Uthamini—Lakini Mbona ni Mtanguo?
KATIKA Novemba wa mwaka uliopita, wakati wa mkusanyiko mmoja wa maaskofu Waitalia uliofanywa katika Bologna, Italia, Kanisa Katoliki lilitokeza shambulio dhidi ya Mashahidi wa Yehova. Chini ya kichwa, “Kristo Mungu Wetu na Tumaini Letu: Wakristo wakabiliana na Mashahidi wa Yehova,” padri Giovanni Marinelli alishtaki kwamba, Mashahidi ni “hatari kwa dini na jamii ya watu “Kwa sababu ya ukuzi wao wa haraka-haraka katika Italia unaotokea wanapochukua watu waliokuwa Wakatoliki, yeye alishtaki Mashahidi juu ya kuwa ‘kiini kibaya cha ugonjwa kinachoshambulia hasa wale wenye ukosefu mkubwa zaidi wa kinga.’
Wilaya za maaskofu na mitaa ya Wakatoliki katika sehemu zote za Italia ziliagizwa zichukue msimamo wenye bidii dhidi ya Mashahidi. Jinsi gani? Kwa kuunda katika kila mji vikundi vya watu ambavyo “vingetaka kuchunguza” utendaji wa Mashahidi kwa kusudi la ‘kuyafungua macho ya waaminifu wetu.’
Je! kukusanya vikundi hivyo dhidi ya Mashahidi wa Yehova kumekuwa na mafanikio? Katika barua iliyochapishwa katika Piano Parish Magazine, padri mmoja anaandika hivi: “Mimi binafsi, nawapenda Mashahidi wa Yehova; ninakiri wazi jambo hilo Ninyi nyote mna uhuru kabisa kuwa na mawazo tofauti yangu, na labda, hata kuniondoa katika ushirika. . . Mashahidi ninaowajua wana adabu zisizo na kasoro hata kidogo, ni watu wenye maneno mapole . . . , [na] ni wenye nguvu za usadikishi kweli kweli. Ni wakati gani sisi tutakapoelewa kwamba ukweli unahitaji kutokezwa mbele ya watu kwa njia inayokubalika? Ni wakati gani tutakapoelewa kwamba wale wanaoutangaza ukweli hawahitaji kuwa na moyo nusu-nusu, kuwa wenye kunuka, watu wa kuvaa ovyo-ovyo, wenye sura za kuchafuka-chafuka?
“Pia, Mashahidi wa Yehova wanakuja na kuwatembelea ninyi nyumbani Huko nyumbani mnakuwa katika mazingira yenu wenyewe na kwa hiyo mko katika hali bora.. . . Mnaweza kunyosha mkono na kuchukua Biblia yenu . . . kutoka katika rafu, na mnaweza kuchunguza mwone kama mstari fulani uliotajwa ni sahihi, mpate maana inayofaa ya mstari huo n.k.
“Na ingefaa niseme pia kwamba jambo linalonishangaza kweli kweli ni kwamba Mashahidi wa Yehova wanahisi binafsi kwamba ‘wameitwa‘ . . . kwenye huduma ya lile neno. Hilo ni daraka ambalo sisi tumesahau kwa muda mrefu na ambalo limeleta madhara yasiyohesabika kwenye kazi yetu ya kueneza evanjeli ‘Watasikiaje mtu asipowatangazia?’ Kwa maoni yangu, Mashahidi wa Yehova wanaonekana kama kwamba ni watu ‘kamili’: si kwa habari ya nyumba zao tu, kazi zao, na starehe zao, bali pia kwa habari ya funzo la kibinafsi wanalofanya kuhusu imani zao na kuhusu jinsi ya kusaidia wengine wawaelewe wao. Lakini jambo linalonifanya nihisi ‘nikitaka kunyongwa na mate’ ni kwenye maziko ya Mashahidi wa Yehova. Nikiyalinganisha na maziko yetu ya Kikatoliki, ambako mtu peke yake anayekaa akiwa amenyamaza ni yule mfu, ambako hakuna mtu anayekuwa ameshika Biblia mikononi mwake ili afuatane na usomaji huo wa ushirika . . . Nuru ya ajabu! Sala za ajabu! imani ya ajabu! Utulivu wa ajabu! Ni nani ajuaye kama mimi nitaweza kukipinga kile kishawishi cha kutaka kuongezea wosia wangu useme hivi: ‘Nikifa ningependa nizikwe na Mashahidi wa Yehova.’ Huenda ikawa hivyo. Nani ajuaye!
“Maneno yao ya utangulizi yanafaa sana sana. Labda sababu ni kwamba mimi pia siridhiki na mambo, sitosheki nayo, au kwamba ninaelewa mambo yale wanayolaumu waziwazi. Wao wanasema, ‘Ulimwengu ambamo tunaishi umejawa na jeuri na ukosefu wa adili.’ Je! wewe unahisi ukitaka kuwathibitishia kwamba wanakosea? Mimi sihisi hivyo. ‘Kanisa Katoliki, ambalo ni moja la dini zenye kuzoewa mahali pengi zaidi na zilizo za zamani zaidi, ndilo linalopasa kuwa la kwanza kulaumiwa kwa sababu ya tabia kushuka namna hiyo.’ Je! wewe utapaza sauti kwa kukataa? Mimi sitafanya hivyo? Ni watu wazuri, wenye adabu, . . . wenye kujitoa Mashahidi wa Yehova wana ushujaa unaoambatana na sababu za kiakili. Wao wanamalizia kwa kusema, ‘Kwa hiyo, acheni makanisa yenu mfuatane nasi.’
“Mimi natambua kwamba, kama ningeacha dini ambayo nimejua tangu nilipokuwa nikinyonya maziwa ya mama, kisha niambatane na nyingine, kufanya hivyo kungeumiza sana maoni yangu Lakini ikiwa kufanya hivyo kungekuwa ndilo jambo linalofaa, mbona nisiichukue hatua hiyo? Ebu fikiria jambo hilo, kubadili dini hakushushi hata kidogo heshima ya mtu.. . . Jambo ambalo lingekuwa la kushusha heshima ni kuacha dini moja kumbe unaenda kukuta utupu, kuing’oa nanga kumbe unaanza kupeperuka huku na huku bila kujua unakoelekea. Lakini namna gani ikiwa ningefikiri nguo nilizofua ni nyeupe kwa sababu tu sikuwa nimeziona zako? Mimi naona ingefaa nichague sabuni iliyo nzuri zaidi, ile inayofua nguo zikawa na weupe unaozidi ule wa ukawaida tu! Shabaha ya wamisionari ni moja, tena moja tu: kubadili dini ya watu. . Kwa sababu gani nisibadili dini ikiwa dhamiri yangu inaniambia nifanye hivyo? Ikiwa yule mwenye kuhubiri ananisadikisha nifanye hivyo? Ikiwa ingefaa nifanye hivyo? Ikiwa dini ya Mashahidi wa Yehova ndiyo iliyo sahihi zaidi . . . basi . . . mimi nitafuatana na Mashahidi wa Yehova. . . . Mimi nataka kujua kama Mashahidi wa Yehova ndio walio sawa.”
Akimalizia barua yake, padri huyo alikazia kwamba matumizi ya Mashahidi ya neno Yehova badala ya Yahweh wanapotamka jina la Mungu si “sababu ya kunifanya nisiendelee kuwapenda sana Mashahidi wa Yehova.” Kwa sababu gani? “Ingawaje,” yeye anaongeza, “wao ni mashahidi wa Mungu na hilo ndilo jambo la maana!”
Nyongeza: Inaonekana barua ya Padri huyo ilitokeza ubishi mkubwa kati ya jamii ya mapadri wakuu. Katika toleo fulani la baadaye la gazeti la eneo hilo la kidini yeye alitangua maelezo yake aliyokuwa ametoa juu ya Mashahidi wa Yehova.