KAHIRUPAN KRISTEN

Fitur Anyar pikeun Pasamoan Tengah Minggu

Ngamimitian Januari 2018, dina pasamoan tengah minggu bakal aya catetan jeung média tina Kitab Suci Terjemahan Dunia Baru édisi palajaran (nwtsty-E) online, sanajan Kitab Suci éta tacan aya dina basa Sadérék. Katerangan ieu pasti bakal leuwih ngabantu Sadérék pikeun nyiapkeun pasamoan. Nu leuwih penting, mugia ieu bisa nguatkeun sosobatan Sadérék jeung Yéhuwa, Bapa urang nu asih!

CATETAN

Dina catetan, aya katerangan ngeunaan budaya, géografi, jeung basa asli tina loba ayat Alkitab.

Mateus 12:20

Lampu anu geus kakalincesan: Lampu di imah-imah jaman baheula biasana téh mangrupa wadah leutik tina taneuh nu dieusian ku minyak jetun. Sumbu jaramina bakal nyedot minyak ka luhur supaya seuneuna tetep hurung. Dina basa Yunani, ”lampu anu geus kakalincesan” bisa jadi ngamaksudkeun sumbu nu ngaluarkeun haseup ku sabab arengna hurung kénéh, tapi seuneuna geus pareum. Nubuat di Yesaya 42:3 nunjukkeun yén Yésus téh karunyaan, anjeunna moal pernah mareuman harepan jalma nu rendah haté jeung ditindes, sanajan harepanana ngan sagedé silalatu.

Mateus 26:13

Sing percaya: Yunani, a·menʹ, disalin tina basa Ibrani ʼa·menʹ, hartina ”sing ngajadi kitu”, atawa ”pasti”. Yésus sababaraha kali ngagunakeun kekecapan ieu saacan nepikeun bebeneran, jangji, atawa nubuat, pikeun nandeskeun yén omonganana téh bener jeung bisa dipercaya. Cara Yésus ngagunakeun kecap ”sing percaya”, atawa amin, téh disebut unik dina buku-buku kaagamaan. Lamun disebutkeun dua kali (a·menʹ a·menʹ), sakumaha nu aya di kabéh Injil Yohanes, kekecapan Yésus ieu bisa ditarjamahkeun jadi ”sing percaya kana benerna”.—Yoh 1:51.

MÉDIA

Poto, gambar, sarta vidéo tanpa sora jeung animasi pikeun ngagambarkeun rincian-rincian dina Alkitab.

Bétpagé, Gunung Jetun, jeung Yérusalém

Vidéo singget ieu nunjukkeun jalan ti daérah wétan ka Yérusalém, nyaéta ti désa et-Tur modéren ka hiji tempat nu leuwih luhur di Gunung Jetun. Désa ieu téh dianggap Bétpagé nu aya dina Alkitab. Bétpagé téh aya di suku Gunung Jetun beulah wétan. Di beulah wétan Bétpagé, aya Bétania. Basa di Yérusalém, Yésus jeung murid-muridna osok mondok di Bétania, ayeuna mah disebut kota el-ʽAzariyeh (El ʽEizariya), ngaran dina basa Arab nu hartina ”Tempatna Lasarus”. Yésus osok mondok di imahna Marta, Maria, jeung Lasarus. (Mat 21:17; Mar 11:11; Luk 21:37; Yoh 11:1-2) Waktu indit ka Yérusalém, katingalina Yésus ngaliwatan jalan saperti nu aya dina vidéo. Dina tanggal 9 Nisan 33 M, Yésus numpak kaldé jalu ka Yérusalém ngaliwatan Gunung Jetun. Bisa jadi, Yésus numpak kaldéna ti Bétpagé.

Jalan ti Bétania ka Bétpagé
Bétpagé
Gunung Jetun
Walungan Kidron
Gunung Bait

Paku nu Nanceb dina Tulang Keuneung

Ieu téh poto ti tiruan paku tina beusi nu panjangna 11,5 cm, nu nanceb dina tulang keuneung manusa. Paku aslina kapanggih dina taun 1968 basa aya pangalian di Yérusalém beulah kalér. Ieu téh paku nu asalna ti jaman Rum kuno. Bukti arkéologi nunjukkeun yén paku-paku téh osok dipaké pikeun maku jelema kana tihang kayu. Katingalina, ieu téh paku nu sarua jeung nu dipaké ku prajurit Rum pikeun nancebkeun Yésus kana tihang. Paku ieu kapanggih di jero peti batu, nu disebut ossuary, wadah paranti neundeun tulang-tulang jalma maot sanggeus dagingna buruk. Hal ieu nunjukkeun yén jalma nu maot lantaran dipaku kana tihang téh meunang dikubur.—Mat 27:35.