36 Elihu akaendelea kusema:
2 “Uwe na subira zaidi ninapoendelea kueleza,
Kwa maana bado nina maneno ya kusema kwa niaba ya Mungu.
3 Nitazungumza kwa kina kuhusu ninayojua,
Nami nitatangaza kwamba uadilifu ni wa Muumba wangu.+
4 Kwa kweli maneno yangu si ya uwongo;
Yule ambaye ni mkamilifu katika ujuzi+ yuko hapa mbele yako.
5 Kwa kweli, Mungu ana nguvu,+ naye hamkatai yeyote;
Yeye ni mkuu katika nguvu zake za uelewaji.
6 Hatawaacha waovu waendelee kuishi,+
Lakini huwapa haki wanaoteseka.+
7 Yeye haondoi macho yake kwa waadilifu;+
Huwaketisha kwenye viti vya ufalme pamoja na wafalme,+ nao wanakwezwa milele.
8 Lakini ikiwa wamefungwa kwa pingu
Na kunaswa na kamba za mateso,
9 Huwafunulia mambo waliyotenda,
Uovu wao uliosababishwa na kiburi chao.
10 Hufungua masikio yao ili wapokee marekebisho
Na kuwaambia waache kutenda makosa.+
11 Wakitii na kumtumikia,
Wataishi siku zao zote kwa ufanisi,
Na miaka yao itafurahisha.+
12 Lakini wasipotii, wataangamia kwa upanga+
Na kufa bila ujuzi.
13 Wanaomkataa Mungu moyoni watakuwa na kinyongo.
Hawalilii msaada hata anapowafunga.
14 Wanakufa wakiwa bado vijana,+
Wakitumia maisha yao miongoni mwa wanaume makahaba wa hekaluni.+
15 Lakini Mungu huwaokoa wanaoteseka wakati wanapoteseka;
Hufungua sikio lao wanapokandamizwa.
16 Hukuvuta mbali kutoka kwenye ukingo wa taabu+
Na kukuleta mahali penye nafasi kubwa, pasipo na vizuizi,+
Na meza yako itakuwa na chakula chenye lishe ili kukufariji.+
17 Kisha utaridhika na hukumu itakayowapata waovu,+
Hukumu itakapotolewa na haki kutetewa.
18 Lakini jihadhari ghadhabu isikufanye uwe na chuki,+
Wala usikubali rushwa kubwa ikupotoshe.
19 Je, kilio chako cha kuomba msaada
Au mojawapo ya jitihada zako nyingi inaweza kukuepusha na taabu?+
20 Usiutamani usiku,
Watu wanapotoweka katika makao yao.
21 Jihadhari usigeukie kutenda uovu,
Kuchagua uovu badala ya mateso.+
22 Tazama! Mungu amekwezwa katika nguvu zake;
Ni nani aliye mfundishaji kama yeye?
23 Ni nani ameelekeza njia yake+
Au kumwambia, ‘Jambo ulilotenda si sawa’?+
24 Kumbuka kuzitukuza kazi zake,+
Ambazo wanadamu wameimba kuzihusu.+
25 Wanadamu wote wameziona,
Mwanadamu anayeweza kufa huzitazama kutoka mbali.
26 Naam, Mungu ni mkuu kuliko tunavyoweza kujua;+
Idadi ya miaka yake haiwezi kufahamika.+
27 Yeye huvuta juu matone ya maji;+
Yanaganda na kuwa mvua kutokana na ukungu wake;
28 Kisha mawingu huyamwaga chini;+
Yanawanyeshea wanadamu.
29 Kuna yeyote anayeweza kuelewa matabaka ya mawingu,
Mngurumo unaotoka katika hema lake?+
30 Tazama jinsi anavyoitandaza radi+ yake juu yake
Na kufunika vilindi vya bahari.
31 Kwa vitu hivyo yeye huwategemeza watu;
Huwapa chakula kwa wingi.+
32 Hufunika radi kwa mikono yake,
Naye huielekeza kwenye shabaha yake.+
33 Mngurumo wake husimulia kumhusu,
Hata mifugo husema ni nani anayekuja.