Se Tlisang Thabo ka Lapeng

Ho Feta Selemo sa Pele sa Lenyalo ka Katleho

Monna o re: “Ke makalitsoe ke hore na ’na le mosali oa ka re fapane hakaakang! Ka mohlala, ke rata ho tsoha hoseng, empa eena o rata ho robala bosiu haholo. Ho feto-fetoha ha maikutlo a hae hona ho nkemisa hlooho! Ntho e ’ngoe hape ke hore ha ke pheha, o lula a ntšoaea liphoso, haholo-holo ha ke phumola matsoho a ka ka fatuku.”

Mosali o re: “Monna oa ka ha a bue haholo. Empa ’na ke tloaetse lapeng. Ke batho ba ipuelang, haholo-holo nakong eo re jang. Bothata bo bong ke hore ha monna oa ka a pheha, o sebelisa fatuku e le ’ngoe ho phumola lijana le matsoho a hae! Ha a etsa joalo, kea teneha! Ebe ke hobane’ng ha ho le thata hakaale ho utloisisa banna? Batho ba khona joang ho etsa hore manyalo a bona a atlehe?”

HAEBA u sa tsoa kena lenyalong, na u tobane le mathata a tšoanang le aa? Na ho bonahala eka molekane oa hao ka ho panya ha leihlo o se a e-na le liphoso le mefokolo eo a neng a se na eona ha le ntse le tšepisane lenyalo? U ka etsa joang hore u fokotse “matšoenyeho a letsatsi le letsatsi ao batho ba nyalaneng ba tla ba le ’ona”?—1 Bakorinthe 7:28, Today’s English Version.

Taba ea pele, u se ke ua lebella hore kaha uena le molekane oa hao le nkile likano tsa lenyalo, seo se bolela hore hang-hang le se le le litsebi tsa bophelo ba lenyalo. E ka ’na eaba u ile ua ithuta mekhoa e metle ea ho sebelisana le batho ha u ntse u le lesoha, mohlomong e ile ea ba ea ntlafala ha le ntse le tšepisane lenyalo. Leha ho le joalo, u tla lokela ho sebelisa mekhoa eo kaofela lenyalong ka litsela tse ncha, mohlomong u be u tlamehe ho ithuta e meng e mecha. Na ebe u tla etsa liphoso? Joang kapa joang u tla li etsa. Na u ka ba le tsebo e hlokahalang? Ha ho potang!

Mokhoa o molemo ka ho fetisisa oa ho ntlafatsa tsebong efe kapa efe, ke hore u botse setsebi sa ntho eo u batlang ho ntlafatsa ho eona ebe u sebelisa keletso ea sona. Setsebi se seholo sa lenyalo ke Jehova Molimo. Etsoe ke eena ea re bōpelletseng le takatso ea ho nyala kapa ho nyaloa. (Genese 2:22-24) Hlokomela hore na Lentsoe la hae, Bibele, le ka u thusa joang hore u hlōle mathata u be u be le tsebo e hlokahalang hore u fete selemo sa pele sa lenyalo ka katleho.

TSEBO EA 1. ITHUTENG HO RERA LINTHO HAMMOHO

Ke’ng e etsang hore ho be thata? Monna e mong ea lulang Japane ea bitsoang Keiji,a ka linako tse ling o ne a lebala hore liqeto tseo a li etsang li ama mosali oa hae. O re: “Ha batho ba ne ba re mema kae-kae, ke ne ke lumela ke e-s’o buisane le mohats’a ka. Joale hamorao ke ne ke fumana hore mohats’a ka o ne a sa khone ho ea ka mabaka a itseng.” Monna e mong oa Australia ea bitsoang Allen, eena o re: “Ke ne ke nka hore monna ea buisanang le mosali oa hae pele ka lintho ke selehe.” O ne a e-na le bothata boo ka lebaka la tsela eo a hōtseng ka eona. Ho ne ho le joalo le ka Dianne, ea lulang Brithani. O re: “Ke ne ke tloaetse ho batla likeletso ho ba heso. Ka hona, qalong ke ne ke botsa bona ha ke etsa liqeto ho e-na le ho botsa monna oa ka.”

Tharollo ke efe? Hopola hore Jehova Molimo o nka banyalani e le “nama e le ’ngoe.” (Matheu 19:3-6) Ho eena ha ho na kamano e ’ngoe ea batho eo a e nkang e le ea bohlokoa ho feta ea monna le mosali! E le hore banyalani ba boloke kamano eo e le matla, ba lokela ho buisana ka bolokolohi.

Monna le mosali ba ka ithuta ho hongata ha ba hlahloba tsela eo Jehova Molimo a ileng a buisana le Abrahama ka eona. Ka mohlala, ka kōpo bala puisano e tlalehiloeng ho Genese 18:17-33. Hlokomela hore Molimo o ile a hlompha Abrahama ka litsela tse tharo. (1) Jehova o ile a hlalosa seo a neng a rerile ho se etsa. (2) O ile a mamela ha Abrahama a ntša maikutlo a hae. (3) Jehova o ile a leka ka hohle hore a fetole tsela eo a neng a tla etsa lintho ka eona e le ho nahanela seo Abrahama a neng a se kōpa. U ka latela mokhoa oo joang ha u buisana le molekane oa hao?

LEKA HO ETSA TJENA: Ha u tšohla taba e tla ama molekane oa hao, (1) hlalosa hore na u ka rata hore boemo bo sebetsoe joang, empa ntša maikutlo a hao e le tlhahiso, eseng e le qeto eo u seng u e entse kapa taelo; (2) botsa mohats’a hao hore na eena o ikutloa joang ka taba eo, ’me u utloisise hore o na le tokelo ea ho ba le maikutlo a fapaneng le a hao; hape (3) u etse hore ‘ho ba le kahlolo e molemo ha hao ho ke ho tsejoe’ ka hore ha ho khoneha, u latele khetho ea molekane oa hao.—Bafilipi 4:5.

TSEBO EA 2. ITHUTE HO BUA KA TSELA E NAHANELANG

Ke’ng e etsang hore ho be thata? E ka ’na eaba u tloaetse ho ntša maikutlo a hao ka tsela e hatellang kapa e sa nahaneleng, mohlomong ka lebaka la tsela eo u hōlisitsoeng ka eona lapeng kapa ka lebaka la sebaka seo u hōletseng ho sona. Ka mohlala, Liam ea lulang Europe, o re: “Sebakeng seo ke tsoang ho sona, batho ba ipuela feela ba sa nahanele maikutlo a ba bang. Ka hona, tsela e sa nahaneleng eo ke neng ke ntša maikutlo ka eona hangata e ne e utloisa mosali oa ka bohloko. Ke ile ka tlameha ho ithuta ho ba mosa haholoanyane.”

Tharollo ke efe? U se ke ua nahana hore mohats’a hao o batla hore u bue le eena ka tsela eo u tloaetseng ho ipuela ka eona. (Bafilipi 2:3, 4) Keletso eo moapostola Pauluse a ileng a e fa moromuoa e mong e ka thusa le batho ba qetang ho nyalana. O ile a re: “Lekhoba la Morena ha ho hlokahale hore le loane, empa ho hlokahala hore le be bonolo.” Ho latela Segerike sa boholo-holo, lentsoe le fetoletsoeng e le “bonolo” le ka boela la fetoleloa e le “mosa.” (2 Timothea 2:24; Bibele ea Sesotho) Motho ea mosa o khona ho lemoha haeba taba e lokela ho sebetsoa ka tsela e nahanelang le e lerato, e ke keng ea khopisa motho e mong.

LEKA HO ETSA TJENA: Haeba ho e-na le ntho e itseng e u halefisitseng ka molekane oa hao, nakong eo u buisanang le eena nka hore u buisana le motsoalle oa hao oa hlooho ea khomo kapa mohiri oa hao. Na molumo oa lentsoe la hao le mantsoe ao u a sebelisang e tla ’ne e be tse tšoanang? Joale nahana hore na ke hobane’ng ha u lokela ho buisana le mohats’a hao ka tsela e mo hlomphang le e mosa ho feta motsoalle oa hao kapa eena mohiri oa hao.—Bakolose 4:6.

TSEBO EA 3. ITHUTE HO PHETHA BOIKARABELO BA HAO BO BOCHA

Ke’ng e etsang hore ho be thata? Qalong monna a ka ’na a sebelisa bohlooho ba hae ka tsela e utloisang mosali bohloko a sa elelloe, ’me mosali eena e ka ’na eaba ha a e-s’o tloaele ho etsa litlhahiso ka tsela e hlomphang. Ka mohlala, monna e mong oa Italy ea bitsoang Antonio, o re: “Ho ne ho se mohla Ntate a rerisanang le ’Mè ka liqeto tsa lelapa tseo a neng a li etsa. Ka hona, qalong ke ne ke laola lelapa la ka joalokaha eka ke morena.” ’Mè e mong oa Canada ea bitsoang Debbie, eena o re: “Ke ne ke batla hore monna oa ka a be makhethe. Empa tsela eo ke neng ke mo qobella ka eona ho bonahala e ne e etsa hore a be manganga le ho feta.”

Tharollo ke efe bakeng sa monna? Banna ba bang ba ferekanya seo Bibele e se buang ha e re basali ba ikokobetse le seo e se buang ha e re bana ba mamele batsoali. (Bakolose 3:20; 1 Petrose 3:1) Leha ho le joalo, Bibele e re monna o lokela ho “khomarela mosali oa hae, ’me bao ba babeli e tla ba nama e le ’ngoe”; empa ha e bue joalo ka kamano ea batsoali le bana. (Matheu 19:5) Jehova o hlalosa mosali e le motlatsi kapa molekane oa monna oa hae. (Genese 2:18) Ha ho mohla a kileng a re ngoana e tla ba motlatsi kapa molekane oa motsoali oa hae. Joale u nahana’ng—na monna ea tšoarang mosali joaloka ngoana o hlompha tokisetso ea lenyalo?

Ha e le hantle, Lentsoe la Molimo le u khothalletsa hore u tšoare mosali oa hao ka tsela eo Jesu a tšoarang phutheho ea Bokreste ka eona. U ka nolofalletsa mosali oa hao hore a u nke u le hlooho ea hae haeba (1) u sa lebelle hore a ikokobeletse uena hang-hang le ka ho hloka sekoli, le haeba (2) u mo rata joalokaha u ithata, esita le haeba ho hlaha mathata.—Baefese 5:25-29.

Tharollo ke efe bakeng sa mosali? Amohela taba ea hore hona joale monna oa hao o behiloe ke Molimo hore e be hlooho ea hao. (1 Bakorinthe 11:3) Haeba u hlompha monna oa hao, u hlompha Molimo. Haeba u sa ikokobeletse bohlooho ba hae, ha u senole feela tsela eo u ikutloang ka eona ka monna oa hao, empa u senola le tsela eo u ikutloang ka eona ka Molimo le litaelo tsa hae.—Bakolose 3:18.

Ha le tšohla mathata a lōna, ithute ho hlasela bothata, eseng monna oa hao. Ka mohlala, ho na le nako eo Mofumahali Esthere a neng a batla hore monna oa hae, e leng Morena Assueruse, a lokise boemo bo neng bo bontša ho hloka toka. Ho e-na le hore a hlasele monna oa hae, o ile a itlhalosa ka mosa. Monna oa hae o ile a amohela tlhahiso ea hae ’me qetellong a etsa se nepahetseng. (Esthere 7:1-4; 8:3-8) Monna oa hao o tla ithuta ho u rata ka ho tebileng haeba (1) u mo fa nako ea hore a ithute ho phetha kabelo ea hae e ncha ea ho ba hlooho ea lelapa hantle, le haeba u (2) mo hlompha, esita le ha a etsa liphoso.—Baefese 5:33.

LEKA HO ETSA TJENA: Ho e-na le hore u lule u nahana ka lintho tseo u nkang hore mohats’a hao o lokela ho ntlafatsa ho tsona, nahana ka tseo uena u lokelang ho ntlafatsa ho tsona. Banna: Haeba u utloisa mosali oa hao bohloko ka tsela eo u sebelisang bohlooho ba hao hampe ka eona kapa ka tsela eo u hlōlehang ho bo sebelisa ka eona, mo botse hore na u ka ntlafatsa hokae, ebe u ngola litlhahiso tseo fatše. Basali: Haeba monna oa hao a nka hore ha u mo hlomphe, mo botse hore na u ka ntlafatsa hokae, ’me u ngole litlhahiso tseo fatše.

U se ke Ua Lebella Mohlolo

Ho ithuta ho ba le kamano e thabileng le e tsitsitseng lenyalong ho tšoana le ho ithuta ho palama baesekele. U lebeletse hore ka linako tse ling u tla oa ha u ntse u ntlafatsa tsebo ea hao ea ho e palama. Ka tsela e tšoanang, u lokela ho lebella hore u tla etsa liphoso tse tla u soabisa ha u ntse u ithuta bophelo ba lenyalo.

E-ba le linako tsa ho itšeha. U se ke ua nka lintho tseo mohats’a hao a amehileng ka tsona habobebe, empa le teng u ithute ho itšeha ha u entse liphoso. Fumana menyetla ea ho thabisa mohats’a hao selemong sa lōna sa pele sa lenyalo. (Deuteronoma 24:5) Ka holim’a tsohle, lumella Lentsoe la Molimo hore le le tataise kamanong ea lōna. Haeba u etsa joalo, lenyalo la hao le tla matlafala ha lilemo li ntse li feta.

[Mongolo o botlaaseng ba leqephe]

IPOTSE . . .

▪ Na ke tšollela mohats’a ka maikutlo, kapa ke khetha ho a tšollela bathong ba bang?

▪ Lihoreng tse 24 tse fetileng, ke eng eo ke e entseng eo ka ho khetheha e bontšang hore ke rata mohats’a ka ebile kea mo hlompha?

[Lebokose/Litšoantšo tse leqepheng la 11, 12]

Bibele e Pholositse Lenyalo la Rōna

Toru le Akiko ba ne ba ratana ha ba nyalana. Empa ka mor’a likhoeli tse robeli feela, banyalani bana ba Majapane ba ile ba etsa qeto ea ho hlalana. Ba pheta se ileng sa etsahala.

Toru: “Ke ile ka fumana hore ’na le mosali oa ka re fapane ho feta kamoo ke neng ke nahanne kateng. Ka mohlala, ha re shebella TV, ’na ke ne ke rata ho shebella lipapali, eena a rata lipale. Ke ne ke rata ho intša, eena a rata ho ba lapeng.”

Akiko: “Toru o ne a etsa ntho leha e le efe eo ba habo ba reng a e etse, empa o ne a sa mpotse pele. Ke ile ka mo botsa, ‘Ke mang oa bohlokoa ho uena pakeng tsa ka le ’mè oa hao?’ Hape ke ne ke tšosoa ke tsela eo Toru a neng a bua leshano ka eona. Ke ile ka mo bolella hore leshano le le leng le isa ho le leng le hore haeba a sa khaotse ho bua leshano, re tla tlameha ho arohana.”

Toru: “Ke ile ka imeloa kelellong eaba ke kōpa keletso ho mookameli oa ka hore na ke sebelisane le mosali oa ka joang. O ile a re: ‘Mo bolelle hore a koale molomo. Ha a ka ’na a koma-koma, u mo otle ka e tla mo tsosa fatše.’ Ka lekhetlo le leng ke ile ka jabela Akiko ka ba ka phethola tafole. Re ile ra loana hampe hoo ka mor’a moo a ileng a tloha lapeng. Ke ile ka lokela ho ea mo lata hoteleng Tokyo hore a khutlele lapeng. Qetellong re ile ra etsa qeto ea ho hlalana. Ha ke ea mosebetsing hoseng ha letsatsi leo, mosali oa ka o ile a qala o paka lintho tsa hae.”

Akiko: “Ha ke isa mekotla ea ka monyakong o ka pele, ho ile ha e-ba le motho ea kokotang monyako. Ha ke bula, ho ne ho eme mosali e mong. E ne e le e mong oa Lipaki Tsa Jehova. Ke ile ka re a kene ka tlung.”

Toru: “Ha ke fihla ofising, ke ile ka fetola maikutlo ka taba ea hore re hlalane, eaba ke khutlela hae ka potlako. Ha ke fihla, ke ile ka fumana Akiko a buisana le mosali enoa. Mosali eo o ile a re ho ’na: ‘Ho hlokahala le ke le etse ntho itseng le le ’moho. Na le ka rata ho ithuta Bibele?’ Ke ile ka re: ‘Nka rata, ntho leha e le efe feela e ka pholosang lenyalo la rōna, e lokile!’”

Akiko: “Mosali eo o ile a etsa litokisetso tsa hore re ithute Bibele. Maemo a ile a fetoha ha re bala tlhaloso ea Bibele ka tokisetso ea lenyalo. E re: ‘Ke ka lebaka leo monna a tla siea ntat’ae le ’m’ae a khomarele mosali oa hae ’me e tla ba nama e le ’ngoe.’”—Genese 2:24.

Toru: “Hang feela ke ile ka utloisisa se neng se boleloa. Ke ile ka re ho batsoali ba ka: ‘Ho tloha hona joale, ke tla buisana le mohats’a ka pele nka etsa liqeto.’ Ke ile ka ba ka tlohela ho noa joala haholo. Hape ke ile ka leka ho bua ’nete feela ka mor’a hore ke ithute hore Molimo o hloile leshano.”

Akiko: “Le ’na ke ile ka fetoha. Ka mohlala, ke ne ke tloaetse ho hanyetsa Toru. Empa ka mor’a hore ke bone kamoo a neng a sebelisa melao-motheo ea Bibele kateng, ke ile ka qala ho mo tšehetsa. (Baefese 5:22-24) Hona joale re se re qetile lilemo tse 28 re thabile lenyalong la rōna. Re khonne ho hlōla mathata a rōna ka ho tsebana haholoanyane le ka ho sebelisa keletso e bohlale e fumanoang Bibeleng.”