Khaolo ea 105

Ho Qaleha ha Letsatsi le Mahlonoko

HA JESU a tloha Jerusalema ka ’Mantaha mantsiboea, o khutlela Bethania letsoapong le ka bochabela la Thaba ea Mehloare. Matsatsi a mabeli a tšebeletso eo ea ho qetela Jerusalema a se a phethiloe. Ntle ho pelaelo Jesu o boetse o robaletsa ha motsoalle oa hae Lazaro. Ho tloha haesale a fihla a tsoa Jeriko ka Labohlano, bona ke bosiu ba bone a robaletsa Bethania.

Joale, hoseng ha Labobeli, la 11 Nisane, eena le barutuoa ba hae ba boetse ba kena tseleng. Lena le ipaka e le letsatsi le mahlonoko la tšebeletso ea Jesu, le maphatha-phathe ka ho fetisisa ho tla fihlela joale. Ke letsatsi la ho qetela a bonahala tempeleng. ’Me ke letsatsi la ho qetela la tšebeletso ea hae ea phatlalatsa pele a qosoa le ho bolaoa.

Jesu le barutuoa ba hae ba tsamaea ka tselana e tšoanang ba hloa Thaba ea Mehloare ho leba Jerusalema. Pel’a tsela eo e tlohang Bethania, Petrose o hlokomela sefate seo Jesu a neng a se rohakile hoseng ha letsatsi le ka pele. Oa hooa: “Rabbi, bona sefate sa feiga see u se rohakileng, se omeletse.”

Empa ke hobane’ng ha Jesu a ile a bolaea sefate seo? Oa bontša hore na ke hobane’ng ha a tsoela pele ho re: “Ka ’nete kea le bolella, ke re: Holane le na le tumelo, le sa belaele, le ka be le etsa, e seng se entsoeng ho sefate sa feiga feela, empa leha le be le ka re ho thaba ena [Thaba ea Mehloare eo ba emeng holim’a eona]: Tloha, u itihele leoatleng, ho no ho ka etsahala. Se seng le se seng seo le se kōpang ka thapelo, ha le lumela, le tla se neoa.”

Kahoo ka ho etsa hore sefate seo se omelle, Jesu o fa barutuoa ba hae thuto e theiloeng nthong e bonahalang ka tlhokahalo ea hore ba be le tumelo ho Molimo. Joalokaha a bolela: “Se seng le se seng seo le se kōpang ka thapelo, lumelang hoba le se bone, ’me se tla ba ho lōna.” Ke thuto ea bohlokoa hakaakang eo ba lokelang ho ithuta eona, haholo-holo ka baka la liteko tse tšabehang tse tla tla haufinyane! Leha ho le joalo, ho omella ha sefate sa feiga ho boetse ho amana le boleng ba tumelo.

Sechaba sa Iseraele joaloka sefate sa feiga, se na le ponahalo e thetsang. Le hoja sechaba seo se le kamanong ea selekane le Molimo ’me ka ntle se ka ’na sa bonahala se boloka litaelo tsa oona, se ipakile se se na tumelo, se sa behe litholoana tse ntle. Ka baka la ho haelloa ke tumelo, se bile se lekhatheng la ho lahla Mora oa Molimo! Ka hona, ka ho etsa hore sefate sa feiga se sa beheng se omelle, ka tšoantšetso Jesu o bontša hore na qetello ea sechaba sena se se nang litholoana, se se nang tumelo e tla ba efe.

Kapele, Jesu le barutuoa ba hae ba kena Jerusalema, ’me joalokaha e le tloaelo ea bona, ba leba tempeleng moo Jesu a qalang ho ruta teng. Baprista ba baholo le baholo ba sechaba baa mo phephetsa, ntle ho pelaelo ba hopotse ketso ea Jesu khahlanong le ba ananyang lichelete letsatsing le fetileng: “Ntho tseo, u li etsa ka matla afe? ’Me matla ao u a neiloe ke mang?”

Jesu ha a arabela o re: “Ke tla le botsa taba le ’na; ekare ha le mpolella eona, le ’na ke tla le bolella matla ao ke etsang ntho tseo ka ’ona. Ana kolobetso ea Johanne e ne e tsoa kae? Na e ne e tsoa leholimong, kapa bathong?”

Baprista le baholo ba qala ho eletsana hammoho mabapi le hore na ba tla arabela joang. “Ha re re: E ne e tsoa leholimong, o tla re: Ha ho le joalo, ha lea ka la e lumela ke’ng? ’Me ha re ka re: E ne e tsoa bathong, re tšaba bongata, hobane bohle ba re: Johanne ke moprofeta.”

Baeta-pele bao ha ba tsebe kamoo ba ka arabelang ka teng. Ka hona ba arabela Jesu ka ho re: “Ha re tsebe.”

Ha a arabela, Jesu o re: “Le ’na nke ke ka le bolella matla ao ke etsang ntho tseo ka ’ona.” Mattheu 21:19-27; Mareka 11:19-33; Luka 20:1-8.

▪ Ke’ng seo e leng ntho ea bohlokoa ka Labobeli, la 11 Nisane?

▪ Ke lithuto life tseo Jesu a fanang ka tsona ka ho etsa hore sefate sa feiga se omelle?

▪ Jesu o arabela ba ’motsang hore na o etsa lintho ka matla afe joang?

Khaolo ea 106

Ba Pepesoa ke Litšoantšo tsa Tšimo ea Merara

JESU o tempeleng. O sa tsoa arabela baeta-pele ba bolumeli ka mokhoa o ileng oa ba emisa hlooho ha ba ne ba batla ho tseba hore na o etsa lintho ka matla a mang. Pele ba hlaphoheloa pherekanong ea bona, Jesu oa botsa: “Empa le re’ng ka taba ena?” ’Me joale a sebelisa setšoantšo, o ba bontša hore na ha e le hantle ke batho ba mofuta ofe.

Jesu oa tlaleha: “Motho o na a na le bara ba babeli; a ea ho oa pele, a re ho eena: Mor’a ka, e-ea, u sebetse kajeno tšimong ea ka ea merara. Eo a araba, a re: Kea hana. Empa hamorao, a baka, a ea. A ea ho oa bobeli, le ho eena a rialo, ’me eo a mo araba a re: Kea ea, morena. Empa a se ke a ea.” Jesu oa botsa: “Ana ho bona ba babeli, ke ofe ea entseng thato ea ntat’ae?”

Bahanyetsi ba hae baa arabela: “Ke oa pele.”

Kahoo Jesu oa hlalosa: “Ka ’nete kea le bolella, ke re: Ba-lekhetho le basali ba bafebi ba le raka ’musong oa Molimo.” Ha e le hantle, balekhetho le basali ba bafebi, ba ne ba hana ho sebeletsa Molimo. Empa joale, joaloka ngoana oa pele, ba ile ba baka ’me ba o sebeletsa. Ka lehlakoreng le leng, baeta-pele ba bolumeli, joaloka ngoana oa bobeli, ba ne ba ipolela hore ba sebeletsa Molimo, empa, joalokaha Jesu a bolela: “Johanne [Mokolobetsi] o tlile ho lōna ka tsela ea ho loka, ’me ha lea ka la mo lumela; empa ba-lekhetho le basali ba bafebi ba mo lumetse; ’me lōna, leha le bone hoo, ha lea ka la baka, la mo lumela.”

Ka mor’a moo Jesu o bontša hore baeta-pele bana ba bolumeli hase feela hore ba hlokomoloha ho sebeletsa Molimo. Che, empa e hlile ke batho ba babe, ba khopo. Jesu oa tlaleha: “Motho o na a le teng, e leng mong a ntlo, ea hlomileng tšimo ea merara; a e sireletsa ka motero, a cheka sehatelo teng, a e hahela tora, ’me a e laeletsa balemi, a ntoo eta. Eare ha nako ea litholoana e atametse, a roma bahlanka ba hae ho balemi ho nka litholoana tsa hae. Empa balemi ba tšoara bahlanka ba hae, ba otla e mong, ba bolaea e mong, ba tlepetsa e mong ka majoe. A boela a roma bahlanka ba bang, ba fetisang ba pele ka bongata, ’me le bona ba etsoa joale ka ba pele.”

“Bahlanka” ke baprofeta bao “mong a ntlo,” Jehova Molimo, a ileng a ba romela ho “balemi” ba ‘tšimo ea hae ea merara.’ Balemi bana ke baemeli ba etelletseng pele ba sechaba sa Iseraele, e leng sechaba seo Bibele e se tsebahatsang e le ‘tšimo ea Molimo ea merara.’

Kaha “balemi” ba tšoara “bahlanka” hampe ba bile baa ba bolaea, Jesu oa hlalosa: “Ho feleng, [mong’a tšimo ea merara] a romela mor’a hae ho bona, a re: Ba tla hlompha mora oa ka. Empa balemi, ha ba bona mor’a hae, ba bolellana, ba re: Enoa ke mojalefa; tlong, re ’molaeeng, re tle re inkele lefa la hae. Eaba ba mo tšoara, ba mo lahlela ka ntle ho tšimo ea merara, ba ’molaea.”

Joale, a tobisitse taba ho baeta-pele bao ba bolumeli, Jesu oa botsa: “Ana mohla mong a tšimo ea merara a fihlang, balemi bao o tla ba etsa joang na?”

Baeta-pele ba bolumeli baa arabela: “O tla timetsa ba babe bao hampe, ’me tšimo ea hae ea merara o tla e laeletsa balemi basele, ba tla mo nea litholoana nakong ea tsona.”

Ka hona baeta-pele bao ba bolumeli ba ikahlola ba sa hlokomele, kaha baa akarelletsoa har’a “balemi” ba Baiseraele ba “tšimo ea merara” ea Jehova ea sechaba sa Iseraele. Litholoana tseo Jehova a li lebelletseng ho balemi ba joalo ke tumelo ho Mora oa hae, Messia oa ’nete. Ka baka la ho hlōleha ha bona ho fana ka litholoana tse joalo, Jesu oa lemosa: “Ana ha lea ka la bala Mangolong [ho Pesaleme ea 118:22, 23] taba e reng: Lejoe leo bahahi ba le lahlileng, ke lona le entsoeng la motheo, la sekhutlo? Le entsoe le joalo ke Morena, ’me ke le makatsang mahlong a rōna. Ka baka leo ke re ho lōna: ’Muso oa Molimo le tla o amohuoa, ’me o tla neoa sechaba se seng se tla bea litholoana tsa oona. Ea tla oela holim’a lejoe leo, o tla robeha, ’me le tla pitla eo le mo oelang holimo.”

Joale bangoli le baprista ba baholo baa hlokomela hore Jesu o bua ka bona, ’me ba batla ho ’molaea, eena “mojalefa” ea nang le tokelo. Kahoo e le sechaba ba tla amohuoa tokelo ea ho ba babusi ’Musong oa Molimo, ’me ho tla bōptjoa sechaba se secha sa ‘balemi ba tšimo ea merara,’ se tla hlahisa litholoana tse loketseng.

Kaha baeta-pele ba bolumeli ba tšaba matšoele a talimang Jesu e le moprofeta, ha ba leke ho ’molaea lekhetlong lena. Mattheu 21:28-46; Mareka 12:1-12; Luka 20:9-19; Esaia 5:1-7.

▪ Bana ba babeli ba setšoantšong sa Jesu sa pele ba emela bo-mang?

▪ Setšoantšong sa bobeli, “mong a tšimo,” “tšimo ea merara,” “balemi,” “bahlanka,” le “mojalefa” ba emela bo-mang?

▪ Ho tla etsahala joang ka ‘balemi ba tšimo ea merara,’ ’me ba tla nkeloa sebaka ke bo-mang?

Khaolo ea 107

Setšoantšo sa Mokete oa Lenyalo

JESU o pepesitse bangoli le baprista ba baholo ka litšoantšo tse peli, ’me ba batla ho ’molaea. Empa Jesu o sa le hōle le ho qeta ka bona. O tsoela pele ho ba bolella setšoantšo se seng hape, o re:

“’Muso oa maholimo o joaloka khosi e neng e etselitse mora oa eona mokete oa lenyalo. Ea rōma bahlanka ba eona ho ea bitsa ba memetsoeng moketeng, empa ba hana ho tla.”

Jehova Molimo ke Morena ea lokisetsang mokete oa lenyalo bakeng sa Mora oa hae, Jesu Kreste. Qetellong, monyaluoa oa balateli ba tlotsitsoeng ba 144 000 o tla kopana le Jesu leholimong. Bafo ba Morena ke sechaba sa Iseraele se amohetseng monyetla oa ho fetoha “’muso oa baprista,” ha se tlisoa selekaneng sa Molao ka 1513 B.C.E. Ka hona, ketsahalong eo, ba ile ba memeloa ea ho tla moketeng oa lenyalo pele.

Leha ho le joalo, pitso ea pele ea ba memiloeng ha e-ea ka ea tsoa ho fihlela hoetla ka 29 C.E., ha Jesu le barutuoa ba hae (bahlanka ba morena) ba qala mosebetsi oa bona oa ho bolela ka ’Muso. Empa Baiseraele ba tlhaho ba ileng ba amohela pitso ena e neng e etsoa ke bahlanka ho tloha ka 29 C.E. ho ea ho 33 C.E. ba ne ba sa ikemisetsa ho tla. Kahoo Molimo o ile oa neha sechaba sa ba memiloeng monyetla o mong, joalokaha Jesu a bolela:

“Ea boela ea rōma bahlanka ba bang hape, ea re: ‘Bolellang bamemuoa hore ke lōkisitse mokete; lipholo le linonneng tsa ka li se li hlabiloe, tsohle li lokile, ba tle moketeng.’” Pitso ena ea bobeli le ea ho qetela ea ba memiloeng e qalile ka Pentekonta 33 C.E., ha moea o halalelang o ne o tšolleloa holim’a balateli ba Jesu. Pitso ena e ile ea tsoela pele ho fihlela ka 36 C.E.

Leha ho le joalo, ba bangata haholo ho Baiseraele bao, le bona ba ile ba nyelisa pitso ena. Jesu o re: “Empa bamemuoa ba se ke ba natsa, ba itsamaela; e mong a ikela masimong, e mong a ikela khoebong ea hae. Ba bang ba tšoara bahlanka ba khosi, ba ba etsa hampe, ’me ba ba bolaea.” Jesu o tsoela pele: “Khosi ea halefa, ea romela limphi tsa eona, tsa ripitla babolai bao, tsa chesa motse oa bona.” Sena se etsahetse ka 70 C.E., ha Jerusalema e ne e senngoa ke Baroma, ’me babolai bao ba ile ba bolaoa.

Joale Jesu o hlalosa se etsahetseng nakong eo: “Eaba [khosi] e re ho bahlanka ba eona: ‘Mokete oa lenyalo o lōkisitsoe, empa ba neng ba memiloe ba ne ba sa lokela. E-eang ke hona mateanong a litsela, ’me bohle bao le ba fumanang le ba memele moketeng.’” Bahlanka ba ile ba etsa sena, ’me “ntlo ea mokete ea tlala tsoete!”

Mosebetsi ona oa ho bokella baeti mateanong a litsela ka ntle ho motse oa ba memiloeng o qalile ka 36 C.E. Molaoli oa lebotho oa Moroma Kornele le lelapa la hae ke bona ba pele ba sa bollang bao e seng Bajode ba ho bokelloa. Ho bokelloa ha bana bao e seng Bajode, bao kaofela ha bona e leng ba nkileng sebaka sa ba ileng ba hana pitso pele, ho tsoetse pele ho tla fihlela lekholong la bo20 la lilemo.

Ke lekholong lena la bo20 la lilemo moo ntlo ea litšebeletso tsa lenyalo e tlalang. Joale Jesu o pheta se etsahalang, o re: “Khosi ea kena ho tla bona bamemuoa, ’me ea bona motho ea sa aparang seaparo sa mokete. Ea re ho eena: ‘Motsoalle, u kene joang moo, u se na seaparo sa mokete?’ Empa eo a khutsa. Eaba khosi e re ho basebeletsi: ‘Mo tlameng sekōlōkōtō, le mo lahlele kantle lefifing, moo ho tla ba le lillo le litsikitlano tsa meno.’”

Monna eo ea se nang seaparo sa lenyalo o tšoantšetsa Bakreste ba bohata ba Bokreste-’mōtoana. Bana le ka mohla Molimo ha o e-s’o ka o ba amohela e le ba nang le boiponahatso bo loketseng e le Baiseraele ba moea. Le ka mohla Molimo ha o e-s’o ka o ba tlotsa ka moea o halalelang e le majalefa a ’Muso. Kahoo ba lahleloa ka ntle lefifing moo ba tla timela teng.

Jesu o phetha setšoantšo sa hae ka ho re: “Hobane ba mengoang ba bangata, empa ba khethoang ha ba bakae.” E, ho ne ho e-na le ba bangata ba memiloeng sechabeng sa Iseraele hore ba fetohe litho tsa monyaluoa oa Kreste, empa ho ile ha khethoa Baiseraele ba tlhaho ba fokolang feela. Bongata ba baeti ba 144 000 ba amohelang moputso oa leholimo ba ipaka e se Baiseraele. Mattheu 22:1-14, TLP; Exoda 19:1-6; Tšenolo 14:1-3.

▪ Ke bo-mang ba memetsoeng moketeng oa lenyalo pele, hona ba ile ba mengoa neng?

▪ Ka lekhetlo la pele, pitso e-ea neng ho ba memiloeng, hona bahlanka ba sebelisoang ho e etsa ke bo-mang?

▪ Pitso ea bobeli e atolosoa neng, hona ke bo-mang ba mengoang hamorao?

▪ Ke bo-mang ba tšoantšetsoang ke monna ea se nang seaparo sa lenyalo?

▪ Ba bangata ba mengoang ke bo-mang, hammoho le ba seng bakae ba khethoang?

Khaolo ea 108

Ba Hlōleha ho Tšoasa Jesu

KAHA Jesu o ne a ntse a ruta ka tempeleng ’me o sa tsoa bolella lira tsa hae tsa bolumeli litšoantšo tse tharo tse pepesang bokhopo ba tsona, Bafarisi ba halefile ’me ba rera hammoho ho mo tšoasa ka hore a bue ntho e ’ngoe eo ba ka mo tšoarisang ka baka la eona. Ba loha leqheka ’me ba romela barutuoa ba bona, hammoho le balateli ba mokha oa Heroda, hore ba leke ho mo tšoasa.

Banna bana ba re: “Moruti, rea tseba hobane u oa ’nete, le hoba u ruta tsela ea Molimo ka ’nete, le hoba ha u re letho ka motho; hobane tšobotsi ea motho ha e talingoe ke uena. Ka baka leo, u re bolelle khopolo ea hao: Hleka hoa lokela ho ntšetsa Cesare lekhetho, kapa che?”

Jesu ha a qhekelloe ke thoriso eo. O hlokomela hore haeba a re, ‘Che, ha hoa lokela kapa ha hoa nepahala ho lefa lekhetho lena,’ o tla ba molato oa ho khothalletsa bofetoheli khahlanong le Roma. Empa, haeba a re, ‘E, le lokela ho lefa lekhetho lena,’ Bajode, ba nyelisang bokhoba ba bona tlas’a Roma, ba tla mo hloea. Kahoo o arabela tjena: “Le ntekela’ng, lōna baikaketsi? Mpontšeng chelete ea lekhetho.”

Ha ba mo tlisetsa eona, oa ba botsa: “Setšoantšo sena ke sa mang, le lengolo lena ke la mang?”

Baa arabela: “Ke la Cesare.”

“Hommeng! Ntšetsang Cesare tseo e leng tsa Cesare, le ntšetse Molimo tseo e leng tsa Molimo.” Koana, ha banna bana ba utloa karabelo ena e bohlale ea Jesu, baa makala. ’Me ba itsamaela ba mo siea a le mong.

Ha ba bona ho hlōleha ha Bafarisi hore ba fumane ntho e ’ngoe khahlanong le Jesu, Basaduci, ba bolelang hore ha ho na tsoho, baa mo atamela ’me baa botsa: “Moruti, Moshe o itse: Monna ha a e-shoa, a se na bana, ngoan’abo o tla nka mosali oa hae, a hlahisetse ngoan’abo bana. Bara ba motho a le mong, ba supileng, ba ne ba le teng har’a rōna; e moholo a shoa, a se a nyetse; ’me kahobane a sa ka a ba le bana, a siela moen’ae mosali oa hae. Ha e-ba joalo le oa bobeli, le oa boraro, ho isa ho oa bosupa. Ka mor’a bona bohle, mosali le eena a shoa. Ana ha ho le joalo, mohl’a tsoho ea bafu, mosali eo e tla ba oa ofe ho ba supileng, ha e le moo ba kile ba e-ba le eena bohle?”

Ha Jesu a arabela, o re: “Na ho lahleha ha lōna hase kahobane le sa tsebe Mangolo, leha e le matla a Molimo na? Hobane mohla ho tsohuoang bafung, ha ho ka ke ha nyaloa, leha e le ho nyalisoa, empa batho ba tla ba joale ka mangeloi maholimong. Ha e le hore bafu ba tla tsoha, hleka ha lea ka la bala bukeng ea Moshe, kamoo Molimo o buileng le eena kateng sehlahleng, oa re: Ke ’na Molimo oa Abrahama, le Molimo oa Isaaka, le Molimo oa Jakobo? Molimo hase Molimo oa bafu, empa ke Molimo oa ba phelang. Lōna, le lahlehile haholo.”

Matšoele a boetse a tsota karabelo ea Jesu. Esita le ba bang ho bangoli baa lumela: “Moruti, u arabile hantle.”

Ha Bafarisi ba bona hore Jesu o khutsisitse Basaduci, ba tla ho eena e le sehlopha se le seng. Ha a tsoela pele ho mo leka, mongoli e mong har’a bona oa botsa: “Moruti, taelo e kholo ea molao ke efe na?”

Jesu oa arabela: “Ea pele ke ena, ‘Utloa, Uena Iseraele, Jehova Molimo oa rōna ke Jehova a le mong, ’me u tlameha ho rata Jehova Molimo oa hao ka pelo eohle ea hao le ka sephefumolohi sohle sa hao le ka khopolo eohle ea hao le ka matla ’ohle a hao.’ Ea bobeli ke ena, ‘U tlameha ho rata moahisani oa hao joalokaha u ithata.’ Ha ho taelo e ’ngoe e khōlō ho tsena.” (NW) Ha e le hantle, Jesu oa phaella: “Melao e ’meli eo ke motheo oa molao oohle le oa baprofeta.”

Mongoli e mong oa lumela: “Ke hantle, moruti; u boletse ka ’nete ha u re: Molimo o mong, ’me ha ho o mong ha e se oona: ’me ho o rata ka pelo eohle, le ka khopolo eohle, le ka moea oohle, le ka matla ’ohle, le ho rata oa habo motho joale ka ha motho a ithata, ho fetisa licheso le mahlabelo ’ohle.”

Ha Jesu a lemoha hore mongoli eo o arabetse ka kelello, oa ’molella: “Ha u hole le ’muso oa Molimo.”

Ke matsatsi a mararo joale—Sontaha, ’Mantaha, le Labobeli—Jesu a ntse a ruta ka tempeleng. Batho ba mo mametse ka thabo, leha ho le joalo, baeta-pele ba bolumeli ba batla ho ’molaea empa ho fihlela hona joale merero ea bona e ’nile ea nyopa. Mattheu 22:15-40; Mareka 12:13-34; Luka 20:20-40.

▪ Bafarisi ba loha leqheka lefe e le ho tšoasa Jesu, hona phello e ne e tla ba efe haeba a ne a ka arabela ka e kapa che?

▪ Jesu o boetse o hlōla boiteko ba Basaduci ba ho mo tšoasa joang?

▪ Bafarisi ba etsa boiteko bofe bo eketsehileng ba ho leka Jesu, hona phello ke efe?

▪ Nakong ea tšebeletso ea hae ea ho qetela Jerusalema, Jesu o ruta ka matsatsi a makae tempeleng, hona e le ka phello efe?

Khaolo ea 109

Jesu o Nyatsa Bahanyetsi ba Hae

JESU o ferekantse bahanyetsi ba hae ba bolumeli ka ho felletseng hoo ba tšabang ho tsoela pele ba ’motsa ntho efe kapa efe. Ka hona o nka khato ea ho pepesa ho hloka tsebo ha bona. Oa ba botsa: “Le re’ng ka Kreste? Ke mora oa mang?”

Bafarisi baa arabela: “Oa Davida.”

Le hoja Jesu a sa latole hore Davida ke ntate-moholo oa nama oa Kreste, kapa Messia, oa botsa: “Ha ho le joalo, na Davida ha a bolelisoa ke Moea [ho Pesaleme ea 110], o ’mitsetsa’ng morena oa hae, ha a re: Morena [“Jehova,” NW] o itse ho moren’a ka: Lula letsohong la ka le letona, ke be ke bee bao e leng lira ho uena bonamelo ba maoto a hao? Na Davida ha a ’mitsa morena, e ka ba mora oa hae joang?”

Bafarisi ba khutsitse, kahobane ha ba tsebe hore na ha e le hantle Kreste, kapa motlotsuoa, ke mang. Messia hase motho feela eo e leng setloholo sa Davida, joalokaha ho bonahala Bafarisi ba lumela joalo, empa o kile a ba teng leholimong ’me o ne a phahametse Davida, kapa e le Morena oa hae.

Ha Jesu a retelehela joale ho matšoele le ho barutuoa ba hae, o lemosa ka bangoli le Bafarisi. Kaha ba ruta Molao oa Molimo, ‘ba lutse litulo tsa Moshe,’ Jesu oa phehella: “Le boloke, ’me le etse tsohle tseo ba le bolellang tsona.” Empa oa phaella: “Le mpe le se ke la etsa ka liketso tsa bona, hobane ba bolela, empa ha ba etse.”

Ke baikaketsi, ’me Jesu o ba nyatsa ka puo e tšoanang haholo le eo a ileng a ba nyatsa ka eona ha a le lijong tlung ea Mofarisi e mong likhoeli pejana. O re: “Liketso tsa bona tsohle ba li etsa hore ba tle ba bonoe ke batho.” ’Me o fana ka mehlala, oa hlokomelisa:

“Ba habōlla mekotlana ea Mangolo a halalelang eo ba e roetseng.” Mekotlana ena eo ha ho bapisoa e leng menyenyane, e roaloang phatleng kapa sephakeng, e na le likarolo tse ’nè tsa Molao: Exoda 13:1-10, 11-16; le Deuteronoma 6:4-9; 11:13-21. Empa Bafarisi ba eketsa boholo ba mekotlana ena e le ho fana ka maikutlo a hore ba chesehela Molao.

Jesu o tsoela pele hore “ba lelefatsa litjellane tsa likobo tsa bona.” Ho Numere 15:38-40 Baiseraele ba laeloa hore ba etse litjellane liaparong tsa bona, empa Bafarisi ba etsa hore tsa bona li be khōlōanyane ho feta kamoo motho leha e le ofe a etsang ka teng. Ntho e ’ngoe le e ’ngoe ba e etsa hore ba bonoe! Jesu o re: “Ba rata litulo tse kapele.”

Ka ho soabisang, barutuoa ba hae ba tšoaelitsoe ke takatso ena ea ho hlahella. Kahoo oa eletsa: “Empa lōna, le se ke la bitsoa Rabbi, hobane moruti oa lōna o mong, e leng Kreste, ’me lona bohle le bana ba motho a le mong. Le se ke la bitsa motho lefatšeng ntat’a lōna, hobane o mong feela eo e leng Ntat’a lōna, ke ea leng maholimong. Hape, le se ke la bitsoa benghali, hobane monghali oa lōna o mong, e leng Kreste.” Barutuoa ba tlameha ho tlosa ka ho bona takatso ea ho ba ba pele! Jesu oa khothalletsa: “E moholo ho lōna e tla ba mohlanka oa lōna.”

O boetse o phatlalatsa letoto la bomalimabe holim’a bangoli le Bafarisi, a ntse a ba bitsa baikaketsi khafetsa. O re, ba “koalla batho ’muso oa maholimo,” ’me ‘ba metsa matlo a basali ba bahlolohali, ka ho re, ba ba etsetsa merapelo e melelele.’

Jesu o re: “Ho malimabe lōna, batsamaisi ba foufetseng.” O nyatsa ho haella ha lintho tsa bohlokoa tsa moea ho Bafarisi, joalokaha ho bontšoa ke khethollo ea bompoli eo ba e etsang. Ka mohlala, ba re, ‘Ha ho na’ng ha motho a ana ka tempele, empa ha a anne ka gauda ea tempele, o tlamiloe.’ Ka ho hatisa haholo gauda ea tempele ho feta bohlokoa ba moea ba sebaka seo sa borapeli, ba senola bofofu ba bona boitšoarong.

Ka hona, joalokaha a ile a etsa pejana, Jesu o nyatsa Bafarisi ka ho hlokomoloha “lintho tsa bohlokoa tsa Molao: tōka, mohau le botšepehi” (TLP) athe ba lebisa tlhokomelo e khōlō tabeng ea ho lefa karolo ea leshome ea limela tseo e seng tsa bohlokoa.

Jesu o bitsa Bafarisi ‘batsamaisi ba lifofu, ba okolang monoang, empa ba metsa kamele!’ Ba okola monoang veineng ea bona, e seng feela hobane e le kokoanyana, empa hobane litšebeletsong ha e-ea hloeka. Empa, ho hlokomoloha ha bona lintho tsa bohlokoa tsa Molao ho tšoana le ho metsa kamele, eo le eona e leng phoofolo e sa hloekang litšebeletsong. Mattheu 22:41–23:24, TLP; Mareka 12:35-40; Luka 20:41-47; Levitike 11:4, 21-24.

▪ Ke hobane’ng ha Bafarisi ba khutsitse ha Jesu a ba botsa ka seo Davida a se buileng ho Pesaleme ea 110?

▪ Ke hobane’ng ha Bafarisi ba etsa hore mekotlana ea bona e nang le Mangolo e be meholo le litjellane tse liaparong tsa bona li be khōlō?

▪ Jesu o fa barutuoa ba hae keletso efe?

▪ Ke khethollo efe ea bompoli eo Bafarisi ba e etsang, hona Jesu o ba nyatsa ka ho hlokomoloha lintho tsa bohlokoa joang?

Khaolo ea 110

Tšebeletso Tempeleng ea Phethoa

JESU o itlhahisa la ho qetela tempeleng. Ha e le hantle, o phetha tšebeletso ea hae ea pontšeng lefatšeng ntle le liketsahalo tsa ho qosoa le ho bolaoa ha hae matsatsing a mararo a tlang. Joale o tsoela pele ho nyatsa bangoli le Bafarisi ka ho ba tšoaea liphoso.

Ka makhetlo a mang hape a mararo oa hooa: “Ho malimabe lōna, bangoli le bafarisi, baikaketsi!” Pele, o phatlalatsa bomalimabe ho bona hobane ba hloekisa “bokantle ba mohope le sejana, empa kahare li tletse tsa bosholu le ho hloka boitšoaro.” Kahoo oa eletsa: “Qala ka ho hloekisa bokahare ba mohope e le hore bokantle ba oona le bona bo tle bo hloeke.”

Hape o phatlalatsa bomalimabe ho bangoli le Bafarisi ka baka la bobolu bo ka hare le tšenyeho tseo ba lekang ho li pata ka bohloeki ba ka ntle. O re: “Le joalo ka mabitla a koetlisitsoeng, a talimehang a khahleha kantle, empa kahare, a tletse masapo a bafu le libolu tsohle.”

Qetellong, boikaketsi ba bona bo bonahala tabeng ea ha ba rata ho haha mabitla a baprofeta le ho a khabisa e le ho lebisa tlhokomelo liketsong tsa bona tsa ho etsa molemo. Leha ho le joalo, joalokaha Jesu a senola, ke “bara ba babolai ba baprofeta.” Ka sebele, mang kapa mang ea lekang ho pepesa boikaketsi ba bona o kotsing!

Ha Jesu a tsoela pele, o bolela mantsoe a hae a matla ka ho fetisisa a nyatsang. O re: “Linōha ting! malinyane a marabe! kahlolo ea lihele [“Gehenna,” NW] le tla e phonyoha joang?” Gehenna ke khohlo e sebelisoang e le thotobolo ea lithole ea Jerusalema. Ka hona Jesu o re ka ho hahamalla tsela ea bona e khopo, bangoli le Bafarisi ba tla timela ka ho sa feleng.

Mabapi le bao a ba romang e le baemeli ba hae, Jesu o re: “Ba bang ba bona le tla ba bolaea, le ba thakhise; ’me ba bang ba bona le tla ba shapela matlung a lōna a thapelo, le ba phalalise le metse eohle; hore mali ’ohle a ba lōkileng a tšolotsoeng lefatšeng a botsoe ho lōna ho qala ka mali a Abele ea lōkileng, ho ea fihla ho a Sakaria, mor’a Barakia [ea bitsoang Jehojada ho Likronike tsa Bobeli], eo le neng le ’molaele pakeng tsa sehalalelo le aletare. Ruri kea le bolella hore tsena tsohle li tla botsoa ho molōko ona.”

Kahobane Zakaria o ile a khalemela baeta-pele ba Iseraele, “ba mo rera, ’me ba mo tlepetsa ka majoe lebaleng la ntlo ea Jehova, ka taelo ea morena.” Empa, joalokaha Jesu a bolela esale pele, Iseraele e tla lefella mali ’ohle a joalo a lokileng a tšollotsoeng. Ba lefa lilemo tse 37 hamorao, ka 70 C.E., ha mabotho a Roma a timetsa Jerusalema ’me ho e-shoa Bajode ba ka holimo ho millione.

Ha Jesu a nahanisisa ka boemo bona bo tšosang, oa sisimoha. O boela a phatlalatsa: “Jerusalema! Jerusalema! . . . ke hakae ke lakalitseng ho phutha bana ba hao, joalokaha khoho e alama litsuonyana tsa eona, empa ua hana! Bonang, ntlo ea lōna e tla sala e le lithako.”

Joale Jesu oa phaella: “Kea u bolella hore ho tloha joale ha le sa tla mpona ho fihlela le re: ‘Ho lehlohonolo ea tlang ka lebitso la Morena [“Jehova,” NW]!’” Letsatsi leo e tla ba boteng ba Kreste ha a tla ’Musong oa hae oa leholimo ’me batho ba ’mona ka mahlo a tumelo.

Joale Jesu o tsamaela sebakeng seo ho sona a ka shebang polokelo ea letlotlo e ka tempeleng le matšoele a nokelang chelete ka ho eona. Barui ba nokela chelete e ngata. Empa joale mohlolohali e mong ea futsanehileng oa tla ’me o nokela licheletana tse peli tsa bohlokoa bo fokolang.

Ha a bitsa barutuoa ba hae, Jesu o re: “Ka ’nete ke re ho lōna: Mohlolohali enoa ea fumanehileng o noketse ho fetisa bohle ba noketseng polokelong ea letlotlo.” Ba tlameha ba be ba ipotsa hore na sena se ka ba joalo joang. Ka hona Jesu oa hlalosa: “Hobane bohle ba noketse ba nkile ho tlalloeng ha bona; empa enoa o noketse a nkile bofumanehing ba hae, o noketse hohle hoo a neng a na le hona, hohle hoo a neng a phela ka hona.” Ka mor’a ho bolela lintho tsena, Jesu o tloha tempeleng ka lekhetlo la ho qetela.

Ba hlolletsoe ke boholo le botle ba tempele, barutuoa ba hae baa hooa: “Moruti, bona, ke majoe a makakang, le mehaho e mekakang!” Ka sebele, ho ea ka tlaleho majoe ao a bolelele ba limithara tse ka bang 11, a bophara ba limithara tse ka bang 5, ’me a bophahamo ba limithara tse fetang tse 3!

Jesu oa arabela: “Ua e bona mehaho e meholo eo? Ha ho ka ke ha lesoa mona lejoe holim’a lejoe le leng, le sa heletsoang.”

Ka mor’a ho bolela lintho tsena, Jesu le baapostola ba hae ba tšela Phula ea Kedrone ’me ba hloa Thaba ea Mehloare. Ha ba le moo ba ka boha tempele eo e hlollang. Mattheu 23:25–24:3, TLP; Mareka 12:41–13:3; Luka 21:1-6; 2 Likronike 24:20-22.

▪ Jesu o etsa’ng nakong ea leeto la hae la ho qetela tempeleng?

▪ Boikaketsi ba bangoli le Bafarisi bo pepesoa joang?

▪ Ho boleloa’ng ka “kahlolo ea lihele [“Gehenna,” NW]”?

▪ Ke hobane’ng ha Jesu a re mohlolohali o nehetse ho feta barui?

Khaolo ea 111

Pontšo ea Mehla ea Qetello

HONA joale ke Labobeli motšehare oa mantsiboea. Ha Jesu a lutse Thabeng ea Mehloare, a shebile tempeleng e tlaase, Petrose, Andrease, Jakobo, le Johanne ba tla ho eena ka lenyele. Ba amehile ka tempele, kaha Jesu o sa tsoa bolela esale pele hore ha ho lejoe le tla tloheloa holim’a lejoe le leng ho eona.

Empa ka ho hlakileng ba hopotse ho eketsehileng ha ba atamela Jesu. Libekeng tse seng kae pejana, o ne a ile a bua ka “boteng” ba hae, nako ea “ha Mor’a motho a ne a tla senoloa.” ’Me ketsahalong ea pejana, o ne a ile a ba bolella ka “bofelo ba tsamaiso ea lintho.” Ka hona baapostola ba laba-labela ho tseba litaba.

Ba re: “Re bolelle, lintho tsee li tla etsahala neng [tse tla fella ka ho timetsoa ha Jerusalema le tempele ea eona], hona pontšo ea boteng ba hao le ea bofelo ba tsamaiso ea lintho e tla ba efe?” Ha e le hantle, potso ea bona e likarolo li tharo. Ea pele, ba batla ho tseba ka ho fela ha Jerusalema le tempele ea eona, joale ho latela e mabapi le boteng ba Jesu matleng a ’Muso, ’me qetellong e mabapi le bofelo ba tsamaiso eohle ea lintho.

Karabong ea hae e telele, Jesu o arabela likarolo tsohle tse tharo tsa potso ena. O fana ka pontšo e khethollang nako ea ha tsamaiso ea Sejode ea lintho e tla fela; empa o fana ka ho eketsehileng. Hape o fana ka pontšo e tla hlokomelisa barutuoa ba hae ba nakong e tlang hore ba phela nakong ea boteng ba hae le ea hore ba phela haufi le bofelo ba tsamaiso eohle ea lintho.

Ha lilemo li ntse li feta, baapostola ba hlokomela phethahatso ea boprofeta ba Jesu. E, tsona lintho tseo a ileng a li bolela esale pele li qala ho etsahala mehleng ea bona. Kahoo, Bakreste ba phelang lilemo tse 37 hamorao, ka 70 C.E., timetso ea tsamaiso ea Sejode le tempele ea eona ha e ba tsometse.

Leha ho le joalo, boteng ba Kreste le bofelo ba tsamaiso ea lintho ha bo etsahale ka 70 C.E. Boteng ba hae matleng a ’Muso bo etsahala morao haholo. Empa bo etsahala neng? Ho hlahloba boprofeta ba Jesu ho senola sena.

Jesu o bolela esale pele hore ho tla ba le “lintoa le litlaleho tsa lintoa.” O re, “Sechaba se tla tsohela sechaba matla,” ’me ho tla ba le likhaello tsa lijo, litšisinyeho tsa lefatše, le mafu a seoa. Barutuoa ba hae ba tla hlouoa le ho bolaoa. Baprofeta ba bohata ba tla hlaha ’me ba khelose ba bangata. Tlōlo ea molao e tla eketseha, ’me lerato la ba bangata le tla tapa. Ka nako e tšoanang, litaba tse molemo tsa ’Muso oa Molimo li tla boleloa e le bopaki ho lichaba tsohle.

Le hoja boprofeta ba Jesu bo bile le phethahatso e nyenyane pele ho timetso ea Jerusalema ka 70 C.E., phethahatso e khōlō ea bona e etsahala nakong ea boteng ba hae le bofelong ba tsamaiso ea lintho. Tlhahlobo e hlokolosi ea liketsahalo tsa lefatše ho tloha ka 1914 e senola hore boprofeta ba bohlokoa haholo ba Jesu bo ’nile ba phethahala ho tloha selemong seo.

Karolo e ’ngoe ea pontšo eo Jesu a fanang ka eona ke ho hlaha ha “ntho e nyonyehang e bakang timetso.” Ka 66 C.E. ntho ena e nyonyehang e ile ea hlaha ka sebōpeho sa “mabotho a bokaneng” a Roma a ileng a lika-liketsa Jerusalema le ho heletsa lerako la tempele ka ho le cheka ka tlaase. “Ntho e nyonyehang” e ile ea ema moo e neng e sa tšoanela.

Phethahatsong e khōlō ea pontšo, ntho e nyonyehang ke Selekane sa Lichaba le mohlahlami oa sona, Machaba a Kopaneng. Mokhatlo ona oa khotso ea lefatše o talingoa ke Bokreste-’mōtoana e le moemeli oa ’Muso oa Molimo. Ke ho nyonyehang hakaakang! Ka baka leo, ka mor’a nako, mebuso ea lipolotiki e amanang le Machaba a Kopaneng e tla fetohela Bokreste-’mōtoana (bo neng bo tšoantšetsoa ke Jerusalema) ’me e tla bo timetsa.

Kahoo Jesu o ile a bolela esale pele: “Ho tla ba le matšoenyeho a maholo ka mokhoa oo ho seng mohla ho kileng ha etsahala haesale lefatše le theoa ho fihlela joale, che, leha e le hore a tla etsahala hape.” Le hoja ho timetsoa ha Jerusalema ka 70 C.E. ka sebele e ne e le matšoenyeho a maholo, ka ba fetang millione bao ho tlalehoang hore ba ile ba bolaoa, e ne e se matšoenyeho a maholo ho feta Moroallo oa lefatše lohle oa mehleng ea Noe. Ka hona phethahatso e khōlō ea boprofeta bona ba Jesu ke hona e tla phethahala.

Ho ba le Kholiseho Mehleng ea Qetello

Ha Labobeli, la 11 Nisane, le ea malikelong, Jesu o ntšetsa pele puisano le baapostola ba hae mabapi le pontšo ea boteng ba hae matleng a ’Muso le bofelo ba tsamaiso ea lintho. O ba lemosa ka ho matha ka mor’a bo-Kreste ba bohata. O re ho tla etsoa boiteko, ba ‘ho thetsa le bona bakhethoa, hola ke ntho e ka etsoang.’ Empa, joaloka lintsu tse bonelang hōle, bakhethoa bana ba tla bokana moo lijo tsa ’nete tsa moea li fumanoang teng, ke hore, ho Kreste oa ’nete botenng ba hae bo sa bonahaleng. Ba ke ke ba khelosoa eaba ba bokana ’moho ho Kreste oa bohata.

Bo-Kreste ba bohata ba ka hlaha feela ka tsela e bonahalang. Ka ho fapaneng, boteng ba Jesu bo ke ke ba bonahala. Bo tla etsahala nakong e tšosang historing ea batho, joalokaha Jesu a re: “Letsatsi le tla fifala, khoeli e ke ke ea khanya.” E, ena e tla ba nako e lefifi ka ho fetisisa ea boteng ba batho. Ho tla ba joalokaha eka letsatsi le fifetse motšehare, le joaloka hoja khoeli e ne e sa fane ka leseli la eona bosiu.

Jesu o tsoela pele: “Tse matla tsa leholimo li tla sisinyeha.” Ka hona o bontša hore maholimo a sebele a tla bonahala ka tsela e lelekelang ho hong. Maholimo e ke ke ea e-ba sebaka se laoloang ke linonyana feela, empa a tla tlala lifofane tsa ntoa, lirokete, le lifofa-sebakeng tse romellang boitsebiso bo tsoang sebakeng. Tšabo le pefo li tla feta ntho leha e le efe eo ho kileng ha fetoa ho eona historing e fetileng ea batho.

Ka baka leo, Jesu o re, “lichaba li tla tsieleha, li be le matsoalo, leoatle le ntse le luma le maqhubu a lona. Batho ba tla neela moea ke tšabo le ke tebello ea tse tla tla lefatšeng.” Joalokaha Jesu a bolela, ka sebele nako ena e lefifi ka ho fetisisa ea ho ba teng ha batho e tla lebisa nakong ea ha, “pontšo ea Mor’a Motho e tla hlaha leholimong, merabe eohle ea lefatše e tla ikotla lifuba ka lillo.”—TLP.

Empa hase bohle ba tla beng ba lla ha ‘Mor’a motho a e-tla ka matla’ ho felisa tsamaiso ena ea lintho e khopo. “Bakhethoa,” ba 144 000 ba tla kopanela le Kreste ’Musong oa hae oa leholimo, ba ke ke ba lla, le eona metsoalle ea bona, eo pejana Jesu a ileng a e bitsa “linku tse ling” tsa hae, e ke ke ea lla. Ho sa tsotellehe ho phela nakong e lefifi ka ho fetisisa historing ea batho, bana ba arabela khothatsong ena ea Jesu: “Etlare ha tseo li qala ho hlaha, emisang lihlooho, ’me le lelale holimo, hobane topollo ea lōna e tla be e atametse.”

E le hore barutuoa ba hae ba neng ba tla be ba phela mehleng ea qetello ba ka hlokomela ho atamela ha bofelo, Jesu o fana ka setšoantšo sena: “Bonang sefate sa feiga le lifate tsohle. Ha le li bona li se li hlahisa mahlaku, le ee le tsebe le lōna hoba lehlabula le haufi. Ka mokhoa o joalo le lōna, etlare ha le bona tseo li hlaha, le tsebe hoba ’muso oa Molimo o haufi. Ka ’nete ke re ho lōna: Moloko ona o ke ke oa feta, tseo li e-so ho hlahe.”

Ka hona, ha barutuoa ba hae ba bona litšobotsi tse ngata tse fapaneng tsa pontšo li phethahatsoa, ba lokela ho hlokomela hore bofelo ba tsamaiso ea lintho bo haufi le hore ’Muso oa Molimo o tla tloha o felisa bokhopo bohle. Ha e le hantle, bofelo bo tla etsahala nakong ea bophelo ba batho ba bonang phethahatso ea lintho tsohle tseo Jesu a li bolelang esale pele! Ha a eletsa barutuoa ba neng ba tla be ba phela nakong ea mehla ea qetello e mahlonoko, Jesu o re:

“Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehloho; hobane le tla oela ba ahileng lefatšeng lohle joalo ka sefi. Falimehang ke hona, ’me le rapele ka mehla, le tle le neoe tokelo ea ho phonyoha ho tseo tsohle tse tla etsahala, le ea ho ema pel’a Mor’a motho.”

Baroetsana ba Bohlale le ba Maoatla

Jesu o ne a ntse a arabela kōpo ea baapostola ba hae ea pontšo ea boteng ba hae matleng a ’Muso. Joale o fana ka litšobotsi tse eketsehileng tsa pontšo ka lipapiso tse tharo, kapa litšoantšo.

Phethahatso ea setšoantšo ka seng e ne e tla bonoa ke ba phelang nakong ea boteng ba hae. O kenyelletsa sa pele ka mantsoe ana: “Mohlang oo, ’muso oa leholimo o tla tšoana le baroetsana ba leshome ba nkileng lilampi tsa bona, ba tsoile ho khahlanyetsa monyali. Ba bahlano ho bona e be e le ba bohlale, ba bahlano ba bang e be e le maoatla.”

Ka polelo e reng “’muso oa leholimo o tla tšoana le baroetsana ba leshome,” Jesu ha a bolele hore halofo ea ba ruang lefa la ’Muso oa leholimo ke batho ba maoatla ’me halofo e ’ngoe ke ea ba bohlale! Che, empa o bolela hore mabapi le ’Muso oa maholimo, ho na le tšobotsi e ’ngoe e itseng e tšoanang le ena, kapa hore litaba tse mabapi le ’Muso li tla tšoana le ntho e ’ngoe e itseng.

Baroetsana ba leshome ba tšoantšetsa Bakreste bohle ba mocheng kapa ba ipolelang hore ba mocheng oa ho fumana ’Muso oa leholimo. Ke ka Pentekonta ea 33 C.E. ha phutheho ea Bokreste e tšepisoa lenyalo ke Monyali ea tsositsoeng, ea tlotlisitsoeng, Jesu Kreste. Empa lenyalo le ne le tla etsahala leholimong nakong e ’ngoe e tlang e sa boleloang.

Setšoantšong, baroetsana ba leshome ba tsoa ka morero oa ho khahlanyetsa monyali le ho kenella mokolokong oa lenyalo. Ha a fihla, ba tla bonesa tsela eo mokoloko o tsamaeang ho eona ka lilampi tsa bona, ka hona ba tla mo hlompha ha a tlisa monyaluoa oa hae tlung eo a e lokiselitsoeng. Leha ho le joalo, Jesu oa hlalosa: “Maoatla ha a nka lilampi tsa ’ona, ha a ka a li nkela oli. Empa ba bohlale ba nka oli lipitseng tsa bona, hammoho le lilampi tsa bona. Joale kahobane monyali a liehile, ba otsela bohle, ba robala.”

Ho lieha ho hoholo ha monyali ho bontša hore boteng ba Kreste e le Morena ea busang bo tla etsahala nakong e tlang e sa ntsaneng e le hōle. Qetellong o tla teroneng ea hae ka selemo sa 1914. Nakong ea bosiu bo bolelele bo etellang selemo seo pele, baroetsana bohle baa robala. Empa ha ba nyatsoe ka baka la sena. Ho nyatsoa ha baroetsana ba maoatla ke ka baka la ho hloka ha bona oli bakeng sa lipitsa tsa bona. Jesu o hlalosa kamoo baroetsana ba tsohang ka teng pele monyali a fihla: “Eare bosiu bo boholo, ha etsoa mohoo, ha thoe: Bonang, monyali ke eo; tsoang, le mo khahlanyetse. Eaba baroetsana bao kaofela ba tsoha, ba lokisa lilampi tsa bona. Maoatla a re ho ba bohlale: Le re qhatsetse oli, hobane lilampi tsa rōna lia tima. Empa ba bohlale ba fetola, ba re: Che; e ke ke ea lekana rōna le lōna; e-eang ho bao e rekoang ho bona, le ithekele.”

Oli e tšoantšetsa se bolokang Bakreste ba ’nete ba khanya joaloka maseli. Sena ke Lentsoe la Molimo le bululetsoeng, leo Bakreste ba le fupereng ka thata, hammoho le moea o halalelang, o ba thusang ho utloisisa Lentsoe leo. Oli ea moea e nolofalletsa baroetsana ba bohlale ho khantša leseli ha ba amohela monyali mokolokong o eang moketeng oa lenyalo. Empa sehlopha sa baroetsana ba maoatla ha se na oli e hlokahalang ea moea ka hare ho sona le ka lipitseng tsa sona. Kahoo Jesu o hlalosa se etsahalang:

“Ba re [baroetsana ba maoatla] ba sa ea ithekela [oli], monyali a fihla, ’me ba itokisitseng ba kena le eena bohaling, ’me ha koaloa monyako. Baroetsana ba bang ba ntoo fihla, ba re: Morena, Morena, re bulele! Empa a ba fetola, a re: Ka ’nete ke re ho lōna: Ha ke le tsebe.”

Ka mor’a hore Kreste a fihle ’Musong oa hae oa leholimo, sehlopha sa baroetsana ba bohlale sa Bakreste ba ’nete ba tlotsitsoeng se ile sa tsoha ho falimehela tokelo ea sona ea ho khantša leseli lefatšeng lena le lefifing ho rorisa Monyali ea khutlileng. Empa ba tšoantšetsoang ke baroetsana ba maoatla ba ne ba sa itokisetsa ho fana ka thoriso ena e mo khahlanyetsang. Kahoo ha nako e fihla, Kreste ha a ba bulele monyako ho kena moketeng oa lenyalo leholimong. O ba siea ka ntle lefifing le letšo ka ho fetisisa la bosiu ba lefatše, hore ba timele hammoho le basebetsi ba bang kaofela ba ho hloka molao. Jesu o qetella ka ho re: “Lebelang ke hona; kahobane ha le tsebe letsatsi le hora.”

Setšoantšo sa Litalenta

Jesu o ntšetsa pele puisano le baapostola ba hae Thabeng ea Mehloare ka ho ba bolella setšoantšo se seng, e leng sa bobeli letotong la tse tharo. Matsatsi a seng makae pejana, ha a ntse a le Jeriko, o ile a bolela setšoantšo sa limina ho bontša hore nako ea ho tla ha ’Muso e ne e sa ntsane e le hōle. Setšoantšo seo a se phetang hona joale, le hoja se e-na le litšobotsi tse ngata tse tšoanang, se hlalosa ka phethahatso ea sona mesebetsi e etsoang nakong ea boteng ba Kreste matleng a ’Muso. Se bontša hore barutuoa ba hae ba tlameha ho sebetsa ha ba sa ntsane ba le lefatšeng ho eketsa “letlotlo la hae.”

Jesu oa qala: “Hobane hoo [ke hore, maemo a amanang le ’Muso] ho joale ka motho ea etang, eo eitseng hobane a bitse makhoba a hae, a a neela letlotlo la hae.” Jesu ke monna eo, pele a etela hōle leholimong, a nehang makhoba a hae—barutuoa ba mocheng oa ho fumana ’Muso oa leholimo—letlotlo la hae. Letlotlo lena hase maruo a bonahalang empa le emela tšimo e lenngoeng eo a entseng hore e be le matla a ho hlahisa barutuoa ba eketsehileng.

Jesu o beha letlotlo la hae matsohong a makhoba a hae nakoana pele a nyolohela leholimong. O etsa seo joang? Ka ho a laela hore a tsoele pele ho sebetsa tšimong e lenngoeng ka ho bolela molaetsa oa ’Muso ho isa likarolong tse hōle ka ho fetisisa tsa lefatše. Ho joalokaha Jesu a bolela: “A nea e mong litalenta tse hlano, e mong a mo nea li le peli, e mong a neoa e le ’ngoe; e mong le e mong a neoa ka matla a hae; eaba oa tsamaea.”

Ka hona litalenta tse robeli—letlotlo la Kreste—li abjoa ho latela matla, kapa menyetla ea moea, ea makhoba. Makhoba a emela lihlopha tsa barutuoa. Lekholong la pele la lilemo, sehlopha se ileng sa amohela litalenta tse hlano ka ho hlakileng se ne se akarelletsa baapostola. Jesu o tsoela pele ho bolela hore makhoba a amohetseng litalenta tse hlano le tse peli kaofela a ile a li eketsa habeli ka ho bolela ha ’ona ka ’Muso le ho etsa barutuoa. Leha ho le joalo, lekhoba le amohetseng talenta e le ’ngoe le ile la e pata mobung.

Jesu o tsoela pele: “Tšiu tse ngata ha li fetile, monghali oa makhoba ao a fihla, ’me a hlahloba litaba le ’ona.” E bile feela lekholong la bo20 la lilemo, lilemo tse ka bang 1 900 hamorao, ha Kreste a khutla ho tla hlahloba litaba, ka hona, ka sebele e bile ‘ha litšiu tse ngata li fetile.’ Joale Jesu oa hlalosa:

“Eaba le nkileng litalenta tse hlano lea atamela, la hlahisa tse ling tse hlano, la re, ‘Monghali, u no u ’neile litalenta tse hlano; bona, ke ruile tse ling tse hlano ka holim’a tsona.’ Monghali oa hae a re ho lona: ‘Ke hantle, lekhoba le molemo, le khabane! U bile khabane linthong li se kae, joale ke tla u bea holim’a tse ngata. Kena thabong ea morena oa hao.’” Lekhoba le amohetseng litalenta tse peli ka ho tšoanang le ile la eketsa litalenta tsa lona habeli, ’me le ile la amohela pabatso le moputso o tšoanang.

Leha ho le joalo, makhoba ana a tšepahalang a kena thabong ea Monghali oa ’ona joang? Thabo ea Monghali oa ’ona, Jesu Kreste, e bile ea ho amohela ’Muso ha a ea hōle ho Ntat’ae leholimong. Ha e le makhoba a tšepahalang a mehleng ea kajeno, a fumana thabo e khōlō ka hore boikarabelo bo eketsehileng ba ’Muso bo behoe matsohong a ’ona, ’me ha a qeta tsela ea ’ona ea lefatšeng, a tla fumana thabo e khōlō ka ho fetisisa ea ho tsosetsoa ’Musong oa leholimo. Empa ho thoe’ng ka lekhoba la boraro?

Lekhoba lena lea tletleba: “Morena, ke u tsebile hobane u motho ea thata. Ke tšabile ke hona, ’me ke ile ka pata talenta ea hao mobung; bona, e sa le ena ntho ea hao.” Lekhoba lena le hanne ka boomo ho sebetsa tšimong e lenngoeng ka ho bolela le ho etsa barutuoa. Kahoo monghali o le bitsa “le lonya, le sebolu” ’me o phatlalatsa kahlolo: “Le amoheng talenta . . . Lahlelang lekhoba le sebolu mafifing a kantle, moo lillo li tla ba teng le litsikitlano tsa meno.” Ba sehlopha sa lekhoba le khopo, ba lahletsoeng ka ntle, ba amohuoe thabo leha e le efe ea moea.

Sena se fana ka thuto e tiileng bakeng sa bohle ba ipolelang e le balateli ba Kreste. Ba tlameha ho sebeletsa ho eketsa letlotlo la Monghali oa bona oa leholimo ka ho kopanela ka botlalo mosebetsing oa ho bolela hore ba tle ba thabele pabatso le moputso tse tsoang ho eena le hore ba tle ba qobe le ho lahleloa lefifing le ka ntle le timetsong ea ho qetela. Na u mafolo-folo tšobotsing ee?

Ha Kreste a Fihla Matleng a ’Muso

Jesu o sa ntsane a e-na le baapostola ba hae Thabeng ea Mehloare. Ha a arabela kōpo ea bona ea pontšo ea boteng ba hae le bofelo ba tsamaiso ea lintho, joale o ba bolella setšoantšo sa ho qetela letotong la tse tharo. Jesu o qala ka ho re: “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae.”

Batho ba ke ke ba bona mangeloi khanyeng ea ’ona ea leholimo. Kahoo ho fihla ha Mor’a motho, Jesu Kreste, a e-na le mangeloi e tlameha ho ba ho sa bonahaleng mahlong a batho. Ho fihla hoo ho etsahala ka selemo sa 1914. Empa ke ka morero ofe? Jesu oa hlalosa: “Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. O tla bea linku ka letsohong la hae le letona, a bee lipōli ho le letšehali.”

Ha a hlalosa se tla etsahala ho ba khethetsoeng ka lehlakoreng la ba amoheloang, Jesu o re: “Ke moo Morena a tla bolella ba ka letsohong la hae le letona, a re: Tlong, lōna ba hlohonolofalitsoeng ke Ntate, le amohele ’muso oo le o lokiselitsoeng ha e sa le lefatše le theoa.” Linku tsa setšoantšo sena ha li na ho busa le Kreste leholimong empa li tla rua lefa la ’Muso ka kutloisiso ea ho ba bafo ba oona ba lefatšeng. ‘Ho theoa ha lefatše’ ho etsahetse ha Adama le Eva ba qala ho ba le bana ba neng ba ka rua molemo tokisetsong ea Molimo ea ho lopolla batho.

Empa ke hobane’ng ha linku li khetheloa ka letsohong le letona la Morena la ba amoheloang? Morena oa arabela: “Hobane ke na be ke lapile, ’me le kile la ’nea ka ja; ke na be ke nyoriloe, ’me le kile la ’nea ka noa; ke na be ke le moeti, ’me la nkenya tlung ha lōna; ke na be ke hlobotse, ’me la nkapesa; ke na be ke baba, ’me le tlile ho mpona; ke na be ke le teronkong, ’me la tla ho ’na.”

Kaha linku li lefatšeng, li batla ho tseba hore na ke joang li etselitseng Morena oa tsona oa leholimo liketso tse ntle hakaalo. Lia botsa: “Morena, ke neneng re kileng ra u bona u lapile, ’me ra u nea ua ja; leha u nyoriloe, ’me ra u nea ua noa? Ke neng re u boneng u le moeti, ’me re kileng ra u kenya tlung ha rōna; leha u hlobotse, ’me ra u apesa? Ke neng re u boneng u baba, mohlomong u le teronkong, ’me ra ea ho uena?”

Morena oa arabela: “Ka ’nete kea le bolella, ke re: Tseo le li entseng e monyenyane ho baena ba ka, le li entse ’na.” Baena ba Kreste ke ba setseng lefatšeng ba sehlopha sa ba 144 000 ba tla busa le eena leholimong. ’Me Jesu o re ho ba etsa hantle ho tšoana le ho etsa eena hantle.

Ka mor’a moo, Morena o bua le lipoli: “Tlohang ho ’na, lōna ba rohakiloeng, le ee mollong o sa feleng, o lokiselitsoeng Diabolose le mangeloi a hae. Hobane ke na be ke lapile, ’me ha lea ka la ’nea ka ja; ke na be ke nyoriloe, ’me ha lea ka la ’nea ka noa; ke na be ke le moeti, ’me ha lea ka la nkenya tlung ha lōna; ke na be ke hlobotse, ’me ha lea ka la nkapesa; ke na be ke le pabong, le teronkong, ’me ha lea ka la tla mpona.”

Leha ho le joalo, lipoli lia ipelaetsa: “Morena, ke neng re kileng ra u bona u lapile, leha u nyoriloe, leha u le moeti, leha u hlobotse, leha u baba, leha u le teronkong, ’me re sa ka ra u thusa?” Lipoli li ahloloa haboima motheong o tšoanang le oo linku li ahloloang hamolemo ho oona. Jesu oa arabela: “Ereka ha le sa ka la etsa joalo ho e mong oa ba banyenyane bana [ho baena ba ka], ha lea ka la nketsa joalo le ’na.”

Kahoo boteng ba Kreste matleng a ’Muso, pejana feela ho bofelo ba tsamaiso ena ea lintho e khopo mahlomoleng a maholo, e tla ba nako ea kahlolo. Lipoli li “tla ea bohlokong [“timetsong,” NW] bo sa feleng, empa ba lokileng [linku] ba tla ea bophelong bo sa feleng.” Mattheu 24:2–25:46; 13:40, 49; Mareka 13:3-37; Luka 21:7-36; 19:43, 44; 17:20-30; 2 Timothea 3:1-5; Johanne 10:16; Tšenolo 14:1-3.

▪ Ke eng se susumelletsang potso ea baapostola, empa ho bonahala ba hopotse eng hape?

▪ Ke karolo efe ea boprofeta ba Jesu e phethahetseng ka 70 C.E., empa ke eng e sa kang ea etsahala ka nako eo?

▪ Ke neng boprofeta ba Jesu bo ileng ba phethahala ka lekhetlo la pele, empa bo ba le phethahatso e khōlō neng?

▪ Ntho e nyonyehang ke eng phethahatsong ea eona ea pele le ea ho qetela?

▪ Ke hobane’ng ha matšoenyeho a maholo a sa ka a e-ba le phethahatso ea ’ona ea ho qetela ka ho timetsoa ha Jerusalema?

▪ Ke maemo afe a lefatše a tšoaeang boteng ba Kreste?

▪ “Merabe eohle ea lefatše e tla ikotla lifuba ka lillo” neng, empa balateli ba Kreste ba tla be ba ntse ba etsa’ng?

▪ Jesu o fana ka setšoantšo sefe ho thusa barutuoa ba hae ba nakong e tlang ho lemoha ha bofelo bo se bo atametse?

▪ Jesu o fana ka keletso efe ho ba bang ba barutuoa ba hae ba neng ba tla be ba phela mehleng ea qetello?

▪ Ke bo-mang ba tšoantšetsoang ke baroetsana ba leshome?

▪ Phutheho ea Bokreste e ile ea tšepisoa lenyalo ke monyali neng, empa monyali o fihla neng ho tla nka monyaluoa oa hae ho ea moketeng oa lenyalo?

▪ Oli e emela eng, ’me ho ba le eona ho etsa hore baroetsana ba bohlale ba nolofalloe ho etsa eng?

▪ Mokete oa lenyalo o tšoareloa hokae?

▪ Ke moputso ofe o moholo oo baroetsana ba maoatla ba lahleheloang ke oona, ’me qetello ea bona ke efe?

▪ Setšoantšo sa litalenta se ruta thuto efe?

▪ Makhoba ke bo-mang, ’me letlotlo le behiloeng matsohong a ’ona ke eng?

▪ Monghali o khutla neng ho tla hlahloba litaba, ’me o fumana eng?

▪ Thabo eo makhoba a tšepahalang a kenang ho eona ke efe, ’me ho etsahala’ng ka lekhoba la boraro, e leng le khopo?

▪ Ke hobane’ng ha boteng ba Kreste e tlameha ho ba bo sa bonahaleng, ’me ke mosebetsi ofe oo a o etsang nakong eo?

▪ Ke ka kutloisiso efe linku li amohelang, ’Muso?

▪ ‘Ho theoa ha lefatše’ ho etsahetse neng?

▪ Ke motheo ofe oo batho ba ahloloang e le linku kapa e le lipoli ka oona?

Khaolo ea 112

Paseka ea ho Qetela ea Jesu e Haufi

HA LABOBELI, la 11 Nisane, le ea malikelong, Jesu o qetella ho ruta baapostola Thabeng ea Mehloare. E bile letsatsi le maphathe-phathe le le boima hakaakang! Hona joale, mohlomong ha a khutlela Bethania hore a robaletse teng, o bolella baapostola ba hae: “Lea tseba hore kamora’ matsatsi a mabeli e tla ba Paseka, ’me Mor’a Motho o tla neeloa ho thakhisoa.”—TLP.