hlalositse hore ba ne ba tla tsosoa ‘nakong ea ho ba teng ha Kreste,’ e qalileng ka selemo sa 1914. (1 Bakorinthe 15:23) Ha batlotsuoa ba tšepahalang ba qeta tsela ea bona ea lefatšeng hona joale nakong ea boteng ba hae, ha ho hlokahale hore ba lule lefung ho fihlela Morena oa bona a khutla. Hang feela ha ba e-shoa, ba tsosetsoa bophelong ba moea, baa “fetoloa, ka motsotsoana, ka ho panya ha leihlo.” Thabo ea bona ke e kaakang, kaha mesebetsi e metle eo ba e entseng e “tsamaea hammoho le bona”!—1 Bakorinthe 15:51, 52; Tšenolo 14:13.

11. Ke tsoho efe e tlang ho ba teng bakeng sa batho ka kakaretso, hona e tla qala neng?

¹¹ Empa ho tsosetsoa ha majalefa a ’Muso bophelong ba leholimo hase eona feela tsoho. Taba ea hore ebe e bitsoa ‘tsoho ea pele’ ho Tšenolo 20:6 e bontša hore ho na le e tlamehang ho latela. Ba fumanang molemo ka tsoho ena ea morao ba tla thabela ho lebella bophelo bo sa feleng lefatšeng la paradeise. Hoo ho tla etsahala neng? Buka ea Tšenolo e bontša hore e tla ba ka mor’a hore “lefatše le leholimo”—tsamaiso ea hona joale e khopo ea lintho, hammoho le babusi ba eona—li tlosoe. Bofelo boo ba tsamaiso ea khale bo haufi haholo. Ka morao ho moo, ka nako e behiloeng ke Molimo, tsoho ea lefatšeng e tla qala.—Tšenolo 20:11, 12.

12. Ho tla akarelletsoa bo-mang har’a ba tšepahalang ba tla tsosetsoa bophelong lefatšeng, hona ke hobane’ng ha e le tebello e hlollang?

¹² Ho tla akarelletsoa bo-mang tsohong eo ea lefatšeng? Har’a bona e tla ba bahlanka ba tšepahalang ba Jehova ba mehleng ea boholo-holo, banna le basali bao ka lebaka la tumelo ea bona e matla tsohong, ‘ba neng ba ke ke ba amohela tokollo ka thekollo e itseng.’ Ke hore, ba ne ba ke ke ba sekisetsa botšepehi ba bona ho Molimo e le hore ba ka balehela lefu le mabifi le le tlang pele ho nako. E tla ba thabo e kaakang ho ba tseba le ho ba mamela ha ba pheta ka botlalo lintlha tsa liketsahalo tse ngotsoeng ka bokhutšoanyane feela ka Bibeleng! Ba bang hape ba tla tsosetsoa bophelong ba lefatšeng e tla ba Abele, paki ea pele e tšepahalang ea Jehova; Henoke le Noe, baboleli ba sebete ba molaetsa oa Molimo oa temoso pele ho Moroallo; Abrahama le Sara, ba ileng ba amohela mangeloi; Moshe, eo Molao o fanoeng ka eena Thabeng ea Sinai; baprofeta ba sebete ba kang Jeremia, ea boneng ho timetsoa ha Jerusalema ka 607 B.C.E.; le Johanne Mokolobetsi, ea utloileng ha Molimo ka boeena a tsebahatsa hore Jesu ke Mora oa Hae. Ho phaella moo, ho tla ba le banna le basali ba bangata ba tšepahalang ba shoeleng mehleng ena ea ho qetela ea tsamaiso ena ea hona joale e khopo ea lintho.—Baheberu 11:4-38; Matheu 11:11.

13, 14. (a) Ho tla etsahala eng ka Hadese le bafu ba ho eona? (b) Ho tla akarelletsoa bo-mang tsohong, hona hobane’ng?

¹³ Ka mor’a nako e itseng, ba bang le bona ba tla tsosoa bafung kantle ho bahlanka ba tšepahalang ba Molimo, ho se le ea mong ea salang lebitleng le tloaelehileng la batho. Hore na lebitla leo le tla horuloa bafu ba lona ho isa kae ho ka bonoa tseleng eo Jesu a tlang ho sebelisa ‘senotlolo sa Hadese’ ka eona molemong oa moloko oa batho. Sena se ka bonoa ponong e nehiloeng moapostola Johanne eo ho eona a boneng Hadese e “liheloa ka letšeng la mollo.” (Tšenolo 20:14) Hoo ho bolela’ng? Ho bolela hore Hadese, e leng lebitla le tloaelehileng la moloko oa batho, e felisoa ka ho feletseng. E ke ke ea hlola e e-ba teng, e horuloa bafu ka ho feletseng, hobane kantle le ho tsosoa ha barapeli bohle ba tšepahalang ba Jehova, Jesu ka mohau o tla tsosa le ba sa lokang. Lentsoe la Molimo lea re tiisetsa: “Ho tla ba le tsoho ea ba lokileng le ba sa lokang.”—Liketso 24:15.

¹⁴ Ha ho le ea mong ho bana ba sa lokang ea tsosetsoang feela hore a tl’o ahloleloa lefu hape. Tikolohong ea ho loka e tlang ho rena lefatšeng ka bophara tlas’a ’Muso oa Molimo, ba tla thusoa ho etsa hore bophelo ba bona bo lumellane le litsela tsa Jehova. Pono e bontšitse hore “moqolo oa bophelo” o tla phetloa. Kahoo, ba tla ba le monyetla oa hore mabitso a bona a ngoloe ho oona. Ba tla “ahloloa ka bomong ho ea ka liketso tsa bona” tseo ba li entseng ka mor’a hore ba tsohe. (Tšenolo 20:12, 13) Kahoo, ha ho nahanoa ka phello ea eona, tsoho ea bona e ka ipaka e le ‘tsoho ea bophelo’ ho e-na le hore e be ‘tsoho ea kahlolo.’—Johanne 5:28, 29.

15. (a) Ke bo-mang ba ke keng ba tsosoa? (b) Ho tseba ’nete ka tsoho ho lokela ho re ama joang?

¹⁵ Leha ho le joalo, hase bohle ba kileng ba phela eaba baa shoa ba tlang ho tsosoa. Ba bang ba entse libe tseo ba ke keng ba li tšoareloa. Ba joalo ha ba Hadese, empa ba Gehena, moo ba timetsoang ka ho sa feleng. Ba bang ba akarelletsoang har’a bana ke ba tlang ho timetsoa ‘matšoenyehong a maholo,’ a seng a le haufi hona joale. (Matheu 12:31, 32; 23:33; 24:21, 22; 25:41, 46; 2 Bathesalonika 1:6-9) Kahoo, le hoja Jehova a bontša mohau o fetisisang ka ho lokolla bafu Hadese, tsoho hase motheo oa hore re se tsotelle hore na re phela joang hona joale. Tsoho e ke ke ea e-ba teng bakeng sa bao ka boomo ba fetohelang bobusi ba Jehova. Tsebo ena e lokela ho re susumelletsa hore re bontše hore re ananela ka botebo mosa o sa tšoanelang oa Molimo ka ho phela bophelo ba rōna ho ea ka thato ea hae.

Ho Matlafatsoa ke Tšepo ea Tsoho

16. Tšepo ea tsoho e ka ba mohloli oa matla a maholo joang?

¹⁶ Rōna ba lumelang tšepo ea tsoho e le kannete re khona ho fumana matla a maholo ho eona. Hona joale, ha re le haufi le qetello ea bophelo ba rōna, rea tseba hore re ke ke ra lula re chechisa lefu ka ho sa feleng—ho sa tsotellehe mekhoa ea bongaka e sebelisoang. (Moeklesia 8:8) Haeba re sebelelitse Jehova ka botšepehi re kopane le mokhatlo oa hae o hlophisitsoeng, re ka lebella bokamoso ka tšepo e tiileng. Rea tseba hore ka nako ea Molimo e loketseng re tla tsosoa ’me re thabele bophelo hape. ’Me boo e tla ba bophelo bo hlollang hakaakang! Moapostola Pauluse o bo bitsa “bophelo ba sebele.”—1 Timothea 6:19; Baheberu 6:10-12.

17. Re ka thusoa ke eng hore re boloke botšepehi ho Jehova?

¹⁷ Ho tseba hore ho na le tsoho le ho tseba Eo e leng mohloli oa tokisetso eo ho etsa hore re be matla tumelong. Hona ho re matlafatsa hore re tšepahale ho Molimo leha re tšosoa ka lefu ke bahlorisi ba mabifi. Ke khale Satane a sebelisa ho tšaba lefu le tlang ka tšohanyetso e le mokhoa oa ho boloka batho bokhobeng. Empa Jesu ha aa ka a ba le tšabo e joalo. O ipakile a tšepahala ho Jehova ho fihlela lefung. Ka sehlabelo sa hae sa thekollo, Jesu o ile a fana ka mokhoa oa ho lokolla ba bang tšabong e joalo.—Baheberu 2:14, 15.

18. Ke eng se thusitseng bahlanka ba Jehova ho haha tlaleho e ntle joalo ea botšepehi?

¹⁸ Ka lebaka la tumelo ea bona tokisetsong ea sehlabelo sa Kreste le tsohong, bahlanka ba Jehova ba hahile tlaleho e ikhethang e le baboloki ba botšepehi. Ha ba hatelloa, ba ipakile hore ‘ha ba rate meea ea bona’ ho feta ho rata Jehova. (Tšenolo 12:11) Ka bohlale, ha ba leke ho boloka bophelo ba bona ba hona joale ka ho lahla litekanyetso tsa Bokreste. (Luka 9:24, 25) Baa tseba hore le haeba ba ka lahleheloa ke bophelo ba bona hona joale ka lebaka la ho khomarela bobusi ba Jehova ka botšepehi, o tla ba putsa ka tsoho. Na u na le tumelo e joalo? U tla ba le eona haeba u fela u rata Jehova ’me u hlile u amohela ka pelo eohle se boleloang ke tšepo ea tsoho ho uena.

Tlhahlobo

• Ke hobane’ng ha ho hlokahala hore motho a utloisise hore na moea ke eng le hore na boemo ba bafu ke bofe pele a ka ananela tsoho?

• Ke bo-mang ba tla tsoha bafung, hona tsebo ee e lokela ho re ama joang?

• Tšepo ea tsoho e re matlafatsa joang?

[Setšoantšo se leqepheng la 84, 85]

Jehova o tšepisa hore ho tla ba le tsoho ea ba lokileng le ba sa lokang