Na U Kile Ua Sebeletsa? Na U ka Sebeletsa Hape?
NA U kile ua ba le boikarabelo bo itseng ka phuthehong ea Bokreste? Mohlomong u ne u le mohlanka ea sebeletsang kapa moholo. Mohlomong u ne u le tšebeletsong e itseng ea nako e tletseng. Ha ho pelaelo hore kabelo eo u neng u e etsa e ne e u thabisa ebile e u khotsofatsa haholo, leha ho le joalo ka mabaka a itseng u ile ua tlameha ho e tlohela.
Mohlomong u ile ua tlohela kabelo ea hao e le hore u ka hlokomela ba lelapa la hao. Kapa e ka ’na eaba e ne e le ka lebaka la botsofali kapa ho fokolloa ke bophelo. Hase hore liqeto tseo li bontša hore u hlōlehile. (1 Tim. 5:8) Lekholong la pele la lilemo, Filipi e ne e le moromuoa, empa hamorao o ile a lula Cesarea, moo a neng a hlokomela ba lelapa la hae. (Lik. 21:8, 9) Ha Morena Davida oa Iseraele ea boholo-holo a se a tsofetse, o ile a lokisetsa hore mora oa hae Solomone e be mohlahlami teroneng ea hae. (1 Mar. 1:1, 32-35) Ho ntse ho le joalo, Jehova o ne a ntse a rata Filipi le Davida a bile a ba ananela ’me ba ntse ba hlomphuoa ho fihlela kajeno.
Ka lehlakoreng le leng, e ka ’na eaba u ile ua tlohelisoa kabelo ea hao. Na e ne e le ka lebaka la boitšoaro bo seng botle? Kapa mohlomong e ne e le ka lebaka la mathata a lelapa? (1 Tim. 3:2, 4, 10, 12) Mohlomong u ne u sa lumellane le qeto eo ’me le hona joale e sa ntse e u khopisitse.
U ka Hahamalla ho Sebeletsa Hape
Na ha u lahlehetsoe ke boikarabelo ka phuthehong ho bolela hore ha u sa tla bo fumana hape? Hangata ha ho joalo. Leha ho le joalo, e le hore u tle u sebeletse hape, u lokela ho ikemisetsa ho hahamalla ho sebeletsa. (1 Tim. 3:1) Empa ke hobane’ng ha u lokela ho ikemisetsa ho etsa joalo? Ka lebaka le tšoanang le leo u ileng ua inehela ho Molimo ka lona—hobane u rata Jehova le ba mo sebeletsang. Haeba u ikemiselitse ho bontša lerato leo ka hore u sebeletse hape, sena se tla etsa hore Jehova a sebelise seo u ithutileng sona pele u lahleheloa ke boikarabelo boo le ka mor’a hore bo u lahlehele.
Ka mor’a hore Jehova ka nepo a khaotse kamano ea hae e khethehileng le sechaba sa Iseraele, hopola seo a ileng a se tiisetsa sona. Lentsoe la hae le re: “Ke ’na Jehova; ha kea fetoha. Lōna le bara ba Jakobo; ha le e-s’o fele.” (Mal. 3:6) Jehova o ne a rata Baiseraele a bile a batla ho ba sebelisa haholoanyane. Le uena o batla ho u sebelisa nakong e tlang. Ke eng seo u ka se etsang hajoale? Ho ntšetsa pele mosebetsi oa puso ea Molimo ha hoa itšetleha hakaalo ka bokhoni ba motho empa ho itšetlehile haholo ka hore a be le kamano e ntle le Jehova. Kahoo, ha u sa ntse u se na boikarabelo bo itseng ka phuthehong, tsepamisa kelello ea hao tabeng ea ho tiisa kamano ea hao le Jehova.
E le hore u “be matla” tumelong, u tlameha ho ‘batla Jehova le matla a hae.’ (1 Bakor. 16:13; Pes. 105:4) U ka etsa sena ka ho rapela ho tsoa botebong ba pelo. Ha u hlalosetsa Jehova maemo a hao, mo tšollele maikutlo a hao ’me u kōpe hore a u fe moea oa hae. Ha u etsa sena, u tla atamela ho Jehova ’me u tla tiea. (Pes. 62:8; Bafil. 4:6, 13) Tsela e ’ngoe eo u ka tiisang kamano ea hao le Molimo ka eona ke ka ho ntlafatsa tsela eo u ithutang Lentsoe la Molimo ka eona. Kaha hajoale ha u e-s’o be le boikarabelo bo bongata, u ka ’na ua khona ho eketsa thuto ea botho le ea lelapa haholoanyane, mohlomong ua tsosolosa kemiso eo ho neng ho le thata ho e khomarela.
Ha e le hantle, u sa ntse u le Paki ea Jehova. (Esa. 43:10-12) Tlotla e khōlō ka ho fetisisa eo re ka bang le eona ke ea ho ba “basebetsi-’moho le Molimo.” (1 Bakor. 3:9) Tsela e molemo ka ho fetisisa eo ka eona u ka tiisang kamano ea hao le Jehova le ea bao u sebetsang le bona tšimong, ke ka ho ikakhela ka setotsoana tšebeletsong ea tšimo.
Ho Laola Maikutlo a Hao
Ho lahleheloa ke boikarabelo ba hao ho ka ’na ha etsa hore u ikoahlaee kapa u ikutloe u soabile. U ka ’na ua batla ho ikemela. Leha ho le joalo, u tla ikutloa joang haeba barab’abo rōna ba ikarabellang ba ile ba mamela taba ea hao empa ba ntse ba nahana hore u lokela ho tlohela boikarabelo ba hao? Taba eo e ka ’na ea lula e sa u tšoara hantle, ebe e u sitisa hore u hahamalle ho sebeletsa kapa ea ba ea u thatafalletsa hore u ithute ho hong ho se etsahetseng. A re ke re hlahlobe hore na se ileng sa etsahalla Jobo, Manase le Josefa se ka u thusa joang hore u se ke ua nyahama.
Jobo o ne a ile a emela batho ka pel’a Jehova ’me e ne e bile moholo le moahloli mehleng ea bapatriareka. (Jobo 1:5; 29:7-17, 21-25) Eare nakong eo lintho li neng li mo tsamaela hantle bophelong, a be a senyeheloa ke leruo, bana ba hae ba shoa ’me le eena a kula. Ho phaella moo, botumo ba hae bo botle bathong bo ile ba fela. Jobo o ile a re: “Ba ntšehile, ba banyenyane ho ’na ka matsatsi.”—Jobo 30:1.
Jobo o ne a lumela hore ha a na molato ka ho feletseng ’me o ne a batla ho ipuella ka pel’a Molimo. (Jobo 13:15) Leha ho le joalo, Jobo o ne a ikemiselitse ho letela Jehova, ’me o ile a hlohonolofatsoa ka lebaka la seo. O ile a hlokomela hore o ne a hloka ho khalemeloa, haholo-holo ka lebaka la tsela eo a ileng a bua ka eona ha a ne a lekoa. (Jobo 40:6-8; 42:3, 6) Boikokobetso ba Jobo bo ile ba etsa hore qetellong Molimo a mo hlohonolofatse haholo.—Jobo 42:10-13.
Haeba u ne u lahlehetsoe ke boikarabelo ba hao ka lebaka la phoso eo u neng u e entse, u ka ’na ua ipotsa hore na ebe Jehova le Bakreste-’moho le uena ba tla ke ba u tšoarele e le kannete ba be ba u leballe. Ak’u nahane ka mohlala oa Morena Manase oa Juda. O ile “a etsa se sebe mahlong a Jehova ka tekanyo e khōlō, ho mo siteloa.” (2 Mar. 21:6) Ho sa tsotellehe seo, Manase o ile a shoa a ntse a tšepahala e le morena. Ho tlile joang?
Qetellong Manase o ile a amohela khalemelo. Ka mor’a hore a iphapanyetse litemoso, Jehova o ile a etsa hore Baassyria ba mo hlasele, ’me ba ile ba mo tlama eaba ba mo isa kholehong hōle koana Babylona. Ha Manase a le moo, o ile “a nolofatsa sefahleho sa Jehova Molimo oa hae ’me a ’na a ikokobetsa haholo ka lebaka la Molimo oa baholo-holo ba hae. A ’na a Mo rapela.” Manase o ile a paka ka liketso hore o bakile ho tsoa pelong ’me o ile a tšoareloa.—2 Likron. 33:12, 13.
Ke ka seoelo boikarabelo bo ka khutlisoang ka nako le motsotso. Leha ho le joalo, ha nako e ntse e e-ea, u ka ’na ua fuoa boikarabelonyana bo itseng. Ha u bo amohela ebile u bo phetha ka tsela e tsoileng matsoho, hangata sena se ka ’na sa etsa hore u fuoe boikarabelo bo bong. Sena hase bolele hore lintho li tla ba bonolo. Ho ka ’na ha e-ba le mathata mona le mane. Ho sa tsotellehe seo, boikemisetso le mamello li tla tsoala katleho.
Nahana ka mohlala oa Josefa, mora oa Jakobo. Ha Josefa a le lilemo li 17, ka lonya banab’abo ba ile ba mo rekisa hore e be lekhoba. (Gen. 37:2, 26-28) Ho hang o ne a sa lebella hore banab’abo ba ka mo tšoara ka tsela ena. Leha ho le joalo, o ne a ikemiselitse ho mamella maemo ao, ’me Jehova o ile a mo hlohonolofatsa eaba o “laola ntlo ea mong’a hae.” (Gen. 39:2) Hamorao, Josefa o ile a kenngoa chankaneng. Empa o ile a lula a tšepahala ’me Jehova o ile a ba le eena, hoo qetellong litaba tsa chankana li ileng tsa behoa matsohong a hae.—Gen. 39:21-23.
Josefa o ne a sa tsebe hore lintho tsena li ne li tla ba le molemo o itseng nakong e tlang. Eena o ile a tsoela pele feela a etsa seo a ka se khonang. Ka tsela eo Jehova o ile a mo sebelisa hore a ntšetse pele lesika la Peō e tšepisitsoeng. (Gen. 3:15; 45:5-8) Le hoja ho se le ea mong oa rōna ea ka lebellang ho phetha karolo ea bohlokoa e tšoanang le eo Josefa a ileng a e phetha, tlaleho ena e bululetsoeng e bontša hore ka tsela e itseng likabelo tseo batho ba Jehova ba li fumanang li tsoa ho Eena. Etsisa Josefa ’me u ipulele menyetla ea hore Jehova a u sebelise.
Ithute Linthong Tse Bohloko Tse Etsahetseng
Jobo, Manase le Josefa ba ile ba hlaheloa ke lintho tse bohloko. Kaofela ha bona ba ile ba amohela seo Jehova a neng a lumeletse hore se ba hlahele, ’me e mong le e mong oa bona o ile a ithuta thuto ea bohlokoa. Uena u ka ithuta eng?
Leka ho bona hore na ebe Jehova o u ruta eng. Ha Jobo a ntse a loana ka thata hore a se ke a felloa ke tšepo, o ile a qetella a icheba boeena eaba o hlokomoloha lintho tsa bohlokoa. Leha ho le joalo, ka mor’a hore ka lerato Jehova a mo khalemele, o ile a boela a ba le pono e nepahetseng, eaba o re: “Ke buile, empa ke ne ke sa utloisise.” (Jobo 42:3) Haeba u utloisitsoe bohloko ke hore u lahlehetsoe ke boikarabelo ba hao, ‘u se ke ua inahana haholo ho feta kamoo ho hlokahalang ho nahana, empa u nahane e le hore u be le kelello e hlaphohileng.’ (Bar. 12:3) E ka ’na eaba Jehova o leka ho u koetlisa ka tsela eo u sa e utloisiseng ka botlalo hajoale.
Amohela khalemelo. Mohlomong qalong Manase o ne a nahana hore o ne a sa tšoaneloe ke khalemelo e boima joaloka eo a ileng a e fuoa. Leha ho le joalo, o ile a e amohela, a baka ’me a furalla phoso ea hae. Ho sa tsotellehe hore na u ikutloa joang ka khalemelo eo u e filoeng, ‘ikokobetse mahlong a Jehova, ’me o tla u phahamisa.’—1 Pet. 5:6; Jak. 4:10.
E-ba le mamello le boikemisetso. Se ileng sa etsahalla Josefa se ka be se entse hore habonolo feela a lule a e-na le maikutlo a lehloeo le boiphetetso. Ho e-na le hoo, o ile a ba le kutloisiso le mohau. (Gen. 50:15-21) Haeba ho na le se u utloisitseng bohloko, e-ba le mamello. Ikemisetse hore Jehova a u koetlise.
Na u kile ua ba le boikarabelo bo itseng ka phuthehong ea Bokreste? Fa Jehova monyetla oa hore a u fe boikarabelo nakong e tlang. Tiisa kamano ea hao le Jehova. Laola maikutlo a hao ka ho ba le mamello le boikokobetso. Ikemisetse ho amohela likabelo leha e le life tseo u ka li fuoang. Kholiseha hore “Jehova a ke ke a hanela ba tsamaeang ka ho hloka molato ka ntho leha e le efe e ntle.”—Pes. 84:11.
[Ntlha e Qolotsoeng e leqepheng la 30]
Rapela ho tsoa botebong ba pelo e le hore u be matla tumelong
[Setšoantšo se leqepheng la 31]
Tsela e molemo ka ho fetisisa eo ka eona u ka tiisang kamano ea hao le Jehova ke ka ho ikakhela ka setotsoana tšebeletsong ea tšimo
[Setšoantšo se leqepheng la 32]
Fa Jehova monyetla oa hore a u fe boikarabelo nakong e tlang