Grounds New York City ka 1958?” Ka potlako feela ’na le Joan re ne re phathahane re sebetsana le likōpo tse tsoang ho barab’abo rōna bakeng sa ho fumana sebaka lifofaneng le likepeng tse hiriloeng ke Mokhatlo. Ena e ile ea e-ba Kopano ea Machaba ea Thato ea Molimo e tsebahalang e ileng ea e-ba le bamameli ba bangata haholo ba 253 922. Kopanong ena, ba 7 136 ba ile ba tšoantšetsa boinehelo ba bona ho Jehova ka kolobetso ea metsing—e leng palo e fetang habeli ea ba ileng ba kolobetsoa ketsahalong ea bohlokoa ea Pentekonta ea 33 C.E., joalokaha ho tlalehiloe ka Bibeleng.—Liketso 2:41.

’Na le Joan re ke ke ra lebala mosa oa Mor’abo rōna Knorr ha a re mema ka boeena hore re ee kopanong eo ho ea thusa ho hlokomela baeti ba tla fihla New York City ba e-tsoa linaheng tse 123. Phihlelo eo e bile e thabisang le e khotsofatsang ho rōna re le babeli.

Litlhohonolofatso Tsa Tšebeletso ea Nako e Tletseng

Ha re khutla, re ile ra tsoela pele mosebetsing oa ho tsamaea ho fihlela re hlaheloa ke mathata a ho kula. Joan o ile a kena sepetlele, ’na ka otloa ke stroke hanyenyane. Re ile ra tlohela mosebetsi oo ra etsa oa bopula-maliboho bo khethehileng empa hamorao ra boela ra ba le tokelo ea ho sebetsa ka nakoana mosebetsing oa potoloho. Qetellong, re ile ra khutlela Bristol moo re ntseng re le tšebeletsong ea nako e tletseng teng. Moen’a ka Dick le lelapa la hae ba lula haufi, ’me re atisa ho ikhopotsa liketsahalo tsa nakong e fetileng.

Mahlo a ka a ile a senyehela ruri ka lebaka la mara a mang a mahlo a ileng a arohana ka 1971. Ho tloha ka nako eo, ke bile le bothata bo boholo ba ho bala, ka lebaka leo ke fumana lik’hasete tse hatisitsoeng tsa lingoliloeng tsa Bibele e le tokisetso e babatsehang e tsoang ho Jehova. ’Na le Joan re sa ntse re khanna lithuto tsa Bibele, ’me ho theosa le lilemo, re bile le tokelo ea ho thusa batho ba ka bang 40 hore ba tsebe ’nete, ho akarelletsa le lelapa le leng la batho ba supileng.

Ha re ne re nehela bophelo ba rōna ho Jehova hoo e ka bang lilemong tse fetileng tse 60, takatso ea rōna e ne e le ho kenela tšebeletso ea nako e tletseng le ho lula ho eona. Re leboha hakaakang hore ebe re sa na le matla a ho sebeletsa Jehova e Moholo—e leng eona tsela feela eo ka eona re ka mo lebohang ka molemo oa hae ho rōna le ka lilemo tsa rōna tsa thabo re le hammoho!

Jehova o Moholo ho Feta Lipelo Tsa Rōna

“JEHOVA o khahlisoa ke ba mo tšabang,” ho ngolile joalo mopesaleme. Ka sebele, ’Mōpi o thabela ho shebella mohlanka e mong le e mong oa hae oa motho ha a loanela ho khomarela litekanyetso tsa hae tsa ho loka. Molimo o hlohonolofatsa ba tšepahalang ba hae, oa ba khothatsa, ’me oa ba tšelisa ha ba nyahame. Oa tseba hore barapeli ba hae ha baa phethahala, ka hona, seo a se lebeletseng ho bona ke seo a tsebang hore ba ka khona ho se etsa.—Pesaleme ea 147:11.

Re ka ’na ra se ke ra thatafalloa ho lumela hore Jehova o na le lerato le leholo bakeng sa bahlanka ba hae ka kakaretso. Leha ho le joalo, ho bonahala hore ba bang ba amehile haholo ka mefokolo ea bona hoo ba kholisehileng hore ha ho mohla Jehova a ka ba tšoarelang. Ba ka ’na ba etsa qeto ena: “Ke fokola haholo hoo ho seng kamoo Jehova a ka nthatang kateng.” Ka sebele, kaofela ha rōna re ba le maikutlo a fosahetseng nako le nako. Empa ho bonahala hore ba bang ba loana ntoa e sa khaotseng khahlanong le maikutlo a ho eiseha.

Maikutlo a ho Nyahama

Mehleng ea Bibele batho ba bangata ba tšepahalang ba bile le maikutlo a ho nyahama ho matla. Jobo o ile a hloea bophelo ’me a ikutloa hore Molimo o mo furalletse. Anna, eo e ileng ea e-ba ’mè oa Samuele, ka nako e ’ngoe o ne a tsielehile ka ho tebileng ka ho se be le bana ’me a lla habohloko. Davida o ile a ‘inama ho isa tekanyong e fetisisang,’ ’me Epafroditase o ne a tsielehile hobane litaba tsa ho kula ha hae li ne li tšoenya barab’abo.—Pesaleme ea 38:6, NW; 1 Samuele 1:7, 10; Jobo 29:2, 4, 5; Bafilippi 2:25, 26.

Ho thoe’ng ka Bakreste kajeno? Mohlomong ho kula, ho hōla, kapa maemo a mang a botho a thibela ba bang ho etsa ho hongata kamoo ba neng ba ka rata tšebeletsong e halalelang. Sena se ka ba lebisa ho etseng qeto ea hore ba siteloa Jehova le balumeli-’moho le bona. Kapa ba bang ba ka ’na ba ipeha molato ka linako tsohle bakeng sa liphoso tsa nako e fetileng, ba belaela hore na ebe Jehova o ba tšoaretse. Mohlomong ba bang ba tsoang limelong tsa malapa tseo ho leng thata ho li utloisisa ba kholisehile hore ha ba hlile ha baa lokela ho ratoa. See se ka khoneha joang?

Ba bang ba hōlela malapeng ao ho ’ona ho renang moea oa boithati, ho phoqa le tšabo eseng oa lerato. Ho ka etsahala hore ho se be le mohla ba ka tsebang ntate ea ba ratang ka ho teba, ea batlang menyetla ea ho ba rorisa le ho ba khothatsa, ea hlokomolohang liphoso le ea itokiselitseng ho tšoarela esita le liphoso tse tebileng haholoanyane le eo mofuthu oa hae o etsang hore lelapa lohle le ikutloe le sireletsehile. Kaha ha ho mohla ba kileng ba e-ba le ntate oa lefatšeng ea lerato, ho ka ’na ha e-ba thata hore ba utloisise hore na ho ba le Ntate oa leholimo ea lerato ho bolela eng.

Ka mohlala, Fritz oa ngola: “Bongoaneng le bocheng ke ile ka susumetsoa ka matla ke ho hloka lerato ha Ntate.a Ha ho mohla a neng a babatsa, ’me ha ho mohla nkileng ka ikutloa ke le haufi le eena. Ha e le hantle, boholo ba nako, ke ne ke mo tšaba.” Ka lebaka leo, Fritz, eo hona joale a leng lilemong tsa bo-50, o ntse a e-na le maikutlo a ho hlōleha. ’Me Margarette oa hlalosa: “Batsoali ba ka ba ne ba se na botsoalle ba bile ba se na lerato. Ha ke ne ke qala ho ithuta Bibele, ke ne ke thatafalloa ho nahana hore na ntate ea lerato o joang.”

Maikutlo a joalo, ho sa tsotellehe hore na a susumetsoa ke eng, a ka bolela hore tšebeletso ea rōna ho Molimo ka linako tse ling ha e hlile ha e susumetsoe ke lerato, empa karolo e khōlō ea eona e susumetsoa ke boikutlo ba ho ba molato kapa tšabo. Ha ho mohla se molemohali seo re se etsang se bonahalang se khotsofatsa. Takatso ea ho khahlisa Jehova le balumeli-’moho le rōna e ka ’na ea etsa hore re be le boikutlo ba hore ha re khone ho etsa sohle seo re batlang ho se etsa. Ka lebaka leo, re ka ’na ra sitoa ho finyella lipakane tsa rōna, ra ipeha molato, ’me ra ikutloa re nyahame.

Ke’ng se ka etsoang? Mohlomong ho hlokahala hore re ikhopotse hore na Jehova o mosa hakae. Motho ea neng a utloisisa karolo ena e lerato ea botho ba Molimo ke moapostola Johanne.

“Molimo o Moholo ho Feta Lipelo Tsa Rōna”

Mafelong a lekholo la pele la lilemo C.E., Johanne o ile a ngolla balumeli-’moho le eena: “Ka sena re tla tseba hore re simoloha ’neteng, ’me re tla kholisa lipelo tsa rōna ka pel’a hae mabapi le eng kapa eng eo lipelo tsa rōna li ka re tsoang ho eona, hobane Molimo o moholo ho feta lipelo tsa rōna ’me o tseba lintho tsohle.” Ke hobane’ng ha Johanne a ile a ngola mantsoe aa?—1 Johanne 3:19, 20.

Johanne o ne a tseba ka ho hlaka hore ho ne ho ka etsahala hore mohlanka oa Jehova a be le maikutlo a hore pelo ea hae ea mo tsoa. Mohlomong Johanne ka boeena o ne a ile a ba le maikutlo a joalo. Ha e sa le mohlankana ea halefang kapele, ka linako tse ling Johanne o ile a khalemeloa ke Jesu Kreste ka lebaka la ho nyatsa-nyatsa ha a sebetsana le ba bang. Ha e le hantle, Jesu o ile a reha Johanne le mor’abo Jakobo “lebitso le leng, Boanergese, le bolelang Bara ba Sea-luma.”—Mareka 3:17; Luka 9:49-56.

Lilemong tse latelang tse 60, Johanne o ile a nolofatsoa ke ho hōla le phihlelo ’me ea e-ba Mokreste ea leka-lekaneng, ea lerato le ea mohau. Nakong eo eena, e le moapostola oa ho qetela ea neng a ntse a phela, a neng a ngola lengolo la hae la pele le bululetsoeng, o ne a tseba hore Jehova ha a otle bahlanka ba hae bakeng sa phoso e ’ngoe le e ’ngoe. Ho e-na le hoo, ke Ntate ea mofuthu, ea mosa, ea fanang ka seatla se bulehileng le ea qenehelang, ea nang le lerato le tebileng bakeng sa bohle ba mo ratang le ba mo rapelang ka ’nete. Johanne o ile a ngola: “Molimo ke lerato.”—1 Johanne 4:8.

Jehova o Thabela Tšebeletso eo re mo Etsetsang Eona

Molimo o tseba mefokolo le likhaello tseo re li futsitseng, ’me oa li nahanela. Davida o ile a ngola: ‘O tsebisisa ho bōptjoa ha rōna, o elelloa hoba re lerōle feela.’ Jehova o hlokomela phello eo semelo sa rōna se nang le eona ho re etseng seo re leng sona. Ha e le hantle, o re tseba hamolemo ho feta kamoo re itsebang kateng.—Pesaleme ea 103:14.

Oa tseba hore bongata ba rōna bo ka rata ho ba ba fapaneng, empa ha re khone ho hlōla mefokolo ea rōna. Boemo ba rōna bo ka tšoantšoa le ba moapostola Pauluse, ea ileng a ngola: “Molemo oo ke o lakatsang ha ke o etse, empa bobe boo ke sa bo lakatseng ke bona boo ke tloaetseng ho bo etsa.” Kaofela ha rōna re ntoeng e tšoanang. Maemong a mang sena se ka ’na sa fella ka hore lipelo tsa rōna li re tsoe.—Baroma 7:19.

Kamehla hopola sena: Habohlokoa ho feta kamoo re italimang kateng ke kamoo Jehova a re talimang kateng. Neng le neng ha a re bona re leka ho mo khahlisa, ha a khotsofale ka tsela e foofo feela tjee empa oa thaba. (Liproverbia 27:11) Le hoja seo re se finyellang se ka ’na sa bonahala se batla se le senyenyane mahlong a rōna, boikemisetso ba rōna le sepheo sa rōna tse molemo lia mo nyakallisa. O bona ka nģ’ane ho seo re se finyellang; o lemoha seo re batlang ho se etsa; o ela hloko seo re se ratang le seo re se lakatsang. Jehova a ka bona lipelo tsa rōna.—Jeremia 12:3; 17:10.

Ka mohlala, bongata ba Lipaki tsa Jehova ka tlhaho ke batho ba lihlong le ba thōtseng ba ikhethelang ho se hlahelle. Ho ba joalo, ho bolela litaba tse molemo ka ntlo le ntlo e ka ba phephetso e nyahamisang. Empa, ba susumetsoa ke takatso ea ho sebeletsa Molimo le ho thusa baahisani ba bona, esita le ba lihlong ba ithuta ho atamela baahisani ba bona ’me ba bua ka Bibele. Ba ka ’na ba ikutloa hore ba finyella ho honyenyane, ’me sena se ka ’na sa ba hlokisa thabo. Lipelo tsa bona li ka ’na tsa ba bolella hore tšebeletso ea bona ea phatlalatsa hase ea bohlokoa. Empa ka sebele Jehova o thabela boiteko bo boholo boo ba joalo ba bo etsang tšebeletsong ea bona. Ho feta moo, ba ke ke ba tseba hore na peō ea ’nete e jaliloeng e tla mela, e hōle le ho beha litholoana neng hona hokae.—Moeklesia 11:6; Mareka 12:41-44; 2 Bakorinthe 8:12.

Lipaki tse ling li utloisoa bohloko ke ho kula ha nako e telele kapa lia tsofala. Ho tsona, ho ea libokeng kamehla Holong ea ’Muso ho ka tsamaisana le bohloko le matšoenyeho. Ho mamela puo e buang ka mosebetsi oa ho bolela ho ka ’na ha ba hopotsa seo ba neng ba tloaetse ho se etsa le seo ba sa ntseng ba batla ho se etsa, le hoja ho fokola ho ba sitisa. Ba joalo ba ka ba le boikutlo ba ho ba molato hobane ba sa khone ho latela keletso eo ka hohle kamoo ba neng ba ka rata kateng. Empa, ka sebele Jehova o ananela botšepehi ba bona le mamello. Hafeela ba lula ba tšepahala, ha ho mohla a lebalang tlaleho ea bona ea botšepehi.—Pesaleme ea 18:25; 37:28.

Ho “Kholisa Lipelo Tsa Rōna”

Nakong ea ha Johanne a fihla botsofaling, e tlameha ebe o ne a utloisisa haholo ka mosa oa Molimo. Hopola hore o ngotse a re: “Molimo o moholo ho feta lipelo tsa rōna ’me o tseba lintho tsohle.” Ho feta moo, Johanne o ile a re khothalletsa ho “kholisa lipelo tsa rōna.” Johanne o ne a bolela’ng ka mantsoe ao?

Ho latela Vine’s Expository Dictionary of Old and New Testament Words, leetsi la Segerike le fetoletsoeng e le “kholisa” le bolela “ho sebelisa tšusumetso, ho hlōla kapa ho hapa, ho susumetsa.” Ka mantsoe a mang, hore re kholise lipelo tsa rōna, ho hlokahala hore re li hape, re li susumelletse ho lumela hore Jehova oa re rata. Joang?

Fritz, eo ho builoeng ka eena pejana sehloohong sena, o sebelelitse e le moholo oa phutheho e ’ngoe ea Lipaki tsa Jehova ka lilemo tse fetang 25 ’me o fumane hore thuto ea boinotšing e ka kholisa pelo ea hae hore Jehova oa mo rata. “Ke ithuta Bibele le lingoliloeng tsa rōna kamehla le ka hloko. Sena se nthusa hore ke se ke ka lula ke nahana ka nako e fetileng empa hore ke be le pono e hlakileng ea bokamoso ba rōna bo babatsehang. Ka linako tse ling, lintho tseo ke neng ke li etsa nakong e fetileng li nkhatella maikutlo, ’me ke ba le maikutlo a hore ha ho kamoo Molimo a ka hlolang a nthata kateng. Empa, ka kakaretso, ke fumana hore ho ithuta kamehla ho matlafatsa pelo ea ka, ho eketsa tumelo ea ka, ’me ho nthusa ho lula ke thabile ke bile ke tsitsitse.”

Ke ’nete hore ho bala Bibele le ho thuisa ka eona ho ka ’na ha se ke ha fetola boemo ba rōna. Empa, ho ka fetola tsela eo re talimang boemo ba rōna ka eona. Ho kenya mehopolo ea Lentsoe la Molimo ka lipelong tsa rōna ho re thusa ho nahana joaloka eena. Ho feta moo, ho ithuta ho re nolofalletsa ho hōla kutloisisong ea mosa oa Molimo. Butle-butle re ka amohela hore Jehova ha a re behe molato bakeng sa tikoloho eo re hōletseng ho eona, ’me ha a re behe molato bakeng sa mefokolo ea rōna. Oa tseba hore meroalo eo bongata ba rōna re e jereng—ebang ke maikutlong kapa ’meleng—hangata ha ea bakoa ke rōna, ’me ka lerato oa e nahanela.

Ho thoe’ng ka Margarette, ea boletsoeng pejana? Nakong eo a ileng a tseba Jehova ka eona, le ho eena ho ithuta Bibele ho ile ha e-ba molemo haholo. Eena, joaloka Fritz, o ile a lokela ho lokisa maikutlo a hae ka ntate. Thapelo e ile ea thusa Margarette ho kopanya seo a ithutileng sona. Margarette o re: “Ke ile ka qala ka ho nka Jehova e le motsoalle ea haufi, kaha ke ne ke e-na le phihlelo e ngata ea ho ba le metsoalle e lerato ho feta ea ho ba le ntate ea lerato. Butle-butle, ke ile ka ithuta ho tšollela maikutlo a ka, lipelaelo, matšoenyeho le mathata ho Jehova. Ke ne ke bua le eena khafetsa thapelong, ka nako e tšoanang ke kopanya hammoho lintho tsohle tse ncha tseo ke neng ke ithuta tsona ka eena, ka tsela e batlang e tšoana le ho kopanya likoto tse nyenyane tsa lesela ho etsa litšoantšo. Ka mor’a nako e itseng, maikutlo a ka mabapi le Jehova a ile a fetoha ho fihlela moo hona joale e leng ka seoelo ke bang le bothata ba ho mo nka e le Ntate ea lerato.”

Ho Lokolloa Matšoenyehong ’Ohle

Hafeela tsamaiso ena ea khale e khopo e ntse e le teng, ha ho motho ea ka bang le tšepo ea ho lokoloha matšoenyehong. Ho Bakreste ba bang sena se bolela hore maikutlo a ho tšoenyeha kapa ho ikhalala a ka ’na a khutla ’me a ba bakela tsieleho. Empa re ka kholiseha hore Jehova o tseba sepheo sa rōna se setle le ho sebetsa ha rōna ka thata tšebeletsong ea hae. Ha ho mohla a tla lebala lerato leo re le bontšang bakeng sa lebitso la hae.—Baheberu 6:10.

Lefatšeng le lecha le atamelang tlas’a ’Muso oa Bomesia, batho bohle ba tšepahalang ba ka lebella ho lokolloa likhatellong tsa tsamaiso ea Satane. Eo e tla ba phomolo e kaakang! Joale re tla boela re bone bopaki bo eketsehileng ba hore na Jehova o mosa hakae. Ho fihlela nakong eo, bohle a ba ke ba kholisehe hore “Molimo o moholo ho feta lipelo tsa rōna ’me o tseba lintho tsohle.”—1 Johanne 3:20.

[Mongolo o botlaaseng ba leqephe]

[Ntlha e Qolotsoeng e leqepheng la 30]

Jehova hase mohatelli ea thata empa ke Ntate ea mofuthu, ea mosa le ea qenehelang

[Setšoantšo se leqepheng la 31]

Ho ithuta Lentsoe la Molimo ho re thusa ho nahana joaloka eena