YEHOVA NI UADILIFU WETU

Maneno hayo yametafsiriwa kutoka katika maneno mawili Yehwahʼ Tsidh·qeʼnu, yanayopatikana katika Yeremia 23:6 na 33:16.

Yeremia 23:5, 6 ni unabii wa Kimasihi unaoeleza kumhusu mfalme wa wakati ujao anayechipuka kutoka kwenye ukoo wa Daudi ili “kutekeleza haki na uadilifu katika nchi.” Kwa kuwa anatawala akiwa mwakilishi wa Mungu (kama vile Daudi na wengine walivyoketi “kwenye kiti cha ufalme cha Yehova” wakiwa wafalme waliotiwa mafuta ambao waliwekwa na Mungu; 1Nya 29:23), unabii huo unasema hivi kumhusu, “Naye ataitwa jina hili, Yehova Ni Uadilifu Wetu.” Hilo halimaaanishi kwamba Yesu, Masihi, na Yehova wako sawa, au ni Mungu mmoja, kama wengine wanavyodai. Jambo hilo linathibitishwa na unabii wa Kimasihi unaolingana na huo ulio kwenye Yeremia 33:14-16, ambapo maneno hayohayo yanatumiwa kurejezea Yerusalemu: “Naye ataitwa: Yehova Ni Uadilifu Wetu.” Katika visa vyote viwili maneno hayo yanaonyesha kwamba jina la Mungu, Yehova, linapokuwa juu ya mfalme wake aliyeahidiwa na juu ya jiji kuu alilochagua, ni uhakikisho kwamba mfalme huyo atakuwa mwadilifu na jiji hilo litakuwa na uadilifu. Isitoshe, haki na uadilifu ambao jiji hilo na mfalme huyo anaonyesha, unatokana na kujitoa kikamili kwa Yehova na kufanya mapenzi yake na hivyo kupata baraka na mwongozo wake.