Ho Tlisetsa ba Leng Chankaneng Tokoloho ea Moea

“ESALE re le emetse.” “Masiu a mangata a fetileng ke lorile ka ho tla ha lōna.” “Re le leboha ka hore le re abele motho ea tla re etela ka linako tsohle.” “Re lakatsa ho hlalosa kananelo ea rōna bakeng sa tlhohonolofatso e ’ngoe le e ’ngoe eo ka ho sa tšoanelang re e amohelang e e-tsoa ho Jehova le mokhatlo oa hae o hlophisitsoeng le bakeng sa lijo tsa moea tse fanoang ka nako e loketseng.”

Lebaka la ho buuoa ha mantsoe aa a teboho e ne e le lefe? Tsena ke tse ling tsa litlhaloso tse hlahang ho batšoaruoa ba koaletsoeng lichankaneng tse fapa-fapaneng tsa Mexico. Ba ananela tlhokomelo eo ba e fumanang e tsoang ho Lipaki tsa Jehova, e ba tliselitseng tokoloho ea moea leha ba ntse ba le chankaneng. Mexico ho na le lichankana tse 42 moo ka linako tsohle Lipaki tsa Jehova li sebeletsang litlhoko tsa moea tsa batšoaruoa. Libaka tsena li bitsoa Centro Readaptación Social (Setsi sa Sechaba sa ho Busetsoa Tseleng). Ho tse ling tsa lichankana tsena, ho boetse ho tšoaroa liboka tsa Bokreste kamehla ka liphello tse ntle haholo. Ka mohlala, ha ho baloa ba bileng teng haufinyane tjena, batho ba ka bang 380 ba ne ba tla libokeng libakeng tsena. Ka nako eo, ho ne ho tšoaroa karolelano ea lithuto tsa Bibele tse 350. Ba 37 ba ne ba tšoaneleha ho qalisa ho bolela, ’me ba 32 ba ne ba nehetse bophelo ba bona ho Jehova, ba tšoantšetsa sena ka ho kolobetsoa metsing.

Kamoo Mosebetsi o Etsoang Kateng

Lipaki tsa Jehova li ntšetsa mosebetsi oa tsona oa boboleli pele joang libakeng tsee? Li qala ka ho ea ho balaoli ba ikarabellang ho kōpa tumello e ngotsoeng ea ho kena chankaneng, e hlalosang morero oa maeto—ho ruta batšoaruoa kamoo ba ka ntlafatsang boleng ba bophelo ba bona le ho sebeletsa Molimo ka tsela e mo khahlisang.

Boemong bo bong le bo bong ba boholong ba ile ba fana ka tumello ea bona. Balaoli bana ba ananela thupelo ea Bibele e fuoang batšoaruoa. Balaoli ba chankana ba hlokometse hore Lipaki tsa Jehova li mamela melao ea tšireletso e behetsoeng libaka tsena. Ba lumeletse basebeletsi bana ba etileng hore ba sebelise liofisi, matlo a ho jela le likamore tsa ho sebeletsa ho tšoarela liboka tsa bona. Sebakeng se seng Lipaki li bile tsa lumelloa ho haha Holo ea ’Muso e nyenyane, joalokaha ho bontša phihlelo ena e latelang e ileng ea phetoa ke molebeli ea tsamaeang ka boroa-bochabela ho Mexico.

“Mathoasong a 1991 re ile ra qala ho etela chankana ea Tehuantepec, Oaxaca, moo re ileng ra fumana tlala e khōlō ea moea. Kapele-pele re ile ra qalisa lithuto tsa Bibele tse 27. Ka lebaka la thahasello ea batšoaruoa, ho ile ha etsoa kemiso ea liboka tse hlano tsa phutheho. E mong oa batšoaruoa, ea ileng a bontša lerato le leholo ho Jehova, o ile a etsa qeto ea ho haha Holo ea ’Muso e nyenyane jareteng ea chankana hore ho be le sebaka sa ho tšoarela liboka. O ile a ea ho mookameli oa chankana ho kōpa tumello, ’me ba boholong ba ile ba sebelisana hantle le eena. Mathoasong a December 1992, batšoaruoa ba tšeletseng ba ile ba tšoaneleha ho ba bahoeletsi ba litaba tse molemo. Ka lebaka la khatelo-pele e ileng ea bontšoa, ho ile ha etsoa litokisetso tsa ho tšoarela Sehopotso ka har’a chankana. Re ile ra kōpa tumello ea mookameli oa chankana hore re tle le litšoantšetso—bohobe le veine—’me ka mor’a puisano ea lihora tse ’nè, ho ile ha fanoa ka tumello.

“Ho ile ha etsahala hore ka la 3 April, 1993 (matsatsi a mararo pele ho mokete oa Sehopotso), batšoaruoa ba bang ba lokolloe. Ha eo e neng e le mohoeletsi a fumana litokomane tsa ho lokolloa ha hae, o ile a kōpa ho buisana le motsamaisi oa chankana bakeng sa ho fuoa tumello ea ho lula moo ho fihlela ka mor’a mokete oa Sehopotso. Sena se hlile sa makatsa motsamaisi kaha ena e ne e le kōpo e sa tloaelehang, empa ka lebaka la thahasello e khōlō ea motšoaruoa ea ho ba teng Sehopotsong moo chankaneng, o ile a lumelloa. Batho ba 53 ba bile teng Sehopotsong, ’me ba ile ba ntša meokho ea thabo qetellong ea lenaneo. Re ile ra lumellana ho bitsa sehlopha sena ‘Tokoloho Cereso,’ hobane se lokolohile ka kutloisiso ea moea.”

Mosebetsi oa Lipaki tsa Jehova o ananeloa haholo libakeng tsena. Ho e ’ngoe ea lichankana tsena tsa litlōlo tsa molao tse tebileng, motho ea ikarabellang o buella pepenene ho ba teng libokeng tsa Lipaki tsa Jehova e le “pheko” e potlakileng ea ho busetsa batšoaruoa tseleng.

Lenaneo le Atlehileng la ho Busetsa Tseleng

Mosebetsi oa Lipaki tsa Jehova o feletse ka hore batšoaruoa ba bangata ba busetsoa tseleng ka ho feletseng. Le hoja hangata e le ’nete hore ba bileng chankaneng ba khutlela bophelong ba bona ba tlōlo ea molao hang feela ha ba lokolloa, bao kannete ba amohetseng molaetsa oa Lentsoe la Molimo ba fetohile ka ho feletseng. Ho fetoha ha bona ho re hopotsa mantsoe a moapostola Pauluse: “Leha e le lihlola . . ., kapa masholu, kapa batho ba meharo, kapa matahoa, kapa ba litlhapa, kapa bahanyapetsi ha ba na ho rua ’muso oa Molimo. ’Me leha ho le joalo ke seo ba bang ba lōna ba neng ba le sona. Empa le hlatsoitsoe hore le hloeke, empa le halalelitsoe, empa le boletsoe le lokile ka lebitso la Morena oa rōna Jesu Kreste le ka moea oa Molimo oa rōna.”—1 Bakorinthe 6:9-11.

Phetoho e khethehileng ka ho totobetseng bothong ba bona e totobala tseleng eo ba hlalosang maikutlo a bona ka eona. Miguel, ea leng chankaneng ea Campeche, Campeche City, o ile a hlalosa ka tsela ena: “Kajeno nka bolela ka thabo hore ke inka ke le har’a linku tse ling tse nang le tšepo e boletsoeng ho 2 Petrose 3:13 le Matheu 5:5.” José, ea leng Koben, chankaneng ea Campeche, o ile a hlalosa tjena: “Le hoja ke le motšoaruoa ’me mohlomong tlōlo ea ka ea molao e le e tebileng haholo, ke elelloa hore Jehova o mosa haholo ’me o mamela lithapelo le likōpo tsa ka tse tiileng. A ka ntšoarela litlōlo tsa ka le ho ’neha monyetla oa ho qeta bophelo ba ka bohle ke bolela litaba tse molemo tsa ’Muso oa Molimo. Re leboha baholo ba rōna ka ho ipha nako eo ba iphang eona ho re etela chankaneng e le hore re ka rua molemo litšepisong tsa ’Muso oa Molimo. Ke tlhohonolofatso e thabisang hakaakang! Na nka bolela hore ke motšoaruoa? Che, Jehova o mphile tokoloho ea moea eo ke neng ke e hloka.”

Ke eng se etsang hore babolai, babeti, ba chesang thepa, masholu le ba bang ba fetohe Bakreste ba phelang bophelo bo botle? Ho ea ka banna bana, ke matla a fetolang a Lentsoe la Molimo le botsoalle bo botle le batho ba inehetseng ka sebele. Taba ea Tiburcio, ea koaletsoeng chankaneng ea litlōlo tse tebileng tsa molao Mazatlán, Sinaloa, e bontša ho atleha ha lenaneo lena la ho busetsa tseleng. O ne a bile chankaneng ea Concordia, Sinaloa, moo a bileng le mathata ka lebaka la ho ba sefela-peloana se mabifi. Mosali oa hae e ne e le e mong oa Lipaki tsa Jehova, ’me o ne a atisa ho tšoara mosali hampe haholo, esita leha a ne a mo etetse chankaneng. Mosali o bile pelo-telele ’me a ’na a mo etela, kahoo monna o ile a kōpa hore a mo tlele le buka ea U ka Phela ka ho sa Feleng Paradeiseng Lefatšeng, eo a ileng a qala ho ithuta eona a le mong.a Joale o ile a kōpa hore motho e mong a tle chankaneng ho tla ithuta le eena. O ile a qala ho tsoela pele moeeng, ’me likamano tsa hae le ba bang li ile tsa qala ho fetoha ka tsela e molemo. O ile a isoa chankaneng ea Mazatlán moo ho nang le sehlopha se ithutang Bibele, ’me hona joale ke mohoeletsi. O re: “Hona joale, ’na hammoho le mosali oa ka le bana le metsoalle ea ka ea batšoaruoa, ke thabela hore ebe ke khona ho mamela linnete tsa Bibele sebakeng sena, ke e-na le tšepo ea hore haufinyane, ke tla lokolloa le ho khona ho ba teng likopanong tsohle le libokeng tsohle tsa phutheho.”

Ho boetse ho teng Conrado, ea lebohang haholo ka liphetoho tseo a khonneng ho li etsa bophelong ba hae. O ne a e-na le mathata a tebileng lenyalong hoo mosali oa hae a ileng a mo siea. Kahoo o ile a batla matšeliso lithethefatsing. Ha nako e ntse e tsamaea o ile a fetoha semokolara sa lithethefatsi. O ile a tšoaroa ’me a ahloleloa ho hlola chankaneng ka lebaka la ho tsamaisa moqeqeko oa matekoane le k’hok’heine. Chankaneng ho ne ho e-na le sehlopha se ithutang Bibele le Lipaki tsa Jehova, ’me o ile a memeloa ho ithuta le sona. O hlalosa maikutlo a hae ka tsela ena: “Ke ile ka khahloa haholo ke tsela e hlophisehileng eo liboka li neng li tšoaroa ka eona, lenaneo la ho etsa liphuputso ka lingoliloeng le hore ntho e ’ngoe le e ’ngoe e ne e thehiloe Bibeleng. Hang-hang ke ile ka kōpa thuto ea Bibele ’me ka qala ho ea libokeng.” E ne e le ka January 1993. Hona joale Conrado o tsoile chankaneng ’me o ntse a hatela pele phuthehong ea Bokreste.

Islas Marías

Mexico ho na le chankana e tšajoang haholo e nang le lihlekehleke tse ’nè tse bitsoang Islas Marías. Batšoaruoa ba ka itsamaela hohle lihlekehlekeng tseo ba koaletsoeng ho tsona. Ba bang ba lula moo le basali ba bona le bana.

Ho hlonngoe phutheho e nyenyane moo. Barab’abo rōna ba bararo ba tsoang Mazatlán ba ea moo hang ka khoeli, ba thusa ho tšoara liboka, ho nehelana ka lingoliloeng le ho fana ka khothatso. Ka linako tse ling molebeli oa potoloho o ea moo ho ba etela. Karolelano ea ba bang teng e mahareng a 20 le 25. Ho na le bahoeletsi ba bane ba kolobelitsoeng le ba babeli ba sa kolobetsoang. Molebeli ea tsamaeang o tlaleha hore “ba bang ba tsamaea lik’hilomithara tse 17 ho tla libokeng tsa Sontaha ’me ba lokela ho tloha libokeng ka lepotlapotla bakeng sa hore ba be teng ha ho baloa mabitso. Esita le ha ba phakisa, ho nka lihora tse peli ho khutlela morao.” E mong oa barab’abo rōna, ea ithutileng ’nete chankaneng eo, o sa tsoa re: “Ke ne ke thahasella ho lokolloa kapele chankaneng, empa hona joale ekaba neng kapa neng ha Jehova a rata kaha ke e-na le mosebetsi o mongata oo ke lokelang ho o etsa mona.”

Re thabela ho bona hore ’nete e sebelisa matla a eona ho lokolla batho ba tšepahalang ba batlang tsela ea ho thabisa Jehova. Ba ka holimo ho 12 ho batho bana, ba ithutileng ’nete chankaneng, ba se ba lokolotsoe, ba kolobelitsoe ’me hona joale ba phela bophelo bo hlomphehang joaloka bahlanka ba Molimo, ba bang ebile ke baholo liphuthehong. Matla ao Bibele e nang le ’ona a ho lokisa lipelo le ho busetsa batho tseleng a bonahetse ka ho hlakileng. Hang ha banna bana ba neng ba koaletsoe ka lebaka la litlōlo tsa molao ba kena tseleng ea leseli la Lentsoe la Molimo, ba latsoa tokoloho ea ’nete eo Jesu a ileng a e tšepisa ha a ne a re: “Le tla tseba ’nete, ’me ’nete e tla le lokolla.”—Johanne 8:32; Pesaleme ea 119:105.

[Mongolo o botlaaseng ba leqephe]

[Setšoantšo se leqepheng la 23]

Ba bangata ba ile ba rua molemo linneteng tsa Bokreste tseo ba ithutileng tsona chankaneng