Ripoti ya Watangazaji Ufalme

Mikusanyiko ya Ajentina Yenye Kutokeza

“MASHAHIDI WA YEHOVA wamejifunza kukusanyika bila kufanya jeuri wala mwenendo mbaya kati ya wanaume na wanawake, bila tumbako wala vileo, bila mambo ya aina yo yote ya kupita kiasi. Bila shaka hilo ni somo kwa jamii iliyo kama yetu, inayotambuliwa rasmi kuwa ya Ukatoliki, na bado inapatwa na matatizo ya kuendesha misongamano mikubwa ya watu katika wanja za mpira bila vituko vya watu wasiovumiliana, nyakati nyingine vikitokeza msiba,” likaripoti gazeti Flash katika Ajentina. Maelezo hayo yalitolewa kuhusu mmoja wa minne ya “Washika Ukamilifu” Mikusanyiko ya Mashahidi wa Yehova iliyofanywa katika Ajentina Januari 1986. Kwa kweli, akina ndugu walifurahi walipoona watu 97,736 wakihudhuria mikusanyiko hiyo minne. Ilikuwa pindi yenye kujaa furaha kwao kuona karibu 600 wa ndugu zao kutoka nchi nyingine 19 na mabara 5 wakihudhuria pamoja nao. Walifurahi sana, pia, kujua kwamba kati ya wale 97,736 wenye kuhudhuria, watu kama 40,000 walikuwa ni wale walioanza kupendezwa hivi karibuni.​—Zaburi 122:1.

Magazeti yaliwasifu sana wakusanyikaji kwa tengenezo lao zuri na mwenendo wao mzuri sana. Gazeti La Razon lilikuwa na kichwa kinachofuata kuhusu mkusanyiko ule wa Buenos Aires uliofanywa katika River Plate Stadium ambako watu zaidi ya 57,000 walihudhuria: “Utaratibu, usafi, na kimya ya ajabu, zile tabia za watu . . . Hudhurio la waaminifu hao lilionyesha tengenezo bora sana . . . utaratibu ni adimu sana kunapokuwa na halaiki ya watu.”

Gazeti La Nacion lilieleza juu ya mkusanyiko uliofanywa katika Rosario ambako watu 15,000 walihudhuria: “Ijapokuwa hesabu ya watu walioalikwa na Mashahidi wa Yehova, hakuna polisi hata mmoja ambaye aliweza kuonekana karibu, na utaratibu uliokuwako ulikuwa bora sana.”

Wajumbe wa mikusanyiko hiyo walitumia kila njia ya kusafiria ili wafike kwenye mikusanyiko: ndege, magari-moshi, basi, motokaa ndogo, na baiskeli. Zaidi ya basi 870 na gari-moshi moja zilikodiwa zilete wajumbe kutoka bonde Rio Negro kusini mwa nchi hiyo mpaka kwenye mkusanyiko wa River Plate. Mtu mmoja mwenye kupendezwa aliendesha baiskeli kwa muda wa siku nne, kilometa 800, ahudhurie mkusanyiko katika Cordoba.

Kwa sababu gani jitihada yote hiyo ikafanywa ili kuhudhuria? Ni kwa sababu Mashahidi wa Yehova wanauona sana sana uhitaji wao wa kiroho. (Mathayo 5; 3, NW) Gazeti Clarin lilitoa maoni haya: “Shauri, vitia-moyo, vilivyotolewa kiasili maelezo ya Kibiblia, yalifuatwa kwa makini na maelfu ya wanaume na wanawake ambao, huku wakiandika mambo wakati kifungu cha Biblia kilipotajwa, walifungua Maandiko Matakatifu na kusoma maneno yaliyotumiwa.” Gazeti La Voz del Interior katika Cordoba lilitoa maoni hayo: “Kusanyiko hilo lilikazia uhitaji wa kujifunza jinsi ya kutimiza sheria ya Mungu kwa uangalifu, hata katika mambo madogo-madogo kama vile ushirika, muziki, na kujipamba kwa mtu binafsi.”

Kuonyesha matokeo ya habari za Kibiblia zilizotolewa, mwanamume mmoja, alisema hivi muda fulani baada ya mkusanyiko: “Tangu siku ile [ya kuhudhuria mkusanyiko] na kuendelea, maisha yangu yamebadilika kabisa. Mimi ninachukuliana vizuri zaidi na washiriki wa jamaa yangu. Ninafanya kazi vizuri zaidi. Ninafurahi sana kwamba nimefahamiana nanyi, kujua kwamba kungali kuna watu wema, watu wanaosaidia jirani yao kwa sababu ya kupenda Yesu. Wanawake wakivalia kwa kiasi, na hakuna mtu wa kuvuta sigareti wala kunywa pombe. Hiyo ni paradiso ya kweli, iliyo na watu wengi sana wenye umoja na wanaojiendesha kama kwamba wao ni jamaa moja kubwa.”

Maelezo kama hayo yanatusaidia tuthamini kwamba ni kupitia roho ya Yehova kwamba utaratibu na upendo kama huo unawezekana.