Majina Humaanisha Nini?

JE! WAJUA ni kwa nini wazazi wako walikupa jina lako? Katika nyakati za Biblia mara nyingi majina ya watu yalionyesha imani katika Mungu na ahadi zake. Kwa kielelezo, jina Abrahamu, ambalo Mungu alimpa, lamaanisha “Baba ya Umati (Halaiki).” Jina Ishmaeli lamaanisha “Mungu Husikia (Husikiliza).” Na jina Yesu lamaanisha “Yehova Ni Wokovu.”

Leo, katika nchi za Afrika, kupewa majina mara nyingi hutegemea itikadi za kidini na mapendezi. Ndivyo ilivyo na Mashahidi wengi wa Yehova wa Afrika.

Katika Naijeria, mwanamke mmoja mchanga asimulia hivi: “Baba yangu alijifunza kweli ya Biblia kutoka kwa Mashahidi wa Yehova mwaka mmoja kabla nizaliwe. Katika mwaka uo huo, kitabu Kweli Iongozayo kwenye Uzima wa Milele kilitolewa katika Kiingereza. Baadaye, karibu na wakati nilipozaliwa, kitabu Kweli kilitolewa katika lugha yetu ya Kiyoruba. Kwa sababu hiyo, baba yangu aliona kuwa jambo lifaalo kunipa jina Truth [Kweli].”

Mwanamume mwingine ambaye ni Shahidi wa Yehova, asema hivi: “Baba yangu alikuja kuwa Shahidi mwaka mmoja kabla nizaliwe. Alikuwa akifanya kazi katika mahali paliposimamiwa na Wakatoliki wenye kushikilia dini yao sana, na kwa sababu ya itikadi zake, alipoteza kazi yake. Nilipozaliwa, baba hakuwa na kazi na alikuwa na fedha kidogo sana. Lakini hakuvunjika moyo. ‘Sina kazi kwa sababu ya uaminifu wangu kwa Ufalme wa Mungu,’ baba akasema. Kwa hiyo aliniita Kingdom [Ufalme].”

“Wazazi wangu waliniita Ifeanyichukwu, jina la Kiigbo,” akasema kijana mwingine. “Hilo ni jina gumu kwa watu wasiosema Kiigbo, kwa hiyo nilitaka jina rahisi zaidi. Pia nilitaka kutumikia katika Betheli [ofisi ya tawi ya mahali hapo ya Watch Tower Society], na nilikuwa na rafiki aliyeitwa Bethel. Kwa hiyo niliwauliza wazazi wangu kama nijiite ‘Bethel [Betheli].’ Walikubali.”

“Wazazi wangu walikuwa mapainia [wahudumu wa wakati wote],” asimulia mwanamume mwingine wa Naijeria. “Baba yangu alitaka kumpa mmoja wa watoto wao jina la kazi yao wapendayo. Ndivyo nilivyopata jina langu la Pioneer [Painia]. Walitumaini kwamba mimi vilevile ningepata baraka tele za utumishi wa wakati wote.”

Mshiriki mmoja wa Baraza Linaloongoza la Mashahidi wa Yehova alipokuwa katika Côte ďIvoire katika Desemba 1978, alikutana na dada aliyekuwa na mtoto aliyeitwa Victorious Faith (Imani Ishindayo) kwa sababu mtoto huyo alizaliwa wakati mama yake alipokuwa akihudhuria Mkusanyiko wa “Imani Ishindayo.”

Truth, Kingdom, Bethel, na Pioneer wote wanafanya kazi katika ofisi ya tawi ya Watch Tower Society katika Naijeria. Pia kuna Mashahidi wanaotumika huko wenye majina ambayo kwa Kiswahili ni Biblia, Hekima, Mkristo, Upendo, Mnyoofu, Mwanzo, na Baraka. Wahudumu hao wote walio Wakristo wanajitahidi kudumisha sifa nzuri, au jina zuri, na Yehova Mungu, ambaye kwake kila familia mbinguni na juu ya dunia huwiwa jina layo.—Linganisha Waefeso 3:14, 15, New World Translation.