Khaolong ea 19

Nka Eetsa’ng Hore ke Sebelise Chelete Hantle?

Ke hangata hakae u eeng u nahane hore ha u na chelete e lekaneng ha u reka?

□ Ha ho mohla

□ Ka linako tse ling

□ Khafetsa

Ke hangata hakae u rekang lintho tseo u se nang chelete ea tsona?

□ Ha ho mohla

□ Ka linako tse ling

□ Khafetsa

Ke hangata hakae u rekang ntho hobane feela e theotsoe, empa u hlile u sa e hloke?

□ Ha ho mohla

□ Ka linako tse ling

□ Khafetsa

NA U nahana hore ha ho mohla u nang le chelete e lekaneng hore u reke lintho? Haeba u ne u ka ba le chelete e ngatanyana, u ne u tla reka papali e itseng eo u e ratang. Haeba u ne u amohela moputso o tomanyana, u ne u tla ithekela lieta tsane tseo u nahanang hore ua li hloka. Kapa mohlomong u ka ’na ua thulana le bothata bo tšoanang le ba Joan, ea reng: “Ka linako tse ling metsoalle ea ka e ’memela hore re e’o ithabisa ka lintho tse bitsang chelete e ngata. Ke rata ho ithabisa le metsoalle ea ka. Ha ho motho ea batlang ho re, ‘Ka masoabi nke ke ka khona, kaha ha ke na chelete.’”

Ho e-na le ho tšoenyeha ka chelete eo u se nang eona, ke hobane’ng ha u sa ithute ho sebelisa chelete eo u nang le eona hantle? U ne u ka ’na ua ema ho fihlela u tlohile lapeng hore u ithute ho sebelisa chelete hantle. Empa ak’u nahane ka sena, Na u ka itsubelletsa sefofaneng u sa qala ka ho ithuta hore na parachuti e sebelisoa joang? Ke ’nete hore motho e mong a ka ’na a khona ho bona seo a lokelang ho se etsa ha a ntse a tsubella ho ea fatše. Empa ho ne ho tla ba molemo hakaakang hore a ithute ho sebelisa parachuti pele a tsubella!

Ka ho tšoanang, nako e molemo ka ho fetisisa ea hore u ithute ho sebelisa chelete hantle ke ha u ntse u le lapeng, pele u thulana le maemo a boima a lichelete. Morena Solomone o ile a ngola, a re: “Chelete [ke] tšireletso.” (Moeklesia 7:12) Empa chelete e tla u sireletsa hafeela u ithuta ho e sebelisa hantle. Ha u etsa joalo, u tla itšepa haholoanyane ’me batsoali ba hao ba tla u hlompha le ho feta.

Ithute Lintho Tsa Motheo

Na u se u kile ua kōpa batsoali hore ba u hlalosetse hore na ke lintho life tse amehang tabeng ea ho hlokomela lelapa? Ka mohlala, na ua tseba hore na ke bokae khoeli le khoeli ho lefella motlakase, ho futhumatsa ntlo, metsi, ho sebelisa koloi, ho reka lijo le ho lefa rente kapa ho lefella ntlo? Hopola hore le uena ua tlatsetsa litšenyehelong tseo—’me ha u tloha lapeng, ke uena ea tla lokela ho li lefella. Kahoo, mohlomong u tla tseba hore na u tla hloka chelete e kae hore u itjare. Kōpa batsoali ba hao hore ba u bontše hore na lintho tse ling li lefelloa bokae, ’me u mamele ka hloko ha ba hlalosa tsela eo ka eona ba etsang moralo oa ho li lefella.

Maele a Bibele a re: “Motho ea bohlale o tla mamela ’me a amohele taeo e eketsehileng, ’me motho ea nang le kutloisiso ke ea fumanang tataiso e bohlale.” (Liproverbia 1:5) Anna o ile a kōpa tataiso e bohlale ho batsoali ba hae. O re, “Ntate o ile a nthuta ho etsa moralo oa tšebeliso ea chelete, ’me a mpontša kamoo ho leng bohlokoa kateng ho hlophisa tšebeliso ea chelete hantle lapeng.”

Khabareng, ’mè oa Anna o ile a mo ruta lintho tse ling tsa bohlokoa. Anna o re: “O ile a mpontša bohlokoa ba ho bapisa litheko pele ke reka.” Oa phaella: “’Mè o ne a reka lintho tse ngata ka chelete e seng kae.” Anna o ruile molemo ofe? O re: “Hona joale ke tseba ho hlokomela chelete ea ka. Ke laola ka hloko chelete eo ke e sebelisang, ka hona ke khatholohile kelellong kaha ke qoba likoloto tse sa hlokahaleng.”

Hlokomela Mathata a Teng

Ke ’nete hore ho ka ’na ha e-ba boima ho laola tsela eo u sebelisang chelete ka eona ho feta kamoo u ka nahanang kateng, haholo-holo haeba u lula heno ’me u fuoa chelete e itseng kapa u fumana moputso mosebetsing. Hobane’ng? Hobane ho ka etsahala hore ebe batsoali ba hao ke bona ba lefellang litšenyehelo tse ngata. Ka lebaka leo, u ka iphumana u saletsoe ke chelete e ngata haholo eo u ka e sebelisang. ’Me ho sebelisa chelete ho monate.

Leha ho le joalo, bothata bo ka hlaha haeba lithaka tsa hao li u hatella hore u sebelise chelete e ngata ho feta tekano. Ellena, ea lilemo li 21, o re: “Lithakeng tsa ka, ho reka ke eona tsela e ka sehloohong ea ho ithabisa. Ha ke intšitse le tsona, ekare ke molao ho sebelisa chelete e le hore motho a thabe.”

Ke ntho e tloaelehileng ho batla hore u tšoane le metsoalle ea hao. Empa ak’u ipotse, ‘Na ha ke e-na le metsoalle ke sebelisa chelete hobane ke khona kapa hobane ke utloa ke tlamehile?’ Batho ba bangata ba sebelisa chelete hobane ba batla hore metsoalle ea bona le batho ba ba tloaetseng ba ba hlomphe. Ba leka ho khahla batho ba bang ka seo ba nang le sona ho e-na le ho ba khahla ka seo ba leng sona. Mokhoa ona o ka u bakela mathata a lichelete, haholo-holo haeba u e-na le karete ea ho reka ka mokitlane. U ka thibela see joang?

Ithute ho Laola Chelete

Ho e-na le ho sebelisa chelete eohle eo karete ea hao ea ho reka ka mokitlane e u lumellang hore u e sebelise kapa ho sebelisa chelete eohle ea hao ea moputso ha u intšitse, ak’u leke ho etsisa seo Ellena a se etsang. O re: “Ha ke intša le metsoalle, ke rera esale pele ebe ke etsa qeto ea hore na ke tla sebelisa bokae. Moputso oa ka o kena ka ho toba ak’haonteng ea ka ea banka, ’me ke ntša feela chelete eo ke e hlokang bakeng sa ketsahalo eo. Hape ke bona ho le molemo ho ea mabenkeleng le metsoalle e hlokolosi ka chelete, e bileng e nkhothalletsang ho bapisa lintho pele ke reka le hore ke se ke ka reka ntho ea pele eo ke e bonang.”

Haeba u na le karete ea ho reka ka mokitlane, u ka ’na ua rata ho sebelisa litlhahiso tse latelang:

● Boloka tlaleho ea lintho tseo u li rekang ’me u bapise ka hloko hore na li lumellana le seteitemente sa khoeli le khoeli e le ho tiisa hore u lefisitsoe feela lintho tseo u li rekileng.

● Lefa mokitlane oa karete ea hao kapele-pele. Haeba u khona, u hle u lefe molato oo kaofela.

● E-ba hlokolosi ha u bua ka fono kapa u sebelisa Inthanete hore u se ke ua fana ka nomoro ea karete ea hao ea ho reka ka mokitlane le hore na e felloa ke nako neng.

● Qoba ho sebelisa karete ea hao ea ho reka ka mokitlane e le mokhoa oa ho fumana chelete kapele. Hangata ho alima chelete ho tsamaea le sekhahla se phahameng haholo sa tsoala.

● U se ke ua alima motho leha e le ofe karete ea hao ea ho reka ka mokitlane, esita le motsoalle oa hao.

Empa na ho ba le chelete e ngata ho ne ho ke ke ha rarolla mathata ’ohle a hao a ho sebelisa chelete? Che, ha ho joalo! Ho etsa mohlala: Haeba u ne u khanna koloi ebe joale ha u khone ho e laola kapa haeba u ne u tloaetse ho sotha lebili la koloi u tutubetse, na ho tšela peterole e ngata ho ne ho tla etsa hore u fihle moo u eang teng u sireletsehile? Ka ho tšoanang, haeba u sa ithute ho laola tsela eo u sebelisang chelete ka eona, ho amohela chelete e ngata ho ke ke ha ntlafatsa boemo ba hao.

Mohlomong u nahana hore uena u se u ntse u sebelisa chelete ea hao hantle. Empa ak’u ipotse sena: ‘Khoeling e fetileng ke sebelisitse bokae? Ke ne ke reka eng?’ Na ha u tsebe hantle? Litlhahiso tse latelang li tla u thusa hore u laole tsela eo u sebelisang chelete ka eona, pele e ka u laola.

 1. Boloka tlaleho. Bonyane ka khoeli e le ’ngoe, tlaleha chelete eo u e fumanang le letsatsi leo u e fumanang ka lona. Ngola ntho e ’ngoe le e ’ngoe eo u e rekang le hore na ke bokae. Mafelong a khoeli, kopanya chelete eo u e fumaneng le eo u e sebelisitseng.

 2. Etsa moralo oa ho sebelisa chelete. Sheba chate e leqepheng la 163. K’holomong ea pele, ngola chelete eohle eo u lebeletseng ho e fumana ka khoeli. K’holomong ea bobeli, thathamisa lintho tseo u rerang ho li etsa ka chelete ea hao; u sebelisa lethathamo lane leo u le entseng (mohatong oa 1) hore le u tataise. Ha khoeli e ntse e ea, k’holomong ea boraro ngola chelete eo u hlileng u e lefang nthong e ’ngoe le e ’ngoe eo u neng u rerile ho e reka. Ngola le chelete eohle eo u e sebelisitseng linthong tseo u neng u sa rera ho li reka.

 3. Fetola mekhoa ea hao ea ho sebelisa chelete. Haeba u sebelisa chelete e ngata ho feta kamoo u neng u nahanne kateng linthong tse itseng ’me sekoloto sa hao se ntse se phaellana, fetola mekhoa eo u sebelisang chelete ka eona. Lefa likoloto. Laola boemo.

Chelete e ka ba ntho e molemo haeba e sebelisoa hantle. Ha e le hantle, ho batho ba bangata, ntho ea bohlokoa bophelong ke ho etsa chelete le ho e sebelisa. Empa u leke ho ba le pono e leka-lekaneng. Mocha ea bitsoang Matthew o re: “Chelete ke ntho ea bohlokoa, empa hase eona ntho ea bohlokoa ka ho fetisisa. Ho hang ha ea lokela ho nkoa e le ea bohlokoa ho feta lelapa kapa Jehova.”

LENGOLO LA SEHLOOHO

“Chelete [ke] tšireletso; empa molemo oa tsebo ke hore bohlale bo boloka ba nang le bona ba phela.”—Moeklesia 7:12.

KELETSO

Pele u ea mabenkeleng, ngola lethathamo la lintho tseo u batlang ho li reka. Nka feela chelete e hlokahalang, ’me u reke lintho tse lethathamong leo feela.

NA U NE U TSEBA . . . ?

Haeba u saletsoe ke R2 000 kareteng ea hao ea ho reka ka mokitlane eo sekhahla sa eona sa tsoala e leng liphesente tse 18,5, ’me u lefa feela chelete e tlaase ka ho fetisisa e lumeletsoeng, ho tla u nka lilemo tse 11 hore u lefe sekoloto sa hao ’me u tla lefa tsoala e eketsehileng ea R1 934.

SEO KE RERANG HO SE ETSA!

Nka laola tsela eo ke sebelisang chelete ka eona ka ho ․․․․․

Pele ke reka ntho e itseng ka karete ea ho reka ka mokitlane, ke tla ․․․․․

Lintlha tseo ke tla rata ho li botsa motsoali kapa batsoali ba ka tabeng ena ke ․․․․․

U NAHANA’NG KA SEE?

● Ke hobane’ng ha u lokela ho ithuta ho sebelisa chelete hantle ha u sa ntse u le lapeng?

● Ke hobane’ng ha u ka ’na ua thatafalloa ho sebelisa chelete hantle?

● U ka sebelisa chelete ka litsela life hore u thuse ba bang?

[Ntlha e qolotsoeng leqepheng la 162]

“Ha ke iketselitse moralo oa ho sebelisa chelete, ke khona ho boloka chelete e ngata. Ha ke reke lintho tseo ke sa li hlokeng.’’—Leah

[Lebokose se leqepheng la 158]

Chelete e Bontša Seo u Leng Sona

U etsa’ng ka chelete ea hao? Haeba kamehla u sebelisa chelete ea hao ho thusa ba bang, joale tsela eo u sebelisang chelete ka eona e bontša hore u tsotella ba bang e le kannete, eseng feela ka molomo. (Jakobo 2:14-17) Haeba kamehla u fana ka chelete hore u tšehetse borapeli ba ’nete, u “hlompha Jehova ka lintho tsa hao tsa bohlokoa.” (Liproverbia 3:9) Ka lehlakoreng le leng, haeba kamehla u sebelisa chelete ea hao ho ithekela lintho tseo u li hlokang le tseo u li batlang, u bontša hore na ntho ea bohlokoa ka ho fetisisa ho uena ke efe.

[Chate/Litšoantšo tse leqepheng la 163]

Lintlha Tseo U li Ngotseng

Seo ke Rerang ho se Etsa ka Chelete Khoeli le Khoeli Kopitsa leqephe lena!

LIJO

․․․․․ ․․․․․

LIAPARO

․․․․․ ․․․․․

FONO

․․․․․ ․․․․․

Chelete eo ke e BOITHABISO

Rumanang ․․․․․ ․․․․․

CHELETE EO KE E FUOANG MONEHELO

․․․․․ ․․․․․ ․․․․․

MOSEBETSI OA NAKOANA E EANG BANKENG

․․․․․ ․․․․․ ․․․․․

MEHLOLI E MENG LITŠENYEHELO TSE LING

․․․․․ ․․․․․ ․․․․․

↓ ↓ ↓

Kakaretso Kakaretso Kakaretso

R․․․․․ R․․․․․ R․․․․․

[Setšoantšo se leqepheng la 160]

Ho se laole tsela eo u sebelisang chelete ka eona ho tšoana le ho khanna koloi u tutubetse