Maswali Kutoka kwa Wasomaji

◼ Je! Yesu alikuwa akituonya kwenye Mathayo 10:21, kwamba ndugu wengi katika kundi wangegeuka dhidi ya ndugu zao wa kiroho?

La, hilo si kusudi la onyo la Yesu, ambalo husomwa hivi: “Na ndugu atamsaliti nduguye ili auawe, na baba atamsaliti mwana, na wana watawainukia wazazi wao, na kuwafisha.”—Mathayo 10:21.

Muktadha unaonyesha kwamba Yesu alisema hayo kwa wale mitume 12 alipowatuma kwenye safari ya kuhubiri katika Israeli. Mengi ya yale aliyosema yalikuwa na maana ya kwanza kwa mitume. Kwa mfano, alisema kwamba walipewa nguvu ya kufanya maponyo ya kimuujiza, mipunga ya roho waovu na hata mafufuo. (Mathayo 10:1, 8; 11:1) Historia inathibitisha kwamba si Wakristo wote waliopokea nguvu kama hizo za kimuujiza, ikihakikisha kwamba Yesu hapo alikuwa akisema na kundi moja hususa la wasikilizaji—mitume wake.

Hata hivyo, mengine ya yale ambayo Yesu alisema yalienea kupita safari ya kuhubiri ya mitume. Aliwaambia hivi: “Jihadharini na wanadamu; kwa maana watawapeleka mabarazani, na katika masinagogi yao watawapiga; nanyi mtachukuliwa mbele ya maliwali na wafalme kwa ajili yangu, kuwa ushuhuda kwao na kwa mataifa.” (Mathayo 10:17, 18) Katika safari hiyo, yaelekea wale 12 walikabili upinzani, lakini hakuna ushuhuda wowote kuonyesha kwamba walipelekwa “mbele ya maliwali na wafalme” kutoa ushuhuda kwa “mataifa.”a Katika miaka ya baadaye, mitume walienda mbele ya watawala, kama vile Wafalme Herode Agrippa I na II, Sergio Paulo, Galio, na hata Maliki Nero. (Matendo 12:1, 2; 13:6, 7; 18:12; 25:8-12, 21; 26:1-3) Kwa hiyo maneno ya Yesu yalikuwa na utumizi baadaye.

Shauri la Yesu liliendelea na onyo hili: “Ndugu atamsaliti nduguye ili auawe.” Hakuwa anarejezea ndugu wa kiroho kama vile hakuwa anarejezea akina baba au watoto wa kiroho katika maneno yake yanayofuata katika mstari wa 21: “Baba atamsaliti mwana, na wana watawainukia wazazi wao, na kuwafisha.” Yesu alimaanisha kwamba mitume wangetarajia uadui au upinzani hata kutoka kwa watu wa ukoo.—Mathayo 10:35, 36.

Mitume wangehitaji uvumilivu katika safari hiyo ya kuhubiri. Yesu aliendelea hivi: “Nanyi mtakuwa mkichukiwa na watu wote kwa ajili ya jina langu; lakini mwenye kuvumilia hata mwisho, ndiye atakayeokoka.”—Mathayo 10:22.

Mengine ya yale Yesu alisema wakati huo yana maana kwetu sisi leo tukiwa Mashahidi wa Yehova. Mkazo wa kuhubiri kwetu ni juu ya Ufalme. Sisi hufanya huduma yetu bila malipo na hutafuta watu wanaopendezwa na ujumbe au wanaoustahili. Kujihadhari kunafaa. Wapinzani ni wengi. Nyakati nyingine watu wa ukoo, majirani, au wafanya kazi wenzetu husababisha matatizo makali, hasa kwa walio wanyofu wanaoanza kufuatia mwenendo wa Ukristo wa kweli. Yesu alirudia onyo juu ya upinzani kama huo alipokuwa anaeleza juu ya “ishara” ya kuwapo kwake. (Mathayo 24:3, 9, 10; Luka 21:16, 17) Pia alitaarifu tena juu ya uhitaji wetu wa ‘kuvumilia hata mwisho ili kuokolewa.’ Naam, tunahitaji kuvumilia hadi mwisho wa uhai wetu uliopo au hadi mfumo huu wa mambo uishapo na tuweza kuingia ulimwengu mpya.—Mathayo 24:13.

[Maelezo ya Chini]