Naweza Kukabilianaje na Msongo wa Marika?

Barua kutoka kwa polisi mmoja katika Chicago, U.S.A., inaonyesha umaana wa kujua jibu la swali hilo. Yeye aandika:

“Mnamo Januari 15, 1990, nilikuwa nikishughulikia mfungwa mwenye umri wa miaka 18 aliyerudishwa Chicago kutoka Mississippi kwa waranti ya mtorokaji. Sehemu ya shughuli hiyo ni kutwaa mali yote ya mfungwa. Kati ya mali zake kulikuwako kitabu, Maswali Ambayo Vijana Huuliza—Majibu Yafanyayo Kazi.

“‘Je! ulisoma kitabu hiki?’ Nikauliza.

“‘Ndiyo,’ akajibu. ‘Nilipokuwa nimejificha katika Mississippi, nilifanya kazi katika shamba, na Mashahidi wa Yehova wawili walinipa kitabu hiki.’ Kisha akaanza kulia, akilia kwikwi asijidhibiti. Alipokuwa akilia, alisema: ‘Nimesoma kitabu hiki mara nyingi, na sura niliyorudia kusoma tena na tena ni “Naweza Kukabilianaje na Msongo wa Marika?”’ Yeye aliongeza: ‘Laiti ningalikuwa na habari hii miaka mitatu au minne iliyopita, nisingalikuwa hapa leo.’

“Mfungwa huyo alipelekwa zake, nami nikasoma ripoti ya polisi na ungamo alilotoa kwa polisi. Katika ripoti hiyo alisema: ‘Kiongozi wa genge langu aliniambia niende barabarani nikapige risasi mshiriki wa genge la wakinzani aliyekuwa akiuza kokeni katika eneo letu. Mimi nilifanya nilivyoambiwa. Nilihofu washiriki wale wengine wangefikiri mimi si shujaa. Nilitaka kukubaliwa.’

“Mfungwa huyo wa miaka 18 alishtakiwa kwa uuaji wa kukusudia, na akipatikana na hatia, atahukumiwa kifo kwa kufanya yale ambayo marika zake walimwambia afanye.”

Biblia huandaa miongozo na mashauri yenye kutegemeka kwa mengi ya matatizo ya leo. Ikiwa ungependa kupata habari zaidi au funzo la Biblia nyumbani bila malipo, tafadhali andikia I.B.S.A., Box 47788, Nairobi, Kenya.