Kutoka kwa Wasomaji Wetu

Shambulio la Maneno Ule mfululizo “Kutoka Maneno Yaumizayo Hadi Maneno Yaponyayo” (Oktoba 22, 1996) ni sehemu tu ya makala kadhaa ambazo zimeonyesha jinsi Yehova anavyotujali. Makala kuhusu “Msaada kwa Waraibu wa Alkoholi na Familia Zao” (Mei 22, 1992, la Kiingereza), “Wanawake—Wanastahili Staha” (Desemba 8, 1992), “Msaada kwa Watoto wa Talaka” (Oktoba 8, 1991), na “Je! Jeuri ya Nyumbani Itakwisha Wakati Wowote?” (Februari 8, 1993) zote zimenitegemeza kupitia miaka ya kutendwa vibaya kihisia-moyo kutoka kwa mume mraibu wa alkoholi. Nimesoma makala hizi kwa machozi ya shangwe na huzuni. Moyo wangu hufurika kwa uthamini kwa Mungu ajuaye hofu, maumivu, na viwewe vyetu vya usiri zaidi.

J. C., Kanada

Makala hizo zilinigusa sana. Zilifafanua kihususa hali niliyokuwa nayo na mume wangu. Naweza kwa utayari kukubaliana na kila sentensi. Mwawatendea wanawake kwa njia yenye upendo sana, na hilo hunihakikishia kwamba tengenezo hili latumiwa na Yehova.

P. S., Ujerumani

Makala hizo zilinitia moyo kuendelea kupigana na udhaifu wangu kwa kuudhibiti ulimi wangu. Sasa najua jinsi nipaswavyo kumtendea mume wangu. Nilisoma makala hizo nikiwa na machozi machoni pangu.

G. I., Austria

Nimekuwa mhasiriwa wa ujeuri wa maneno kutoka kwa mume wangu kwa miaka mingi. Nimefaulu kuepuka kushindwa na mtamauko kwa kukuza matunda ya roho ya Mungu na kwa kujishughulisha katika kazi ya kuhubiri ya wakati wote. Makala zenu zilinifanya nihisi siko peke yangu sana — kwamba mtu fulani huelewa tatizo hilo.

M. N., Italia

Nimepata kusoma makala zenu nyingi hapo awali, lakini hizi zilinigusa sana. Kutazama picha kwenye ukurasa wa 9 kulikuwa kama kumtazama mama yangu au dada yangu, ambao kwa miaka mingi wameteswa na waume zao. Nilifanyiza nakala ya makala hizo na kuwapelekea wengine niwajuao wanaoteseka kwa njia hii. Twatazamia ulimwengu mpya wa Mungu, ambapo usemi wenye kuudhi wa kila namna utaondolewa.

B. P., Kenya

Nilipompa gazeti hilo mjomba wangu ambaye alizoea kumtenda vibaya mke wake kwa maneno, alilisoma mara kadhaa. Baadaye, tuligundua kwamba hakuendelea kumtenda vibaya mke wake na kwamba hakukuwa na rabsha zozote nyumbani kwao. Yeye na vilevile mke wake hunishukuru kwa kuwasaidia kujielewa. Nataka kupitisha shukrani hizo kwa Amkeni!

F. F., Nigeria

Aliyekuwa Mraibu Nashukuru kwa makala “Kweli Ilinirudishia Uhai Wangu.” (Oktoba 22, 1996) Nina umri wa miaka 19, na hata ingawa mimi ni painia wa kawaida, au mweneza-evanjeli wa wakati wote, nyakati fulani nimehisi kwamba nilikuwa nikikosa mambo fulani. Jambo lililoonwa la Dolly Horry lilinisaidia kuona kwamba uvutio wa ulimwengu ni madanganyo tu.

R. M. A., Bolivia

Nataka kuwaambia jinsi nilivyoguswa na makala hii. Nilipokuwa nikisoma simulizi la Dolly Horry, machozi yalitiririka usoni pangu. Ni sala yangu kwamba makala hii itagusa wengine walio katika njia ya maisha ya awali ya Dolly wageukie maisha yenye maana sasa.

O. S. O., Nigeria

Nikiwa mmoja wa Mashahidi wa Yehova, nahisi ni heshima kwangu kuwa na Dolly Horry akiwa dada Mkristo. Katika miaka yangu ya utineja nilimweka Yehova katika mahali pa pili maishani mwangu. Ingawa hivyo mama yangu hakuacha kamwe kunisaidia, naye alikuwa na shangwe nyingi mno nilipobatizwa mwaka uliopita.

B. B., Australia