Kwa Sababu Gani Upendo ‘Waweza Kuvumilia Mambo Yote’?

WALIKUWA na furaha katika ndoa yao, na biashara yao ilifanikiwa. Lakini zaidi ya hayo yote, walikuwa Wakristo waliokuwa wakf kabisa. Kwa muda wa miaka 25 walifurahia pamoja mambo mengi mbalimbali waliyoyaona. Ndipo, siku moja, mumewe akapatwa na ugonjwa wa ubongo wa ghafula. Kwa muda wa miaka 20 aliendelea kuishi, akazidi kutojiweza, mpaka mwishowe akafa, mkewe, aliyejitoa sana akaondolewa mzigo wake. Ni kitu gani kilichomwezesha amtunze kwa huruma, bila kunung’unika hata ingawa hiyo ilimaanisha akose kulala usingizi mzuri hata siku moja? Ni upendo aliokuwa nao kwake. “Alikuwa mume mwema sana, na mwenye upendo,” ndivyo atakavyokwambia unapouliza habari zake. Ndiyo, yeye alionyesha kwamba maneno haya yaliyoongozwa na Mungu ni ya kweli, “Upendo . . . huvumilia yote.”​—1 Kor. 13:4, 7.

Mara nyingine maisha huleta mambo ambayo ni magumu kuvumilia. Kila siku tunasoma juu ya watu au kuona watu ambao wameamua kwamba ni vigumu kuvumilia fungu lao. Wakijiona kuwa wanalemewa sana, vijana wanaacha shule, watu wanaacha kazi, watu waliooana wanaacha wenzi wao wa ndoa au wanatalikiana, na watu wengine hata wanapita kiasi na kujiua. Sababu gani waliona mambo kuwa yasiyoweza kuvumiliwa? Kulingana na maneno hayo yaliyoongozwa na Mungu, tunaweza kuamua kwamba ni kwa sababu walikosa upendo. Kama upendo ungalikuwako, ‘ungalivumilia yote.’ Au, kama tafsiri nyingine zinavyotafsiri maneno hayo ya mtume Paulo: “Upendo . . . uko tayari kusamehe sikuzote.” “Upendo hauna mwisho wa uvumilivu wake.” “Upendo haushindwi hata kidogo.” “Upendo unaweza kukabili yote.” “Upendo unaweza kukubali kutendewa vyo vyote.”

Ni upendo wa namna gani unaoweza kukubali “kutendewa vyo vyote”? Je! upendo wa namna yo yote unaweza, maadamu unakuwa ni “upendo” tu? Namna gani upendo wa kumpenda mwingine kipekee? Labda nyakati nyingine, kwa kuwa Biblia inatuambia kwamba mzee wa ukoo Yakobo alitumikia kwa miaka mingi kwa ajili ya Rakeli, mpendwa wake, lakini kwake ilionekana kama miaka michache tu. Zaidi ya hayo, kazi aliyolazimika kufanya ya kuchunga kondoo ilijawa na magumu ya kila namna.​—Mwa. 29:18-20; 31:36-42.

Vilevile, upendo wenye nguvu kati ya washiriki wa jamaa unawawezesha kuvumilia kutendewa vikali. Wagiriki waliuita upendo wa namna hii storgé. Kwa mfano, Yuda alikuwa na nia ya kukubali kuwa mtumwa wa mgawaji wa vyakula wa Misri maisha yake yote ili amwondolee baba yake huzuni ya kumpoteza mwanawe mpendwa Benjamini. (Mwa. 44:18-34) Upendo kati ya rafiki wanaofanya mambo mamoja, namna ya upendo inayojulikana kama philia kwa Wagiriki, vilevile unawezesha watu wavumilie mambo yasiyopendeza. Je! huo si ndio namna ya upendo waliokuwa nao Yonathani na Daudi kati yao? Bila shaka ndio. Kwa sababu ya kumpenda Daudi, Yonathani alikubali hata kuhatarisha maisha yake.​—1 Sam. 18:1; 20:32-34.

Na zaidi ya yote, upendo unaoongozwa na kanuni, unaoitwa agápe na waandikaji wa Maandiko ya Kigiriki ya Kikristo, unamwezesha mtu kuvumilia yote. Upendo wa namna hiyo umemwezesha Muumba mkuu, Yehova Mungu, awasubiri sana, na kustahimili sana, watoto wake wenye makosa na wapotevu wa kibinadamu. (2 Pet. 3:9, 15) Vilevile ulimwezesha Yesu ayavumilie mambo yote kutoka kwa adui zake, pamoja na makosa ya wanafunzi wake. Mwishowe, ili aonyeshe upendo wake, Yesu aliutoa uhai wake kwa ajili ya wengine.​—Yohana 15:13.

Mtume Paulo ni mfano mzuri sana wa mwanadamu mwenye makosa ambaye ‘hakushindwa hata kidogo’ na ambaye aliweza ‘kukubali kutendewa vyo vyote.’ Upendo wake kwa Wakristo wenzake ungeweza kulinganishwa na ule wa mama mlezi anayetunza watoto wake, na kama ule wa baba anayehangaikia wanawe. (1 The. 2:7, 11) Ebu tazama yote aliyovumilia! Kwa kweli, upendo wake ‘haukuwa na mwisho wa uvumilivu wake.’ Alipigwa mara nyingi, akajikuta katika hatari ya kila namna, akaenda bila chakula, akakaa siku nyingi bila kulala na mara nyingi akataabishwa na mambo mengine mengi​—yote hayo kwa ajili ya upendo wake kwa Mungu wake Yehova na kwa wanadamu wenzake.​—2 Kor. 11:23-33.

Kwa sababu gani upendo wa agápe unaweza kuvumilia kutendewa vyo vyote? Sababu moja ni kwamba unahangaikia bila choyo hali njema ya wengine. Upendo alio nao mama mlezi unatoa mfano mzuri wa upendo wa namna hii. Lo! namna mtoto anavyoweza kukujaribu!

Je! waangalizi Wakristo leo hawaonyeshi upendo kwa kuvumilia makosa ya wengine? Upendo unawawezesha waangalizi hawa wawafundishe kwa upole hata wale wanaoshindana nao.​—2 Tim. 2:24, 25.

Vilevile upendo unatusaidia ‘tusishindwe hata kidogo.’ Kwa kuwa una huruma, upendo unatuwezesha tuwahurumie wengine. Upendo unatupa ufahamu hivyo tunakuwa “tayari kusamehe sikuzote” na kuachilia makosa ya wengine. Upendo unatuwezesha tuvumilie tabia za wengine zisizopendeza kama vile​—sauti yenye kukwaruza, ishara za namna fulani au kusema-sema sana. Ndiyo, kwa sababu ya upendo tutafunika hata wingi wa tabia za namna hiyo.​—1 Pet. 4:8.

Kati ya sababu nyingine za “upendo [kuweza] kukabili yote” ni uhakika wa kwamba hauna kiburi. “Haujivuni.” (1 Kor. 13:4) Kiburi kinamfanya mtu atoe wengine makosa, kinamfanya achukizwe na kuvumilia makosa pamoja na udhaifu wa wengine. Lakini mtu mnyenyekevu haudhiki upesi, hahangaikii sana hali yake njema na mapendezi yake mwenyewe. Mtu mnyenyekevu anakuwa tayari kutumikia wengine na vilevile anakuwa tayari kuvumilia kwa upendo watu walio na dhamiri dhaifu.​—Rum. 15:1, 2.

Leo, Wakristo wengi walio wakf wamekwenda katika nchi za kigeni wakiwa wamisionari, na wengine wamekwenda kutumikia mahali ambako kuna uhitaji mkubwa wa watangazaji wa “habari njema.” Watu hawa wamevumilia hali za chini za maisha, kuwa na mapato madogo, kutoitikia habari njema pamoja na upinzani​—haya yote kwa sababu ya upendo walio nao kwa jirani zao. Vilevile wao wanaonyesha kwamba upendo “huvumilia yote.” Namna gani wewe?

Je! wewe unao upendo wa namna hiyo? Je! unatia bidii uuonyeshe?