Mamelang Lentsoe la Jehova

1-2. (a) Jehova o ’nile a bua le batho joang? (b) Re tl’o hlahloba’ng sehloohong see?

JEHOVA o rata ho bua le rona. Nakong e fetileng, o ne a bua le batho a sebelisa mangeloi, baprofeta le Mora oa hae Jesu Kreste. (Amose 3:7; Bagal. 3:​19; Tšen. 1:1) Mehleng ena, o bua le rona a sebelisa Lentsoe la hae Bibele. O ile a re fa eona e le hore re ka utloisisa tsela eo a nahanang ka eona le eo a etsang lintho ka eona.

² Ha Jesu a le lefatšeng, ho ile ha utloahala lentsoe la Jehova le hlahang leholimong ka makhetlo a mararo a fapaneng. A re hlahlobeng hore na Jehova o ile a re’ng, hore na re ithuta’ng mantsoeng ao a ileng aa bua le hore na re ka rua molemo joang ho ’ona.

 3. Mareka 1:​9-11 e re Jehova o ile a re’ng ha Jesu a ne a kolobetsoa, hona mantsoe ao a ne tiisa lintho life tse tharo tsa bohlokoa?

³ Mareka 1:​9-11 e bua ka lekhetlo la pele leo ka lona lentsoe la Jehova le ileng la utloahala le hlaha leholimong. (E bale.) O ile a re: “U Mora oa ka, ea ratoang; ke u amohetse.” U nahana hore Jesu o ile a ikutloa joang ha a utloa hore Ntate oa hae oa mo rata le hore oa mo tšepa? Mantsoe ana a Jehova a ile a tiisa lintho tse tharo tsa bohlokoa ka Jesu. Ea pele, Jesu ke Mora oa Jehova. Ea bobeli, Jehova o rata Mora oa hae. Ea boraro, Jehova o amohetse Mora oa hae. A re hlahlobeng e ’ngoe le ’ngoe ea tsona ka hloko.

 4. Ha Jesu a ne a kolobetsoa e ile ea e-ba Mora oa Molimo ka kutloisiso efe e ’ngoe hape?

⁴ “U Mora oa ka.” Mantsoe ana a ne a bontša ka ho hlaka hore Jehova o na le kamano e ntle le Mora oa hae. Pele Jesu a tla lefatšeng, e ne e se e ntse e le Mora oa Molimo. Leha ho le joalo, ha Jesu a ne a kolobetsoa e ile ea e-ba Mora oa Molimo ka kutloisiso e ’ngoe hape. Ka nako eo, Molimo o ile a tlotsa Jesu ka moea o halalelang ’me a mo fa tšepo ea hore o tla khutlela leholimong ho ea busa e le Morena le Moprista ea Phahameng ’Musong oa Molimo. (Luka 1:​31-33; Baheb. 1:​8, 9; 2:​17) Kahoo, hoa utloahala hore na ke hobane’ng ha Jehova a ile a re ho Jesu: “U Mora oa ka.”​—Luka 3:22.

 5. Re ka etsisa mohlala oa Jehova joang ha re bontša batho ba bang hore rea ba rata?

⁵ “U . . . ea ratoang.” Jehova ke mohlala o motle oo re ka o etsisang ha re bontša batho ba bang hore rea ba rata ka hore re batle menyetla ea ho ba khothatsa. (Joh. 5:​20) Rea thaba ha batho ba re bontša hore baa re rata ba bile ba re babatsa ha re entse lintho tse ntle. Ka tsela e tšoanang, bara le barali babo rona le litho tsa malapa a rona ba hloka hore re ba babatse le ho ba rata. Ha re babatsa batho ba bang, re matlafatsa tumelo ea bona ebile re ba thusa hore ba lule ba sebeletsa Jehova ka botšepehi. Batsoali le bona ba lokela ho babatsa bana ba bona. Ha batsoali ba babatsa bana ba bona ho tsoa pelong ’me ba ba bontša hore baa ba rata, ba thusa bana hore ba atlehe.

 6. Re na le lebaka lefe la ho tšepa Jesu?

⁶ “Ke u amohetse.” Mantsoe ana a bontša hore Jehova o ne a tšepa hore Jesu o tla etsa thato ea hae ka ho feletseng. Kaha Jehova o tšepa Mora oa hae, le rona re ka tšepa ka ho feletseng hore Jesu o tla phethahatsa litšepiso tsohle tsa Ntate oa hae. (2 Bakor. 1:​20) Ha re nahanisa ka lintho tseo Jesu a ileng a li etsa, re tla ikemisetsa ho etsisa mohlala oa hae nthong e ’ngoe le e ’ngoe eo a ileng a e etsa. Feela joalokaha Jehova a ne a tšepa hore Jesu o tla phetha thato ea hae ka ho feletseng, o boetse o lumela hore bahlanka ba hae bohle ba tla tsoela pele ho ithuta mohlaleng oa Mora oa hae.​—1 Pet. 2:21.

 7. Matheu 17:​1-5 e re Jehova o ile a bua neng hape a le leholimong, hona o ile a re’ng?

⁷ Bala Matheu 17:​1-5. Lekhetlo la bobeli leo ka lona lentsoe la Jehova le ileng la utloahala ho tsoa leholimong e ne e le ha Jesu “a fetoha sebopeho.” Jesu o ile a re Petrose, Jakobo le Johanne ba ee le eena ka holim’a thaba. Ha ba ntse ba le moo, ba ile ba bona pono e makatsang. Sefahleho sa Jesu se ile sa khanya ’me liaparo tsa hae tsa phatsima. Ponong eo, barutuoa ba Jesu ba ile bona Moshe le Elia ba bua le Jesu mabapi le lefu la hae le tsoho ea hae. Le hoja barutuoa bana ba bararo ba ne ba “imetsoe ke boroko,” ba ile ba bona pono ena nakong eo ba neng ba ntse ba hlaphohetsoe. (Luka 9:​29-32) Ka mor’a moo, ba ile ba koaheloa ke khanya e kholo eaba ba utloa lentsoe la Jehova le tsoa lerung. Ha Jesu a ne a kolobetsoa, Jehova o ile a bua mantsoe a bontšang hore oa mo rata ebile o mo amohetse ha a re: “Enoa ke Mora oa ka, ea ratoang, eo ke mo amohetseng.” Empa lekhetlong lena Jehova o ile a qetella ka hore: “Mo mameleng.”

 8. Pono eo barutuoa ba Jesu ba ileng ba e bona e ile ea thusa Jesu le barutuoa ba hae joang?

⁸ Pono eo e ne e bontša hore Jesu o ne a tla ba le matla joaloka Morena ’Musong oa Molimo. E tlameha ebe pono ena e ile ea khothatsa Jesu le ho mo matlafatsa e le hore a ka mamella mahloriso ’ohle ao a neng a tla thulana le ’ona. Pono eo e ile ea boela ea matlafatsa tumelo ea barutuoa ba Jesu le ho ba thusa ho mamella mathata ao ba neng ba tla thulana le ’ona ha ba ntse ba etsa mosebetsi oa bona. Lilemo tse ka bang 30 hamorao, moapostola Petrose o ile a bua ka pono ena ’me o ne a bontša hantle hore o ntse a e hopola.​—2 Pet. 1:​16-18.

 9. Jesu o ile a re’ng ha a ne a le lefatšeng?

⁹ “Mo mameleng.” Jehova o hlakisitse hore o batla hore re mamele Mora oa hae. Jesu o ile a re’ng ha a ne a le lefatšeng? O ile a bua lintho tse ngata tsa bohlokoa tseo re lokelang ho li mamela. Mohlala, o ile a ruta balateli ba hae hore na ba ka ruta batho ka ’Muso oa Molimo joang ’me ka ho pheta-pheta a ba hopotsa hore ba lule ba lebetse. (Mat. 24:​42; 28:​19, 20) O ile a re ba ikitlaetse ka matla ha ba etsa mosebetsi oa bona ’me a ba khothalletsa le hore ba se ke ba tela ha ba o etsa. (Luka 13:​24) Jesu o ile a boela a khothalletsa balateli ba hae hore ba ratane, ba lule ba momahane le hore ba mamele litaelo tsa hae. (Joh. 15:​10, 12, 13) Lintho tseo Jesu a ileng a re barutuoa ba hae ba li etse li ne li le bohlokoa. Le mehleng ena li ntse li le bohlokoa.

10-11. Re ka etsa’ng ho bontša hore re mamela Jesu?

¹⁰ Jesu o ile a re: “E mong le e mong ea leng ka lehlakoreng la ’nete o mamela lentsoe la ka.” (Joh. 18:​37) Re bontša hore rea mo mamela ha re “mamellana le ho tšoarelana ka bolokolohi.” (Bakol. 3:​13; Luka 17:​3, 4) Re boetse re bontša hore rea mamela ha re ruta batho ka ’Muso oa Molimo ‘nakong e tšoanelang le nakong e likhathatso.’​—2 Tim. 4:2.

¹¹ Jesu o ile a re: “Linku tsa ka li mamela lentsoe la ka.” (Joh. 10:​27) Balateli ba Jesu ba bontša ka liketso hore baa mo mamela. Ha ba lumelle “matšoenyeho a bophelo” hore a ba sitise ho mamela. (Luka 21:​34) Ba lula ba mamela litaelo tsa Jesu ho bata kapa ho chesa. Bara le barali babo rona ba bangata ba mamelletse mathata a akarelletsang ho hlorisoa, bofuma le likoluoa tsa tlhaho. Ho sa tsotellehe mathata ana ao ba thulanang le ’ona, ba lula ba tšepahala ho Jehova. Ha Jesu a ba khothatsa o re: “Ea nang le litaelo tsa ka ’me a li boloka, eo ke eena ea nthatang. Ea nthatang le eena o tla ratoa ke Ntate.”​—Joh. 14:21.

12. Tsela e ’ngoe eo re ka bontšang ka eona hore re mamela Jesu ke efe?

¹² Tsela e ’ngoe eo re ka bontšang ka eona hore re mamela Jesu ke ka hore re sebetse ’moho le bao a ba behileng hore ba re etelle pele. (Baheb. 13:​7, 17) Morao tjena, mokhatlo oa Molimo o entse liphetoho tse ngata tse akarelletsang tsela eo liboka tsa har’a beke li tšoaroang ka eona, lintho tseo re li sebelisang tšebeletsong ea tšimo le tsela eo re hahang le ho hlokomela Liholo Tsa ’Muso ka eona. Rea ananela hore ebe Jehova o re tataisa ka tsela ena e bontšang hore oa re rata le ho re nahanela. Re ka kholiseha hore Jehova o tla re hlohonolofatsa haeba re mamela le ho latela tataiso eo re e fuoang ke mokhatlo oa hae.

13. Re rua molemo ofe ha re mamela Jesu?

¹³ Re rua molemo haholo ha re mamela lintho tsohle Jesu a itseng re li etse. Jesu o ile a tšepisa barutuoa ba hae hore ba tla khatholoha ha ba mamela litaelo tsa hae. O ile a re: “Le tla fumanela meea ea lona khatholoho. Etsoe joko ea ka e mosa le mojaro oa ka o bobebe.” (Mat. 11:​28-30) Likosepele tse ’nè tse buang ka bophelo ba Jesu ho akarelletsa le Bibele eohle, li re thusa hore re rate Jehova haholoanyane le hore re etse lintho ka bohlale. (Pes. 19:7; 23:3) Jesu o re: “Ho thaba ba utloang lentsoe la Molimo ’me ba le boloka!”​—Luka 11:28.

14-15. (a) Johanne 12:​27, 28 e bua ka lekhetlo lefe la boraro leo ho lona lentsoe la Jehova le ileng la utloahala ho tsoa leholimong? (b) Mantsoe a Jehova a ile a matlafatsa Jesu joang?

¹⁴ Bala Johanne 12:​27, 28. Kosepele ea Johanne e tlaleha lekhetlo la boraro leo ka lona lentsoe la Jehova le ileng la utloahala ho tsoa leholimong. Matsatsi a seng makae pele ho lefu la hae, Jesu o ne a le Jerusalema a il’o keteka Paseka lekhetlo la ho qetela. O ile a re: “Moea oa ka o khathatsehile.” Eaba oa rapela o re: “Ntate, tlotlisa lebitso la hao.” Ka mor’a moo, Ntate oa hae o ile a bua a le leholimong a re: “Ke le tlotlisitse ’me ke tla boela ke le tlotlise.”

¹⁵ Jesu o ne a tšoenyehile ka lebaka la boikarabelo bo boima ba hore a lule a tšepahala ho Jehova. O ne a tseba hantle hore o ne a tl’o hlorisoa le ho shoa lefu le sehloho. (Mat. 26:​38) Ntho ea bohlokoa eo Jesu a neng a amehile ka eona e ne e le ho tlotlisa lebitso la Ntate oa hae. Jesu o ne a tšoenyehile ka hore lefu la hae le ne le tla etsa hore lebitso la Ntate oa hae le rohakoe ’me batho ba ne ba mo qosa ka hore ke monyefoli. E tlameha ebe mantsoe a Jehova a ile a etsa hore Jesu a be matla. O ne a kholisehile hore Jehova o tla tlotlisa lebitso la hae. Mantsoe ana a Ntate oa hae a ne a tla mo thusa hore a mamelle lintho tsohle tse bohloko tse neng li tla mo hlahela. Le hoja ho ka etsahala hore ebe e ne e le Jesu feela ea neng a utloisisa mantsoe ao a Ntate oa hae ka nako eo, Jehova o ile a etsa hore a tlalehoe ka Bibeleng.​—Joh. 12:​29, 30.

16. Re ka ’na ra tšoenyeha ka eng?

¹⁶ Joaloka Jesu, le rona re tšoenyehile ka hore batho ba se ke ba rohaka lebitso la Molimo. Mohlomong le rona re tšoaroa ka tsela e se nang toka. Kapa e ka ’na eaba re utloisoa bohloko ke mashano ao batho ba a buang ka rona. Re ka ’na ra nahana hore na mashano ana a senya Jehova lebitso hakaakang le mokhatlo oa hae. Maemong ana ’ohle, ho hopola mantsoe a Jehova a hlahang ho Johanne 12:​27, 28 ho ka re khothatsa haholo. Ha rea lokela ho tšoenyeha haholo ka mashano ao batho ba a buang ka Jehova le mokhatlo oa hae. Re ka kholiseha hore “khotso ea Molimo e fetang monahano oohle e tla lebela lipelo tsa [rona] le matla a [rona] a kelello ka Kreste Jesu.” (Bafil. 4:​6, 7) Ha ho mohla Jehova a tla hloleha ho halaletsa lebitso la hae. ’Muso oa hae o tla felisa lintho tsohle tse bohloko tseo Satane a li tlisetsang bahlanka ba Jehova.​—Pes. 94:​22, 23; Esa. 65:17.

17. Esaia 30:​21 e re Jehova o bua le rona joang mehleng ee?

¹⁷ Jehova o ntse a bua le rona le mehleng ena. (Bala Esaia 30:​21.) Ha se hore re utloa lentsoe la hae ka ho toba le tsoa leholimong ha a bua le rona. Empa o sebelisa Bibele ho bua le rona. Hape Jehova o sebelisa moea oa hae o halalelang ho thusa “motsamaisi ea tšepahalang” ho re fa lijo ka nako e tšoanetseng. (Luka 12:​42) Mokhatlo oa Jehova o re fa lingoliloeng, livideo le likhatiso tse rekotiloeng tse re thusang ho matlafatsa tumelo ea rona.

18. Bibele e re thusa joang hore re be le tumelo le sebete?

¹⁸ E se eka re ka lula re hopola mantsoe ao Jehova a ileng a a bua ha Mora oa hae a ntse a le lefatšeng. Bibele e re thusa hore re kholisehe hore Jehova o tla felisa lintho tsohle tse bohloko tseo Satane a re baketseng tsona. A re ikemisetseng ho lula re mamela Jehova. Ha re etsa joalo, re tla khona ho mamella mathata ’ohle ao re tobanang le ’ona hona joale le ao re tla tobana le ’ona nakong e tlang. Bibele e re: “Ho hlokahala hore le be le mamello, e le hore, ka mor’a hore le etse thato ea Molimo, le ka amohela phethahatso ea tšepiso.”​—Baheb. 10:36.