Diabolose—Hase Tumela-khoela Feela

“Hohle ka har’a Testamente e Ncha ho buuoa ka khohlano e khōlō pakeng tsa mabotho a Molimo a ho loka, le mabotho a bokhopo a eteletsoeng pele ke Satane. Maikutlo ana hase a mongoli a le mong kapa ba babeli [ba Bibele], empa ke maikutlo a tloaelehileng. . . . Joale, bopaki ba Testamente e Ncha bo hlakile. Satane ke motho oa sebele ea khopo, kamehla o khahlanong le Molimo le batho ba Molimo.”—“The New Bible Dictionary.”

HA HO le joalo, ke hobane’ng ha ba bangata ba ipolelang hore ke Bakreste—le ba ipolelang hore ba lumela Bibele—ba latola boteng ba Diabolose? Hobane, ha e le hantle, ha ba amohele Bibele e le Lentsoe la Molimo. (Jeremia 8:9) Ba re bangoli ba Bibele ba ne ba bonahatsa likhopolo tsa lifilosofi tsa lichaba tse neng li ba potolohile ’me ha baa ka ba fetisa ’nete e tsoang ho Molimo ka mokhoa o nepahetseng. Ka mohlala, moruti oa thuto ea bolumeli oa K’hatholike Hans Küng, oa ngola: “Litšōmo tsa Satane le lilegione tsa bademona . . . li ile tsa kena ka lenyele tsamaisong ea bolumeli ea Sejuda ’me ho tloha moo tsa fetela ka har’a Testamente e Ncha li tsoa litšōmong tsa Bababylona.”—On Being a Christian.

Empa Bibele hase feela lentsoe la motho; ka sebele ke Lentsoe la Molimo le bululetsoeng. Kahoo, re tla be re le bohlale ha re ka ela hloko seo e se buang ka Diabolose.—2 Timothea 3:14-17; 2 Petrose 1:20, 21.

Jesu o ne a Nahana Eng?

Jesu Kreste o ne a lumela hore Diabolose ke motho oa sebele. Jesu ha aa ka a lekoa ke bobe bo itseng bo neng bo le ka hare ho eena. O ile a hlaseloa ke motho oa sebele eo hamorao a ileng a mo bitsa “’musi oa lefatše.” (Johanne 14:30; Matheu 4:1-11) O ne a boetse a lumela hore ho na le libōpuoa tse ling tsa moea tse tšehetsang Satane mererong ea hae e mebe. O ile a phekola batho ba ‘nang le bademona.’ (Matheu 12:22-28) Esita le buka e latolang boteng ba Molimo e bitsoang A Rationalist Encyclopædia e bontša bohlokoa ba sena ha e re: “Kamehla e ’nile ea e-ba nyeliso ho baruti ba thuto ea bolumeli hore ebe Jesu oa Likosepele o ne a lumela hore ho na le libōpuoa tse khopo tsa moea.” Ha Jesu a ne a bua ka Diabolose le bademona ba hae, o ne a sa phete litumela-khoela tse nkiloeng litšōmong tsa Bababylona. O ne a tseba hore ehlile ba teng.

Re ithuta ho hongata ka Diabolose ha re hlahlobisisa mantsoe a Jesu a tobisitsoeng ho matichere a bolumeli a mehleng ea hae ha a re: “Le tsoa ho ntat’a lōna Diabolose, ’me le lakatsa ho phetha litakatso tsa ntat’a lōna. E ne e le ’molai ha a qala, ’me ha aa ka a ema a tiile ’neteng, hobane ’nete ha e eo ho eena. Ha a bua leshano, o bua ho ea ka tšekamelo ea hae, hobane o leshano ’me ke ntate oa leshano.”—Johanne 8:44.

Ho latela sena, Diabolose, e leng lebitso le bolelang “moetselletsi,” o ne a le “leshano ’me ke ntate oa leshano.” Ke sebōpuoa sa pele se ileng sa bua leshano ka Molimo, ’me se ile sa etsa joalo koana serapeng sa Edene. Jehova o ne a boleletse batsoali ba rōna ba pele hore ‘ka sebele ba ne ba tla shoa’ ha ba ka ja litholoana tsa sefate sa tsebo ea botle le bobe. Satane o ile a sebelisa noha ha a bolela hore mantsoe ao e ne e se ’nete. (Genese 2:17; 3:4) Ka nepo o bitsoa “noha ea pele, e bitsoang Diabolose le Satane.”—Tšenolo 12:9.

Diabolose o ile a bua leshano ka sefate sa tsebo ea botle le bobe. O ile a beha lebaka la hore thibelo ea hore batho ba se ke ba ja litholoana tsa sefate seo e ne e fosahetse; e le tšebeliso e mpe ea matla. O ile a re Adama le Eva ba ne ba “tla ba joaloka Molimo” ba tsebe ho iketsetsa qeto ea se setle le se sebe. Satane o ile a fana ka maikutlo a hore ha ba itaola, ba tla iketsetsa liqeto ka ho feletseng. (Genese 3:1-5) Ho hlaseloa ha tokelo ea Molimo ea ho busa ho ile ha phahamisa lintlha tsa bohlokoa ka ho fetisisa. Kahoo Jehova o lumelletse nako hore lintlha tsena li rarolloe. Sena se bolela hore Satane o fuoe monyetla oa ho phela ka nakoana. Nako ea hae e lekanyelitsoeng e fela ka potlako. (Tšenolo 12:12) Leha ho le joalo, o ntse a tsoela pele ho khelosa moloko oa batho ho Molimo ka mashano le thetso, a sebelisa batho ba kang bangoli le Bafarisi ba mehleng ea Jesu ho ntšetsa pele lithuto tsa hae.—Matheu 23:13, 15.

Jesu o ile a boela a re Diabolose e ne e le “’molai ha a qala” le hore “ha aa ka a ema a tiile ’neteng.” Bibele ha e rute hore Diabolose o ne a bōpetsoe ho ba ntho e kang selalome se laolang sebaka sa mollo le sa tlhokofatso bakeng sa bohle ba hanyetsang Molimo, ’me ho feta moo, ho hang ha e rute hore ho na le sebaka se joalo. Bibele e bontša hore bafu ba mabitleng a tloaelehileng a moloko oa batho, ha ba mollong kapa moo Satane a lulang teng.—Liketso 2:25-27; Tšenolo 20:13, 14.

Tšimolohong, Diabolose o ne a le “’neteng.” Joaloka mor’a Molimo ea phethahetseng, e ne e le karolo ea lelapa la Jehova la leholimo. Empa “ha aa ka a ema a tiile ’neteng.” O ile a ikhethela litsela tsa hae le melao-motheo ea hae e thehiloeng holim’a mashano. ‘Ha aa qala’ ho ba Diabolose ha a bōptjoa e le mor’a Molimo oa lengeloi, empa o qalile ho ba eena ha ka boomo a fetohela Jehova ’me a thetsa Adama le Eva. Diabolose o tšoana le batho ba ileng ba fetohela Jehova mehleng ea Moshe. Re bala se latelang ka bona: “Ba entse ka mokhoa o senyang; hase bana ba hae, sekoli ke sa bona.” (Deuteronoma 32:5) Ho ka buuoa se tšoanang ka Satane. E ile ea e-ba “’molai” ha e e-ba mofetoheli ’me a e-ba molato ka lefu la Adama le Eva, ha e le hantle, ka lefu la moloko oohle oa batho.—Baroma 5:12.

Mangeloi a sa Mameleng

Mangeloi a mang a ile a ipōpa ngatana-’ngoe le Satane bofetoheling ba hae. (Luka 11:14, 15) Mehleng ea Noe, mangeloi ana a ile a “furalla sebaka sa ’ona sa bolulo se loketseng” ’me a iphetola batho e le hore a ka thabela likamano tsa botona le botšehali le “barali ba batho.” (Juda 6; Genese 6:1-4; 1 Petrose 3:19, 20) Ke “karolo ea boraro ea linaleli tsa leholimo,” kapa karolo e nyenyane ea libōpuoa tsa moea, e nkileng tsela ena.—Tšenolo 12:4.

Buka ea Tšenolo e ngotsoeng haholo-holo ka puo ea tšoantšetso e hlalosa Diabolose e le “drakone e khōlō e ’mala oa mollo.” (Tšenolo 12:3) Hobane’ng? Hase hobane ka sebele a e-na le ’mele o tšosang le o mobe. Ha e le hantle, ha re tsebe hore na libōpuoa tsa moea li na le ’mele oa mofuta ofe, empa ho ka etsahala hore ebe Satane ha aa fapana le libōpuoa tse ling tsa moea tsa mangeloi tabeng eo. Leha ho le joalo, ho loketse hore ebe Satane o bitsoa “drakone e khōlō e ’mala oa mollo” ka lebaka la botho ba hae bo meharo, bo tšabehang, bo matla le bo senyang.

Hona joale, Satane le bademona ba hae ba thibetsoe ka tsela e makatsang. Ba ke ke ba hlola ba iphetola batho joaloka pele. Ka mor’a hore ho thehoe ’Muso oa Molimo o etelloang pele ke Kreste ka 1914, ba ile ba liheloa lefatšeng.—Tšenolo 12:7-9.

Diabolose ke Sera se Matla

Leha ho le joalo, Diabolose e ntse e le sera se matla. “O tsamaea joaloka tau e purumang, e batlang ho harola e mong.” (1 Petrose 5:8) Ha se matla a bobe a lulang ka har’a ’mele ea rōna e sa phethahalang. Ke ’nete hore letsatsi le leng le le leng re loana ka matla le litšekamelo tsa rōna tsa boetsalibe. (Baroma 7:18-20) Empa ntoa ea sebele e khahlanong “le babusi ba lefatše ba lefifi lena, le makhotla a moea a khopo a leng libakeng tsa leholimo.”—Baefese 6:12.

Tšusumetso ea Diabolose e atile hakae? Moapostola Johanne o re: “Lefatše lohle le rapaletse matleng a ea khopo.” (1 Johanne 5:19) Ho hlakile hore ha re batle ho tsepamisa mehopolo ea rōna ho Diabolose kapa ho lumella tšabo ea tumela-khoela mabapi le eena hore e re hlokise matla. Leha ho le joalo, ke bohlale hore re lule re falimehetse boiteko ba hae ba ho re foufatsa hore re se ke ra bona ’nete le ba ho senya botšepehi ba rōna ho Molimo.—Jobo 2:3-5; 2 Bakorinthe 4:3, 4.

Hase kamehla Diabolose a sebelisang mekhoa e mabifi ho hlasela ba batlang ho etsa thato ea Molimo. Ka linako tse ling, o iketsa eka ke “lengeloi la leseli.” Moapostola Pauluse o ile a lemosa Bakreste ka leraba lena ha a ne a ngola a re: “Ke tšaba hore ka tsela e itseng, joalokaha noha e ile ea eka Eva ka mano a eona, likelello tsa lōna li ka bolisoa hore li tlohe botšepehing le tlhoekong e lokelang Kreste.”—2 Bakorinthe 11:3, 14.

Ka lebaka leo re lokela ho ‘lula re hlaphohetsoe likelellong, re lebetse, re le khahlanong le eena, re tiile tumelong.’ (1 Petrose 5:8, 9; 2 Bakorinthe 2:11) Qoba ho bapalla liatleng tsa Satane ka ho itšunya-tšunya linthong leha e le life tse amanang le matla a phahametseng a tlhaho. (Deuteronoma 18:10-12) E-ba seithuti se khothetseng sa Lentsoe la Molimo, u ntse u hopola hore ha Jesu Kreste a ne a lekoa ke Diabolose, nako le nako o ne a lebisa tlhokomelo Lentsoeng la Molimo. (Matheu 4:4, 7, 10) Rapella moea oa Molimo. Litholoana tsa oona li ka u thusa ho qoba mesebetsi ea nama, eo Satane a e khothalletsang ka katleho e khōlō. (Bagalata 5:16-24) Hape, rapela Jehova ka tieo ha u le ka tlas’a khatello e itseng ea Diabolose le bademona ba hae.—Bafilipi 4:6, 7.

Ha ho na lebaka la hore re tšabe Diabolose. Jehova o re tšepisa tšireletso ea sebele khahlanong le eng kapa eng eo Satane a ka e etsang. (Pesaleme ea 91:1-4; Liproverbia 18:10; Jakobo 4:7, 8) Moapostola Pauluse o re: “Le tsoele pele ho fumana matla Moreneng le bonatleng ba matla a hae.” Ke moo le tla “khona ho ema le tiile khahlanong le maqiti a Diabolose.”—Baefese 6:10, 11.

[Setšoantšo se leqepheng la 5]

Jesu o ne a tseba hore Diabolose ke motho oa sebele

[Setšoantšo se leqepheng la 6]

“Lefatše lohle le rapaletse matleng a ea khopo”

[Tlhaloso ea Moo Setšoantšo se Nkiloeng Teng]

NASA photo

[Litšoantšo tse leqepheng la 7]

Ema u tiile khahlanong le Diabolose ka ho ithuta Lentsoe la Molimo le ka ho rapela kamehla