2. Iliandikwa Bila Kupendelea na kwa Unyoofu

WANAUME walioandika Biblia walikuwa wanyoofu na waliandika bila kupendelea. Unyoofu wao unathibitisha kwamba maandishi yao ni ya kweli.

Waandikaji wa Biblia hawakuficha makosa na udhaifu wao. Musa alisimulia kosa ambalo lilimletea madhara makubwa. (Hesabu 20:7-13) Asafu alielezea jinsi ambavyo kwa muda fulani alionea wivu maisha yenye ufanisi ya waovu. (Zaburi 73:1-14) Yona alieleza namna alivyokosa kutii na mwelekeo mbaya aliokuwa nao mwanzoni Mungu alipowaonyesha rehema watenda-dhambi waliotubu. (Yona 1:1-3; 3:10; 4:1-3) Mathayo alieleza bila kuficha jinsi alivyomwacha Yesu usiku ule ambao Yesu alikamatwa.—Mathayo 26:56.

Waandikaji wa Maandiko ya Kiebrania walieleza waziwazi malalamiko ya kila mara na uasi wa watu wa taifa lao wenyewe. (2 Mambo ya Nyakati 36:15, 16) Waandikaji hawakuficha makosa ya mtu yeyote, hata ya watawala wa mataifa yao. (Ezekieli 34:1-10) Wakiwa na unyoofu huohuo, mitume waliandika barua zilizozungumzia matatizo mazito ya Wakristo fulani kutia ndani ya wale wenye madaraka, na pia ya makutaniko fulani katika karne ya kwanza W.K.—1 Wakorintho 1:10-13; 2 Timotheo 2:16-18; 4:10.

Waandikaji wa Biblia hawakujaribu kufunika-funika kweli ambazo zingeweza kuonwa kuwa zinaaibisha. Wakristo wa karne ya kwanza walieleza waziwazi kwamba hawakupendwa na ulimwengu uliowazunguka na walionwa kuwa wapumbavu na wenye kudharauliwa. (1 Wakorintho 1:26-29) Waandikaji hao walisema kwamba mitume wa Yesu walionwa kuwa “wasio na elimu na wa kawaida tu.”—Matendo 4:13.

Waandikaji wa Injili hawakusema uwongo ili Yesu aonekane kuwa mtu mwenye kuvutia zaidi. Badala yake waliripoti kwa unyoofu kwamba alizaliwa katika familia ya hali ya chini, kwamba hakusoma katika shule za hali ya juu za wakati huo, na kwamba wasikilizaji wake wengi walikataa ujumbe wake.—Mathayo 27:25; Luka 2:4-7; Yohana 7:15.

Kwa kweli, Biblia inatoa uthibitisho wa kutosha kwamba iliandikwa na watu wanyoofu. Je, unyoofu wao haukufanyi uitumaini Biblia?