Mangeloi ke Bo-mang, Hona a Etsa Eng?

Jehova o batla hore re ithute ka lelapa la hae le leholimong. Lelapa leo le akarelletsa mangeloi, ao Bibele e reng ke “bara . . . ba Molimo.” (Jobo 38:7) Bibele e re’ng ka mangeloi? A ama batho joang? Na mangeloi kaofela ke karolo ea lelapa la Molimo?

1. Mangeloi ke bo-mang?

Jehova o bopile mangeloi pele a bopa lefatše. Joaloka Molimo, mangeloi ha a bonahale ’me a lula leholimong. (Baheberu 1:​14) Ho na le mangeloi a limilione ’me le leng le le leng le ikhethile. (Tšenolo 5:​11) A ‘phetha taelo ea [Jehova], ka ho mamela lentsoe la taelo ea hae.’ (Pesaleme ea 103:​20) Mehleng ea khale, ka linako tse ling Jehova o ne a sebelisa mangeloi ho fana ka melaetsa, ho thusa le ho pholosa batho ba hae. Mehleng ena mangeloi a thusa Bakreste ho ea ho batho ba batlang ho ithuta ka Molimo.

2. Satane le bademona ke bo-mang?

Mangeloi a mang ha aa ka a lula a tšepahalla Jehova. Lengeloi la pele le ileng la fetohela Molimo ke le ‘bitsoang Diabolose le Satane, le khelosang lefatše lohle leo ho ahiloeng ho lona.’ (Tšenolo 12:9) Satane o ne a batla ho busa batho, kahoo o ile a susumeletsa Adama, Eva le mangeloi a mang hore a se ke a mamela Jehova. Mangeloi ao a sa kang a mamela Molimo a bitsoa bademona. Jehova o ile a ba leleka leholimong, a ba lahlela lefatšeng ’me ba tla felisoa.​—Bala Tšenolo 12:​9, 12.

3. Satane le bademona ba hae ba leka ho re khelosa joang?

Satane le bademona ba hae ba khelosa batho ba bangata ka ho ba susumeletsa ho sebelisana le bademona kapa meea ’me ho etsa joalo ho fosahetse. Ka mohlala, batho ba bang ba batla thuso ho linohe tsa linaleli, ho batho ba bolelang liketsahalo esale pele, ho baloi kapa ho lingaka tsa setso. Ba bang bona ba sebelisa pheko e tsamaisanang le bodemona, ha ba bang ba thetsoa ka hore ba ka khona ho bua le bafu. Empa Jehova oa re eletsa o re: “Le se ke la retelehela ho ba buisanang le meea, ’me le se ke la batla keletso ho litsebi tse bolelang liketsahalo esale pele.” (Levitike 19:​31) O re fa tlhokomeliso ena e le hore a ka re sireletsa ho Satane le bademona. Ke lira tsa Molimo ’me li batla ho re ntša kotsi.

ITHUTE LINTLHA TSE LING

4. Mangeloi a thusa batho ho ithuta ka Jehova

Mangeloi a Molimo ha a rute batho Bibele ka ho toba. Empa a ka tataisetsa bahlanka ba Jehova ho batho ba batlang ho ithuta ka eena. Bala Tšenolo 14:​6, 7 ebe le buisana ka lipotso tse latelang:

• Ke hobane’ng ha re hloka thuso ea mangeloi ha re ruta batho Bibele?

• Na ho tseba hore mangeloi a khona ho u tataisetsa ho batho ba batlang ho ithuta Bibele hoa u khothatsa? Hobane’ng ha u cho joalo?

5. Hana ho sebelisana le bademona

Satane le bademona ke lira tsa Jehova ebile ke lira tsa rona. Bala Luka 9:​38-​42 ebe le buisana ka potso e latelang:

• Bademona ba tšoara batho joang?

Ha re batle hore bademona ba re susumetse. Bala Deuteronoma 18:​10-​12 ebe le buisana ka lipotso tse latelang:

• Ke ka litsela life bademona ba lekang ho re susumetsa le ho bua le rona? Ke mekhoa efe ea ho sebelisana le bademona e tloaelehileng sebakeng seo u lulang ho sona?

• Na ke ntho e utloahalang hore ebe Jehova ha a batle ha re sebelisana le bademona? Hobane’ng ha u cho joalo?

Bapala VIDEO ebe le buisana ka lipotso tse latelang:

VIDEO: “Hanyetsa Diabolose” (5:02)

• Na u nahana hore ntho eo ngoana oa Palesa a neng a e roetse letsohong e kotsi? Hobane’ng ha u cho joalo?

• Palesa o ne a lokela ho etsa’ng ho itšireletsa khahlanong le bademona?

Haesale Bakreste ba ’nete ba hanyetsa bademona. Bala Liketso 19:​19 le 1 Bakorinthe 10:​21 ebe le buisana ka potso e latelang:

• Ke hobane’ng ha ho le bohlokoa ho lahla ntho e ’ngoe le e ’ngoe eo u nang le eona e amanang le bodemona?

6. Hlola Satane le bademona ba hae

Bademona ba busoa ke Satane. Empa mangeloi a tšepahalang a tataisoa ke lengeloi le ka sehloohong Mikaele, e leng lebitso le leng la Jesu. Mikaele o na le matla a makae? Bala Tšenolo 12:​7-9 ebe le buisana ka potso e latelang:

• Ke bo-mang ba nang le matla a maholo, na ke Mikaele le mangeloi a hae kapa Satane le bademona ba hae?

• Na u nahana hore balateli ba Jesu ba lokela ho tšaba Satane le bademona ba hae?

U ka hlola Satane le bademona ba hae. Bala Jakobo 4:7 ebe le buisana ka potso ena:

• U ka itšireletsa joang khahlanong le Satane le bademona ba hae?

KAKARETSO

Mangeloi a tšepahalang aa re thusa. Satane le bademona ba hae ke lira tsa Jehova ’me ba susumeletsa batho ho sebelisa bodemona e le hore ba se ke ba mamela Jehova.

Re Ithutile’ng?

• Mangeloi a Jehova a thusa batho ho ithuta ka eena joang?

• Satane le bademona ba hae ke bo-mang?

• Ke hobane’ng ha u sa batle ho etsa letho le amanang le ho sebelisana le bademona?

BATLA

Bona bopaki ba hore Jesu ke eena lengeloi le ka sehloohong le bitsoang Mikaele.

“Ke Mang Lengeloi le ka Sehloohong le Bitsoang Mikaele?” (Sehlooho se websaeteng)

Bona bopaki bo bontšang hore Satane ke motho oa sebele.

“Na Diabolose ke Motho oa Sebele?” (Sehlooho se websaeteng)

Bona hore na ’mè e mong o ile a etsa’ng e le hore a se ke a hlola a susumetsoa ke bademona.

“O Ile a Fumana Morero Bophelong” (Molula-Qhooa, July 1, 1993)

Ithute hore na Satane o sebelisa bodemona joang ho khelosa batho.

“ ’Nete ka Boselamose le Boloi” (Na u Fumane Tsela e Isang Bophelong bo sa Feleng, karolo ea 5)