Wapiga Mbiu ya Ufalme Waripoti

Kuzikubali Habari Njema Katika Ubelgiji

“NI NANI aliyesikia neno kama hili? yasema ofisi ya tawi ya Mashahidi wa Yehova katika Ubelgiji. (Linganisha Isaya 66:8.) Nchi hii yenye urembo yaripoti kilele cha wahubiri 24,464 kwa mwaka wa utumishi wa 1989. Pia kulikuwako ongezeko la asilimia 4 katika hesabu ya wastani ya wale wanaoshiriki katika utendaji wa kuhubiri kila mwezi.

◻ Habari njema zenye kupigiwa mbiu na Mashahidi wa Yehova zilikiriwa na kasisi Mkatoliki ambaye kwenye Misa ya Jumapili aliwaambia hivi wanakanisa wa mtaa wake: “Mashahidi wa Yehova wakija kwenye mlango wako, ufungue wazi. Wao ndio wenye ukweli!” Ndivyo hasa bibi mmoja alivyofanya. Mashahidi walipokuja, alifungua kabisa mlango wake na kukubali kupokea kitabu Life—How Did It Get Here? By Evolution or by Creation? Baadaye aliomba kitabu Unaweza Kuishi Milele Katika Paradiso Duniani. Funzo la Biblia lilianzwa pamoja naye, lakini mume wake hakujiunga. Kwa hiyo ndugu mmoja akampigia simu akamwuliza kama angependa kuishi pamoja na mke wake katika ulimwengu bora? Tokeo ni kwamba, alijiunga katika funzo. Mume na mke hao walikuwa wanaishi pamoja bila kufunga ndoa kihalali, lakini walihalalisha muungano wao na upesi wakabatizwa.

◻ Ukweli uligeuza maisha ya msichana mchanga. Alipokuwa bado hajafika miaka 14, aliachwa peke yake. Alikutana na mvulana mchanga na kuishi naye katika ulimwengu usio na adili, akitumia dawa za kulevya na kuonyesha roho ya jeuri. Halafu mvulana huyo akapoteza uhai wake katika msiba wa gari. Hilo likasababisha kuvurugika sana kwa neva za msichana huyo, naye akafikiria kujiua. ‘Naweza kupata wapi utatuzi kwa matatizo yangu?’ akashangaa. Alikutana na mtu mwenye kuzoea uwasilianiroho aliyemfanya aamini kwamba angeweza kupashana habari na mwandamani wake aliyekufa. Walifanya jaribio kwa kumtia katika usingizi wa mazingaombwe na kupitia hisia zilizo nje ya zile za kibinadamu. Kwa kutopata faraja aliyotarajia katika jambo hilo, aliingia tena katika mshukomoyo wa kina kirefu. Kwa miezi kadhaa alijitenga akawa peke yake kabisa. Halafu mmoja wa Mashahidi wa Yehova akamkuta na kujaribu kumsaidia kiroho. Kwa muda hilo lilifanywa kwa barua, na nyumaye mambo yakanyooka baada ya jitihada nyingi na moyo mkuu kwa upande wake. Sasa akawa amewekwa huru kutoka uvutano wa roho waovu, kutoka zoea la tumbako, na kutoka hisia za kina kirefu za hatia. Wakati ulipoendelea, maarifa zaidi ya Biblia na roho ya Yehova vilimsaidia sana. Pia, mikutano ilimwimarisha, kwa kuwa aliifanyia matayarisho kwa bidii. Sasa amebatizwa na ana roho ya upainia. Tayari anaongoza mafunzo kadhaa ya Biblia, moja pamoja na mama yake, ambaye sasa anahudhuria mikutano fulani. Kwa kweli, Yehova amemsaidia msichana huyo!

◻ Wale wanaotumia kwa faida fursa zilizo katika shule huona shangwe ya mafanikio mazuri katika kuzieneza habari njema. Dada mmoja mchanga akiwa shuleni katika Ubelgiji alipewa mgawo wa kuhutubu juu ya habari ya kujichagulia mwenyewe. Aliamua kuongea juu ya Mashahidi wa Yehova na imani zao, akitegemeza habari zake juu ya broshua Mashahidi wa Yehova Katika Karne ya 20. Profesa wake alivutiwa. Baada ya kutolea darasa hotuba yake, wanafunzi waliruhusiwa waulize maswali. Baadaye wanadarasa kadhaa waliuliza yawapasa kufanya nini ili waishi katika Paradiso ya Mungu iliyotajwa katika hotuba yake. Wengi, kutia na profesa huyo, wakaomba nakala za broshua tofauti-tofauti ambazo dada huyo alikuwa nazo. Madarasa mengine yaliomba broshua na habari zaidi, na profesa mmoja wa dini akazichunguza broshua na kuzipendekeza kwa darasa lake.

Kitendo cha moyo mkuu cha dada yetu mchanga kilibarikiwa. Broshua 23 ziligawanywa kwa profesa wawili na kwa wanafunzi wengi; mwanafunzi mmoja, akiisha kusikia juu ya hotuba hiyo, aliomba habari zilizosemwa ili aeleze kazi ya Mashahidi wa Yehova katika darasa lake.

Wengi wanazikubali habari njema katika Ubelgiji. Wao hulipokea Neno la Mungu, “si kama neno la wanadamu, bali kama neno la Mungu; na ndivyo lilivyo kweli kweli; litendalo kazi pia ndani yenu ninyi mnaoamini.”— 1 Wathesalonike 2:13.