Nka Etsa Joang Hore Maikutlo Aa a Fele?

“Kaha hona joale ke talima bosodoma bo khopisa, ka linako tse ling ke iphumana ke hoheloa ke bona. Maikutlo ana aa mpherekanya, ka linako tse ling bosiu le motšehare. Ke ’nile ka rapela Jehova, ‘Tlosa maikutlo ana a tšosang!’ Na a sa tla ke a fele?”—Dennis.a

BACHA ba bangata ba Bakreste—ba batona hammoho le ba batšehali—ba ’nile ba etsa likōpo tse bontšang ho felloa ke tšepo tse kang ena bakeng sa thuso. Ba ikutloa ba sekametse bosodomeng empa ha ba batle ho kopanela bootsoeng bona, boloetseng, le boitšoarong bo bobe bo khethollang mofuta oo oa bophelo. Habohlokoa le ho feta, ba batla ho thabisa Molimo, ’me o nyatsa bosodoma ka ho tobileng Lentsoeng la hae.—Ba-Roma 1:26, 27; Ba-Kolosse 1:10.

Hangata ho boleloa hore basodoma ba ke ke ba fetoha. Leha ho le joalo, sena hase ’nete. Bakreste ba bang ba pele, qalong e ne e le basodoma, empa ba ile ba fetoha. (1 Ba-Korinthe 6:9-11) E, ka ho fapaneng le litšōmo tse tloaelehileng, batho ba ka fetoha ebile baa fetoha. Leha ho le joalo, le hoja mocha a ka ’na a qoba liketso tsa bosodoma ka katleho, a ka ’na a ho fumana ho le thata hore a hle a tlose ka ho feletseng takatso ea bosodoma. Mohlankana e mong o ile a ipolela tjena: “Ke lekile ho fetola maikutlo a ka. Ke rapetse Jehova bakeng sa thuso. Ke bala Bibele. Ke utloile lipuo tse buang ka taba ena. Empa ke tlaletsoe.”

Ha ho na pheko ea mohlolo kapa e etsahalang ka ho panya ha leihlo. Dennis oa hopola: “Ke ile ka iqobella bootsoa ba likamano tsa botona le botšehali e le ha ke leka ho ba ‘monna.’ Sena sohle ha sea ka sa atleha haese feela ho baka bohloko bo eketsehileng.” Leha ho le joalo, ka ho sebelisa melao-motheo ea Bibele, motho a ka sebetsana ka katleho le maikutlo a joalo.

Ho Hlokomela Mekhoa e Fosahetseng ea ho Nahana

Pele ho tsohle, hlokomela hore liketso li etelloa pele ke menahano. (Esaia 55:6, 7; Jakobo 1:14, 15) Dr. Wayne W. Dyer o hlokomela hore: ‘Ka sebele u ke ke ua ba le boikutlo (maikutlo) ka ntle le hore ebe u ile ua nahana pele.’ Kahoo motsong oa litakatso tsa bosodoma ho ka ’na ha e-ba teng mokhoa oa monahano o tsoileng tseleng mabapi le motho ka boeena, ba batona kapa ba batšehali, lerato, le tse ling tse joalo. Pele motho a ‘nchafatsa kelello ea hae’ le ho fetola menahano e joalo, taba ea pele motho o tlameha ho e hlokomela. (Ba-Roma 12:2) Ho etsa joalo ho ka neha motho temohisiso ea bohlokoa ea hore na ke ka lebaka la’ng ha motho a hoheloa ke batho ba bang ba batona kapa ba batšehali joaloka eena.

Motho a ka etsa seo joang? Tsela e ’ngoe ke ho rapela, joaloka mopesaleme: “Ntekolisise, uena Molimo, ’me u tsebe pelo ea ka. Ntlhahlobe, ’me u tsebe mehopolo ea ka e farasang, ’me u bone hore na ka hare ho ’na ho na le tsela leha e le efe e utloisang bohloko.” (Pesaleme ea 139:23, 24, NW) Hape ho ka ba molemo hore motho a tšohle maikutlo a hae le Mokreste ea masene ea hōlileng tsebong. Joalokaha Liproverbia 27:17 e bolela, “tšepe e leotsa tšepe.” Ka hona mohlankana e mong o ile a bolela lekunutu la hae ho moholo oa Mokreste ea neng a tsejoa ka hore oa utloisisa ebile o na le kutloelo-bohloko. Ho hang ho ne ho se bonolo ho eena ho tšepela motho e mong lekunutu la hae, empa ho hōtse kamano ea bohlokoahali. O re: “Nka bua le eena ka ntho leha e le efe.” Moholo enoa ha a mamele feela empa, ka ho botsa ka bohlale, o thusa ho ntša maikutlo le mehopolo ea mohlankana enoa.—Bapisa le Liproverbia 20:5.

Haeba motho e motona a ne a e-na le ntate ea khesang le ea hlekefetsang, a ka ’na a fumana hore ho hoheloa ha hae ke batho ba batona joaloka eena ka sebele ke boiteko ba lefeela ba ho khotsofatsa tlhoko ea lerato la ntate. Ka hore ebe le ka mohla ha aa ka a ba le mohlala oa motho e motona eo a lokelang ho mo etsisa, a ka ’na a ba le boikutlo ba seo Dr. Joseph Nicolosi a se bitsang “boikutlo ba ho fokola le ho se tšoanelehe mabapi le litšoaneleho tsa bonna, e leng matla, ho tiisa, le bonatla.” Haeba motho a nahana ka litšobotsi ka bonngoe tse khethehileng tseo a ikutloang hore lia haella ho eena, a ka ’na a makala ho fumana hore tsona litšobotsi tseo ke tsona tseo a li fumanang li hohela ho banna ba bang.

“Lithuto” Tse Bohloko Tsa Nakong e Fetileng

Bacha ba bang baa hlokomela hore bothata ba bona bo amana le lintho tse ferekanyang tsa nakong e fetileng. Ngoanana e mong oa hopola: “Ke ile ka pepesehela boitsebisong bo nang le litšoantšo tsa bootsoa le lihlooho tsa bosodoma. Ke ile ka qala ho hōlisa litakatso tseo eseng tsa tlhaho.” Mohlankana e mong oa bolela: “Ntate o ne a ntlhasela ka ho kopanela liphate. Ka lebaka leo, ho kopanela liphate le motho e mong e motona ho ile ba bonahala e le ntho e tloaelehileng ho ’na.” Liphihlelo tse bohloko joalo li ka ’na tsa ruta bahlaseluoa ho hloea kapa esita le ho tšaba ba batona kapa ba batšehali ho fapana le bona kapa ba nka lerato le tšoana le ho atamelana haufi-ufi ka ’mele. Ka hona mohlaseluoa e mong o hlalosa litakatso tsa hae tsa ho ba le likamano tsa botona le botšehali e le “tlhoko ea maikutlo, eseng ea ’mele—tlhoko ea mofuthu le kutloisiso.”

Leha ho le joalo, ho lumeloa hore lisosa tsa bosodoma li rarahane, ’me liketsahalo tse ngata li hanyetsa tlhaloso e bonolo feela.b Leha ho le joalo, ho sa tsotellehe hore na ke eng se bakileng monahano o fosahetseng, ho na le ho hongata hoo motho a ka ho etsang ho lokisa monahano oo.

Ho Fetoha ka Nchafalo ea Kelello

Tsela e molemohali ke ho sebelisa Lentsoe la Molimo. Ka mohlala, nahana ka mohlankana ea iphumanang a hoheloa ke banna ba bontšang litšoaneleho tsa bonna tseo a ikutloang hore oa li hloka. Kapa moroetsana ea tšabang batho ba batona. Tsela e ’ngoe eo ka bobeli ba bona ba ka hōlisang pono e molemo haholoanyane ka banna ke ho ithuta mohlala oa Jesu. (1 Petrose 2:21) E ne e le mohlala o phethahetseng oa matla a bonna a leka-lekantsoeng ka bonolo. (Mattheu 19:14; Johanne 19:5) Ka hona mohlankana e mong o fumana e le ho thusang ho ithuta buka ea Motho e Moholo ka ho Fetisisa ea Kileng a Phela.c O re: “Ho tseba Jesu ho nchafatsa setšoantšo sa ka sa hore na monna o lokela ho ba joang.”

Ho thuisa ka litemana tsa Bibele tse buang ka litaba tse kang pono ea Molimo ka botona le botšehali, lerato, le setsoalle le ba batona kapa ba batšehali joaloka uena le hona hoa thusa ho lokisa monahano oa motho.—Genese 1:27, 28; Ruthe 1:16, 17; 1 Samuele 18:1; Liproverbia 5:18, 19; 1 Ba-Korinthe 13:4-8.

E boetse ke habohlokoa ho qoba ho lula u nahana ka lintho tse fosahetseng. Hangata boikutlo bona bo susumetsang bo ba matla haholo-holo ha motho a jeoa ke bolutu, a na le khatello ea maikutlo, kapa a nyahame. (Liproverbia 24:10) Mosali e mong oa Mokreste o re: “Tsela e ’ngoe feela ea ho fetola seo re leng sona, ke hore re fetohe menahanong e mebe ho ea ho e metle.” Ha boikutlo bo sa hloekang bo mo tlela, o ikhopotsa ka pono ea Molimo mabapi le bosodoma. Moshemane ea lilemong tse ka tlaase ho 20 o re: “Neng le neng ha ke na le boikutlo ba bosodoma, ke thuisa ka temana ea Bibele eo ke e ratang haholo.” (Bapisa le 2 Ba-Korinthe 10:4; Ba-Filippi 4:8.) Ba bang ba fumane ho thusa hore ba robale ba kōeetsoa ke molumo oa lik’hasete tsa audio tse sa tšoaneng tsa Mokhatlo oa Watch Tower tse thehiloeng Bibeleng.

Feela joalokaha mokhoa oo re nahanang ka oona o ama tsela eo re etsang lintho ka eona, tsela eo re etsang lintho ka eona e ka ama mokhoa oo re nahanang ka oona le kamoo re ikutloang kateng. Kahoo motho o boetse o tlameha ho khaotsa boitšoaro le setsoalle tse ka tsosang kapa ho susumetsa takatso e fosahetseng. (1 Ba-Korinthe 15:33) Hape ho ka ’na ha hlokahala hore motho a ‘itebele’ ha a le libakeng tsa sechaba tse kang matloana, mabōpo a leoatle, liphaposi tsa ho fetola liaparo, le libaka tse ling tse ka pepesetsang motho molekong.—Pesaleme ea 119:9.

Ho pholla litho tsa botona kapa botšehali ho ikhotsofatsa ke tloaelo e ’ngoe e litšila e lokelang ho qojoa. Ho banna le basali ba bangata ba basodoma, ke temallo e sa laoleheng ho hang. Mohlankana e mong oa ipolela: “Ke ’nile ka ba le bothata ba ho ipholla litho tsa botona ho ikhotsofatsa ho tloha ha ke le lilemo li tšeletseng. Ho nahana ka botona le botšehali ho ile ha susumetsa maikutlo a ka a bosodoma.” Loantša tloaelo ena e litšila!d—Ba-Kolosse 3:5.

Ka lehlakoreng le leng, e boetse ke habohlokoa hore motho a ipehele mekhoa e metle ea boitšoaro. Ba bang ba entse tlhahiso ea hore haeba mohlankana a hōla litšobotsing tsa bonna, a ka ’na a hoheloa hanyenyane ke banna ba bang. Ho hlakile hore mohlankana a ka ’na a se ke a tseba kamoo a ka etsang sena kateng haeba le ka mohla a sa ka a ba le mohlala oa motho e motona eo a lokelang ho mo etsisa ha e sa le ngoana. A ka ba a ’na a ikutloa a sa phutholoha ka ’mele oa hae ’me a ikutloa a sa lokoloha kapa e le lekoala. Ho etsa mosebetsi oa matsoho, tlhakiso ea ’mele e itekanetseng, kapa ho kopanela lipapaling tse khathollang hangata ho ka thusa tabeng ena. (Bapisa le 1 Timothea 4:8.) Empa feela joalokaha mohlankana Timothea a ne a le joaloka mora ho moapostola Pauluse, motho a ka ’na a fumana ho thusa ka ho khethehileng ho hōlisa kutloisiso e molemo ho monna e moholo oa Mokreste ea tsitsitseng. (Ba-Filippi 2:19-22; 2 Timothea 3:10) Ka ho theha meeli e hlakileng ea boitšoaro le ho hlaolela puisano e tobileng, kamano e joalo e ka ba e mofuthu le e hahang, empa e se na maikutlo leha e le afe a ho tsosa takatso.

Ka holim’a tsohle, motho o lokela ho itšireletsa ka matla moeeng. Thuto ea kamehla ea Bibele, thapelo, le hore motho a bolelle ba bang ka tumelo ea hae li thusa ho boloka kelello ea motho e le tseleng ea moea. (Pesaleme ea 55:22; 119:11; Ba-Roma 10:10) Ka linako tse ling maikutlo a hore ha u oa bohlokoa a ka ’na a u thatafaletsa ho ba har’a Bakreste-’moho le uena, empa Bibele e lemosa khahlanong le ho itšehla thajana. (Liproverbia 18:1) Ho ba le botsoalle bo hloekileng le Bakreste ba batona hammoho le ba batšehali ho ka thusa motho ho lula a tsitsitse.—Ba-Heberu 10:24, 25.

Haeba u hlaseloa ke takatso ea bosodoma, litlhahiso tsena li ka ’na tsa ipaka li thusa. Leha ho le joalo, se ke ua nyahama ka ho fetisisa, haeba maikutlo a mabe a phehella. Molimo o utloisisa maikutlo a hao ’me o na le kutloelo-bohloko ho ba loanelang ho mo sebeletsa. (1 Johanne 3:19, 20) Lefatšeng le lecha, moloko oa batho o tla latsoa pholiso ea mafu ’ohle a re utloisang bohloko. (Tšenolo 21:3, 4) Ho sa le joalo, itšetlehe ka Molimo ’me u loantše litakatso tse fosahetseng. (Ba-Galata 6:9) Ha nako e ntse e feta le ka boiteko bo matla, mohlomong le tsona litakatso tse fosahetseng li ka fokotseha.

[Mongolo o botlaaseng ba leqephe]

[Ntlha e Qolotsoeng e leqepheng la 22]

Hōlisa pono e ntle ka banna ka ho ithuta mohlala oa Jesu