Lipotso tse Tsoang ho Babali
◼ Na ho na le moeli oa lilemo tse tlaase bakeng sa hore monna oa Mokreste a ka buelloa e le mohlanka ea sebeletsang ka phuthehong?
Che, Bibele ha e behe moeli leha e le ofe oa lilemo tse tlaase.
Iseraeleng ea boholo-holo, mabakeng a mang Molimo o ile oa beha lilemo tse tobileng. Ba batona ba ngolisetsang tšebeletso ea sesole ba ne ba tlameha ho ba le lilemo tse 20; bashanyana feela tjee ba ne ba sa romeloe ntoeng, joalokaha ho etsahala libakeng tse ling kajeno. Lilemo e ne e boetse e le ntho e amehang ho Balevi. Bakehathe ba sebeletsang tabernakeleng ba ne ba lokela ho ba le lilemo tse tlohang ho 30 ho ea ho 50. Hobane’ng? Moeli ona o ile oa boleloa mabapi le “tšebeletso e boima le tšebeletso ea ho jara meroalo ka tenteng ea pokano.” (Numere 4:3, 47, NW) Ho bonahala eka Balevi ba ne ba ka qala ho etsa mesebetsi e bobebe ha ba le lilemo li 25, empa ba ne ba tlameha ho ba lilemo li 30 pele ba kopanela mesebetsing e boima le litokelong tsa boikarabelo tse eketsehileng tsa ho qhaqha, ho nka, le ho kopanya tabernakele. (Numere 8:24-26) Mosebetsi o joalo o boima o ne o ke ke oa hlokahala hamorao tempeleng, kahoo Balevi joale ba qala ho sebeletsa ba le lilemo li 20.—1 Likronike 23:24.
Empa ha Jehova a khaotsa ho sebelisa Iseraele oa nama ’me a qala ho sebelisa Iseraele oa moea, na o ile a seha moeli oa lilemo tse tlaase bakeng sa bahlanka ba sebeletsang (badiakone) ka phuthehong ea Bokreste?
E mong a ka ’na a nahana joalo, ho itšetlehiloe ka tlaleho ea makholo a lilemo a morao. Kerekeng ea Roma e K’hatholike, modiakone ke “mosebeletsi ea khethiloeng, ka tlaasana ho boemo ba moprista, tsamaisong ea tlhahlamano ea boemo ba boruti e theiloeng ke Molimo ka Kerekeng.” Antiquities of the Christian Church ea Bingham e-ea hlokomela: “Babishopo le Bapresbiteri [baholo] . . . ka ho tloaelehileng ba ka ’na ba se ke ba khethoa pele ho lilemo tse mashome a mararo; empa badiakone ba ne ba lumelletsoe ho khethoa lilemong tse mashome a mabeli a metso e mehlano, e seng pele ho moo. Ena ke taba e tiisitsoeng ke molao oa sechaba le oa kereke . . . Ha se ka mehla re thulanang le boemo ba mang kapa mang ea ileng a khethoa pele ho lilemo tse mashome a mabeli a metso e mehlano, historing eohle ea Kereke.”
Leha ho le joalo, ke litšoaneleho life tse fumanoang ka Bibeleng? Tse fanoeng feela ke tse boletsoeng ho 1 Timothea 3:8-10, 12, 13: “Bahlanka ba kereke [“bahlanka ba sebeletsang,” NW] le bona e be banna ba bokhabane, ba se ke ba e-ba le maleme a mabeli, ba se ke ba hlanyetsa veine, ba se ke ba batla leruo ka thetso; ba boloke sephiri sa tumelo ka letsoalo le hloekileng. Le bona ba tšoanetse ho lekoa pele, ba ntoo beoa bahlanka, ha ba se na sekoli. Hape, bahlanka ba kereke e be banna ba nang le basali ka bong, ba busang bana ba bona hantle le matlo a bona. Hobane ba sebelitseng tsa bohlanka boo hantle, ba ithuetse boholo bo molemo, le bonatla bo boholo tumelong e ho Jesu Kreste.”
Re ka bona mona hore ha ho sehoe moeli oa lilemo tse tlaase bakeng sa ho khethoa joaloka mohlanka ea sebeletsang. Kahoo ha baholo ba kopana ho buisana ka litšoaneleho tsa ba batona ka phuthehong, ba ka hopola hore ha ho na motheo oa Bibele bakeng sa ho batla hore monna oa Mokreste a be lilemo li 20, 25, kapa 30 pele a ka buelloa le ho sebeletsa. Bibele e bua ka ba boemong bona e le “ba sebelitseng tsa bohlanka,” kahoo re hlile re ne re ke ke ra ba lebella hore ba be lilemong tse tlaase kapa tse bohareng tsa bocha. E hlakisa sena, Bibele e bolela hore bahlanka ba joalo ba sebeletsang e ka ’na eaba ka bobona ba se ba nyetse ’me ba e-na le bana.
Ho feta moo, banna ba buelloang joaloka bahlanka ba sebeletsang ba lokela hore ba be ba ‘lekiloe,’ ba fane ka bopaki ba boikutlo ba boikarabello. Hoo hase ho bolela hore ba sebeletsa nako ea ho lekoa pele. Ho e-na le hoo, ba tlameha hore ba be ba bontšitse khōlo ea Bokreste ka nako e utloahalang (ba kolobelitsoe bonyane selemo), e le banna ba utloisisang le ba khonang ho finyella lintho tseo ba li abetsoeng. Haeba motho e mocha ea “bokhabane” a bonahatsa litšobotsi tsena, ’me a e-na le boikokobetso a bile a finyella litšoaneleho tse ling, baholo ba ka ’na ba ’muella hore a khethoe leha a e-s’o ka a ba lilemo li 20. Banna ba bang ba ka ’na ba ba baholoanyane ha ba bontša ka ho hlaka hore ba khahlanyetsa litšoaneleho tsa ‘ho sebetsa tsa bohlanka boo hantle, ba ithuetse boholo bo molemo, le bonatla bo boholo.’