Jiangalie Usijisikitikie

MFALME AHABU alikuwa anajisikitikia sana. Alilala kitandani pake, akageukia ukuta akakataa kula. Kwa nini? Je! ilikuwa kwa sababu ya ugonjwa au kwa sababu ya habari yenye huzuni? La. Tatizo lake peke yake lilikuwa kwamba mmoja wa raia zake, Nabothi, alikuwa amekataa kumwuzia kisehemu cha shamba kilichokuwa kinapakana na nyumba ya kifalme. Mfalme huyu alitaka sana kupata kisehemu hiki cha shamba kwa sababu gani? Je! ilikuwa kwa sababu fulani yenye maana? La. Yeye alikitaka kiwe bustani ya mboga. Kukataa kwa mwenye kisehemu hicho kukiuza kulimfanya mfalme ajisikitikie sana sana. Ahabu aliingia kitandani akakataa kusema.​—1 Fal. 21:1-4.

Jambo hili, lililomfanya mfalme huyu aonekane mjinga, liligeuka likawa baya. Mke wa Mfalme Ahabu, Malkia Yezebeli, mwenye sifa mbaya, alikataa kukubaliana na kukataa kwa Nabothi. Alipanga Nabothi ashtakiwe uongo kuwa mwenye kukufuru. Wazee na wakuu wa baraza ya hukumu katika Samaria walishirikiana na mpango huu, na Nabothi akauawa kwa kupigwa mawe. Hii ilifungua njia kwa Mfalme dhaifu Ahabu ajipatie kisehemu kile cha shamba ili akuze mboga.​—1 Fal. 21:4-16.

Kama inavyoonyeshwa na kisa hiki cha Ahabu, mtu ambaye anajiachilia ajisikitikie anafuata mwendo usiotamanika. Kwa kuwa kujisikitikia ni kujifikiria kupita kiasi, na kusiko na usawa, kunaweza kudhuru sana. Kujisikitikia kunaweza kumfanya mtu aone uchungu sana na aonekane mjinga kama kulivyomfanya Mfalme Ahabu. Kunamfanya mtu ajifikirie sana hata kufikiria wengine kwa njia ya upendo kunafifia au hata kunatoweka kabisa. Mtu anayejiachilia ajisikitikie huenda akaona mambo mazito kwa njia isiyo ya kweli na, kwa hivyo, huenda akafanya uamuzi usiofaa. Kujisikitikia hata kunaweza kumdhoofisha mtu kiroho, na lililo baya hata zaidi, kunaweza kumfanya mtu ashindwe chini ya mkazo akiupoteza msimamo wake safi mbele za Mungu. Kwa hiyo tuna sababu nzuri za kujihadhari na kujisikitikia.

Ni mambo gani yanayoweza kumfanya mtu ajisikitikie? Huenda ukawa ni ugonjwa, udhaifu, kupoteza mali au msiba, kama vile kifo cha mmoja wa jamaa au rafiki mkubwa tunayempenda. Kama ilivyokuwa kwa habari ya Ahabu, kujisikitikia kunaweza kuletwa na kupoteza tumaini. Kujisikia kwamba umeshindwa kutimiza jambo fulani, hata kujisikia hivyo kwa kuwazia tu, pia kunawafanya watu wengi wajisikitikie. Kwa mfano, huenda mtu akajaribu kufanya jambo jipya, lakini baadaye aone kwamba amelifanya vibaya sana. Huenda akaanza kukata tamaa na kujisikitikia, na hasa ikiwa wengine hawamtii moyo au kuonyesha kwamba wanathamini jitihada zake. Huenda hata akatenda kama Ahabu, akaacha kushirikiana na wengine. Wakati jambo kama hili linapofanyika kwa Mkristo, linamdhuru kiroho. Ili aendelee kuwa hai kiroho, anahitaji kushirikiana na ndugu zake Wakristo.

Ili mtu ashinde hali ya kujisikitikia, ni lazima awe na maoni yanayofaa juu ya matatizo na majaribu yake. Tunapaswa kuona mambo yasiyopendeza yanayotupata kama nafasi za kufanya maendeleo katika kuonyesha sifa nzuri chini ya majaribu. Kwa mfano, ikiwa mambo yangekuwa sawa kwetu nyakati zote, tungewezaje kujua tunazo sifa kama vile subira, uvumilivu au kujiweza? Kwa upande mwingine, hali fulani zinatuonyesha upesi sehemu tunazopungukiwa. Hiyo inatufanya tuweze kufanya maendeleo vizuri zaidi. Huenda ikawa mtu anahitaji kutumia wakati zaidi ajifunze Neno la Mungu kwa uzito zaidi na kufanya jitihada zaidi kutumia maarifa yanayopatikana. Labda, anapaswa kushirikiana zaidi na watu ambao ni mifano mizuri katika kuonyesha sifa nzuri za Kikristo. Ndiyo, wakati mtu anapoyaona majaribu yanayompata kama marudio au mazoezi kutoka kwa Yehova, bila shaka yeye atajaribu hata zaidi kufanya maendeleo katika utu wake, na hivyo, awe hataelekea sana kujiachilia ashindwe na kujisikitikia.

Maoni kama hayo kuhusu majaribu yanapatana na shauri hili lililoongozwa na Mungu: “Mwione kuwa furaha yote, ndugu zangu, mnapopatwa na majaribu ya namna nyingi, mkijua kwamba sifa hii iliyojaribiwa ya imani yenu inatokeza uvumilivu. Lakini acheni uvumilivu ukamilishe kazi yake, mpate kuwa wakamilifu na timamu katika mambo yote.”​—Yak. 1:2-4, NW.

Pia kukumbuka mifano ya watu ambao wamevumilia kwa uaminifu na namna Yehova Mungu alivyowathawabisha kunaweza kutusaidia. Mfano mzuri ni wa Ayubu. Yeye alipoteza mali zake zote pamoja na watoto wake. Mkewe na rafiki zake walimgeuka wakawa maadui, naye akapigwa kwa ugonjwa mbaya sana. Hata hivyo, Ayubu alivumilia kwa uaminifu na baadaye alithawabishwa sana na Yehova. Habari ya Biblia inaripoti kwamba Yehova “akaubariki huo mwisho wa Ayubu zaidi ya mwanzo wake.” (Ayubu 42:12) Akielekeza fikira kwenye jambo hili mwanafunzi Mkristo Yakobo aliandika hivi: “Angalieni, twawaita heri wao waliosubiri. Mmesikia habari ya subira yake Ayubu, mmeuona mwisho wa [Yehova] ya kwamba [Yehova] ni mwingi wa rehema, mwenye huruma.”​—Yak. 5:11.

Kusema kweli, dhiki na magumu si mambo ya kupendeza kamwe. Lakini hatupaswi kusahau kwamba yana mwisho wake. Na tukivumilia kwa uaminifu, bila kujiachilia tushindwe na kujisikitikia, hatutapoteza thawabu yetu. Biblia inawahakikishia Wakristo hivi: “Mungu si dhalimu hata aisahau kazi yenu, na pendo lile mlilolidhihirisha kwa jina lake.” (Ebr. 6:10) Mambo yaliyoonwa na wengi wa watumishi wa Yehova waaminifu kutia na Ayubu, yanatoa ushuhuda wa kutosha wa uhakika huo.

Jambo jingine linaloweza kutusaidia tukushinde kujisikitikia ni jitihada za unyofu za kujaribu kuwafikiria wengine badala ya kujifikiria. Hili linapatana na shauri la Biblia: “Mtu asitafute faida yake mwenyewe, bali ya mwenzake.” (1 Kor. 10:24) Mtu anayetumia wakati wake, nguvu na mali kuongeza furaha na hali njema ya wanadamu wenzake atapata furaha pia. “Kuna furaha zaidi katika kutoa kuliko zilivyo katika kupokea.”​—Matendo 20:35, NW.

Pia, sisi watu mmoja mmoja tunaweza kuwasaidia wale wanaoshindwa upesi na kujisikitikia. Haja kubwa zaidi ya wanadamu ni kupendwa. Kwa hiyo, tunaweza kuwasaidia wale wanaojisikitikia mara nyingi. Namna gani? Kwa kuwafanya waone kwamba wanahitajiwa, wanapendwa na kuthaminiwa. Hili pia linaweza kufanywa kwa kuwaonyesha namna wanavyoongeza furaha ya wengine. Zaidi ya hayo, kuonyesha kuwathamini kikweli na kuwatia moyo kunaweza kusaidia sana wafurahi, wakati ule ule tukiwaonyesha hatari ya kujisikitikia kwa njia iliyo wazi na ya upendo.

Kwa sababu ya matatizo yanayoweza kutokezwa na kujisikitikia, bila shaka tuna sababu nzuri ya kutojiachilia tushindwe na hali hii ya moyoni isiyotamanika. Wale watakaoipinga wataona kwamba itafanya maisha yao yawe yenye furaha zaidi, na wataridhika zaidi.