“Hakika Wao Watapigana Dhidi Yako, Lakini Hawatashinda Dhidi Yako”
BWANA Mwenye Enzi Kuu Yehova alimwambia Yeremia kijana kwamba Yeye angemfanya awe “mji uliowekewa ngome na nguzo ya chuma na kuta za shaba” dhidi ya mtu ye yote ambaye angeweza kutafuta kumharibu. Katika nyakati za kisasa, sisi Mashahidi wa Yehova tuna uhakikisho kama huo kutoka kwa Mungu wetu. Ndiyo, chini ya mavutano ya Shetani, ‘hakika wao watapigana dhidi yetu,’ lakini hawatashinda. “Kwa maana ‘mimi nipo pamoja nawe,’ ndilo tamko la Yehova, ‘kukukomboa wewe.’”—Yeremia 1:18,19, NW.
Katika vijiji vya kando kando vya Visiwa Solomon, wageni wanaingia kwa kuthubutu kuhatirisha maisha zao, hasa ikiwa wao wanaleta dini mpya. Hilo ndilo jambo lililopata mapainia wa pekee wawili wa Mashahidi wa Yehova. Wanakijiji wenye sura kali sana waliwaelekezea nyuta na mishale. Walikuwa wamepewa maagizo ya kupiga kwa mishale hiyo! Hali ilipokuwa yenye fadhaa nyingi, mwanamume mmoja mzee alijiingiza kwa ghafula katika jambo lile, akisema: “Hawa ni wageni wangu. Msiwadhuru.” Wanakijiji walifadhaika sana mzee huyo alipowaelekeza kwenye nyumba yake. Mwanamume huyo alikuwa amepata habari juu ya Mashahidi hao; sasa akajipatia kitabu Unaweza Kuishi Milele Katika Paradiso Duniani, na funzo la Biblia likaanzwa. Bila kukawia yeye alianza kusafiri kwenye mikutano. Leo akina ndugu wanaweza kutoa ushahidi kwa uhuru katika eneo hilo, wakiwa wenye shukrani kwa ukombozi ule wa kwanza wa Yehova.
Ukombozi umekuja mara nyingi kupitia kutambuliwa kuwa mmoja wa Mashahidi wa Yehova. Kwa sababu ya kuhubiri nyumba kwa nyumba, watu wanapata kujua Mashahidi ni nani na msimamo wao ni nini juu ya masuala ya siku hizi. Katika kijiji kimoja kidogo katika Peru, wavamizi haramu walishtaki wanakijiji juu ya kuwa waliwasaliti. Walizingira watu wa mji ule na kuwapanga katika mstari ili wapigwe risasi. (Katika hali zinazofanana na hiyo vijiji vizima-vizima vimefagiliwa mbali.) Lakini mambo yalipofikia hatua hiyo, mmoja wa wavamizi haramu hao akatambua ndugu mmoja na kuwaambia wauaji hivi: “Mwanamume yule si mmoja wao. Mimi namjua kuwa Shahidi wa Yehova, nao hawajihusishi katika siasa.” Ndugu yule akaachiliwa. Kwa uhakika Yehova analinda walio wake mwenyewe!
Eneo la kisiwa cha Saiprasi kinaripoti kwamba Kanisa Orthodoksi la Ugiriki limekuwa na utendaji mwingi likijaribu kubomoa kazi ya Mashahidi wa Yehova. Kanisa linagawia watu vikaratasi vinavyoshtakia Mashahidi mambo mengi na kuvunja watu wa kanisa hilo wasiwe na mazungumzo yo yote pamoja na Mashahidi. Walimu fulani wa kidini hata wamejipanga ili watembelee watu ambao wamekuwa wakijifunza pamoja na Mashahidi wa Yehova, wakijaribu kuwavunja moyo. Mfano mmoja wa hali hiyo ni jambo lililotukia katika Pafo, mahali Paulo na Baranaba waliposhinda upinzani kama huo safari moja. (Matendo 13:6-12) Mwalimu wa kidini aliye padri pia alijaribu kusadikisha watu watatu mbalimbali waache kuchunguza Biblia pamoja na Mashahidi wa Yehova. Watu hao wakapanga ndugu mmoja ajiunge nao katika mazungumzo pamoja na mwalimu huyo wa kidini, kila mmoja akiwa na zamu yake pekee yake ya kushiriki katika mazungumzo. Matokeo ni kwamba wote watatu sasa wanashirikiana kwa bidii pamoja na Mashahidi. Yule padri alieleza kwamba, ‘Sitakuwa kamwe na mazungumzo mengine pamoja na Mashahidi wa Yehova.’
Mapadri fulani walifikia hatua ya kuchapa Mashahidi walipokuwa wakifanya kazi ya nyumba kwa nyumba katika kimoja cha vijiji. Jambo la kushangaza sana ni kwamba, siku chache baadaye upepo wa kisulisuli ulipiga kijiji hicho ukaharibu paa za nyumba nyingi. Wanakijiji wengine walieleza hivi: ‘Hii ni adhabu kutoka kwa Mungu kwa sababu ya jambo ambalo mapadri waliwatenda Mashahidi wa Yehova.’ Katika kijiji hicho, watu wenye mioyo minyofu wangali wakikubali ndugu zetu waingie nyumba zao. Katika kisa kimoja, ndugu mmoja alipokuwa akipelekea mtu anayependezwa magazeti ya karibuni, mmoja wa mapadri aliyekuwa amechapa akina ndugu alipitia pale bila kutazamiwa na akamwagiza ndugu yule aende zake na kuacha ‘kundi lake.’ Mtu yule mwenye kupendezwa akamwambia padri: ‘Mimi nina umri wa kutosha kujua ninalofanya.’ Kwa hiyo viongozi wa kidini hawapati ushindi dhidi ya Mashahidi wa Yehova; jitihada zao zinawarudia wao, na watu wengi zaidi wanachukua msimamo wao upande wa Yehova.
Katika nchi yenye kukumbwa sana na vita katika Afrika ya Kati, mwangalizi wa mzunguko alisimamishwa na askari afanyiwe uchunguzi ulio kawaida kule. Kuna jambo fulani ambalo halikuwapendeza katika barua moja aliyokuwa nayo, basi wakampeleka kwenye makao makuu ya polisi, ambako alipigwa viboko na kuteswa na askari watatu. Ingawa hakuna shtaka lililofanywa dhidi yake na hakufanyiwa jaribu la kuona hatia yake, yeye alitiwa kizuizini kwa mwaka mmoja. Kwa muda wa miezi sita aliendelea kuzuiliwa katika kijumba cha gereza kilichosongamana wafungwa wengine 40. Kwa sababu ya makao hayo kuwa yamesongamana, walilazimika kupokezana zamu za kulala, kila mtu muda wa saa tatu. Muda ule mwingine iliwalazimu wabaki wamesimama. Ndugu yetu alipokuwa kule, wafungwa 137 walikufa, naye akapewa kazi ya kuingiza maiti zao katika gunia ili wakazikwe.
Mhudumu huyo wa mzunguko aliendeleza nguvu zake za kiroho kwa kutumia wakati mwingi akiwatolea ushahidi wafungwa wenzake. Ripoti zake zinaonyesha alitumia saa 30 kwa mwezi katika kuhubiri; aliongoza mafunzo ya Biblia manne alipokuwa gerezani. Mmoja wa wanafunzi wake hata alianza kutolea wengine ushahidi. Kupitia majaribu yote hayo, Yehova alitunza ndugu huyo, naye anatolea wengine shauri hili: “Unapokuwa gerezani, wewe acha tu mambo yote mikononi mwa Yehova. Mngojee yeye. Mtumaini yeye. Usifanye wasiwasi mno. Uwe mwaminifu.”
Katika eneo moja katika Zimbabwe, watoto wa Mashahidi wa Yehova walifukuzwa shuleni kwa kutoshiriki katika mazoezi ya kisiasa. Bila kuridhishwa kwa kuwatenda hivyo, vikundi vya watu wa huko hata viliteketeza nyumba za wazazi wao na kuharibu mazao yao shambani. Jamaa za Mashahidi zikalazimika kukimbia ili kuokoa maisha zao, huku wakiacha nyuma ng’ombe na mali nyingine. Ijapokuwa hivyo, jambo hilo lilipelekwa kwa wenye mamlaka wakuu zaidi wa serikali nao wakafanya fadhili kupanga jamaa hizo zirudi nyumbani. Walirudishiwa ng’ombe zao, na serikali imechukua hatua za kuwalipa akina ndugu hasara walizopata. Mashahidi wa Yehova wanathamini kweli kweli wakati “mamlaka zilizo kuu” zinapoonyesha hivyo kwamba hizo ni ‘mhudumu wa Mungu kwa ajili ya wema.’ (Warumi 13:1-4, NW) Kupitia yote hayo, ushahidi mzuri sana ulitolewa, na watu wa kule sasa wanaonyesha kupendezwa kwingi katika ujumbe wa Ufalme. Ni kama vile mmoja wa akina ndugu alivyosema, ‘Sisi tunajua kwamba Yehova anaweza kufanya hali kama hizo zigeuke ziwe ushahidi kwa jina lake.’
Mwaka wa utumishi uliopita uliona baraka ya Yehova jUu ya kazi katika Malawi. Ni katika maeneo yale tu ambako wanavijiji wa kule wanafungia chuki mioyoni mwao ndiko Mashahidi walinyanyaswa. Ripoti inayofuata inashuhudia jambo hilo: “Katika sehemu nyingi za shamba hali ni tulivu. Lakini katika kundi moja jamaa mbili za Mashahidi zilinyanyaswa vibaya na vijana wa chama. Kichwa cha mmoja wa jamaa hizo alipigwa vikali mpaka akapoteza fahamu kwa muda wa saa nne. Baada ya hapo, alipelekwa kwenye kituo cha polisi, ambako polisi aliyekuwa kazini aliendelea kumpiga yeye na wengine waliopelekwa kule pamoja naye. Ijapokuwa hivyo, baadaye polisi tofauti alikuja kazini. Huyo alikuwa mwenye fadhili. Aliwaachilia akina ndugu na kuwaagiza warudi nyumbani, kwa hiyo waliweza kumshukuru Yehova kwa ukombozi huo usiotazamiwa. Baadaye ilikutwa kwamba kisababishi cha kisa hicho kilikuwa chuki ya kibinafsi kutoka kwa watu wa ukoo wa karibu wa polisi yule. Hudhurio letu la Ukumbusho mwaka huu lilikuwa la kutia moyo. Tulikuwa na watu 23,476. Hii inaonyesha kwamba kungali kuna watu wenye mfano wa kondoo ambao ni lazima wasaidiwe kuwa wanafunzi wa Yesu Kristo hapa katika Malawi.”
Nchi moja katika Mashariki ya Ulaya inapeleka ujumbe huu wa kuthamini: “Sisi tunashukuru kwa uhusiano wa karibu tunaokuwa nao pamoja na Baraza Linaloongoza kupitia vipitio vyote vya tengenezo la kidunia la Yehova. Kwa njia hiyo sisi tunaruhusiwa kuona jinsi Baba yetu wa kimbingu anakusanya kondoo Zake leo kupitia Mwanaye na malaika wote, na jinsi sisi tunaweza kushiriki kidogo katika jambo hilo. Hilo ni pendeleo kama nini! Baba yetu amebariki jitihada zetu kwa ongezeko. Wakati mwingi zaidi uliotumiwa shambani, mapainia wasaidizi wengi zaidi wanaohubiri habari njema kwa bidii, na hesabu ya vitabu iliyo kubwa zaidi ya vilivyokopeshwa au kuangushwa shambani wakati wo wote, ni matokeo ya baraka hiyo.
Mbiu ya Yubile ya kisasa imepigwa kwa sauti kubwa na ya wazi. Ripoti iliyoorodheshwa ambayo inafuata inaonyesha jinsi Mashahidi wa Yehova katika sehemu zote za dunia wanajibu mwito huo.