Ho Tsoaloa Hape​—Na ke Tsela ea ho Pholoha?

U NE u ka araba potso ee joang, “Na u tsoetsoe hape?” Balumeli ba limilione lefatšeng ka bophara ba ne ba ka araba ba sa qeaqee ka hore, “E!” Ba lumela hore ho tsoaloa hape ke letšoao la Bakreste bohle ba ’nete le hore ke eona feela tsela ea hore motho a pholohe. Ba lumellana le baeta-pele ba bolumeli ba kang setsebi sa thuto ea bolumeli Robert C. Sproul ea ileng a ngola tjena: “Haeba motho a sa tsoaloa hape, . . . hase Mokreste.”

Na le uena u lumela hore ho tsoaloa hape ke eona tsela e tla etsa hore u pholohe? Haeba ho joalo, ha ho potang hore u tla rata ho thusa beng ka uena le metsoalle ea hao hore ba fumane tsela eo ’me ba qale ho tsamaea ho eona. Leha ho le joalo, e le hore ba e fumane, ba lokela ho utloisisa phapang pakeng tsa motho ea tsoetsoeng hape le ea sa tsoaloang hape. U ka ba hlalosetsa joang hore na ho bolela’ng hore motho o tsoetsoe hape?

Ba bangata ba lumela hore polelo e reng motho ea ‘tsoetsoeng hape’ e bolela motho ea entseng tšepiso e tlohang botebong ba pelo ea hore o tla sebeletsa Molimo le Kreste, ka lebaka leo, ha e sa ba motho ea shoeleng moeeng, empa e se e le ea phelang moeeng. Ha e le hantle, buka e ’ngoe e hlalosang mantsoe e re motho ea tsoetsoeng hape “hangata ke Mokreste ea entseng boitlamo bocha kapa ea pakileng hore o ikanne tumelong haholo-holo ka mor’a hore a amehe maikutlong ketsahalong e itseng ea bolumeli.”—Merriam-Webster’s Collegiate Dictionary—Eleventh Edition.

Na u ne u tla makala ha u ithuta hore Bibele ha e lumellane le tlhaloso eo? Na u ka rata ho tseba hore hantle-ntle Lentsoe la Molimo le ruta eng mabapi le ho tsoaloa hape? Ka sebele u tla rua molemo ka ho hlahlobisisa taba ena. Hobaneng? Hobane ho utloisisa ka nepo se boleloang ke ho tsoaloa hape ho tla ama bophelo ba hao le lintho tseo u lebeletseng hore li etsahale nakong e tlang.

Bibele e Ruta Eng?

Ka Bibeleng, polelo e reng “le tsoaloe hape” e hlaha feela ho Johanne 3:1-12, moo ho hlahang puisano e thahasellisang pakeng tsa Jesu le moeta-pele e mong oa bolumeli, Jerusalema. Tlaleho eo ea Bibele e qotsitsoe ka botlalo lebokoseng le tsamaisanang le sehlooho sena. Re u khothalletsa hore u e bale ka hloko.

Tlalehong eo, Jesu o ile a totobatsa lintho tse ’maloa mabapi le “tsoalo e ncha.”a Ha e le hantle, puisano eo ea Jesu e re thusa hore re arabe lipotso tsena tse hlano tsa bohlokoa:

◼ Tsoalo e ncha ke ea bohlokoa hakae?

◼ Na ke rōna ba ka iketsetsang qeto ea hore re tsoaloe bocha?

◼ Morero oa eona ke ofe?

◼ Tsoalo e ncha e etsahala joang?

◼ E fetola kamano ea bona le Molimo joang?

A re ke re hlahlobeng lipotso tsena ka bonngoe.

[Mongolo o botlaaseng ba leqephe]

[Lebokose/Setšoantšo se leqepheng la 4]

Le Lokela Hore “le Tsoaloe Hape”

“Joale ho ne ho e-na le monna e mong oa Bafarisi, lebitso la hae e le Nikodemase, ’musi oa Bajuda. A tla ho Jesu bosiu ’me a re ho eena: ‘Rabi, rea tseba hore uena joaloka mosuoe u tlile u tsoa ho Molimo; kaha ha ho ea ka etsang lipontšo tsena tseo u li etsang ntle leha Molimo a e-na le eena.’ Ha Jesu a araba a re ho eena: ‘Kannete-nete ke re ho uena, Ntle le hore mang kapa mang a tsoaloe hape, a ke ke a bona ’muso oa Molimo.’ Nikodemase a re ho eena: ‘Ke joang motho a ka tsoaloang ha a le moholo? A ke ke a kena ka pōpelong ea ’m’ae ka lekhetlo la bobeli ’me a tsoaloa, na ha ho joalo?’ Jesu a araba: ‘Kannete-nete ke re ho uena, Ntle le hore mang kapa mang a tsoaloe ka metsi le ka moea, a ke ke a kena ’musong oa Molimo. Se tsoetsoeng ka nama ke nama, ’me se tsoetsoeng ka moea ke moea. U se ke ua hlolloa hobane ke u boleletse, [“Le lokela hore,” NW] le tsoaloe hape. Moea o fokela moo o batlang, ’me u utloa molumo oa oona, empa ha u tsebe hore na o tsoa hokae le hore na o ea hokae. Ho joalo ka e mong le e mong ea tsoetsoeng ka moea.’ Ha Nikodemase a araba a re ho eena: ‘Lintho tsee li ka etsahala joang?’ Ha Jesu a araba a re ho eena: ‘Na u mosuoe oa Iseraele ’me leha ho le joalo ha u tsebe lintho tsee? Kannete-nete ke re ho uena, Seo re se tsebang rea se bua ’me seo re se boneng re paka ka sona, empa lōna ha le amohele bopaki boo re fanang ka bona. Haeba ke le boleletse lintho tsa lefatše ’me leha ho le joalo le sa lumele, le tla lumela joang haeba ke le bolella lintho tsa leholimo?’”—Johanne 3:1-12.

Tsoalo e Ncha​—Ke ea Bohlokoa Hakae?

PUISANONG eohle ea hae le Nikodemase, Jesu o ile a hatisa hore tsoalo e ncha, kapa ho tsoaloa hape, ke ntho ea bohlokoa haholo. O ile a hlakisa seo joang?

Hlokomela hore na puisanong ea hae le Nikodemase Jesu o ile a hatisa joang hore tsoalo e ncha ke ea bohlokoa. O ile a re: “Ntle le hore mang kapa mang a tsoaloe hape, a ke ke a bona ’muso oa Molimo.” (Johanne 3:3) Mantsoe a reng “ntle le hore” le a reng “a ke ke” a hatisa hore tsoalo e ncha ke ea bohlokoa. Ho tea mohlala: Haeba motho a re, “Ntle le hore letsatsi le chabe, ho ke ke ha e-ba le khanya ea letsatsi,” o bolela hore khanya ea letsatsi e itšetlehile ka ho feletseng ka hore letsatsi le chabe. Ka tsela e tšoanang, Jesu o ne a bolela hore ho bona ’Muso oa Molimo ho itšetlehile ka ho feletseng ka hore motho a tsoaloe hape.

Qetellong, joalokaha eka Jesu o tlosa khoao leha e le efe e ka ’nang ea e-ba teng, o ile a re: “Le lokela hore le tsoaloe hape.” (Johanne 3:7, NW) Ho hlakile hore ho latela Jesu, ke tlamo hore motho a tsoaloe hape—o lokela ho tsoaloa hape—e le hore a ‘kene ’musong oa Molimo.’—Johanne 3:5.

Kaha Jesu o ne a hlile a nka tsoalo e ncha e le taba ea bohlokoa, Bakreste ba lokela ho etsa bonnete ba hore ba utloisisa taba ena ka tsela e nepahetseng. Ka mohlala, na u nahana hore Mokreste a ka ikhethela hore a tsoaloe hape?

[Ntlha e Qolotsoeng e leqepheng la 5]

“Ntle le hore letsatsi le chabe, ho ke ke ha e-ba le khanya ea letsatsi”

Tsoalo e Ncha​—Na ke Ntho eo Motho a ka Ikhethelang Eona?

KE MANG ea etsang hore batho ba tsoaloe hape? Ha baruti ba bang ba khothalletsa bamameli ba bona hore e be Bakreste ba tsoetsoeng hape, ba qotsa mantsoe ana a Jesu: “Le lokela hore le tsoaloe hape.” (Johanne 3:7, NW) Baruti bao ba fetola mantsoe ana taelo, ha e le hantle ba re, ‘Tsoaloang hape!’ Ka hona, ba ruta hore molumeli ka mong a ka ikhethela ho mamela Jesu ebe o nka mehato e loketseng ea hore a tsoaloe hape. Ha e le hantle seo ba se bolelang ke hore motho a ka ikhethela ho tsoaloa hape. Empa na seo se lumellana le mantsoe ao Jesu a ileng a a bolella Nikodemase?

Ho hlahlobisisa mantsoe a Jesu ho bontša hore Jesu o ne a sa rute hore motho a ka ikhethela hore na o batla ho tsoaloa hape kapa che. Ke hobane’ng ha re bua mantsoe aa? Poleloana ea Segerike e fetoletsoeng e le “a tsoaloe hape” e ka boela ea fetoleloa e le “o lokela hore a tsoaloe ho tsoa holimo.”a Kahoo, ho latela phetolelo eo, tsoalo e ncha “e tsoa holimo”—ke hore “e tsoa leholimong,” kapa “e theoha ho Ntate.” (Johanne 19:11, NW, mongolo o botlaaseng ba leqephe; Jakobo 1:17) Ka sebele, ke Molimo ea etsang hore batho ba tsoaloe hape.—1 Johanne 3:9.

Haeba re lula re hopotse poleloana e reng “e tsoa holimo,” re ke ke ra thatafalloa ke ho utloisisa hore na ke hobane’ng ha motho a ke ke a iketsa hore a tsoaloe hape. Ak’u nahane ka ha u ne u tsoaloa. Na u ile ua ikhethela hore u batla ho tsoaloa? Le hanyenyane! Ntate oa hao ke eena ea ileng a etsa hore u tsoaloe. Ka ho tšoanang, re ka tsoaloa hape hafeela Molimo, e leng Ntate oa rōna oa leholimo, a etsa hore re fumane tsoalo e ncha. (Johanne 1:13) Ka hona, moapostola Petrose o bua ka nepo ha a re: “Ho bokoe Molimo le Ntate oa Morena oa rōna Jesu Kreste, kaha ho ea ka mohau oa hae o moholo o ile a re fa tsoalo e ncha.”—1 Petrose 1:3.

Na ke Taelo?

Leha ho le joalo, ba bang ba ka ’na ba ipotsa, ‘Haeba ke ’nete hore ha ho na motho ea ka iketsetsang qeto ea hore eena o batla ho tsoaloa hape, ke hobane’ng ha Jesu a ile a fana ka taelo e reng: “Le lokela hore le tsoaloe hape”?’ Eo ke potso e utloahalang. Etsoe haeba ruri mantsoe ao a Jesu ke taelo, o ne a tla be a re laela hore re etse ntho eo re ke keng ra khona ho e etsa. Eo e ne e ke ke ea e-ba ntho e utloahalang. Joale re lokela ho utloisisa mantsoe a reng le lokela hore le “tsoaloe hape” joang?

Ha polelo eo e hlahlobisisoa ka puo ea pele eo e ngotsoeng ka eona, hoa hlaka hore e ne e sa ngoloa e le taelo. Ho e-na le hoo, e ngotsoe e le polelo e hlalosang boemo. Ka mantsoe a mang, ha Jesu a ne a re le lokela hore le “tsoaloe hape,” o ne a bolela taba kamoo e leng kateng, o ne a sa fane ka taelo. O ile a re: “Ho hlokahala hore le tsoaloe ho tsoa holimo.”—Johanne 3:7, Modern Young’s Literal Translation.

Ho etsa mohlala oa hore na taelo le polelo li fapana hokae, nahana ka papiso ena. Nahana ka motse o itseng o nang le likolo tse ngata. Ebe ho khethoa sekolo se seng hore e be sa bana bao e leng baahi kapa matsoalloa a naha eo, ba lulang libakeng tse hōle le motse oo. Ebe ka letsatsi le leng ho fihla moshanyana eo e seng moahi oa naha eo ’me o re ho mosuoe-hlooho oa sekolo seo: “Ke kōpa ho ngolisa sekolong sena.” Ha mosuoe-hlooho a mo araba, o re ho eena: “E le hore u ngolisoe sekolong sena u lokela hore u be moahi oa naha ena.” Ho hlakile hore mantsoe a mosuoe-hlooho hase taelo. Ha a fe seithuti seo taelo e reng: “E-ba moahi oa naha ena!” Mosuoe-hlooho o mpa a bolela taba kamoo e leng kateng—e leng se hlokahalang hore motho a kene sekolo seo. Ka ho tšoanang, ha Jesu a ne a re: “Le lokela hore le tsoaloe hape,” o ne a mpa a bolela taba kamoo e leng kateng—e leng se hlokahalang e le hore motho a ka “kena ’musong oa Molimo.”

’Muso oo oa Molimo, o boletsoeng qetellong, o amana le karolo e ’ngoe hape ea tsoalo e ncha. Karolo ena e amana le potso e reng, Morero oa eona ke ofe? Ke habohlokoa hore re tsebe karabo ea potso eo e le hore re ka utloisisa ka nepo se boleloang ke ho tsoaloa hape.

[Mongolo o botlaaseng ba leqephe]

[Setšoantšo se leqepheng la 6]

Ho tsoaloa bocha le ho tsoaloa ho tloaelehileng ha tlhaho ho tšoana joang?

Tsoalo e Ncha​—Morero oa Eona ke Ofe?

BATHO ba bangata ba lumela hore motho o lokela ho tsoaloa hape hore a pholosoe ka ho sa feleng. Leha ho le joalo, hlokomela hore na Jesu ka boeena o ile a re morero oa tsoalo e ncha ke ofe. O itse: “Ntle le hore mang kapa mang a tsoaloe hape, a ke ke a bona ’muso oa Molimo.” (Johanne 3:3) Kahoo ho hlokahala hore motho a tsoaloe hape e le hore a kene ’Musong oa Molimo, eseng hore a pholosoe. Ba bang ba ka ’na ba re, ‘Empa, na lipoleloana tsee tse peli—ho kena ’Musong le ho pholosoa—ha li bolele moputso o le mong?’ Che, ha ho joalo. E le hore re utloisise phapang, a re qaleng ka ho tšohla se boleloang ke poleloana e reng “’muso oa Molimo.”

’Muso ke mofuta oa puso. Kahoo, poleloana e reng “’muso oa Molimo” e bolela “puso ea Molimo.” Bibele e ruta hore Jesu Kreste, e leng “mor’a motho,” ke eena Morena oa ’Muso oa Molimo le hore Kreste o na le batho bao a tla busa le bona. (Daniele 7:1, 13, 14; Matheu 26:63, 64) Ho feta moo, pono eo moapostola Johanne a ileng a e bontšoa e ile ea senola hore batho ba il’o busa le Kreste ke ba khethiloeng “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng” ebile ba tla “busa e le marena holim’a lefatše.” (Tšenolo 5:9, 10; 20:6) Ho feta moo, Lentsoe la Molimo le bolela hore batho ba tla busa e le marena ke “mohlatsoana” oa batho ba 144 000 “ba rekiloeng lefatšeng.”—Luka 12:32; Tšenolo 14:1, 3.

’Muso oa Molimo o hlonngoe hokae? “’Muso oa Molimo” o boetse o bitsoa “’muso oa maholimo,” e leng se bontšang hore Jesu le marena a tla busa le eena ba tla busa ba le leholimong. (Luka 8:10; Matheu 13:11) Kahoo, ’Muso oa Molimo ke puso ea leholimong eo ho eona ho tla busa Jesu Kreste le sehlopha sa batho ba khethiloeng har’a moloko oa batho.

Joale Jesu o ne a bolela’ng ha a re motho o lokela ho tsoaloa hape e le hore a ka “kena ’musong oa Molimo”? O ne a bolela hore motho o lokela ho tsoaloa hape e le hore a ka ea busa le Kreste leholimong. Ka mantsoe a bonolo, morero oa tsoalo e ncha ke ho lokisetsa sehlopha sa batho ba ’maloa hore ba e’o busa ’musong oa leholimo.

Ho tla fihlela mothating ona, re se re bone hore tsoalo e ncha ke ea bohlokoa, e simoloha ho Molimo le hore e lokisetsa sehlopha sa batho hore ba e’o busa ba le leholimong. Empa hantle-ntle tsoalo e ncha e etsahala joang?

[Ntlha e Qolotsoeng e leqepheng la 7]

Morero oa tsoalo e ncha ke ho lokisetsa sehlopha sa batho ba ’maloa hore ba e’o busa ’musong oa leholimo

[Setšoantšo se leqepheng la 7]

’Muso oa Molimo ke puso eo ho eona ho tla busa Jesu Kreste le sehlopha sa batho ba khethiloeng har’a moloko oa batho

Tsoalo e Ncha​—E Etsahala Joang?

HA Jesu a bua le Nikodemase, ha aa ka a bua feela ka bohlokoa ba tsoalo e ncha, hore na ke mang ea fang batho tsoalo e ncha le hore na morero oa eona ke ofe, empa o ile a boela a bua ka tsela eo e etsahalang ka eona. Jesu o ile a re: “Ntle le hore mang kapa mang a tsoaloe ka metsi le ka moea, a ke ke a kena ’musong oa Molimo.” (Johanne 3:5) Ka hona, motho o tsoaloa hape ka metsi le ka moea. Empa mantsoe “ka metsi le ka moea” a bolela’ng?

‘Metsi le Moea’—Li Emela Eng?

Kaha Nikodemase e ne e le setsebi sa bolumeli ba Sejuda, ha ho potang hore o ne a tloaelane le tsela eo Mangolo a Seheberu a sebelisang poleloana e reng “moea oa Molimo” ka eona—e leng matla a Molimo a sebetsang a ka susumetsang batho hore ba etse liketso tse hlollang. (Genese 41:38; Exoda 31:3; 1 Samuele 10:6) Kahoo ha Jesu a sebelisa lentsoe “moea,” e tlameha ebe Nikodemase o ile a utloisisa hore o bua ka moea o halalelang, e leng matla a Molimo a sebetsang.

Ho thoe’ng ka metsi ao Jesu a neng a bua ka ’ona? Nahana ka liketsahalo tse tlalehiloeng pejana le ka mor’a puisano eo ea hae le Nikodemase. Tsona li bontša hore Johanne Mokolobetsi le barutuoa ba Jesu ba ne ba kolobetsa ka metsi. (Johanne 1:19, 31; 3:22; 4:1-3) Mokhoa ona o ile oa tsebahala haholo Jerusalema. Kahoo, ha Jesu a ne a bua ka metsi, e tlameha ebe Nikodemase o ile a lemoha hore Jesu o ne a sa bue ka metsi ka kakaretso, empa o ne a bua ka metsi a sebelisetsoang kolobetso.a

Ho Kolobetsoa “ka Moea o Halalelang”

Haeba ho ‘tsoaloa ka metsi’ ho bolela ho kolobetsoa metsing, joale ho ‘tsoaloa ka moea’ ho bolela’ng? Pele Jesu a bua le Nikodemase, Johanne Mokolobetsi o ne a ile a bolela hore hase metsi feela a neng a tla phetha karolo ea bohlokoa, empa le moea o halalelang o ne o tla phetha karolo ea bohlokoa. O ile a re: “Ke le kolobelitse ka metsi, empa [Jesu] o tla le kolobetsa ka moea o halalelang.” (Mareka 1:7, 8) Mongoli oa kosepele Mareka o bolela lekhetlo la pele leo ka lona ho ileng ha e-ba le kolobetso ea mofuta oo. O ile a ngola tjena: “Matsatsing ao Jesu a tsoa Nazaretha ea Galilea ’me a kolobetsoa Jordane ke Johanne. Kapele-pele ha a nyoloha a tsoa ka metsing a bona maholimo a ntse a aroha, ’me moea o theohela holim’a hae joaloka leeba.” (Mareka 1:9, 10) Ha Jesu a qoelisoa Jordane, o ile a kolobetsoa ka metsi. Nakong eo ka eona a fumanang moea o tsoang leholimong, o ile a kolobetsoa ka moea o halalelang.

Hoo e ka bang lilemo tse tharo ka mor’a hore Jesu a kolobetsoe, o ile a tiisetsa barutuoa ba hae: “Le tla kolobetsoa ka moea o halalelang matsatsi a seng makae ka mor’a sena.” (Liketso 1:5) See se etsahetse neng?

Ka Pentekonta ea 33 C.E., barutuoa ba ka bang 120 ba Jesu ba ne ba bokane ntlong e ’ngoe Jerusalema. “Eaba ka tšohanyetso ho ba le lerata le tsoang leholimong le joaloka la moea o fokang ka sekhahla, ’me la tlala ntlo eohle eo ba neng ba lutse ka hare ho eona. Maleme a kang a mollo a bonahala ho bona . . . , eaba kaofela ba tlala moea o halalelang.” (Liketso 2:1-4) Hona letsatsing leo, ba bang Jerusalema ba ile ba susumelletsoa hore ba kolobetsoe metsing. Moapostola Petrose o ile a bolella letšoele leo: “Bakang, ’me e mong le e mong oa lōna a ke a kolobetsoe ka lebitso la Jesu Kreste hore le tšoareloe libe, ’me le tla amohela mpho e sa lefelloeng ea moea o halalelang.” Eaba letšoele leo le nka bohato bofe? “Ba ileng ba amohela lentsoe la hae ka pelo eohle ba kolobetsoa, ’me letsatsing leo ha eketsoa meea e ka bang likete tse tharo.”—Liketso 2:38, 41.

Ho Feta Mefuteng e ’Meli ea Kolobetso

Mefuta ee ea kolobetso e senola eng ka tsoalo e ncha? E bontša hore tsoalo e ncha e etsahala ha motho a fetile mefuteng e ’meli ea kolobetso. Hlokomela hore Jesu o ile a qala ka ho kolobetsoa metsing. Eaba o fumana moea o halalelang. Ka tsela e tšoanang, barutuoa ba pele ba ile ba lokela ho kolobetsoa ka metsi pele (ba bang ba kolobelitsoe ke Johanne Mokolobetsi), eaba ka mor’a moo ba fumana moea o halalelang. (Johanne 1:26-36) Ka tsela e tšoanang, batho ba 3 000 ba sokolohileng ba ile ba qala ka ho kolobetsoa metsing, eaba ka mor’a moo ba fumana moea o halalelang.

Re nahanne hore na ka Pentekonta ea 33 C.E., batho ba ile ba feta mefuteng efe ea kolobetso, re lokela ho lebella hore tsoalo e ncha e etsahale joang kajeno? E lokela ho etsahala ka tsela e tšoanang le eo e ileng ea etsahala ka eona ho baapostola ba Jesu le barutuoa ba pele. Pele ho tsohle, motho o bakela libe tsa hae, a sokolohe tseleng e fosahetseng ’me a nehele bophelo ba hae ho Jehova e le hore a mo rapele le ho mo sebeletsa, ebe o bontša phatlalatsa hore o inehetse ka hore a kolobetsoe metsing. Ka mor’a moo, haeba Molimo a khetha hore e be e mong ea tla busa ’Musong oa Hae, o tla mo tlotsa ka moea o halalelang. Motho ke eena ea nkang khato karolong e qalang mefuteng ena e ’meli ea kolobetso (e leng kolobetso ea metsing); empa Molimo ke eena ea phethang karolo ea bobeli (e leng ho kolobetsa ka moea o halalelang). Ha motho a fetile mefuteng ena e ’meli ea kolobetso, o fuoe tsoalo e ncha.

Leha ho le joalo, ke hobane’ng ha Jesu a ile a sebelisa poleloana “a tsoaloe ka metsi le ka moea”? E ne e le ho hatisa hore ho tla ba le phetoho e khōlō ho ba kolobelitsoeng ka metsi le ka moea. Sehlooho se latelang se tla tšohla karolo eo ea tsoalo e ncha.

[Mongolo o botlaaseng ba leqephe]

[Setšoantšo se leqepheng la 9]

Johanne o ile a kolobetsa Baiseraele ba bakileng metsing

Tsoalo e Ncha​—E Finyella Eng?

KE HOBANE’NG ha Jesu a sebelisitse poleloana e reng “a tsoaloe . . . ka moea” ha a bua ka ho kolobetsoa ka moea o halalelang? (Johanne 3:5) Ha lentsoe “tsoalo” le sebelisoa ka tsela ea tšoantšetso, le bolela “qalo” joaloka polelong e reng “tsoalo ea sechaba.” Ka hona, poleloana e reng “tsoalo e ncha” e bolela “qaleho e ncha.” Ka lebaka leo, mantsoe a tšoantšetso a reng ‘tsoaloa’ le “tsoalo e ncha” a hatisa hore ba kolobelitsoeng ka moea o halalelang ba tla qala ho ba le kamano e ncha le Molimo. Kamano ea bona le Molimo e fetoha joang ka ho feletseng?

Ha a hlalosa hore na Molimo o lokisetsa batho joang hore ba e’o busa leholimong, moapostola Pauluse o ile a sebelisa mohlala o amanang le bophelo ba lelapa. O ile a ngolla Bakreste ba mehleng ea hae hore ba ne ba tla “nkeloa ka lapeng [e] le bara” le hore ka tsela eo, Molimo o ne a tla sebelisana le bona joalokaha a sebelisana “le bara.” (Bagalata 4:5; Baheberu 12:7) Hore re bone hore na mohlala ona oa ho nkeloa ka lapeng o re thusa joang hore re utloisise hore na ho etsahala phetoho ea mofuta ofe ha motho a kolobetsoa ka moea o halalelang, nahana hape ka mohlala oane oa moshanyana ea batlang ho ngolisa sekolong sa matsoalloa a naha e itseng.

Phetoho e Bang Teng ka Lebaka la ho Nkeloa ka Lapeng

Papisong eo, moshanyana a ke ke a ngolisoa sekolong seo hobane hase moahi oa naha eo. Joale, nahana feela ka letsatsi le leng ho etsahala phetoho e khōlō. Ntate e mong eo e leng moahi oa naha eo o mo nkela ka lapeng la hae ka molao e le mora oa hae. Phetoho ee e ama moshanyana eo joang? Kaha joale o se a nkoa e le mora oa ntate eo, o na le litokelo tse tšoanang le tsa bana bao e leng matsoalloa a naha eo—ho akarelletsa le tokelo ea hore a ngolisoe sekolong. Ho nkeloa ha hae ka lapeng leo ho fetotse boemo ba hae ka ho feletseng.

Sena se tšoantšetsa se etsahallang ba tsoetsoeng hape, le hona ka tsela ea bohlokoa le ho feta. Hlokomela kamoo lintlha tsena li tšoanang kateng. Moshanyana ea papisong eo ho builoeng ka eona o tla amoheloa sekolong feela ha a e-na le ntho e itseng e hlokahalang, e leng ho ba moahi oa naha eo. Empa seo a ke ke a se etsa ka boeena. Ka ho tšoanang, batho ba bang ba tla fuoa boemo ba ho busa ’Musong oa Molimo, kapa pusong ea leholimo, empa ba tla bo fuoa feela haeba ba e-na le ntho e itseng e hlokahalang—e leng ‘ho tsoaloa hape.’ Leha ho le joalo, ba ke ke ba e fumana ka bobona hobane Molimo ke eena ea khethang ba tsoaloang hape.

Se fetotseng boemo ba moshanyana eloa ke eng? Ke bohato ba molao ba ho mo nkela ka lapeng. Ke ’nete hore bohato boo ha boa ka ba fetola semelo sa moshanyana eo. Ka mor’a hore ntate eane a mo nkele ka lapeng la hae, moshanyana eo ha aa ka a fetoha motho e mong. Leha ho le joalo, ka mor’a hore ho phethoe lintho tse hlokahalang ka molao hore a nkeloe ka lapeng, moshanyana eo o ile a fumana boemo bo bocha. Ka sebele, o ile a qala bophelo bo bocha, joalokaha eka o tsoetsoe bocha. O ile a nkoa e le mora oa hae, e leng se ileng sa mo fa tokelo ea ho ea sekolong seo le ho ba karolo ea lelapa la ntate ea mo nketseng ka lapeng la hae.

Ka ho tšoanang, Jehova o ile a fetola boemo ba sehlopha sa batho ba sa phethahalang ka ho nka bohato ba pele ba molao e le hore a ba nkele ka lapeng e le bana ba hae. Moapostola Pauluse, eo e leng e mong oa sehlopha seo, o ile a ngolla balumeli-’moho le eena mantsoe a reng: “Le ile la amohela moea oa ho nkeloa ka lapeng le le bara, e leng moea oo ka oona re hoeletsang: ‘Abba, Ntate!’ Moea o paka le moea oa rōna hore re bana ba Molimo.” (Baroma 8:15, 16) Ka sebele, ka lebaka la mohato oo oa ho ba nkela ka lapeng, Bakreste bao ba fetohile karolo ea lelapa la Molimo, kapa “bana ba Molimo.”—1 Johanne 3:1; 2 Bakorinthe 6:18.

Ke ’nete hore ha Molimo a nkela Bakreste bao ka lapeng, seo ha sea ka sa fetola boemo ba bona ba tlhaho ba ho se phethahale. (1 Johanne 1:8) Leha ho le joalo, joalokaha Pauluse a ile a tsoela pele ho hlalosa, ka mor’a hore ba nkeloe ka lapeng joalokaha ho ne ho hlokahala, ba ile ba e-ba le boemo bo bocha. Ka nako e tšoanang, moea oa Molimo o ile oa fa bara bana ba nketsoeng ka lapeng kholiseho e matla ea hore ba ne ba tla lula le Kreste leholimong. (1 Johanne 3:2) Kaha moea o halalelang o entse hore ba kholisehe ka ho feletseng ka tšepo eo, ba ile ba qala ho talima bophelo ka tsela e ’ngoe. (2 Bakorinthe 1:21, 22) Ka sebele, ba ile ba e-ba le qaleho e ncha, joalokaha eka ba tsoaloa bocha.

Ha Bibele e bua ka bara ba Molimo ba nketsoeng ka lapeng, e re: “E tla ba baprista ba Molimo le ba Kreste, ’me ba tla busa le eena e le marena ka lilemo tseo tse sekete.” (Tšenolo 20:6) Ba e-na le Kreste, bara bana ba Molimo ba nketsoeng ka lapeng ba tla etsoa marena ’Musong oa Molimo, kapa pusong ea leholimo. Moapostola Petrose o ile a bolella balumeli-’moho le eena hore ba ne ba tla fumana “[lefa] le ke keng la bola le le sa silafalang le le sa senyeheng” le “[bolokiloeng] maholimong” bakeng sa bona. (1 Petrose 1:3, 4) Leo ke lefa la bohlokoa hakaakang!

Leha ho le joalo, taba ena ea bobusi e boetse e hlahisa potso e ’ngoe. Haeba ba tsoaloang hape ba tla busa e le marena leholimong, ba tla busa bo-mang? Ho tla tšohloa potso eo sehloohong se latelang.

[Setšoantšo se leqepheng la 10]

Pauluse o ile a re’ng ka ho nkeloa ka lapeng?

Ho Tla Busa ba ’Maloa, Empa ba Tla Rua Molemo ba Bangata

HO TLOHA mehleng ea baapostola, Molimo o ’nile a khetha har’a moloko oa batho palo e itseng ea Bakreste ba tšepahalang a ba a ba nkela ka lapeng e le bara ba hae. Phetoho e etsahallang bara bana ba nketsoeng ka lapeng ke e feletseng hoo Lentsoe la Molimo le e hlalosang e le tsoalo e ncha. Morero oa tsoalo ena e ncha ke hore bahlanka bao ba Molimo ba tsoetsoeng hape ba lokisetsoe ho ea ba babusi leholimong. (2 Timothea 2:12) E le hore e be babusi, ba tsosoa bafung ho ea phela leholimong. (Baroma 6:3-5) Ha ba le leholimong, “ba tla busa e le marena holim’a lefatše” hammoho le Kreste.—Tšenolo 5:10; 11:15.

Leha ho le joalo, Lentsoe la Molimo le boetse le bua ka ba bang ba tla fumana poloko e sa feleng, ntle le bao ba tsoetseng hape. Ka Bibeleng (Mangolong a Seheberu hammoho le