Lipaki tsa Jehova

Tlhaloso: Mokhatlo oa lefatše ka bophara oa Bokreste oa batho bao ka mafolo-folo ba pakang ka Jehova Molimo le merero ea hae e amang batho. Seo ba se lumelang ba se theile Bibeleng feela.

Ke eng e lumeloang ke Lipaki tsa Jehova e li khethollang ho malumeli a mang?

(1) Bibele: Lipaki tsa Jehova li lumela hore Bibele eohle ke Lentsoe le bululetsoeng la Molimo ’me, ho e-na le ho khomarela thuto e theiloeng neanong ea batho, li tšoarella Bibeleng e le tekanyetso bakeng sa sohle seo li se lumelang.

(2) Molimo: Li rapela Jehova e le oona Molimo feela oa ’nete ’me ka bolokolohi li bua le ba bang ka eena le merero ea hae e lerato ho batho. Mang le mang ea pakang ka Jehova pontšeng hangata o khetholloa e le oa sehlopha se le seng—“Lipaki tsa Jehova.”

(3) Jesu Kreste: Ha li lumele hore Jesu Kreste ke karolo ea Boraro-bo-bong, empa hore, joalokaha Bibele e bolela, ke Mora oa Molimo, letsibolo la pōpo ea Molimo; hore o phetse pele e e-ba motho oa nama le hore bophelo ba hae bo ile ba fetisetsoa popelong ea moroetsana Maria ho tloha leholimong; hore bophelo ba hae bo phethahetseng ba botho bo ileng ba teloa sehlabelong bo nolofatsa poloko e isang bophelong bo sa feleng bakeng sa ba lumelang; hore Kreste o busa ka mafolo-folo e le Morena, ea nang le matla ao a a filoeng ke Molimo holim’a lefatše lohle ho tloha ka 1914.

(4) ’Muso oa Molimo: Li lumela hore ’Muso oa Molimo ke oona tšepo feela bakeng sa batho; hore ke ’muso oa sebele; hore o tla tloha o senya tsamaiso ea hona joale e khopo ea lintho, ho akarelletsa mebuso eohle ea batho le hore o tla hlahisa tsamaiso e ncha e tla ateloa ke ho loka.

(5) Bophelo ba leholimo: Li lumela hore Bakreste ba 144 000 ba tlotsitsoeng ka moea ba tla kopanela le Kreste ’Musong oa hae oa leholimo, ba busa le eena e le marena. Ha li lumele hore leholimo ke moputso bakeng sa e mong le e mong ea “lokileng.”

(6) Lefatše: Li lumela hore morero oa mathomo oa Molimo bakeng sa lefatše o tla phethahatsoa; hore lefatše le tla tlala ka ho feletseng ka barapeli ba Jehova le hore bana ba tla tseba ho thabela bophelo bo sa feleng phethehong ea botho; le hore bafu le bona ba tla tsosetsoa monyetla oa ho kopanela mahlohonolong ana.

(7) Lefu: Li lumela hore ho hang bafu ha ba utloe letho; hore ha ba utloe bohloko kapa nyakallo sebakeng se seng sa moea; hore ha ho kae kapa kae moo ba leng teng ntle ho mohopolong oa Molimo, ka hona tšepo ea bona bakeng sa bophelo ba kamoso e tsohong ea bafu.

(8) Mehla ea qetello: Li lumela hore hona joale, ho tloha ka 1914, re phela mehleng ea qetello ea tsamaiso ena e khopo ea lintho; hore ba bang ba boneng liketsahalo tsa 1914 ba tla boela ba bone ho timetsoa hoa lefatše la joale le khopo; hore barati ba ho loka ba tla pholohela lefatšeng le hloekisitsoeng.

(9) Li arohile lefatšeng: Li leka kahohle ho se be karolo ea lefatše, joalokaha Jesu a itse e ne etlaba ’nete ka balateli ba hae. Li bontša baahelani ba tsona lerato la ’nete la Bokreste, empa ha li kopanele lipolotiking kapa lintoeng tsa sechaba leha e le sefe. Li lokisetsa litlhoko tsa nama tsa malapa a tsona empa li qoba telekiso e matla ea lefatše ea lintho tse bonahalang le botumo ba botho le ho qoela hoa lona ho feteletseng menateng.

(10) Li sebelisa keletso ea Bibele: Li lumela hore ke hoa bohlokoa ho sebelisa keletso ea Lentsoe la Molimo bophelong ba letsatsi le letsatsi hona joale—lapeng, sekolong, mosebetsing le ka phuthehong ea tsona. Ho sa tsotellehe hore na motho o ne a phela joang pele, e ka ’na ea e-ba e mong oa Lipaki tsa Jehova haeba a lahla mekhoa e nyatsuoang ke Lentsoe la Molimo ’me a sebelisa keletso ea lona ea bomolimo. Empa haeba kamorao ho moo motho a itloaetsa bofebe, bohlola, bosodoma, tšebeliso e mpe ea lithethefatsi, botahoa, leshano kapa ho utsoa, o tla khaoloa mokhatlong o hlophisitsoeng.

(Lethathamo le kaholimo le bolela ka bokhutšoaane tse ling tsa lintho tse lumeloang ke Lipaki tsa Jehova empa ho hang hase tsona lintlha feela moo li fapaneng le se lumeloang ke lihlopha tse ling. Motheo oa Mangolo bakeng sa se kaholimo seo li se lumelang o ka fumanoa ho Tšupiso ea Litaba ea buka ena.)

Na Lipaki tsa Jehova ke bolumeli ba Amerika?

Ke babuelli ba ’Muso oa Molimo, e seng ba tsamaiso ea lipolotiki, ea moruo kapa ea kahisano ea sechaba sefe kapa sefe sa lefatše lena la khale.

Ke ’nete hore mehleng ea kajeno Lipaki tsa Jehova li qalehile United States. Ho ba hoa ntlo-kholo ea tsona ea lefatše mono ho nolofalitse ho hatisa le ho romella libuka tsa Bibele likarolong tse ngata tsa lefatše. Empa Lipaki ha li rate sechaba se seng ho feta se seng; li fumanoa hoo e ka bang lichabeng tsohle, ’me li na le liofisi likarolong tse ngata tsa lefatše ho laola tšebetso ea tsona libakeng tseo.

Nahana: Jesu joaloka Mojode o ile a tsoalloa Palestina, empa Bokreste hase bolumeli ba Palestina, na ke bona? Hore na Jesu o tsoaletsoe hokae hase lona lebaka la bohlokoa le ka nahanoang. Seo Jesu a ileng a se ruta se tsoile ho Ntate oa hae, Jehova Molimo, ea sebetsanang le batho ba lichaba tsohle ntle ho khethollo.—Joh. 14:10; Lik. 10:34, 35.

Mosebetsi oa Lipaki tsa Jehova o fumana lichelete hokae?

Ka menehelo ea boithatelo, joalokaha e ne e le ’nete ka Bakreste ba pele. (2 Ba-Kor. 8:12; 9:7) Ha ho mohla ho bokelloang likoleke libokeng tsa tsona; ha ho mohla li qelang lichelete sechabeng. Menehelo e tsoang ho batho ba thahasellang e sebelisetsoa ho ntšetsa pele mosebetsi oa lefatšeng ka bophara oa thuto ea Bibele o etsoang ke Lipaki tsa Jehova.

Lipaki ha li lefeloe ho ea ka ntlo le ntlo kapa ho fana ka libuka tsa Bibele literateng. Li susumetsoa ke lerato bakeng sa Molimo le bakeng sa moahelani hore li bue ka litokisetso tse lerato tsa Molimo bakeng sa batho.

Watch Tower Bible and Tract Society of Pennsylvania, mokhatlo o ngolisitsoeng ka molao oa bolumeli o sebelisoang ke Lipaki tsa Jehova, o kentsoe molaong ka 1884 tumellanong le Molao oa Selekane oa Pennsylvania, U.S.A. oa Mekhatlo ea Tšebelisano e sa Etseng Phaello. Ka hona, ka molao o ke ke, ’me hase mokhatlo o etsang phaello leha e le hore batho ka bomong ba etsa phaello ka Mokhatlo ona. Molao oa motheo oa Mokhatlo o re: “[Mokhatlo] ha o rere ho ba mokhatlo o etsang phaello e nyenyane kapa e khōlō, e-bang ke ka tsietsi kapa ka tsela eitseng, ho litho tsa oona, batsamaisi kapa basebeletsi.”

Na Lipaki tsa Jehova ke mokha oa bokhelohi kapa bolumeli ba mehlolo?

Ba bang ba hlalosa mokha oa bokhelohi e le sehlopha se khelohileng bolumeling ba molao. Ba bang ba sebelisa tlhaloso eo ho sehlopha se latelang moeta-pele ea itseng oa motho kapa moruti. Ka tloaelo tlhaloso e sebelisoa ka tsela e nyelisang. Lipaki tsa Jehova hase lehlomela la kereke e ’ngoe eitseng empa li akarelletsa batho ba tsoang bophelong ba mefuta eohle le ba tsoang malumeling a mangata. Ha lia sheba ho motho mang kapa mang empa ho e-na le hoo li shebile ho Jesu Kreste e le moeta-pele oa tsona.

Bolumeli ba mehlolo ke boo ho thoe’ng ha bo amohelehe kapa bo hatisang boinehelo ho latela litšebeletso tse laetsoeng. Mefuta e mengata ea bolumeli bona ba mehlolo e latela baeta-pele ba phelang ba batho ’me hangata ba lumelang ho bona ba phela ka lihlotšoana tse ikarotseng ho batho ba bang. Leha ho le joalo, tekanyetso ea se amohelehang, e lokela ho ba Lentsoe la Molimo, ’me Lipaki tsa Jehova li itšoarelletse ka thata Bibeleng. Borapeli ba tsona ke tsela ea bophelo, e seng ho inehela mekhoeng ea litšebeletso. Ha li latele motho kapa hona ho ikarola bathong ba bang. Li phela le ho sebetsa har’a batho ba bang.

Bolumeli ba Lipaki tsa Jehova ke ba khale hakae?

Ho ea ka Bibele, letoto la Lipaki tsa Jehova le khutlela morao ho ea fihla ho Abele ea khabane. Ba-Heberu 11:4–12:1 e re: “Ka tumelo, Abele o hlahisitse pel’a Molimo sehlabelo se fetisang sa Kaine; . . . Ka tumelo, Noe, eitse hobane a tsebisoe ke Molimo tse e-song ho bonahale, o kile a tšaba Molimo, . . . Ka tumelo, Abrahama, mohla a bitsoang, o kile a utloa, a fallela naheng eo a tlang ho e neoa ka mokhoa oa lefa, . . . Ka tumelo, Moshe ha a se a hōlile, o hanne ho bitsoa mora oa morali oa Faro; a mpa a ikhethela ho tšoenngoa le sechaba sa Molimo, e seng ho thabela menate ea libe e felang kapele; . . . Joale he, le rōna ha re teetsoe hare ke leru le lekalo la lipaki, a re ke re lahleng hohle ho re imelang, le sebe se tšoasang feela, ’me re ke re titime ka sebete peisong eo re e beetsoeng.”

Mabapi le Jesu Kreste, Bibele e re: “Ke tsena tse boleloang ke eo e leng Amen, paki e tšepehang, ea ’nete, hloho ea libopuoa tsa Molimo.” E ne e le paki ea mang? Ke eena ea itseng o tsebahalitse lebitso la Ntate oa hae. E ne e le paki e ka sehloohong ea Jehova.—Tšen. 3:14; Joh. 17:6.

Ho khahlisang, ba bang ho Bajode ba ile ba botsa hore na ebe tšebetso ea Jesu Kreste e emela “thuto e ncha.” (Mar. 1:27) Hamorao, Bagerike ba bang ba ile ba nahana hore moapostola Pauluse ke moemeli oa ‘thuto e ncha.’ (Lik. 17:19, 20) E ne e le ncha litsebeng tsa ba neng ba e utloa, empa ntho ea bohlokoa ke hore e ne e le ’nete, e lumellanang ka botlalo le Lentsoe la Molimo.

Histori ea kajeno ea Lipaki tsa Jehova e qalehile ka ho theoa hoa sehlopha sa ho ithuta Bibele Allegheny, Pennsylvania, U.S.A., mathoasong a bo-1870. Qalehong li ne li tsejoa feela e le Liithuti tsa Bibele, empa ka 1931 tsa amohela lebitso la Mangolo Lipaki tsa Jehova. (Esa. 43:10-12) Seo li se lumelang le ho se etsa ha se secha empa ke ho tsosolosa Bokreste ba lekholong la pele la lilemo.

Na Lipaki tsa Jehova li lumela hore bolumeli ba tsona ke bona feela bo nepahetseng?

Bibele ha e lumellane le maikutlo a kajeno a hore ho na le litsela tse ngata tse amohelehang tsa ho rapela Molimo. Ba-Efese 4:5 e re ho na le ‘Morena a le mong le tumelo e le ’ngoe.’ Jesu o itse: “Monyako oa bophelo o patisane, le tsela e eang teng e tšesane, ’me ba e fumanang ha ba bakae. . . . Hase bohle ba reng ho ’na: Morena! Morena! ba tlang ho kena ’musong oa maholimo, empa ho tla kena ea etsang thato ea Ntate ea maholimong.”—Matt. 7:13, 14, 21; bona le 1 Ba-Korinthe 1:10.

Nako le nako Mangolo a bua ka sehlopha sa lithuto tsa ’nete tsa Bokreste e le “’nete,” ’me Bokreste bo bitsoa “tsela ea ’nete.” (1 Tim. 3:15; 2 Joh. 1; 2 Pet. 2:2) Hobane Lipaki tsa Jehova li thea sohle seo li se lumelang, litekanyetso tsa tsona bakeng sa boitšoaro le mekhoa ea tlhophiso ka Bibeleng, tumelo ea tsona Bibeleng e le Lentsoe la Molimo, e li kholisa hore seo li nang le sona ruri ke ’nete. Ka hona boemo ba tsona hase ba boithoriso empa bo bontša tšepo ea tsona ea hore Bibele ke tekanyetso e nepahetseng eo motho a ka lekanyetsang bolumeli ba hae ka eona. Hase baikhabi empa li chesehela ho kopanela seo li se lumelang le ba bang.

Na malumeli a mang le oona ha a latele Bibele?

A mangata a e sebelisa ho isa tekanyong e itseng. Empa na a hlile a ruta le ho sebelisa se ka ho eona? Nahana: (1) Liphetolelong tsa oona tse ngata tsa Bibele a tlositse lebitso la Molimo oa ’nete ka makhetlo a likete-kete. (2) Thuto ea Boraro-bo-bong, maikutlo a oona ka Molimo, a alimiloe mehloling ea bohetene ’me a ntlafalitsoe sebopehong sa oona sa hona joale makholo a lilemo kamor’a hore Bibele e qetoe ho ngoloa. (3) Tumelo ea oona ho se shoeng hoa moea oa motho e le eona motheo oa bophelo bo tsoelang pele ha e-ea nkoa ka Bibeleng; metso ea eona e tsoa Babylona ea boholo-holo. (4) Sehlooho sa boboleli ba Jesu e ne e le ’Muso oa Molimo ’me o ile a roma barutuoa ba hae ho ea buisana le batho ba bang ka oona; empa kajeno ke seoelo likereke li bolelang ’Muso oo ’me litho tsa tsona ha li etse mosebetsi oa ho bolela “litaba tsena tse molemo tsa ’muso.” (Matt. 24:14, NW) (5) Jesu o boletse hore balateli ba hae ba ’nete ba ne ba ka khetholloa habonolo ka ho ratana hoa bona ka boitelo. Na hoo ke ’nete ka malumeli a Bokreste-’mōtoana ha lichaba li e-ea ntoeng? (6) Bibele e bolela hore barutuoa ba Kreste e ne e sa tl’o ba karolo ea lefatše, ’me e lemosa hore mang kapa mang ea batlang ho ba motsoalle oa lefatše o iketsa sera sa Molimo; empa likereke tsa Bokreste-’mōtoana le litho tsa tsona li khile ka matheka litabeng tsa lipolotiki tsa lichaba. (Jak. 4:4) Ha ho talingoa tlaleho e joalo, na kannete ho ka boleloa hore li hlile li tšoarelletse Bibeleng?

Lipaki tsa Jehova li fihla joang tlhalosong ea tsona ea Bibele?

Taba ea sehlooho ke hore Lipaki li hlile li lumela hore Bibele ke Lentsoe la Molimo le hore se ka ho eona se moo ho re laea. (2 Tim. 3:16, 17; Ba-Roma 15:4; 1 Ba-Kor. 10:11) Ka hona ha li retelehele likhanng tsa bohlalefi ho baleha lipolelo tsa eona tse hlakileng tsa ’nete kapa ho lokafatsa tsela eo batho ba furaletseng litekanyetso tsa eona tsa boitšoaro ba phelang ka eona.

Ha li supa puo ea tšoantšetso e ka Bibeleng, li tlohella Bibele hore e fane ka tlhaloso ea eona, ho e-na le ho fana ka likhopolo tsa tsona ka hore na e bolela eng. (1 Ba-Kor. 2:13) Sesupo sa se boleloang ke mantsoe a tšoantšetso se atisa ho fumanoa likarolong tse ling tsa Bibele. (Ka mohlala, bona Tšenolo 21:1; joale, ka se boleloang ke “leoatle,” bala Esaia 57:20. Ho khetholla “Konyana” e boleloang ho Tšenolo 14:1, bona Johanne 1:29 le 1 Petrose 1:19.)

Mabapi le phethahatso ea boprofeta, li sebelisa seo Jesu a se buileng ka ho falimehela liketsahalo tse lumellanang le se profetiloeng. (Luka 21:29-31; bapisa 2 Petrose 1:16-19.) Li supa ka hloko liketsahalo tseo ’me li lebisa tlhokomelo ho seo Bibele e bontšang hore lia se bolela.

Jesu o boletse hore lefatšeng o ne a tla ba le “mohlanka ea khabane, ea bohlale” (balateli ba hae ba tlotsitsoeng ba talingoa e le sehlopha), boemeli boo ka bona a neng a tla fana ka lijo tsa moea ho ba etsang ntlo ea tumelo. (Matt. 24:45-47) Lipaki tsa Jehova li hlokomela tokisetso eo. Joalokaha e ne e le ’nete ka Bakreste ba lekholong la pele la lilemo, ba shebile sehlopha se busang sa sehlopha seo sa “mohlanka” hore e be sona se rarollang lipotso tse thata—e seng motheong oa bohlale ba botho, empa ka ho kha tsebong ea sona ea Lentsoe la Molimo le litšebelisanong tsa oona le bahlanka ba oona, le ka thuso ea moea oa Molimo, oo se o rapellang ka tieo.—Lik. 15:1-29; 16:4, 5.

Ke hobane’ng ha ho theosa le lilemo ho bile le liphetoho lithutong tsa Lipaki tsa Jehova?

Bibele e bontša hore Jehova o nolofaletsa bahlanka ba hae hore ba utloisise morero oa hae butle-butle. (Liprov. 4:18; Joh. 16:12) Ka hona, baprofeta ba neng ba bululetsoe ke Molimo ho ngola likarolo tsa Bibele ha baa ka ba utloisisa se neng se boleloa ke ntho e ’ngoe le e ’ngoe eo ba ileng ba e ngola. (Dan. 12:8, 9; 1 Pet. 1:10-12) Baapostola ba Jesu Kreste ba ile ba hlokomela hore ho na le ho hongata hoo ba sa ho utloisiseng mehleng ea bona. (Lik. 1:6, 7; 1 Ba-Kor. 13:9-12) Bibele e bontša hore tsebo ea ’nete e ne e tla eketseha haholo “nakong ea bofelo.” (Dan. 12:4) Tsebo e eketsehileng hangata e hloka hore motho a lokise monahano oa hae. Lipaki tsa Jehova li utloisisa ho etsa litokiso tse joalo ka boikokobetso.

Ke hobane’ng ha Lipaki tsa Jehova li bolela ka ntlo le ntlo?

Jesu o profetile mosebetsi ona bakeng sa mehla ea rōna: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” Hape a laela balateli ba hae: “E-eang . . . le lichaba tsohle, le . . . etse barutuoa.”—Matt. 24:14; 28:19, TLP.

Ha Jesu a ne a roma barutuoa ba hae ba pele, o ile a ba laela hore ba ee malapeng a batho. (Matt. 10:7, 11-13) Moapostola Pauluse o itse ka tšebeletso ea hae: “Kamoo ke sa kang ka pata taba, leha e le ’ngoe, ea tse le tšoanelang; ke sa kang ka phetsa le ho le bolella le ho le ruta tsona pontšeng le ka matlung a lōna.”—Lik. 20:20, 21; bona le Liketso 5:42.

Molaetsa oo Lipaki li o bolelang o ama bophelo ba batho; li batla ho ba hlokolosi hore ha li fete le ea mong. (Sof. 2:2, 3) Maeto a tsona a susumetsoa ke lerato—pele, bakeng sa Molimo, le bakeng sa baahelani ba tsona.

Seboka sa baeta-pele ba bolumeli Spain se ile sa hlokomela sena: “Mohlomong [likereke] li hlokomolohile ka ho feteletseng seo Lipaki li hlileng li tšoarehileng haholo ka sona—ho etela matlung, ho oelang mokhoeng oa baapostola oa kereke ea khale. Ha likereke, ka makhetlo a mangata-ngata, li fella ho haheng litempele tsa tsona, ho letseng litšepe tsa tsona ho hohela batho le ho boleleng ka libakeng tsa tsona tsa borapeli, [Lipaki] li latela mokhoa oa boapostola oa ho ea ka ntlo le ntlo le oa ho ipha monyetla o mong le o mong oa ho paka.”—El Catolicismo, Bogotá, Colombia, September 14, 1975, leq. 14.

Empa ke hobane’ng ha Lipaki li etela nako le nako le matlung a batho ba sa kopaneleng seo li se lumelang?

Ha li qobelle molaetsa oa tsona ho ba bang. Empa lia tseba hore batho ba fallela libakeng tse ncha tsa bolulo le hore maemo a batho aa fetoha. Kajeno e ka ’na eaba motho o tšoarehile haholo hore a ka mamela; mohlomong ka nako e ’ngoe a ka thabela ho ipha sebaka. Setho se seng sa lelapa se ka ’na sa se thahaselle, empa tse ling tsa thahasella. Batho ka bobona baa fetoha; mathata a boima bophelong a ka ’na a tsosa tlhokomelo bakeng sa litlhoko tsa moea.—Bona le Esaia 6:8, 11, 12.

Ke hobane’ng ha Lipaki tsa Jehova li hlorisoa le ho buuoa hampe?

Jesu o itse: “Ekare ha lefatše le le hloea, le tsebe hobane le ntlhoile pele ho lōna. Hojane le le ba lefatše, lefatše le ka be le rata se sa lona; ereka ha le se ba lefatše, ke mpa ke le khethile lefatšeng, ka baka leo lefatše le le hloile.” (Joh. 15:18, 19; bona le 1 Petrose 4:3, 4.) Bibele e bontša hore lefatše lohle le rapaletse tlas’a taolo ea Satane; ke eena mohlohlelletsi e moholo oa mahloriso.—1 Joh. 5:19; Tšen. 12:17.

Jesu a boela a bolella barutuoa ba hae: “Le tla hlouoa ke bohle ka baka la lebitso la ka.” (Mar. 13:13) Lentsoe “lebitso,” mona le bolela boemo boo Jesu a leng ho bona, Morena oa Messia. Mahloriso a tlisoa ke hobane Lipaki tsa Jehova li etelletsa pele litaelo tsa hae ka pele ho tsa ’musi leha e le ofe oa lefatše.

Haeba e Mong a Re—

‘Ke hobane’ng ha lōna le sa amehe ho etseng lintho tse thusang ho etsa lefatše (metse) sebaka se molemo ho phela ho sona?’

U ka ’na ua arabela: ‘Maemo a metseng ho bonahala e le a bohlokoa ho uena, ’me le ho ’na ke a bohlokoa. Nke ke botse, Ke bothata bofe boo u ikutloang hore bo lokela ho eloa hloko pele?’ ’Me mohlomong u ka eketsa: ‘Ke hobane’ng ha u ikutloa hore hona ho fetohile tlhoko e khōlō? . . . Ka ho hlakileng, ho ka ba molemo ha ho ka nkoa bohato bo potlakileng ka taba ena, empa kea tiisa u tla lumela hore re ka rata ho bona ntlafatso motheong oa nako e telele. Ke eona tsela eo rōna Lipaki tsa Jehova re atamelang taba ka eona. (Hlalosa seo re se etsang ho thusa batho ho sebelisa metheo ea Bibele bophelong ba bona e le hore ho ka fihloa motsong oa taba motheong oa botho; hape, seo ’Muso oa Molimo o tla se etsa, le hore na ke hobane’ng ha hona ho tla rarollela batho bothata ka ho sa feleng.)’

Kapa u ka re: ‘(Kamor’a ho koahela tse ling tsa lintlha tse karabelong e kaholimo . . . ) Batho ba bang ba tlatsetsa ntlafatsong ea metse ka ho fana ka chelete; ba bang ba ho etsa ka litšebeletso tsa boithaopo. Lipaki tsa Jehova li li etsa ka bobeli. E re ke hlalose.’ ’Me mohlomong u ka eketsa: (1) ‘Hore motho e be e mong oa Lipaki tsa Jehova, o tlameha ho hlokomela ho lefa makhetho; hoo ho nea ’muso chelete ea ho fana ka litšebeletso tse hlokahalang.’ (2) ‘Re etsa ho fetang hoo, re etela matlung a batho, re fana ka thuso ea ho ithuta Bibele le bona ntle ho tefello. Ha ba tloaelana le seo Bibele e se buang, ba ithuta ho sebelisa metheo ea Bibele ’me kahoo ba loana ka katleho le mathata a bona.’

Monyetla o mong: ‘Ke thabela ha u hlahisitse taba ena. Batho ba bangata ha ho mohla ba kileng ba botsa ho fumana hore na Lipaki li hlile li etsa’ng ka litaba tsa metse. Ho hlakile hore litsela li ngata tsa ho fana ka thuso.’ ’Me mohlomong u ka eketsa: (1) ‘Ba bang ba ho etsa ka ho thea mekhatlo—lipetlele, mahae a ba tsofetseng, litsi tsa ho phekola ba lemalletseng lithethefatsi, jj. Ba bang ba ka ’na ba ithaopela ho ea malapeng a batho le ho fana ka thuso e loketseng kamoo ba ka khonang. Ke sona se etsoang ke Lipaki tsa Jehova.’ (2) ‘Re hlokometse hore ho na le ntho e le ’ngoe e ka fetolang pono eohle ea motho bophelong, ’me eo ke tsebo ea seo Bibele e bontšang hore ke oona morero oa bophelo le seo bokamoso bo se tšoereng.’

Tlhahiso e eketsehileng: ‘Ke ananela ha u hlahisitse potso eo. Re lakatsa ho bona maemo a ntlafala, na ha ho joalo? Nke ke botse, U ikutloa joang ka se entsoeng ke Jesu Kreste ka boeena? Na u ka re ho tsamaea hoa hae a thusa batho ho ne ho le molemo? . . . Re leka ho latela mohlala oa hae.’

‘Bakreste ba lebelletsoe ho ba lipaki tsa Jesu, e seng tsa Jehova’

U ka ’na ua arabela: ‘U hlahisitse ntlha e thahasellisang. ’Me u nepile hore re na le boikarabelo ba ho pakela Jesu. Ke ka lebaka leo libukeng tsa rōna ho hatisoang karolo ea Jesu morerong oa Molimo. (Mohlomong u ka rata ho sebelisa buka kapa makasine ea morao-rao ho bontša sena.) Empa ho hong ke hona hoo e ka ’nang eaba ho hocha ho uena. (Tšen. 1:5) . . . Jesu e ne e le “Paki e tšepehang” ea mang? (Joh. 5:43; 17:6) . . . Jesu o beile mohlala oo re lokelang ho o latela, na ha ho joalo? . . . Ke hobane’ng haele hoa bohlokoa hakana ho tseba Jesu le Ntate oa hae? (Joh. 17:3)’