Khaolo ea 7

“Le Nahane ka Hloko ka ea Mameletseng”

1-3. (a) Jesu o utloa bohloko bo tebileng hakae ha a le serapeng sa Gethesemane, hona o utloisoa bohloko ke eng? (b) Ho ka thoe’ng ka mohlala oa Jesu oa ho mamella, hona ho hlaha lipotso life?

JESU o tlas’a khatello e matla. Ha ho mohla a kileng a ba boemong bo sithabetsang kelellong le maikutlong hakana. O saletsoe ke lihora feela a phela lefatšeng. O ea le baapostola ba hae sebakeng seo ba tloaetseng ho ea sona, e leng serapeng sa Gethesemane. O ’nile a kopana le bona ka makhetlo sebakeng seo. Empa bosiung bona, o hloka nako ea hore a be boinotšing. O siea baapostola ba hae kae-kae, o kenella hare serapeng, oa khumama ’me o qala ho rapela. O rapela ka matla ’me o utloa bohloko bo otlang pelo hoo mofufutso oa hae o bang “joaloka marotholi a mali a rothelang fatše.”—Luka 22:39-44.

² Ke hobane’ng ha Jesu a khathatsehile hakaale? Ke ’nete hore oa tseba hore o haufi le ho tobana le masetla-pelo a ho hlokofatsoa ’meleng, empa seo hase sona se mo tšoenyang. O khathatsehile ka taba e ’ngoe ea bohlokoa ho feta eo hōle. O amehile ka ho teba ka lebitso la Ntate oa hae ebile oa hlokomela hore bokamoso ba lelapa lohle la motho bo itšetlehile ka hore a lule a tšepahala. Jesu oa tseba hore na ke habohlokoa hakaakang hore a mamelle. Ha a ka hlōleha, a ka tlisetsa lebitso la Jehova thohako e tšabehang. Empa Jesu ha a hlōlehe. Hamorao hona letsatsing leo, nakoana pele a shoa, motho enoa ea behileng mohlala o motle ka ho fetisisa oa ho mamella ea kileng a phela o hooa ka tlhōlo, o re: “Ho phethehile!”—Johanne 19:30.

³ Bibele e re phehella hore re “nahane ka hloko ka [Jesu] ea mameletseng.” (Baheberu 12:3) Kahoo sena se hlahisa lipotso tse ling tsa bohlokoa: Tse ling tsa liteko tseo Jesu a li mameletseng ke life? Ke’ng se mo nolofalelitseng ho li mamella? Re ka etsisa mohlala oa hae joang? Empa pele re araba lipotso tsena, a re ke re hlahlobeng seo ho mamella ho se akarelletsang.

Mamello ke Eng?

4, 5. (a) “Ho mamella” ho bolela’ng? (b) Re ka bontša joang hore ho mamella hase feela ho ba boemong bo thata bo ke keng ba qojoa?

⁴ Nako le nako, kaofela ha rōna re ‘bakeloa mesarelo ke liteko tse sa tšoaneng.’ (1 Petrose 1:6) Na ho ba tekong ho bolela hore re ea e mamella? Che. Lentsoe la Segerike le sebelisetsoang “ho mamella” le bolela “ho khona ho tiisetsa kapa ho se inehele ha ho nyolosetsa.” Setsebi se seng ha se hlalosa mofuta oa mamello oo bangoli ba Bibele ba buang ka oona, se re: “Ke boikutlo ba ho tiisetsa ha ho nyolosetsa, hase feela taba ea hore motho oa inehela, ho e-na le hoo o na le tšepo e tiileng . . . Ke tšobotsi e etsang hore motho a eme a tiile le har’a mathata. Ke tšobotsi e ka fetolang teko e boima ka ho fetisisa moqhaka hobane ka nģ’ane ho bohloko ke moputso.”

⁵ Kahoo, ho mamella hase feela ho hlaheloa ke boemo bo itseng bo thata bo ke keng ba qojoa. Ho latela Bibele, ho mamella ho akarelletsa hore motho a eme a tiile, a e-na le boikutlo bo nepahetseng kelellong a bile a e-na le tšepo ha a tobane le liteko. Nka ka mohlala: Banna ba babeli ba boemong bo tšoanang teronkong empa ba tšoaretsoe lintho tse peli tse fapaneng hōle. E mong ke senokoane se hlonametseng ho koalloa ha sona. E mong ke Mokreste oa ’nete ea tšoaretsoeng ho phela ka botšepehi, ’me o ema a tiile a bile a sa nyahama hobane o nka boemo boo e le monyetla oa hore a bontše tumelo. Ka sebele ho ke ke ha nkoa hore senokoane seo se beha mohlala oa ho mamella, athe Mokreste enoa ea tšepahalang eena o beha mohlala oa tšobotsi ena e babatsehang.—Jakobo 1:2-4.

 6. Re ka hlaolela mamello joang?

⁶ Mamello ea hlokahala e le hore re tle re pholohe. (Matheu 24:13) Empa ha rea tsoaloa re e-na le tšobotsi ena ea bohlokoa. Mamello e lokela ho hlaoleloa. Joang? Baroma 5:3 e re: “Matšoenyeho a hlahisa mamello.” E, haeba re batla ho hlaolela mamello e le kannete, re ke ke ra ikhula ka tšabo litekong tsohle tsa tumelo. Ho e-na le hoo, re tla tobana le tsona. Re ba le mamello ha re tobana le liteko tse khōlō le tse nyenyane letsatsi le letsatsi ’me re li hlōla. Teko ka ’ngoe eo re fetang ho eona e re matlafalletsa ho tobana le e latelang. Ke ’nete hore hase ka matla a rōna re khonang ho mamella. Re ‘itšetlehile ka matla ao Molimo a fanang ka ’ona.’ (1 Petrose 4:11) Ho re thusa hore re lule re tiile, Jehova o re file thuso e molemo ka ho fetisisa—e leng mohlala oa Mora oa hae. A re hlahlobisiseng tlaleho ea Jesu e se nang sepha ea mamello.

Seo Jesu a Ileng a se Mamella

7, 8. Jesu o ile a mamella eng ho elella qetellong ea bophelo ba hae lefatšeng?

⁷ Jesu o ile a mamella masetla-pelo a mefuta-futa ho elella qetellong ea bophelo ba hae mona lefatšeng. Ho phaella tabeng ea hore bosiung ba hae ba ho qetela o ne a le tlas’a khatello e matla ea kelello, nahana kamoo e tlamehang ebe o ne a soetsehile a bile a tlotlolohile kateng. O ile a ekoa ke ea neng a le haufi le eena, metsoalle ea hae e haufi-ufi ea mo siea kherehloa, a ritelloa nyeoe e seng molaong eo ho eona litho tsa lekhotla le phahameng ka ho fetisisa la bolumeli naheng eo li ileng tsa mo soma, tsa mo tšoela ka mathe le ho mo otla ka litebele. Leha ho le joalo, o ile a mamella tseo tsohle ka seriti le ka mamello.—Matheu 26:46-49, 56, 59-68.

⁸ Lihoreng tsa ho qetela, Jesu o ile a mamella bohloko bo otlang pelo ’meleng. O ile a shapuoa hampe hoo ho hlalosoang hore o ile a tsoa “maqeba a hlenhlaneng habohloko ’me a lahleheloa ke mali a mangata.” O ile a khokhotheloa thupeng, a bolaoa ka tsela e etsang hore “motho a shoe butle le hona ka mokhoa o utloisang bohloko bo kenang pelong.” Inahanele bohloko boo a tlamehang a ile a bo utloa ha a ne a kokotelloa lipekere tse khōlō matsohong le maotong, a kokotelloa thupeng. (Johanne 19:1, 16-18) Inahanele bohloko bo kenang pelong boo a ileng a bo utloa ha thupa eo e emisoa ’me a leketla thupeng a tšoeroe ke lipekere ’me mokokotlo oa hae o hlenhlaneng o hohla thupa eo. Empa o ile a mamella bohloko bona bo otlang pelo ha ka nako e tšoanang a ntse a le tlas’a khatello e matla e hlalositsoeng qalong ea khaolo ena.

 9. Ho nka ‘thupa ea rōna ea tlhokofatso’ le ho latela Jesu ho akarelletsa eng?

⁹ Kaha re balateli ba Kreste, ho ka ’na ha hlokahala hore re mamelle eng? Jesu o ile a re: “Haeba mang kapa mang a batla ho ntšala morao, a ke . . . a nke thupa ea hae ea tlhokofatso a ntatele a sa khaotse.” (Matheu 16:24) Mona poleloana ‘thupa ea tlhokofatso’ e sebelisitsoe ka tsela ea tšoantšetso ho bontša ho utloa bohloko, ho hlabisoa lihlong, esita le ho shoa. Ha ho bonolo ho latela Kreste. Melao-motheo ea Bokreste eo re phelang ka eona e re khetholla ho ba bang. Lefatše le re hloile hobane ha re karolo ea lona. (Johanne 15:18-20; 1 Petrose 4:4) Leha ho le joalo, re ikemiselitse ho nka thupa ea rōna ea tlhokofatso—ha e le hantle, re ikemiselitse ho utloa bohloko, esita le ho shoa, ho e-na le hore re khaotse ho latela Ea re Behetseng Mohlala.—2 Timothea 3:12.

10-12. (a) Ke hobane’ng ha ho se phethahale ha batho ba neng ba pota-potile Jesu ho ile ha leka mamello ea hae? (b) Jesu o ile a mamella maemo afe a mang a neng a mo utloisa bohloko?

¹⁰ Nakong ea tšebeletso ea hae, Jesu o ile a tobana le liteko tse ling tse neng li tlisoa ke ho se phethahale ha batho ba neng ba mo pota-potile. U hopole hore e ne e le “mosebetsi ea hloahloa,” eo Jehova a ileng a mo sebelisa ho bōpa lefatše le lintho tsohle tse phelang ho lona. (Liproverbia 8:22-31) Kahoo Jesu o ne a tseba seo Jehova a se reretseng batho; ba ne ba lokela ho bonahatsa litšobotsi tsa Hae le ho thabela bophelo bo phethahetseng ’meleng. (Genese 1:26-28) Ha Jesu a le mona lefatšeng, o ile a bona ka litsela tse sa tšoaneng liphello tse bohloko tse tlisoang ke sebe—e ne e le motho oa nama, a ikutloa ka tsela eo batho ba ikutloang ka eona. E tlameha ebe o ile a utloa bohloko hakaakang ha a bona kamoo batho ba leng hōle kateng le tsela e phethahetseng eo Adama le Eva ba neng ba le ka eona qalong! Kahoo Jesu o ile a tobana le teko ea mamello. Na o ne a tla nyahamisoa ke seo ebe o se a tela, a nka hore batho ba baetsalibe ba boemong bo ke keng ba hlola bo loka? A re ke re boneng.

¹¹ Tsela eo Bajuda ba neng ba iphapanya ka eona e ile ea utloisa Jesu bohloko hoo a ileng a ba a lla phatlalatsa. Na o ile a lumella hore ho se tsotelle hoo ha bona ho fokotse cheseho ea hae kapa hona hore ho mo tlohelise ho paka? Che, ho e-na le hoo o ile a “ruta letsatsi le leng le le leng ka tempeleng.” (Luka 19:41-44, 47) O ile a ‘sareloa haholo’ ka lebaka la Bafarisi ba neng ba thatafetse lipelo ba bile ba mo behile leihlo ho bona hore na o tla folisa monna e mong ea itseng ka Sabatha na. Na o ile a lumella bahanyetsi bao ba iketsang eka ba lokile hore ba mo tšose? Che! O ile a ema a tiile ’me a folisa monna eo—hona ka moo ka synagogeng!—Mareka 3:1-5.

¹² Ho na le taba e ’ngoe hape eo e tlamehang ebe e ne e utloisa Jesu bohloko—e leng mefokolo ea barutuoa ba hae ba haufi-ufi. Joalokaha re ithutile Khaolong ea 3, ba ile ba iponahatsa ka makhetlo hore ba lakatsa bophahamo. (Matheu 20:20-24; Luka 9:46) Jesu o ile a ba eletsa ka makhetlo hore ho hlokahala hore ba ikokobetse. (Matheu 18:1-6; 20:25-28) Empa ho ile ha ba nka nako ho sebeletsa ntlheng eo. Bosiung ba ho qetela a e-na le bona, ho ile ha tsoha “phehisano e chesang” ea hore na ke mang e moholo har’a bona! (Luka 22:24) Na Jesu o ile a ba tela, a nka hore ha ho sa na letho le ka lokang ka bona? Che. Kaha e ne e le motho ea sa feleng pelo, o ne a ntse a e-na le tšepo ’me a sheba se molemo seo ba se etsang. O ne a tseba hore tlaase botebong ba pelo ba rata Jehova le hore ba batla ho etsa thato ea Hae.—Luka 22:25-27.

13. Re ka ’na ra tobana le liteko life tse tšoanang le tseo Jesu a ileng a li mamella?

¹³ Re ka ’na ra tobana le liteko tse tšoanang le tseo Jesu a ileng a tobana le tsona. Ka mohlala, re ka ’na ra kopana le batho ba iphapanyetsang molaetsa oa ’Muso kapa ba bileng ba o hanyetsang. Na re tla lumella seo ho re nyahamisa, kapa re tla tsoela pele ho paka ka cheseho? (Tite 2:14) Re ka ’na ra lekoa ke ho se phethahale ha barab’abo rōna ba Bakreste. Re ka ’na ra utloisoa bohloko ke motho ea ipuelang habohlasoa feela kapa ea etsang lintho a sa tsotelle. (Liproverbia 12:18) Na re tla lumella mefokolo ea balumeli-’moho le rōna hore e etse hore re ba tele, kapa re tla tsoela pele ho mamella liphoso tsa bona ’me re shebe se molemo seo ba se etsang?—Bakolose 3:13.

Se Entseng Hore Jesu a Mamelle

14. Ke lintlha life tse peli tse ileng tsa thusa Jesu hore a eme a tiile?

¹⁴ Ke’ng se ileng sa thusa Jesu hore a eme a tiile le hore a lule a tšepahala le hoja a ne a etsoa hampe, a soetsoa a bile a utloisoa bohloko? Ho na le lintlha tse peli tse ka sehloohong tse ileng tsa thusa Jesu. Ea pele, o ne a tšepile Molimo, a ipiletsa ho “ea fanang ka mamello.” (Baroma 15:5) Ea bobeli, Jesu o ne a talimile moputsong, a tsepamisitse maikutlo ho se tla tlisoa ke mamello. A re ke re tšohleng ntlha ka ’ngoe ho tsena.

15, 16. (a) Ke’ng e bontšang hore Jesu o ne a sa itšetleha ka matla a hae hore a mamelle? (b) Jesu o ne a kholisehile hore Ntate oa hae o tla etsa’ng, hona hobane’ng?

¹⁵ Le hoja Jesu e le Mora ea phethahetseng oa Molimo, o ne a sa itšetleha ka matla a hae hore a mamelle. Ho e-na le hoo, o ile a retelehela ho Ntate oa hae oa leholimo a mo rapela hore a mo thuse. Moapostola Pauluse o ile a re ha a ngola: “Kreste o ile a nyehela lithapeli le likōpo tse matla ho Ea neng a khona ho mo pholosa hore a tsoe lefung, ka mehoo e matla le meokho.” (Baheberu 5:7) Hlokomela hore Jesu “o ile a nyehela” lithapeli le likōpo tse matla. Poleloana “kōpo e matla” e bolela kōpo e tiileng e tsoang botebong ba pelo—ha e le hantle ho kōpa thuso ka ho phehella. Ha ho buuoa ka “likōpo tse matla” li le ka bongateng hoo ho bontša hore Jesu o ile a kōpa Jehova ka tieo ka makhetlo. Bonneteng, Jesu o ile a rapela ka makhetlo le ka tieo ha a ne a le serapeng sa Gethesemane.—Matheu 26:36-44.

¹⁶ Jesu o ne a kholisehile ka hohle-hohle hore Jehova o tla arabela likōpo tsa hae tse matla, kaha o ne a tseba hore Ntate oa hae ke “Ea Utloang thapelo.” (Pesaleme ea 65:2) Pele Mora enoa oa letsibolo e e-ba motho oa nama, o ne a bone kamoo Ntate oa hae a arabelang lithapelo tsa barapeli ba hae ba tšepahalang kateng. Ka mohlala, Mora o ne a iponetse ka mahlo a le leholimong ha Jehova a romela lengeloi ho ea araba thapelo eo moprofeta Daniele a neng a e etsa ho tsoa botebong ba pelo—le pele Daniele a qeta ho rapela. (Daniele 9:20, 21) Joale ke joang Ntate a neng a ka hlōleha ho araba ha Mora oa hae ea tsoetsoeng a ’notši a tšolla pelo ea hae ka “mehoo e matla le meokho”? Jehova o ile a araba likōpo tse tiileng tsa Mora oa hae ’me a romela lengeloi ho mo matlafatsa hore a tiisetse teko e boima.—Luka 22:43.

17. Ke hobane’ng ha re lokela ho tšepa Jehova e le hore re mamelle, hona re ka itšetleha ka eena joang?

¹⁷ E le hore re mamelle, le rōna re lokela ho tšepa Molimo—‘ea fanang ka bonatla.’ (Bafilipi 4:13) Haeba Mora ea phethahetseng oa Molimo o ile a bona ho hlokahala hore a etse kōpo e matla ea hore Jehova a mo thuse, joale rōna re lokela ho etsa seo le ho feta hakaakang! Ho tšoana le Jesu, le rōna ho ka ’na ha hlokahala hore re kōpe Jehova ka tieo ka makhetlo-khetlo. (Matheu 7:7) Le hoja re ke ke ra lebella hore lengeloi le re etele, re ka kholiseha ka sena: Molimo oa rōna ea lerato o tla arabela boipiletso bo tiileng ba Bakreste ba tšepahalang ba ‘phehellang lithapeling le lithapelong bosiu le motšehare.’ (1 Timothea 5:5) Ho sa tsotellehe liteko tseo e ka ’nang eaba re tobane le tsona—ebang ke ho kula, ho shoeloa ke eo re mo ratang, kapa ho hlorisoa ke bahanyetsi—Jehova o tla araba lithapelo tsa rōna ha re rapela ka tieo re kōpa bohlale, sebete, matla le mamello.—2 Bakorinthe 4:7-11; Jakobo 1:5.

18. Jesu o ne a talimile moputsong o ka nģ’ane ho bohloko boo a neng a bo utloa joang?

¹⁸ Ntlha ea bobeli e ileng ea nolofalletsa Jesu hore a mamelle ke hore o ne a talimile moputsong, ka nģ’ane ho bohloko boo a neng a bo utloa. Bibele e re ka Jesu: “Ka lebaka la thabo e neng e behiloe ka pel’a hae o ile a mamella thupa ea tlhokofatso.” (Baheberu 12:2) Mohlala oa Jesu o bontša kamoo tšepo, thabo le mamello li sebetsang hammoho kateng. Taba ena e ka ’na ea akaretsoa ka ho re: Tšepo e hlahisa thabo, thabo eona e hlahisa mamello. (Baroma 15:13; Bakolose 1:11) Jesu o ne a e-na le tebello e babatsehang. O ne a tseba hore haeba a tšepahala o tla tlosa qoso bobusing ba Ntate oa hae a be a khone ho rekolla lelapa la motho sebeng le lefung. Jesu o ne a boetse a e-na le tšepo ea hore o tla busa e le Morena a be a sebeletse e le Moprista ea Phahameng, a tlisetse batho ba mamelang litlhohonolofatso tse eketsehileng. (Matheu 20:28; Baheberu 7:23-26) Ka ho tsepamisa maikutlo tebellong le tšepong e ka pele ho eena, Jesu o ile a tleloa ke thabo e khaphatsehang, ’me thabo eo ea mo thusa hore a mamelle.

19. Ha re tobana le liteko tsa tumelo, re ka lumella tšepo, thabo le mamello hore li re tsoele molemo joang?

¹⁹ Ho tšoana le Jesu, re lokela ho lumella tšepo, thabo le mamello hore li re tsoele molemo. Moapostola Pauluse o ile a re: “Thabang tšepong.” A ntan’o phaella ka ho re: “Mamellang tlas’a matšoenyeho.” (Baroma 12:12) Na hona joale u tobane le teko e itseng e matla ea tumelo? Haeba ho joalo talima moputsong. U se ke ua lebala hore mamello ea hao e tlotlisa lebitso la Jehova. Lula u hopola ka ho hlaka tšepo e babatsehang ea ’Muso. Ak’u nahane feela u se u le lefatšeng le lecha le tlang la Molimo, ’me u thabela litlhohonolofatso Paradeiseng. Ho labalabela ho bona ha lintho tse babatsehang tseo Jehova a li tšepisitseng li phethahala—ho akarelletsa ho tlosoa ha qoso bobusing ba hae, ho felisoa ha bokhopo lefatšeng le ho felisoa ha ho kula le lefu—ho tla u tlatsa thabo, ’me thabo eo e ka u thusa ho mamella ho sa tsotellehe liteko leha e le life tse ka ’nang tsa u hlahela. Bohloko leha e le bofe boo re bo utloang tsamaisong ena ea lintho ke ba ‘motsotsoana ’me bo bobebe’ ha bo bapisoa le ho phethahala ha litšepiso tsa ’Muso.—2 Bakorinthe 4:17.

“Le Latele Mehato ea Hae Haufi-ufi”

20, 21. Ha ho tluoa tabeng ea mamello, Jehova o lebeletse eng ho rōna, hona re lokela ho ikemisetsa ho etsa eng?

²⁰ Jesu o ne a tseba hore ho ba molateli oa hae e ne e tla ba phephetso, ho ne ho tla hloka hore motho a be le mamello. (Johanne 15:20) O ne a ikemiselitse ho betla khoro, a tseba hore ba bang ba tla matlafatsoa ke mohlala oa hae. (Johanne 16:33) Ke ’nete hore Jesu o behile mohlala o phethahetseng oa mamello, empa rōna re hōle le phetheho. Jehova o lebeletse eng ho rōna? Petrose o re: “Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi.” (1 Petrose 2:21) Jesu o siile “mohlala” oo batho ba ka o etsisang ka tsela eo a ileng a sebetsana le liteko ka eona.a Tlaleho eo a iketselitseng eona ea mamello e ka tšoantšoa le “mehato” kapa mohlala oa moo motho a hatileng teng. Re ke ke ra khona ho latela mehato eo ka ho phethahetseng, empa re ka khona ho e latela “haufi-ufi.”

²¹ Kahoo, a re ikemisetseng ho etsa sohle se matleng a rōna ho latela mohlala oa Jesu. E se eka re ka lula re hopola hore ha re latela mehato ea Jesu haufi-ufi, re tla hlomelloa hamolemo ho mamella “ho isa bofelong”—e leng bofelong ba tsamaiso ena ea khale ea lintho kapa bofelong ba bophelo ba rōna hona joale. Ha re tsebe hore na ho tla fihla bofe pele, empa seo re se tsebang ke hore: Jehova o tla re putsa ka ho sa feleng bakeng sa mamello eo re e bontšitseng.—Matheu 24:13.

[Mongolo o botlaaseng ba leqephe]

U ka Latela Jesu Joang?

● Re lokela ho nka bohloko leha e le bofe boo re bo utloang kahobane re le balateli ba Kreste joang?—Matheu 5:10-12.

● Jesu o ile a re balateli ba hae ba lebelle eng, hona re ka sebelisa keletso eo ea hae joang?—Matheu 10:16-22.

● Re ka etsisa mohlala oa Jesu joang ha re hanyetsoa kapa ha re hlorisoa?—1 Petrose 2:18-25.

● Ho mamella ka botšepehi ha re utloa bohloko ho tiisa eng?—1 Petrose 4:12-14.

[Setšoantšo se leqepheng la 70]

Na re tla lumella khanyetso hore e re nyahamise, kapa re tla tsoela pele ho paka ka cheseho?

[Setšoantšo se leqepheng la 73]

Jehova o tla araba lithapelo tsa rōna ha re rapela ka tieo re mo kōpa hore a re thuse re mamelle