Le Itokisetse Letsatsi la Jehova
“Le itokise, hobane Mor’a motho o tla tla ka hora eo le sa e nahaneng.”—MATHEU 24:44.
1. Ke hobane’ng ha re lokela ho ameha ka letsatsi la Jehova?
E TLA ba letsatsi la ntoa le la khalefo, la bohloko bo boholo le la mahlomola, la lefifi le la lesupi. Ha ho pelaelo hore “letsatsi le leholo le le tšosang la Jehova” le tla tlela tsamaiso ena e khopo ea lintho, feela joalokaha metsi a Moroallo a ile a khama batho ba khopo ba matsatsing a Noe. Joang kapa joang le tla tla. Leha ho le joalo, “e mong le e mong ea ipiletsang lebitsong la Jehova o tla pholoha.” (Joele 2:30-32; Amose 5:18-20) Molimo o tla felisa lira tsa hae ’me a pholose batho ba hae. Kaha moprofeta Sofonia o ne a utloisisa hore metsotso e jele babeli, o ile a re: “Letsatsi le leholo la Jehova le haufi. Le haufi, ’me le potlakile haholo.” (Sofonia 1:14) Leha ho le joalo, ebe kahlolo ee e tsoang ho Molimo e tla phethahatsoa neng?
2, 3. Ke hobane’ng ha ho le bohlokoa hore re itokisetse letsatsi la Jehova?
2 Jesu o itse: “Malebana le letsatsi leo le hora eo ha ho ea tsebang, leha e le mangeloi a maholimo kapa Mora, haese Ntate feela.” (Matheu 24:36) Kaha ha re tsebe nako e tobileng, ke habohlokoa hore re ele hloko mantsoe a temana ea rōna ea selemo ea 2004 a reng: “Le lule le lebetse . . . Le itokise.”—Matheu 24:42, 44.
3 Ha Jesu a ne a bontša kamoo ba itokisitseng ba tlang ho bokelleloa ka potlako moo ho sireletsehileng ha ba bang ba tla lahloa, o itse: “Banna ba babeli ba tla be ba le tšimong: e mong o tla nkuoa ’me e mong a tloheloe; basali ba babeli ba tla be ba sila leloaleng la letsoho: e mong o tla nkuoa ’me e mong a tloheloe.” (Matheu 24:40, 41) Nakong eo e mahlonoko, re tla be re le boemong bofe? Na re tla be re itokisitse, kapa letsatsi leo le tla re tsometsa? Taba-khōlō ke hore na re nka mehato efe hona joale. Re ka itokisetsa letsatsi la Jehova ka ho qoba boikutlo bo itseng bo tloaelehileng kajeno, ka ho hanyetsa boemo bo itseng ba moea le ka ho furalla mekhoa e itseng ea bophelo.
Qoba Boikutlo ba ho se Tsotelle
4. Batho ba matsatsing a Noe ba ne ba e-na le boikutlo bofe?
4 Nahana ka matsatsi a Noe. Bibele e re: “Ka tumelo Noe, ka mor’a ho fuoa temoso ea bomolimo ea lintho tse e-s’o bonoe, o ile a bontša tšabo ea bomolimo eaba o haha areka bakeng sa ho pholosa ba ntlo ea hae.” (Baheberu 11:7) Areka eo e ne e tla ba ntho e sa tloaelehang le e bonahalang ka ho hlaka. Ho feta moo, Noe e ne e le “’moleli oa ho loka.” (2 Petrose 2:5) Ho batho ba matsatsing a Noe ho ne ho se na le moo ho reng teke! ha a ntse a bolela leha a ntse a haha areka. Hobane’ng? Hobane “ba ne ba ja ’me ba noa, banna ba nyala ’me basali ba nyalisoa.” Batho bao Noe a neng a ba pakela ba ne ba tšoarehile ka litaba tsa bona le menate hoo ba sa kang “ba elelloa ho fihlela moroallo o tla ’me o ba hohola bohle.”—Matheu 24:38, 39.
5. Baahi ba Sodoma ba ne ba e-na le pono efe matsatsing a Lota?
5 Ho ne ho le joalo le matsatsing a Lota. Mangolo aa re bolella: “Ba ne ba ja, ba ne ba noa, ba ne ba reka, ba ne ba rekisa, ba ne ba lema, ba ne ba haha. Empa letsatsing leo Lota a ileng a tsoa Sodoma ka lona ho ile ha na mollo le sebabole ho tsoa leholimong ’me tsa ba timetsa kaofela.” (Luka 17:28, 29) Ka mor’a hore mangeloi a lemose Lota hore timetso e haufi, o ile a bolella bakhoenyana ba hae se tlang ho etsahala. Leha ho le joalo, mahlong a bona o ile “a bonahala joaloka motho ea neng a soasoa.”—Genese 19:14.
6. Ke boikutlo bofe boo re lokelang ho bo qoba?
6 Jesu o itse “ho ba teng ha Mor’a motho” ho tla ba ka tsela eo matsatsi a Noe le a Lota a neng a le ka eona. (Matheu 24:39; Luka 17:30) Ka sebele, batho ba bangata kajeno ba na le boikutlo ba ho se tsotelle. Re lokela ho itlhokomela hore re se ke ra susumetsoa ke boikutlo bo joalo. Ha ho letho le phoso ka ho thabela lijo tse monate le lino ka tekanyo. Ka ho tšoanang, lenyalo ke tokisetso ea Molimo. Leha ho le joalo, haeba lintho tseo e se e le tsa bohlokoahali bophelong ba rōna, ’me lintho tsa moea li se li beheletsoe ka thōko, na re itokiselitse letsatsi le tšosang la Jehova?
7. Ke potso efe ea bohlokoa eo re lokelang ho e botsa pele re etsa ntho leha e le efe, hona hobane’ng?
7 Moapostola Pauluse o ile a re: “Nako e setseng e fokotsehile. Ho tloha joale ho ea pele ba nang le basali ba ke ba be joalokaha eka ha ba na bona.” (1 Bakorinthe 7:29-31) Re saletsoe ke nako e khutšoanyane feela hore re qetele mosebetsi oo re o filoeng ke Molimo oa ho bolela ka ’Muso. (Matheu 24:14) Pauluse o ile a lemosa le bona ba leng lenyalong hore ba se ke ba ameha haholo ka balekane ba bona hoo ba behang lintho tse amanang le ’Muso sebakeng sa bobeli. Ho hlakile hore Pauluse o ne a khothalletsa hore re be le kelello e hanelang ho se tsotelle. Jesu o ile a re: “Le ’ne le batle ’muso pele le ho loka ha [Molimo].” (Matheu 6:33) Ha re etsa qeto efe kapa efe kapa pele re etsa ntho leha e le efe, potso ea bohlokoa eo re tlamehang ho e botsa ke e reng, ‘See se tla ama joang tsela eo ka eona ke etelletsang pele lintho tse amanang le ’Muso bophelong ba ka?’
8. Haeba re se re phathahane haholo ka lintho tsa letsatsi le letsatsi, re lokela ho etsa’ng?
8 Ho thoe’ng haeba re hlokomela hore re se re phathahane haholo ka lintho tse tloaelehileng tsa letsatsi le letsatsi hoo lintho tsa moea li seng li behelloa ka thōko? Na tsela eo re phelang ka eona ha ea fapana hakaalo le ea baahelani ba rōna ba se nang tsebo e nepahetseng ea Mangolo le bao e seng baboleli ba ’Muso? Haeba ho joalo, ho hlokahala hore re rapelle taba ena. Jehova a ka re thusa hore re be le boikutlo ba kelello bo nepahetseng. (Baroma 15:5; Bafilipi 3:15) A ka re thusa hore re etelletse pele lintho tse amanang le ’Muso, re etse se nepahetseng le hore re phethe seo re tlamehang ho mo etsetsa sona.—Baroma 12:2; 2 Bakorinthe 13:7.
Ithibe Hore U se Otsele Moeeng
9. Ho latela Tšenolo 16:14-16, ke hobane’ng ha ho le bohlokoa hore re ithibe hore re se otsele moeeng?
9 Boprofeta bo buang ka ‘ntoa ea letsatsi le leholo la Molimo ea Matla ’Ohle’ ea Armagedone bo re lemosa hore ba bang ba ka ’na ba se ke ba lula ba falimehile. Morena Jesu Kreste o re: “Bonang! Ke tla joaloka lesholu. Ho thaba ea lulang a falimehile ’me a boloka liaparo tsa hae tsa ka ntle, e le hore a se ke a tsamaea a hlobotse ’me batho ba talima lihlong tsa hae.” (Tšenolo 16:14-16) Liaparo tsa ka ntle tseo ho buuoang ka tsona mona ke letšoao le re khethollang re le Lipaki Tsa Jehova tsa Bakreste. Sena se akarelletsa mosebetsi oa rōna re le baboleli ba ’Muso le boitšoaro ba rōna ba Bokreste. Haeba re ka thibasela moeeng, re ka ’na ra hlobolisoa letšoao la rōna la Bokreste. Seo se hlabisa lihlong ebile se kotsi. Re lokela ho ithiba hore re se ke ra oela boemong ba ho otsela moeeng kapa ba ho ba botsoa. Tšekamelo eo re ka e thibela joang?
10. Ke hobane’ng ha ho bala Bibele letsatsi le letsatsi ho re thusa hore re lule re falimehile moeeng?
10 Nako le nako Bibele e hatisa bohlokoa ba hore re lule re falimehile le hore re hlaphoheloe likelellong. Ka mohlala, litlaleho tsa Likosepele li re hopotsa sena: “Le lule le lebetse” (Matheu 24:42; 25:13; Mareka 13:35, 37); “le itokise” (Matheu 24:44); “lulang le talimile, le lule le falimehile” (Mareka 13:33); “le lule le lokile” (Luka 12:40). Ka mor’a hore moapostola Pauluse a bolele hore letsatsi la Jehova le tla tlela lefatše ka tšohanyetso, o phehella balumeli-’moho le eena o re: “A re se keng ra tsoela pele ho robala joalokaha ba bang kaofela ba tsoela pele ho robala, empa a re luleng re falimehile ’me re lule re hlaphohetsoe likelellong.” (1 Bathesalonika 5:6) Bukeng ea ho qetela ea Bibele, Kreste Jesu ea tlotlisitsoeng o hatisa kamoo a tlang ho tla ka potlako kateng, a re: “Ke tla kapele.” (Tšenolo 3:11; 22:7, 12, 20) Baprofeta ba bangata ba Baheberu le bona ba ile ba hlalosa ba ba ba lemosa ka letsatsi le leholo la Jehova la kahlolo. (Esaia 2:12, 17; Jeremia 30:7; Joele 2:11; Sofonia 3:8) Ho bala Lentsoe la Molimo, Bibele, letsatsi le letsatsi le ho thuisa ka seo re se balang, ho tla re thusa haholo hore re lule re falimehile moeeng.
11. Ke hobane’ng ha thuto ea botho ea Bibele e le ea bohlokoa hore re falimehe moeeng?
11 Ka sebele motho o lula a falimehile moeeng ha a ithuta Mangolo ka hloko a sebelisa lingoliloeng tse thehiloeng Bibeleng tse lokisetsoang ke “lekhoba le tšepahalang le le masene.” (Matheu 24:45-47) Leha ho le joalo, hore thuto ea botho e re tsoele molemo, e lokela ho etsoa ka mokhoa o tsoelang pele le kamehla. (Baheberu 5:14–6:3) Re lokela ho ja lijo tse tiileng tsa moea kamehla. Mehleng ena e ka ’na ea e-ba bothata ho fumana nako ea hona. (Baefese 5:15, 16) Ho ntse ho le joalo, ho bala Bibele le lingoliloeng tse thehiloeng Mangolong feela ha maemo a lumela, ha hoa lekana. Thuto ea botho ea kamehla ea hlokahala hore re lule re “phela hantle tumelong” le hore re lule re falimehile.—Tite 1:13.
12. Liboka tsa Bokreste le likopano tse nyenyane le tse khōlō, li re thusa joang ho loantša ho otsela moeeng?
12 Liboka tsa Bokreste, likopano tse nyenyane le tse khōlō, le tsona li re thusa ho loantša ho otsela moeeng. Joang? Ka taeo eo re e fumanang ho tsona. Libokeng tsee, na ha re hopotsoe kamehla hore letsatsi la Jehova le haufi? Liboka tsa Bokreste tsa beke le beke li boetse li re fa menyetla ea “hore re susumeletsane leratong le mesebetsing e metle.” Ho susumeletsana ha mofuta ona, ho thusa motho hore a lule a falimehile moeeng. Ha ho makatse hore ebe re laeloa ho bokana kamehla ha re ntse re “bona letsatsi le ntse le atamela.”—Baheberu 10:24, 25.
13. Tšebeletso ea Bokreste e re thusa joang hore re lule re falimehile moeeng?
13 Ho kopanela ka pelo eohle tšebeletsong ea Bokreste le hona ho re thusa hore re lule re falimehile. Na ho na le mokhoa o molemo ka ho fetisisa oa ho lemoha lipontšo tsa mehla le seo li se bolelang ho feta oa ho bua le ba bang ka tsona? ’Me ha re bona bao re ithutang Bibele le bona ba tsoela pele ba bile ba qala ho sebelisa seo ba ithutang sona, kutloisiso ea rōna ea hore metsotso e jele babeli ea eketseha. Moapostola Petrose o ile a re: “Hlomellang likelello tsa lōna bakeng sa tšebetso, le lule le hlaphohetsoe likelellong ka ho feletseng.” (1 Petrose 1:13) Pheko e ntle ea hore motho a se ke a otsela moeeng ke hore “kamehla a be le ho hongata hoo a ka ho etsang mosebetsing oa Morena.”—1 Bakorinthe 15:58.
Phema Mekhoa ea Bophelo e Senyang Bomoea
14. Joalokaha ho hlalositsoe ho Luka 21:34-36, ke mekhoa efe ea bophelo eo Jesu a hlokomelisang ka eona?
14 Boprofeteng ba Jesu bo boholo bo mabapi le pontšo ea ho ba teng ha hae, o ile a fana ka temoso e ’ngoe hape. O ile a re: “Ikeleng hloko hore le ka mohla lipelo tsa lōna li se ke tsa imeloa ke ho ja ho tlōla le ho noa haholo le matšoenyeho a bophelo, ’me ka tšohanyetso letsatsi leo la e-ba holim’a lōna hang-hang joaloka leraba. Etsoe le tla tla holim’a bohle ba lulang holim’a lefatše lohle. Joale, le lule le falimehile ka nako eohle le etsa thapeli e le hore le ka atleha ho phonyoha lintho tsena tsohle tse reretsoeng hore li etsahale, le ho ema ka pel’a Mor’a motho.” (Luka 21:34-36) Jesu o ile a hlalosa hantle mekhoa ea bophelo eo batho ba bangata ba e hahamallang: ho ja ho tlōla, botahoa le tsela ea bophelo e tlisang matšoenyeho.
15. Ke hobane’ng ha re lokela ho qoba ho ja le ho noa ho tlōla?
15 Melao-motheo ea Bibele ha e lumelle ho ja ho tlōla le ho noa ho tlōla ’me ho lokela ho qojoa. Bibele e re: “U se ke ua ba har’a ba noang veine haholo, har’a ba jang nama ka bonyollo.” (Liproverbia 23:20) Leha ho le joalo, ha ho hlokahale hore motho a je ho tlōla, a be a noe ho tlōla, e le hore a behe bomoea ba hae kotsing. Motho a ka otsela a ba a ba botsoa pele a e-ba molato oa ho noa ho tlōla kapa oa bonyollo. Maele a Bibele a re: “Ea botsoa o iponahatsa a lakatsa, empa moea oa hae ha o na letho.” (Liproverbia 13:4) Motho ea joalo a ka ’na a rata ho etsa thato ea Molimo, empa takatso ea hae e lula e sa phethahala ka lebaka la ho se tsotelle.
16. Re ka qoba joang hore re se ke ra imeloa ke matšoenyeho a amang malapa a rōna?
16 Matšoenyeho a bophelo ao Jesu a ileng a lemosa ka ’ona ke afe? A ama lintho tseo motho a tšoenyehileng ka tsona, ho lokisetsa litlhoko tsa lelapa le lintho tse kang tseo. Ke booatla bo bokaakang ho lumella lintho tsee hore li re imele! Jesu o ile a botsa: “Ke mang ho lōna eo ka ho tšoenyeha a ka eketsang nako ea bophelo ba hae ka setsoe se le seng?” O ile a lemosa bamameli ba hae a re: “Le ka mohla le se ke la tšoenyeha ’me la re, ‘Re tla ja’ng?’ kapa, ‘Re tla noa’ng?’ kapa, ‘Re tla apara’ng?’ Kaha tsena tsohle ke lintho tseo lichaba li li phehellang ka tabatabelo. Etsoe Ntat’a lōna oa leholimo oa tseba hore le hloka lintho tsena tsohle.” Haeba bophelong ba rōna re etelletsa pele lintho tse amanang le ’Muso re bile re e-na le tšepo ea hore Jehova o tla re fa lintho tseo re li hlokang, sena se tla re fokoletsa matšoenyeho se be se re thuse hore re lule re falimehile.—Matheu 6:25-34.
17. Ho hahamalla lintho tse bonahalang ho ka tlisetsa motho matšoenyeho joang?
17 Ntho e ’ngoe e ka bakang matšoenyeho ke ho hahamalla lintho tse bonahalang. Ka mohlala, batho ba bang ba thatafatsa bophelo ba bona ka ho reka lintho tse ka holim’a matla a bona. Ba bang ba ’nile ba ekoa ke mekhoa ea ho rua ka pele le matsete a sa tšepahaleng a lichelete. Ba bang leraba la bona ke thuto ea lefatše e phehelloang ka morero oa ho fumana chelete e ngata. Ke ’nete hore thuto e itseng e ka thusa motho hore a fumane mosebetsi. Leha ho le joalo, ’nete ke hore batho ba bang ba intšitse kotsi moeeng ka ho hahamalla thuto e phahameng ho ba jellang nako. Ke boemo bo kotsi hakaakang boo motho a ka bang ho bona ha letsatsi la Jehova le ntse le atamela! Bibele ea lemosa e re: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong.”—1 Timothea 6:9.
18. E le hore re qobe ho hoheloa ke mokhoa oa bophelo oa ho rata lintho tse bonahalang, re lokela ho hlaolela bokhoni ba ho etsa’ng?
18 E le hore motho a se ke a hoheloa ke lintho tse bonahalang, ho hlokahala hore a hlaolele bokhoni ba ho khetha pakeng tsa se nepahetseng le se fosahetseng ha a etsa liqeto. Bokhoni bona bo ntlafatsoa ka hore kamehla re je ‘lijo tse tiileng tsa moea tsa batho ba hōlileng’ le ho ba le ‘matla a ho lemoha a koetliselitsoeng ho khetholla se nepahetseng le se fosahetseng.’ (Baheberu 5:13, 14) Ntho e ’ngoe e tla re sireletsa hore re se ke ra etsa liqeto tse fosahetseng ke ho “nepisisa lintho tsa bohlokoa haholo” ha re etsa liqeto tsa hore na ke lintho life tse tlang pele.—Bafilipi 1:10.
19. Haeba re hlokomela hore re na le nako e nyenyane haholo ea ho hahamalla lintho tsa moea, re lokela ho etsa’ng?
19 Mokhoa oa bophelo oa ho rata lintho tse bonahalang o ka re koala likelello, oa re siela nako e nyenyane kapa oa se ke oa re siela nako ea ho hahamalla lintho tsa moea. Re ka itlhahloba joang ’me ra qoba ho tšoasoa ke mokhoa o joalo oa bophelo? Ho hlokahala hore re rapelle hore na re ka nolofatsa bophelo ba rōna joang le hore na re ka bo nolofatsa hakae. Morena Solomone oa Iseraele ea boholo-holo o ile a re: “Boroko ba ea sebeletsang bo monate, ho sa tsotellehe hore na ke ho honyenyane kapa ho hongata hoo a ho jang; empa lintho tse ngata tsa morui ha li mo lumelle ho robala.” (Moeklesia 5:12) Na ho hlokomela lintho tse bonahalang tse sa hlokahaleng ho re jella nako e ngata le matla a mangata? Ha lintho tse bonahalang li ntse li eketseha, ho li hlokomela, ho li lefella inshorense le ho li sireletsa le hona hoa eketseha. Na ebe re ka rua molemo ka ho nolofatsa bophelo ba rōna ka hore re tlose thepa e itseng?
Joang Kapa Joang, le Itokise
20, 21. (a) Ke eng seo moapostola Petrose a re tiisetsang sona mabapi le letsatsi la Jehova? (b) Ke liketso life tseo re lokelang ho tsoela pele re li etsa ha re ntse re itokisetsa letsatsi la Jehova?
20 Lefatše la matsatsing a Noe le ile la felloa ke nako, ’me tsamaiso ea lintho ea hona joale e tla felloa ke nako le eona. Moapostola Petrose o re tiisetsa sena: “Letsatsi la Jehova le tla tla joaloka lesholu, leo ka lona maholimo a tla feta ka lerata le sheshang le hlabang, empa thepa ea motheo e le e chesang ka matla haholo e tla qhibiliha, ’me lefatše le mesebetsi e ho lona li tla pepesoa.” Maholimo a tšoantšetso—e leng mebuso e khopo—le lefatše la tšoantšetso—e leng moloko oa batho o arohileng ho Molimo—li ke ke tsa pholoha matla a bohale bo tukang ba Molimo. Ha Petrose a bontša kamoo re ka lokelang letsatsi leo kateng, o re: “Kaha lintho tsena tsohle li tla qhibiliha ka tsela eo, le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopola ho ba teng ha letsatsi la Jehova!”—2 Petrose 3:10-12.
21 Liketso tsena tsa boinehelo ba bomolimo li akarelletsa ho ba teng ha rōna kamehla libokeng tsa Bokreste le ho kopanela ha rōna kamehla ho boleleng litaba tse molemo. E se eka re ka etsetsa Molimo liketso tsena ka boinehelo bo tlohang pelong ha re ntse re letetse letsatsi le leholo la Jehova, re sa fele pelo. A re ‘etseng sohle se matleng a rōna hore qetellong [Molimo] a re fumane re se na letheba ebile re se na sekoli ’me re le khotsong.’—2 Petrose 3:14.
Na Ua Hopola?
• Ke hobane’ng ha re lokela ho itokisetsa letsatsi la Jehova?
• Haeba re fumana hore re phathahane haholo ka lintho tse tloaelehileng bophelong, re lokela ho etsa eng?
• Ke eng se tla re thusa ho ithiba hore re se otsele moeeng?
• Ke mekhoa efe e senyang ea bophelo eo re lokelang ho e qoba, hona re ka e qoba joang?
[Litšoantšo tse leqepheng la 20, 21]
Batho ba matsatsing a Noe ha baa ka ba lemoha kahlolo e neng e atametse—uena?
[Setšoantšo se leqepheng la 23]
Na u ka nolofatsa bophelo ba hao e le hore u be le nako e eketsehileng ea ho hahamalla lintho tsa moea?