Hidep Pernah Ngarasa Sieun jeung Teu Boga Batur?

Tingali budak lalaki nu aya dina gambar. Éta budak katingalina keur sieuneun jeung teu boga batur. Hidep pernah teu ngarasa siga kitu?​— Saha waé pasti pernah. Kitab Suci nyaritakeun, sobat-sobat Yéhuwa gé pernah ngarasa sieun jeung ngarasa teu boga batur. Salah sahijina téh Élias. Hayu urang tingali caritana.

Élias hirup di Israil, lila saméméh Yésus lahir. Harita, nu jadi raja di Israil téh Ahab. Manéhna teu nyembah ka Allah nu bener, Yéhuwa. Ahab jeung Isebél, pamajikanana, nyarembah déwa Baal. Lolobana jalma di Israil gé tuturutan nyembah ka Baal. Ratu Isebél téh jahat pisan. Manéh­na hayang maéhan jalma-jalma nu nyarembah ka Yéhuwa, kaasup Élias! Ceuk hidep, naon nu dilakukeun Élias?​—

Élias kabur. Manéhna indit jauh ka tanah gurun, terus nyumput dina jero guha. Ceuk hidep, ku naon manéhna nyumput?​— Enya, manéhna sieuneun. Tapi, kuduna mah Élias teu perlu sieun. Naon sababna? Sabab manéhna nyaho Yéhuwa bisa nulungan manéhna. Yéhuwa pernah némbongkeun kahébatana-Na ka Élias. Hiji waktu, Yéhuwa ngajawab doa Élias ku cara ngadatangkeun seuneu ti langit. Jadi, ayeuna gé Yéhuwa pasti bisa nulungan Élias!

Waktu Élias keur di jero guha, Yéhuwa nanya ka manéhna, ’Élias, keur naon di dieu?’ Élias ngajawab, ’Ngan abdi nu masih nyembah ka Yéhuwa. Ngan abdi nu hirup kénéh, abdi sieun dipaéhan.’ Ceuk pamikir Élias mah kabéh nu nyembah ka Yéhuwa geus diparaéhan. Tapi, Yéhuwa méré nyaho, ‘Henteu, éta téh teu bener. Kami boga kénéh 7.000 jelema anu henteu nyarembah ka Baal. Ulah sieun. Aya loba pagawéan keur manéh!’ Ceuk hidep, Élias bungah teu ngadéngéna?​—

Naon nu bisa hidep conto ti Élias?​— Hidep teu perlu ngarasa sieun jeung ngarasa teu boga batur. Hidep boga babaturan nu nyaah ka Yéhuwa, ogé nyaah ka hidep. Yéhuwa gé kuat pisan jeung bakal terus nulungan hidep. Hidep bungah teu ngadéngéna?​—