Baboleli ba ’Muso Baa Tlaleha
Lipaki li ea Sechabeng Fora
HO TLOHA hoseng ka matjeke ka Labohlano, la la 29 January, 1999, le ho isa mafelo-bekeng, ka cheseho Lipaki tsa Jehova Fora li ile tsa aba literateng ’me hamorao ka ntlo le le ntlo, likopi tse limilione tse 12 tsa pampitšana e nang le sehlooho se reng, People of France, You Are Being Deceived! (Batho ba Fora, le Ntse le Thetsoa!) Ke hobane’ng ha ho ile ha etsoa phutuho e joalo?
Ho ile ha fanoa ka lebaka la ho etsa phutuho eo sebokeng sa bo-ralitaba Paris hoseng ka Labohlano lona leo. Motho ea neng a buella Lipaki o ile a hlalosa: “Seo re batlang ho se etsa kajeno ke ho itsebahatsa ka seo re hlileng re leng sona le ho khutsisa lipolelo tse senyang lebitso tse ntseng li hasoa ka rōna. Re ikemiselitse ho amohela ha batho ba re nyatsa, empa re ke ke ra hlola re mamela mashano le litlhaloso tse re senyang lebitso.”
Le hoja Lipaki tsa Jehova e le tsona sehlopha sa boraro se seholo ka ho fetisisa sa bolumeli ba Bokreste Fora, bana ba bangata ba Lipaki ba ’nile ba rohakoa le ho hlekefetsoa sekolong. Batho ba baholo ba lahlehetsoe ke mesebetsi ea bona ’me ba sokeloa ka lebaka la bolumeli ba bona. Ho makatsang le ho feta ke hore esita le menehelo ea tsona ea bolumeli eo li e amohetseng e hlahlobiloe ’me ea lefisoa lekhetho le etsang karolo ea 60 lekholong. Phutuho eo e ile ea sebetsana le khethollo ee joang?
Pampitšana eo ea phatlalatsa: “Lipaki tsa Jehova tse 250 000 le metsoalle ea tsona tse lulang Fora li IPELAETSA ka tsela ea bolotsana eo bolumeli ba tsona ba Bokreste, bo bileng teng Fora ho tloha ka 1900, bo kopantsoeng hammoho le lihlopha tsa bokhelohi tse kotsi ho tloha ka 1995. . . . Li IPELAETSA ka tlhekefetso e sa khaotseng eo li ’nileng tsa feta ho eona.” Ho ile ha pepesoa liqoso tsa bohata tse entsoeng khahlanong le Lipaki Fora le litsela tsa bolotsana tseo baetselletsi ba ’nileng ba batla ho li sebelisa ho etsa hore sechaba se li hloee. Pampitšana eo e phetha ka ho re: “Kajeno, Lipaki tsa Jehova tse fetang limilione tse peli le metsoalle ea tsona li lula Europe. Li hlompha melao ea Linaha tseo li ahileng ho tsona ka ho tšoarella mekhoeng ea Kosepele. Batho ba Fora, tsena ke linnete. Ke boikarabelo ba rōna hore re li hlahise kamoo e leng ’nete kateng!”
Karabelo e Ntle, Kapelenyana
Letsatsing la pele ho ile ha fanoa ka lipampitšana tse limilione. Paris feela, har’a motšehare Lipaki tse fetang 7 000 li ne li se li file batho lipampitšana tse fetang limilione tse 1,3. Ka sebele e ne e le lekhetlo la pele batho ba bona Lipaki tse ngata hakaalo li fana ka lipampitšana literateng. Ba phatlalatso ea litaba, ho akarelletsa likoranta tsa naheng eo le tsa sebaka ka seng le thelevishene, ba ile ba arabela hantle ka hore ba phatlalatse phutuho eo. Koranta ea Le Progrès de Lyon e ile ea re: “Bohato bona bo nkiloeng qalong . . . bo phatlalatsa ho hloka kutloisiso ka poleloana e itseng. Lilemong tse leshome tse fetileng, poleloana ena ‘sehlopha sa bokhelohi’ . . . e ’nile ea e-ba le maikutlo a ho kheloha, ho ba kotsi le ho bolaea. . . . Lipaki tsa Jehova hase batho ba kotsi bao mohlomong ba ka hlokisang sechaba botsitso.”
Batho ba tsebang Lipaki tsa Jehova ba ananela kamoo e leng batho ba khotso kateng le ho hlompha ha tsona ka ho teba taolo e leng teng sechabeng. Kahoo, batho ba bangata ba neng ba le literateng ba ile ba bontša ho ananela le ho tšehetsa ha bona Lipaki tse mashome a likete tse neng li kopanetse phutuhong eo. Kapele-pele ho ile ha amoheloa mehala ea thelefono, melaetsa ea fax le mangolo a tsoang ho batho ba neng ba leboha ka pampitšana eo. Ka holim’a tsohle, batho ba tšepahalang ba ile ba fuoa monyetla oa ho utloa seo e leng ’nete ka Lipaki ho fapana le lipolelo tsa bohata tse sa utloahaleng, ’me bao ho neng ho boletsoe hampe ka litumelo tsa bona ba ile ba khona ho bontša maikutlo a bona ka seo ba se nkang e le sa bohlokoahali.