Wapiga Mbiu ya Ufalme Waripoti

Mtoto wa Miaka Mitano Aamsha Upendezi

MIONGONI mwa Mashahidi zaidi ya 40,000 katika Venezuela yumo kivulana wa miaka mitano aliyepatwa na jambo la kupendeza sana. Yeye alikuwa amesikiliza kwa uangalifu hotuba za peupe zenye kutegemea kichapo Life—How Did It Get Here?—By Evolution or by Creation? na mafikirio ya jamaa ya kitabu hicho. Mtoto huyu wa miaka mitano, mwenye kutoka katika jamaa iliyo ya kitheokrasi, alielewa kwamba mageuzi hudai kwamba mwanadamu alikuja kuwako kutokana na “mchuzi.” Kimoja cha vifungu vilivyo katika kitabu hicho huzungumza juu ya fundisho la mageuzi kwamba uhai uligeukageuka kutokana na mchuzi mahuluku.

Kwa miaka 14, jamaa moja ya nyumba iliyo karibu (mume, mke, wana wawili matineja, na binti wa miaka saba) ilikuwa imekuwa haiitikii maombi ya jamaa hiyo ya Mashahidi ya kuchunguza Biblia na mialiko yao kwenda kwenye Jumba la Ufalme.

Siku moja mke huyo Shahidi alipokuwa akiosha vyombo, alisikia maongeo ya kupendeza kati ya mwana wake na kile kisichana jirani, karibu na ua wa kugawanya makao. Kivulana mdogo huyo alisema hivi: “Wewe wajua! walimwengu husema kwamba mwanadamu alitokana na mchuzi!” Kisichana akajibu, kama ilivyokuwa kawaida yake: “Una kichaa nini?” Kivulana mdogo akajibu hivi: “La, mimi sina kichaa. Walimwengu husema mwanadamu alitokana na mchuzi; lakini ni Yehova aliyefanyiza mwanadamu.” Kivulana akadhihaki wazo hilo, akifikiri huo ungekuwa ni mchuzi wa kawaida ambao huliwa, naye haupendi. Halafu akaendelea kumwambia hivi kisichana huyo: “Baba yangu apaswa kumpa baba yako kitabu Creation ili aone kwamba ni Mungu aliyeumba mwanadamu.” Hata hivyo, kisichana huyo akasema kwamba wao ni Wakatoliki, na maongeo yakaishia hapo.

Mume wa dada huyu, ambaye ni mzee, alipokuja nyumbani kutoka kazini, dada akasimulia maongeo aliyokuwa amesikia kwa mbali. Ingawa kituko kati ya watoto hao kiliwachekesha, ndugu huyo alifikiri labda Yehova alimtaka amtolee ushahidi tena mwanamume huyu jirani. Kwa hiyo siku chache baadaye, alimfikia jirani yake akamsimulia maongeo ya watoto hao. Alisema kwamba alitaka kumpa nakala ya kile kitabu Creation, kwa niaba ya mwana wake. Shahidi huyo akapendekeza kwamba jirani akisome bila kutangulia kuhukumu vibaya, kwa maana kingeonyesha asili ya uhai.

Siku kadhaa baadaye, ilimshangaza ndugu huyo kwamba mume na mke hawa ambao kwa muda mrefu sana walikuwa wamekuwa wasioitikia ukweli walijileta nyumbani kwa ndugu huyo kueleza wana majuto kwa mtazamo waliokuwa wameshikilia kwa miaka mingi sana. Walisema kwamba walistaajabia ubora wa kitabu Creation.

Tokeo ni kwamba funzo la Biblia lilianzwa pamoja na jamaa hii. Walianza kuhudhuria mikutano kwa ukawaida na muda si muda wakawa wahubiri wa habari njema. Mwanamume huyo, mke wake, na wana wale matineja wawili walibatizwa kwenye mkusanyiko mmoja wa wilaya, na msichana huyo ni mhubiri wa Ufalme pia. Mke alianza utumishi wa painia msaidizi mara baada ya ubatizo wake.

Yesu Kristo ajua wale ambao mioyo yao ni myema, naye aweza kuwatumia hata wadogo-wadogo kuifikia mioyo myema hiyo.—Yohana 10:14.