Bibele e Fetola Batho

’MÈ E MONG ea se nang molekane oa Russia ea neng a lemaletse lithethefatsi o ile a thusoa ke eng hore a tlohele mokhoa oo a be a ntlafatse kamano ea hae le bana ba hae? Ntate ea neng a se na lehae oa Kyoto, Japane, o ile a fumana kae matla le sebete sa ho hlōla bofokoli boo a neng a e-na le bona bo entseng hore a qetelle a futsanehile? Ke eng e ileng ea thusa le-cowboy la Australia hore le tlohele ho itlopa joala? Ikutloele hore na batho bana ba re’ng.

“Ke ile ka ithuta hore ke tlameha ho itjara.”​—NELLY BAYMATOVA

LILEMO: 45

NAHA EA HESO: RUSSIA

PELE: KE NE KE LEMALETSE LITHETHEFATSI

BOPHELO BA KA BA NAKONG E FETILENG: Ke hōletse Vladikavkaz, motse-moholo oa Republic of North Ossetia (eo hona joale e leng Alania). Lelapa leso le ne le ruile. Empa ho sa tsotellehe lintho tse bonahalang tseo ke neng ke e-na le tsona, ke ne ke sa thaba bophelong. Ha ke le lilemo li 34, ke ne ke se ke ile ka nyaloa habeli empa manyalo ao ka bobeli a senyeha. E ne e se e le lilemo tse leshome kaofela ke lemaletse lithethefatsi ’me ke ne ke se ke ile ka ea tleliniking ka makhetlo a mabeli ho ea loantša bothata boo. Le hoja ke ne ke e-na le bana ba babeli, ka nako eo ke ne ke se na taba le bona; ke ne ke bile ke se na kamano e tloaelehileng le metsoalle ea ka kapa ba lelapa.

’Mè e ne e se e le Paki ea Jehova ’me hangata ke ne ke ee ke mo utloe a lla ka lebaka la ka a bile a kōpa Jehova hore a nthuse. Ke ne ke re ka pelong: ‘’Mè o nahana mehlolo e mekaakang! Jehova a ka nthusa joang?’ Ho na le nako eo ke ileng ka leka ho tlohela lithethefatsi. Empa ke ne ke se na matla a ho li tlohela ntle le hore ke thusoe. Ka lekhetlo le leng ke ile ka khona ho qeta matsatsi a mabeli ke sa li sebelisa. Ke ile ka etsa qeto ea ho tloha moo, eaba ke tsoa ka fensetere. Ka bomalimabe, ke ne ke le mokatong oa bobeli. Ke ile ka oa ’me ka robeha letsoho le leoto, ka ba ka lemala mokokotlo. Ke ile ka ba liphateng nako e fetang khoeli.

Nakong eo ke ne ke okoa ke ’Mè ’me ha aa ka a ’nyatsa. O ne a utloisisa hore ka nako eo ke fokola haholo maikutlong. Leha ho le joalo, pel’a bethe ea ka o ne a siea limakasine tsa Tsoha!a Ke ile ka li bala kaofela ’me ka utloa li thahasellisa li bile li na le boitsebiso bo rutang. Eaba ke etsa qeto ea ho ithuta Bibele le Lipaki.

KAMOO BIBELE E FETOTSENG BOPHELO BA KA KATENG: Ntho e ’ngoe eo Bibele e nthutileng eona ke ho ba le boikarabelo. Ho e-na le hore ke lebelle hore ’mè oa ka e be eena ea mphelisang, ke ile ka ithuta hore ke tlameha ho itjara le ho hlokomela bana ba ka litabeng tsa lichelete. Ho ne ho se bonolo ho qala mosebetsi o tsitsitseng ka mor’a ho etsa borata ka nako e telele.

Keletso e ho Deuteronoma 6:5-7 e bolellang batsoali hore ba rute bana ba bona ka Molimo, le eona e ile ea nthusa haholo. Ke ile ka lemoha hore ke ikarabella ho Molimo bakeng sa tsela eo ke hōlisang bana ba ka ba babeli ka eona. Seo se ile sa etsa hore ke qale ho qeta nako le bona le ho hōlisa lerato la ka ho bona.

Ke ile ka ananela haholo monyetla oo Jehova a mphileng oona oa hore ke ithute ’nete ka eena. Ka lebaka leo, ke ile ka nehela bophelo ba ka ho eena ’me ka kolobetsoa ke le e mong oa Lipaki Tsa Jehova.

MELEMO EO KE E FUMANENG: Kaha ke ithutile ho laola bohale, hona joale re se re utloana le ’Mè. Kamano e teng pakeng tsa ka le bana ba ka le eona e ntlafetse haholo.

Ka mor’a hore ke ithute ho hloea lintho tse sa khahliseng Molimo, ha ke sa na mathata a mangata ao ke neng ke e-na le ’ona ka lebaka la tsela eo ke neng ke phela ka eona. Hona joale se nthabisang haholo ke ho thusa ba bang hore ba ithute ’nete ka Molimo oa rōna ea lerato, Jehova.

“Ke nka hore bophelo ba ka bo pholositsoe litleneng tsa lefu.”​—MINORU TAKEDA

LILEMO: 54

NAHA EA HESO: JAPANE

PELE: KE NE KE LULA LITERATENG

BOPHELO BA KA BA NAKONG E FETILENG: Ke hōletse motseng oa Yamaguchi, ke hōlisoa ke Ntate le Nkhono. Ha ke tsebe ’mè oa ka. Nkhono o ile a hlokahala ha ke le lilemo li 19, eaba ke sala le Ntate. Ke ne ke hiretsoe mosebetsi oa ho pheha, Ntate le eena o ne a etsa mosebetsi o tšoanang. Re ne re sebetsa lichifi tse sa tšoaneng, ka hona, re ne re bonana seoelo. Ke ile ka tloaela ho sebetsa lihora tse ngata le ho noa joala le metsoalle ea ka.

Ha nako e ntse e feta, ke ile ka qala ho utloa mosebetsi oa ka o ntena. Ke ile ka loana le mookameli oa ka eaba ke qala ho noa le ho feta. Qetellong ha ke le haufi le ho tšoara selemo sa bo30, ke ile ka etsa qeto ea ho tloha lapeng ’me ka ba mohahlauli. Ha ke felloa ke chelete, ke ile ka qala ho sebetsa k’hasinong ea pachinko (papali ea ho becha). Ke ile ka kopana le ngoanana e mong eaba rea nyalana. Empa re ile ra arohana ka mor’a lilemo tse peli le halofo feela.

Ke ne ke imetsoe maikutlong ke bile ke se na takatso ea ho etsa letho bophelong, eaba ke kena ka hlooho sekolotong sa ba alimanang ka lichelete. Ke ile ka baleha ba latang likoloto ’me ka ea lula ka nakoana le Ntate motseng oa heso, empa ka lula ke mo bolella mashano hoo re ileng ra qabana. Ke ile ka mo utsoetsa chelete eaba ke iphelisa ka nakoana ka ho becha. Empa qetellong ke ile ka futsaneha hoo ke ileng ka lula seteisheneng sa terene nako e teletsana. Ke ile ka fallela Hakata, hamorao ka ea Himeji ’me qetellong ka ea Kyoto. Ke ile ka lula literateng ka lilemo tse ’maloa.

KAMOO BIBELE E FETOTSENG BOPHELO BA KA KATENG: Ka 1999, ke ne ke le serapeng se seng sa boikhathollo se haufi le Nōka ea Kamogawa, Kyoto, ha ke atameloa ke bo-’mè ba babeli. E mong o ile a mpotsa, “Na u ka rata ho ithuta Bibele?” Ke ile ka lumela. Bakreste ba matla moeeng ba phutheho ea moo ea Lipaki Tsa Jehova ba ile ba ithuta Bibele le ’na ’me ba nthusa hore ke bone bohlokoa ba ho sebelisa melao-motheo ea Bibele. Ba ile ba etsa tlhahiso ea hore ke batle mosebetsi le bolulo. E le feela ho ba thabisa, ke ile ka ea libakeng tse ’maloa ho ea hlahlobeloa mosebetsi, empa ke ne ke hlile ke sa etse seo ka pelo eohle. Leha ho le joalo, hamorao ke ile ka qala ho rapella thuso ’me ka leka ka matla hore ke fumane mosebetsi, eaba qetellong kea o fumana.

Thapelo le eona e ile ea nthusa nakong eo ke neng ke tobane le teko e boima. Batho bao ke ba kolotang chelete, bao ke neng ke ba balehile, ba ile ba mpatla ba ba ba mphumana eaba ba batla chelete ea bona. Ke ile ka imeloa habohloko kelellong. Ka le leng ha ke ntse ke bala Bibele joaloka kamehla, ke ile ka bala temana ea Esaia 41:10. Temaneng eo, Molimo o tšepisitse bahlanka ba hae ba tšepahalang: “Ka sebele ke tla u thusa.” Tšepiso eo e ile ea ’matlafatsa ea ba ea mpha sebete. Ke ile ka sebetsa ka thata ’me qetellong ka lefa likoloto tsa ka. Ka 2000, ke ile ka tšoaneleha hore nka kolobetsoa ke le e mong oa Lipaki Tsa Jehova.

MELEMO EO KE E FUMANENG: Seo ke ithutileng sona Bibeleng se ile sa ntšusumeletsa hore ke lokise kamano ea ka le ntate oa ka ’me o ile a ntšoarela ka liketso tsa ka tsa nakong e fetileng. O ne a thabetse hore ebe ke ithutile ho phela ka melao ea Bibele. Ha e le hantle, ke nka hore bophelo ba ka bo pholositsoe litleneng tsa lefu ka lebaka la ho phela tumellanong le melao-motheo ea Bibele.

Ho phaella moo, hona joale ke khona ho iphelisa kaha kea sebetsa. (Baefese 4:28; 2 Bathesalonika 3:12) Ntho e ’ngoe ke hore ke fumane metsoalle ea sebele phuthehong ea Bokreste. (Mareka 10:29, 30) Ke leboha Jehova ho tsoa botebong ba pelo ka seo a nthutileng sona.

“Ho ne ho se bonolo hore ke etse liphetoho tse hlokahalang.”​—DAVID HUDSON

LILEMO: 72

NAHA EA HESO: AUSTRALIA

PELE: KE NE KE ITLOPA JOALA

BOPHELO BA KA BA NAKONG E FETILENG: Ke ’na ngoana oa bo11 oa Ntate Willie le ’Mè Lucy. Lelapa leso le ne le lula motseng oa Maaborijene o bitsoang Aurukun, o neng o le karolong e hōle ka leboea, Queensland. Aurukun e ne e le motse o hahiloeng sebakeng se setle, lebōpong la Nōka ea Archer e haufi le leoatle. Batsoali ba ka ba ile ba re ruta ho tsoma le ho tšoasa litlhapi e le hore re ka iphelisa. Ka nako eo, rōna Maaborijene re ne re le tlas’a molao oa ’muso o neng o re hanela ho sebelisa chelete, ebile re ne re lumeletsoe ho lula sebakeng se itseng feela.

Batsoali ba ka ba ile ba etsa sohle seo ba ka se khonang hore ke be le mekhoa e metle ’me kaofela ha rōna ba re ruta hore re hlomphe batho ba baholo motseng le ho arolelana le ba bang ntho leha e ka ba nyenyane hakae. Ka lebaka leo, re ne re nka motho e mong le e mong e moholo joaloka motsoali.

Ha ke le lilemo li supileng Ntate o ile a hlokahala, eaba re fallela ’mishoneng oa Maaborijene o Mapoon, sebaka se ka bang lik’hilomithara tse 150 ka leboea ho Aurukun. Ha ke le lilemo li 12, ke ile ka qala ho ithuta ho sebetsa ka lipere le likhomo ’me haesale ke sebetsa litsing tse ngata tsa likhomo ke le mohlokomeli oa tsona (le-cowboy) ho fihlela ha ke se ke tla tšoara selemo sa bo50. Bophelo boo bo ne bo le thata. Ke ne ke noa haholo le hona ke noa khafetsa. Seo se ile sa etsa hore ke be le mathata le matšoenyeho a mangata.

Ka lekhetlo le leng ha ke qeta ho itlopa joala, ke ile ka tsoa ka hoteleng ke thekesela eaba ke kena ka pel’a koloi e tlang ka lebelo. Ke ile ka qeta lilemo tse peli ke le setsing sa phekolo, ke bile ke phekoloa le ka physiotherapy, ho bolelang hore ke ne nke ke ka hlola ke khona ho etsa mosebetsi oa ho hlokomela liphoofolo.

KAMOO BIBELE E FETOTSENG BOPHELO BA KA KATENG: Nakong eo ke ntseng ke le setsing sa phekolo, mosali e mong eo ke neng ke mo tloaetse o ile a ntlisetsa limakasine tsa Molula-Qhooa le Tsoha! hore ke li bale. Leha ho le joalo, ke ne ke sa fumana monyetla oa ho kena sekolo hantle, ka hona ke ne ke sa tsebe ho bala hantle. Ka letsatsi le leng ha ho ne ho chesa haholo, ke ile ka eteloa ke ntate-moholo e mong ea hlomphehang ea lilemo li 83. Ke ile ka re a kene ka tlung ’me ka mo fa metsi a pholileng. O ile a mpha lingoliloeng tsa Bibele ’me a mpotsa hore na nka rata hore a khutle a tl’o ntlhalosetsa se ngotsoeng ho tsona. Qetellong re ile ra qala ho ithuta Bibele hammoho kamehla. Ke ile ka qala ho bona hore ke tlameha ho fetola botho ba ka le tsela eo ke phelang ka eona haeba ke batla ho thabisa Molimo.

Ho ne ho se bonolo hore ke etse liphetoho tse hlokahalang. Leha ho le joalo, ka lebaka la seo ’Mè a nthutileng sona, ke ne ke hlompha ntate-moholo eo ke neng ke ithuta Bibele le eena haholo, ke bile ke mo hlompha ka lebaka la seo a nthutang sona. Leha ho le joalo, ke ne ke le leqe ho nehela bophelo ba ka ho Molimo. Ke ne ke nahana hore ke lokela ho tseba ntho e ’ngoe le e ’ngoe e ngotsoeng ka Bibeleng.

Ha e le hantle, motho eo ke sebetsang le eena ke eena ea ileng a nthusa hore ke lokise tsela eo ke nahanang ka eona tabeng ena. E ne e le Paki ea Jehova, ka hona o ile a ntlhokomelisa mantsoe a khothatsang ho Bakolose 1:9, 10. Temana eo e re re lokela ho “hōla tsebong e nepahetseng ea Molimo.” Mosebetsi-’moho eo o ile a nthusa hore ke hlokomele taba ea hore ke tla lula ke ithuta lintho tse ncha, ka hona ha ho na lebaka la hore ke ikhalale hobane ke sa tsebe lintho kaofela.

Ha ke qala ho itsoakanya le Lipaki Tsa Jehova, ho na le ntho e ileng ea nkhahla. Ke ile ka iponela ha batho ba litso tse sa tšoaneng ba kopane hammoho ho rapela Molimo ka kutloano. Tsela eo ba neng ba utloana ka eona e ile ea nkholisa hore ke fumane bolumeli ba ’nete, kahoo ka 1985, ke ile ka kolobetsoa hore ke be e mong oa Lipaki Tsa Jehova.

MELEMO EO KE E FUMANENG: Tsela ea ka ea ho bala e ntlafetse ’me hona joale ke qeta lihora tse ngata beke le beke ke thusa batho ba bang hore ba bale Bibele ba be ba ithute eona. Ho feta moo, mosali eane eo ke neng ke mo tloaetse ea ileng a qala ho ntlisetsa limakasine tsa Molula-Qhooa le Tsoha! hore ke li bale, le eena o ile a ithuta le Lipaki, eaba oa kolobetsoa ’me hona joale ke mosali oa ka ea ratehang. Ka bobeli ba rōna re ikutloa re thabile haholo hore ebe re thusa batho ba sebakeng sa Maaborijene hore ba ithute ka Jehova Molimo.

[Mongolo o botlaaseng ba leqephe]

[Ntlha e Qolotsoeng e leqepheng la 21]

’Na le mosali oa ka re ikutloa re thabile haholo hore ebe re thusa batho ba sebakeng sa Maaborijene hore ba ithute ka Molimo