Ongezeko Bora “Ng’ambo ya Milima”
HAITI ilikuwa jamhuri ya kwanza ya watu weusi kupata uhuru katika Magharibi. Jina layo linatokana na lugha ya Arawak ya Kihindi na linamaanisha “milima.” Kwa kweli, kuna mithali moja ya Kicreole inayosema hivi: “Ng’ambo ya milima kuna milima.” Hili ni simulizi zuri kwa sehemu za mashambani za Wahaiti.
Katika miaka ya majuzi, kuna jambo lenye kutazamisha ambalo limekuwa likitendeka huko “ng’ambo ya milima.” watu wengi wenye kuongezeka wameitikia kule kuhubiriwa kwa habari njema za Ufalme na kuchukua msimamo wao kwa ajili ya Yehova na Mfalme wake mwekwa. (Isaya 60:22) Katika 1980 wastani wa wahubiri karibu 3,000 walikuwa wakiripoti utumishi wa shambani kila mwezi, na afisi ya tawi iliyo katika mji mkuu Port-au-Prince ilikuwa ndogo sana kutosheleza mahitaji yao. Makao mapya yalihitajiwa. Hivyo katika Novemba 1984 kazi ya kujenga makao mapya ilianza katika Santo, mahali penye kupendeza kiungani cha Port-au-Prince.
Kwanza, mahali hapo palihitaji kuzingirwa na ukuta wenye urefu wa futi 4,000. Kampuni moja ya mahali hapo ilitengeneza paneli za zege kwa ajili ya ukuta huu, lakini Mashahidi wa mahali hapo waliajiriwa, na wengi wenye kujitolea walifanya kazi miisho-juma ili kuutimiza mradi huu. Halafu kazi ya kujenga ikaanza, na kwa zaidi ya kipindi cha miaka mitatu, wenye kujitolea zaidi ya mia moja kutoka katika makundi ya Port-au-Prince walisaidia wakati wa miisho-juma. Washiriki wa Programu ya Wafanya Kazi wa Ujenzi wa Kujitolea wa Kimataifa walikuja kutoka United States, Kanada, na nchi nyinginezo—wengi wakijilipia gharama zao wenyewe—ili kusaidia.
Ujenzi ulipoendelea, tatizo ambalo halikutangulia kuonwa lilitokea. Upande mmoja wa makao hayo kuna bonde. Wakati wa kipindi cha mvua, maji yanayotoka mtoni yanaporomoka kwenye bonde hilo, hilo likisababisha mmomonyoko wa udongo. Hatimaye jambo hili lingesababisha kubomoka kwa ua linalozunguka sehemu hiyo ya makao. Hivyo ukuta wenye kuzuia ulijengwa pale pale chini ya mto, na makao hayo sasa yamelindwa kutokana na maji yenye kuporomoka kwa kasi sana yanayoporomoka wakati wa kipindi cha mvua.
Kwa msaada wa Yehova, makao mazuri yakamalizika hatimaye. Betheli hiyo ni jengo lenye muundo wa U lililojengwa kwa zege na vipande vya mawe. Upande walo wa kushuto una vyumba vinane vya kulala, sehemu ya kufulia nguo, na maktaba. Sehemu ya kulia ina ghala la kuweka vichapo. Upande wa mbele wa jengo hilo una sebule yenye nafasi ya kutosha kuweza kuketi kwa starehe akina ndugu wanaowasili hapo kutoka katika sehemu mbalimbali za nchi kwa wakati tofauti-tofauti wakati wa mwezi ili kuchukua magazeti na maagizo ya vichapo kwa ajili ya makundi yao. Upande wa mbele pia una afisi, sehemu ya kulia, na jikoni.
Pamoja na afisi ya tawi, Jumba jipya la Makusanyiko linalotoshea watu 3,000 kuketi lilijengwa pia kwenye makao hayo. Pande mbili za jumba hilo ziko wazi, ili kwamba wale wanaoketi waendelee kutulizwa na upepo wa kawaida—kitulizo kinachokaribishwa kutokana na jua kali la Kihaiti. Pia kuna jikoni la kisasa, ambalo lina vitu vyote vya jikoni na vifaa vya kutoa viburudisho, na pia kidimbwi cha ubatizo na kiwanda kidogo cha useremala. Uwanja huo umepandwa vichaka vya kitropiki vyenye kupendeza na maua.
Mwanzoni mwa 1987, hesabu ya Mashahidi “ng’ambo ya milima” ilikuwa imeongezeka kufika zaidi ya 4,700. Lilikuwa tukio zuri jinsi gani kwao wote kuja pamoja katika Januari 25, 1987, kwa wakfu wa majengo haya mawili yaliyo mazuri sana! Ndugu wengine wa kigeni waliokuwa wamefanya kazi kwenye uwanja huu mapema walirudi wakiwa pamoja na jamaa zao ili kufurahia pindi hii.
Programu ya kuweka wakfu ilianza mapema alasiri washiriki mbalimbali wa Halmashauri ya Tawi wakieleza uhitaji mkubwa uliokuwapo wa majengo hayo mapya kwa sababu ya ongezeko zuri lililokuwa likitokea huko Haiti. Baada ya kupumzika kidogo, wale wahudhuriaji 5,384 walionyeshwa programu ya slaidi iliyokuwa ikionyesha hatua mbali-mbali za kazi hiyo ya ujenzi.
Mwisho, hotuba ya kuweka wakfu ilitolewa na Charles Molohan, mwangalizi wa eneo la dunia mwenye kuzuru kutoka Brooklyn, New York. Ndugu Molohan alizungumzia umaana wa kujenga kwa ajili ya ibada ya Kikristo ya kweli. Yeye alizungumzia juu ya jinsi Noa na jamaa yake walivyokuwa miongoni mwa wafanya kazi wa ujenzi wa mwanzoni-mwanzoni, na kukamilisha kwao kwa uaaminifu mgawo huo wa kazi kulimaanisha kuhifadhiwa kwa jamaa ya kibinadamu, vile vile kuendelea kwa ibada ya kweli duniani. Mradi mwingine wa ujenzi wa kale ni hekalu la Herode, lakini baadaye hili liliharibiwa kwa sababu halikutumiwa kuendeleza ibada ya kweli. (Mathayo 23:38) Leo, lazima sisi tuwe wenye shughuli katika kujenga imani na sifa nyingine za Kikristo ikiwa tutaepuka tukio linalofanana na hili.
Kweli kweli kilikuwa kipindi chenye kusisimua na kufurahisha. Kilipomalizika, wote waliokuwapo walirudi nyumbani mwao wakijua kwamba jengo hili jipya katika nchi iliyo “ng’ambo ya milima” litaendelea kutimiza daraka la muhimu katika kukusanya waabudu wa kweli katika sehemu hii ya Karibea.
[Pichas katika ukurasa wa 31]
Mandhari ya jumba la makusanyiko (upande wa juu kulia), na ya nyumba mpya ya tawi